Lamatuak Yesus nanoli hataholi nai lete anak lain
5
Ledo-eik Yesus nita hataholi makadotok mai tunggan, boe ma Ana hene neni lete anak esa lain neu, de nanggatuuk neu ndia. Ndia ana mana tunggan nala fo Ana hele nalak kala sila, leu deka-deka fo lamanenen. 2 Basa de Ana mulai nanoli sala nae,Hataholi mana maua-manale tetebes
3 “Hataholi kasian fo mana paluu Manetualain, laua-lanale,
huu Manetualain mesak kana sila Mane malolen.
4 Hataholi fo mana nameda dale hedik, laua-lanale,
huu Manetualain mesak kana kokoe sala.a
5 Hataholi kadi'i-taidaek, laua-lanale,
huu dei fo ala simbo basa baba'e-babatik fo Manetualain helun so.b
6 Hataholi fo mana dokodoe nalan seli neu Manetualain dala ndoon, laua-lanale,
huu dei fo Ana tao natetu hihiin nala.c
7 Hataholi fo mana natudu namemeda kasian, laua-lanale,
huu dei fo Manetualain tuda kasian neu sala.
8 Hataholi dale malalaok, laua-lanale,
huu dei fo sila mesak kasa bisa lita Manetualain.d
9 Hataholi fo mana tao mole-dame, laua-lanale,
huu dei fo Manetualain nae, ‘Sila ndia, Au anang.’
10 Hataholi fo mana hambu doidosok huu tungga Manetualain, laua-lanale,
huu Manetualain mesak kana, sila Mane malolen.e
11 Mete ma hataholi fe'ek tao doidoso ei, huu ei tungga Au, na, ei maua-manale boe. Mete ma ala kokolak manggalauk neu ei, ma tui pepekok fo tao laboo ei nadem mala, na, ei maua-manale boe.f 12 Mae leo ndiak, tehuu ei musi kada tao mamahoko ei dalem mala, huu Manetualain sadia bala fee ei baba'em mala makadotok nai nusa sodak. Tehuu masanenedak bou! Ta kada ei mesa nggei hambu doidosok leo ndiak, huu lele uluk ele hataholi la tao manggalauk leo ndiak neu Manetualain mana kokolan nala boe.”g
Hataholi mana tungga Lamatuak Yesus sama leo masik ma manggaledok
13 “Mete ma ita sangga tao talalada nana'ak, na, ita paluu tao masik neu dei. Leo ndiak boe, hataholi la fo lasoda lai dae-bafok ia, ala paluu ei. Tehuu mete ma masik mamin so, na, ndia sosoan hata? Kada nggali henin neu dalak lain fo nana hehetak.h
14 Ei boe oo musi masoda leo banduk, suek hataholi no'uk kala bisa lita lo manggaledok. Ei musi mbila manggaledo ndoos, sama leo kota manai letek lain, fo basa hataholi la litan.i 15 Hataholi mana dede bandu anak, ta tao banduk ndia neni ule dae dale neu. Tehuu ala tao bandu anak ndia neu mamana madema, suek bisa ana nanggaledo neu basa uma isin nala.j 16 Ei boe oo musi masoda leo ndiak. Ei musi masa'a, suek hataholi fe'ek kala bisa lita ei soda malolem mala. De lita leo ndiak, na, dei fo ala koa-kio Manetualain lae, ‘Wei! Ei Amam manai nusa sodak ndia, ana seli bae maa!”’k
Lamatuak Yesus mai fo tao natetu Manetualain heti-heun
17 “Ei boso dudu'a mae, Au uni dae-bafok ia mai, fo koka heni Manetualain heti-heun fo Ana feen neu ba'i Musa. Ma boso mae hetuk Au ta mbali Manetualain mana kokolan nala, fo ala kokolak memak kana neme makahulun mai so. Tehuu Au mai ia, sangga tao basan dadik matetuk sama leo basa dede'ak kala, fo ala kokolak memak kana so. 18 Huu ndia de mamanene neulalau baa! Lalai no dae-bafok bei ta lakalulutuk heni sala, mete ma basan bei ta dadi tungga Manetualain heti-heun nala. Mae titik do koma esa boe oo, ta hambu nana koka henik.l 19 Neme basa Manetualain hataholin mai, mete ma hambu mana la'o lena Manetualain heti-heun, huu ana dudu'a nae, ‘Heeh! Heti-heuk ia, kada kadi'ik, de sosoan ta faa boe!’ Boe ma neu fee nanonolik leo ndiak neu hataholi fe'ek, na dei fo Manetualain nai nusa sodak tao ndia dadik hataholi kadi'i anak. Tehuu hataholi fo mana tao tungga basa Manetualain heti-heun, boe ma neu fee nanonolik leo ndiak neu hataholi fe'ek, na dei fo Manetualain tao ndia dadik hataholi kasosoak. 20 Mamahele neu Au! Mete ma ei ta masoda ndoos malolen lena mese anggama ma hataholi paltei Farisi la, na, ei ta bisa maso dadik neu Manetualain hataholin.”
Lamatuak Yesus nanoli hataholi la fo boso lamananasa aok
21 “Ei bubuluk ba'i Musa heti-heun, fo ana nafada memak kana neu ita bei-ba'in nala so nae, ‘Boso tao misa hataholi, huu see tao nisa hataholi, na dei fo ana hambu huhukuk.’m 22 Tehuu Au sangga afada leo iak: boso mamananasa aok, huu see namanasa ndia tolanoon, na dei fo ana hambu huhukuk. Hataholi fo manggalau neu ndia tolanoon nae, ‘O langga ute kea!’ dei fo hataholi ndia nasale neu lasi anggama la. Ma hataholi fo nasapalak ndia tolanoon nae, ‘Nggoak aa!’, dei fo ana hambu huhukuk nai ha'i naraka.
23 De mete ma o muni fefeek neu Manetualain, tehuu o masaneda mae, tolanook esa bei namanasa o, 24 na, boso fee fefeek ndia dei. Muu mole mua o tolanoom ndia dei, basa ndia bei fo muu fee fefeek ndia neu Manetualain.
25 Mete ma hambu hataholi sangga nadede'a no o, na, malolenak muu tao mole-dame lai-lai mua ndia dei. Mete ma taa, na, dei fo hataholi ndia hela noo o muni mana maketu dede'ak muu. Basa boe ma mana maketu dede'ak fee o muu polisi, boe ma ala sese o muni bui dale muu. 26 Au kokolak tetebes ia! Dei fo o leo makandoo nai bui dale, losa o bae ketu basa o hutam mala.”
Lamatuak Yesus nanoli hataholi fo boso hohongge
27 “Ei bubuluk ba'i Musa heti-heun so nae, ‘Boso hohongge.’n 28 Tehuu Au sangga afada leo iak: hataholi botik matan fo ana suli inak esa, basa de dalen nahiik sunggu noon, na, touk ndia hohongge no inak ndia nai ndia dalen so. 29 Mete ma o tao salak munik o mata konam, na, do'i henin leo. Malolenak o maso muni nusa sodak muu, mua kada mata de'ek esak, fo suek ala boso mbia o muni ha'i naraka muu, mua o mata de'em dua sala.o 30 Ma mete ma o tao salak munik o lima konam, na, tete heni limak ndia leo. Malolenak o maso muni nusa sodak muu mua kada o limam esak, fo suek ala boso mbia o muni ha'i naraka muu, mua o limam dua sala.”p
Lamatuak Yesus nanoli hataholi fo boso namaketu
31 “Ei bubuluk ba'i Musa heti-heun so nae, ‘Hataholi mana namaketu no sao inan, na, ana musi fee susula namaketuk neu inak ndia.’q 32 Tehuu Au afada leo iak: mete ma hambu hataholi namaketu heni sao inan, naa te sao inan ta hohongge nitak, boe ma inak ndia sao seluk, na, ndia sama leo sao tou kaesan tao ndia hohongge. Ma mete ma hambu touk fo sao nala inak esa nana namaketu nitak, na, sila dua sala hohongge ndia so boe.”r
Lamatuak Yesus nanoli hataholi la'e-neu heheluk
33 “Ei bubuluk ba'i Musa heti-heun fo nafada ita bei-ba'in nala so nae, ‘Mete ma o helu munik soo no Manetualain naden, na, o nana mba'ak mua heheluk ndia.’s 34 Tehuu Au afada leo iak: mete ma helu, na, boso munik sosook. Boso soo munik nusa sodak naden, huu nusa sodak ndia, Manetualain mamana leleon.t 35 Boso soo munik dae-bafok naden, huu dae-bafok ndia Manetualain tabu ein. Ma boso soo munik Yerusalem naden, huu Yerusalem ndia, Mane Ina-huuk kotan.u 36 Boso soo munik ei langgam mala. Huu ei ta maena koasa fo koasa langga buluk dook esa fo ana dadik nggeok do fulak. 37 De ei sangga helu mae, hei, na, mafada mae, ‘hei’ leo. Tehuu mete ma taa, na, mafada mae ‘taa’ leo. Mete ma ei mafada lenak neme ndia mai, na, ndia naoka nai nitu so.”
Lamatuak Yesus nanoli hataholi fo boso bala manggalauk no manggalauk, tehuu musi ono-lau no malolen lena bali
38 “Ei bubuluk ba'i Musa heti-heun so nae, ‘Mete ma hambu hataholi tao nakalulutu o matam, na, bala tao makalulutu ndia matan. Ma mete ma hambu hataholi tao namo'u heni o nisim, na, bala tao mamo'u heni ndia nisin boe.’v 39 Tehuu Au afada leo iak: boso bala manggalauk no manggalauk. Mete ma hataholi famba o nasum seli, na, elan neme naa fo ana famba o nasum seli bali. 40 Mete ma hambu hataholi nadede'a no o, do, ha'i nala o badum, na, fee o jeket neun bali. 41 Mete ma hambu soldadu esa nakaseti o, fo lemba ndia buan doon kilo esa, na, lemba makandoon losa kilo dua. 42 Mete ma hambu hataholi noke o buam sudi hata, na, feen neu leo. Ma mete ma hambu hataholi tonda o buam sudi hata, na, kada feen leo.”
Lamatuak Yesus nanoli hataholi fo sue hataholi mana binci ita
43 “Ei mamanene so, hataholi lae, ‘Sue o tolanoom, ma binci hataholi mana binci o.’w 44 Tehuu Au afada leo iak: o musi sue hataholi mana binci o. Ma moke Manetualain fee baba'e-babatik neu hataholi mana tao doidoso o. 45 Mete ma o tao leo ndiak, na, o matudu mae, o ia Amak manai nusa sodak anan. Huu Ana tao ledo nasa'a fee hataholi malole, ma hataholi manggalauk boe. Ana nakonda uda fee hataholi mana tao tungga Ndia palendan, ma hataholi mana laban Ndia palendan boe. 46 De mete ma kada o sue hataholi mana sue o, na, o mae hetuk Manetualain musi bala nenik baba'e-babatik neu o, do? Taa! Hataholi manggalauk sue sila nonoon mana sue sila boe. 47 De mete ma kada o mafada mae, soda-molek neu o nonoom, na, ndia lenan hata? Hataholi ta kamahelek neu Manetualain tao leo ndiak boe. 48 De masanenedak baa! O Amam nai nusa sodak sue basa hataholi la. De o musi tao leo ndiak boe!”x