3 Hatematak ia ei la'o leo! Au adenu ei fo mini hataholi no'uk kala miu. Tehuu masaneda leo iak. Ei sama leo bi'i-lombo ana dale malole, fo mini busa fui manggalauk kala laladan miu.^c

4 Ei boso mini doik do, tas balo'as do, tabu eis lenak nai dalak. Boso ngganggali heni fai no sosoa taak, ma mambue kokolak mia hataholi nai dalak.

5-8 Mete ma ei maso mini nggolok esa miu, na, boso ei lali-lali mima uma esa mai mini uma fe'ek miu. Mete ma hataholi simbok ei no malole nai uma esa, na, leo tataak nai ndia leo, losa ei la'o ela nggolok ndia. Mete ma ei maso mini uma esa miu, ei musi moke Manetualain fee baba'e-babatik neu hataholi malai uma ndia. Mete ma maumak simbok ei no malole, na, neu ko Manetualain natudu Ndia dale malolen neu uma isi la. Tehuu mete ma ala ta nau simbok ei, na, elan fo Manetualain natudu Ndia dale malolen neu kada ei mesa nggei. Mete ma ei maso mini uma esa miu do, nggolok esa miu, na mi'a-minu kada hata fo ala fee. Simbok no dale namahokok, huu nandaa mete ma ala fee ei leo ndiak fo nggati ei sosotam.^d 9 Tao mahai sila hataholi kamahedin. Ma mafada sala mae, ‘Manetualain palendan nai ita matan so!’

10 Tehuu hambu nggolok boe, fo hataholin nala ta nau simbok ei. Mete ma ala tao leo ndiak neu ei, na, miu mambadeik miu nggolok ndia dalan fo kokolak mae, 11 ‘Mamanene neulalau! Ai mai mini Manetualain Dede'a-kokolan fee ei so, tehuu ei ta mbali sala faa boe. De hatematak ia, ai sasambu heni nggolok ia afun neme ai ein nala mai, fo dadik tanda nae, dei fo ei lemba aom nenenin! Tehuu masaneda neulalau! Manetualain palendan nai ita matan so!’^e

12 Ei bubuluk kota Sodom manggalaun, hetu? Au afada ei, baa! Dei fo nandaa no dae-bafok fai babasan, Manetualain huku hataholi mana timba heni ei ndia, belan lena heni hataholi Sodom asa!”^f

13 Yesus kokolak nakadaik bali nae, “Mata neuk neu ei manai nggolo Korasin^g ma nggolo Betsaida! Soe la'e ei! Au tao tanda heran mata-matak nai ei mata idum so, tehuu ei ta nau mamahele Manetualain. Naa te ei ia, hataholi Yahudi fo mana manaku malelak Ndia. Tehuu leo tanda heran nala fo Au taok sila, nai ei nggolom dadi leo nai kota Tirus ma kota Sidon, na neu ko doo basa ia, hataholi malai ndia hondak tutik so, ma la'o ela sila salan nala so, fo fali tungga Manetualain. Ma neu ko sila boe oo pake balo'a fafaluk, ma tao afu neu langgak, fo dadik tanda nae, ala fale dalen nala no sila sala-singgon nala. Naa te hataholi Tirus ma Sidon nala ia, hataholi ta Yahudi, fo manaku lalelak Manetualain.^h 14 Tetebes! Ei mita leo! Mete ma Manetualain naketu basa hataholi la dede'an, na, dei fo hataholi Tirus ma hataholi Sidon huhukun nala bei da'u anak lena heni ei huhukum mala.

15 Mata neuk neu hataholi nggolo Kapernaum! Ei boso dudu'a mae, dei fo Manetualain so'u ei fo maso mini nusa sodak miu. Taa! Dei fo Manetualain mbia heni ei mini naraka dalek miu!ⁱ

16 Masaneda neulalau! Hataholi mana namanene ei, sama leo namanene Au. Ma hataholi fo ta nau namanene ei, sama leo ta nau namanene Au. Nakalenak bali, hataholi fo ta nau namanene Au ndia, sama leo ta nau namanene Manetualain, fo mana nadenu Au uni dae-bafok ia mai so.”^j

17 Neu faik fo nadedenu kahitu hulu duak kala sila fali,^k dalen nala lamahoko lalan seli. Boe ma ala lafada Yesus lae, “Awii! Ana seli maa! Ledo-eik ai pake Lamatuak naden fo husi nitu la. Nitu la lamanene ai, boe ma ala kalua tutik! Ana seli maa!”

18 Boe ma Yesus nataa sala nae, “Tetebes! Ledo-eik ei tao leo ndiak, Au ita Manetualain mbia heni nitu no ndia malanggan leme lalai mai, sama leo manggahadok fo kalua kii-konak neme lalai mai. 19 Masanenedak baa! Nitu la malanggan, ndia ita musun. Ma ndia naena koasa boe! Tehuu Au fee ei koasa, fo suek tao matepa ndia koasan. Ma leo ei heta la'e mengge kalasok, do kulak, na, ei ta hata-hata. Ta hambu esa boe bisa tao soe neu ei.^l 20 Ei dalem mala lamahoko, huu nitu la lamanene ei. Malole boe, tehuu kada dede'a kadi'ik ndia! Malolenak ei dalem mala lamahoko, huu Manetualain sulak nala ei nadem so, fo dadik Ndia hataholin fo mana maso nusa sodak.”

21 Faik ndia, Manetualain Dula-dale Malalaon, tao nala Yesus dalen namahoko. Boe ma Ana koa-kio Manetualain nae, “Ama! Ama mana naena haak palenda basan nai lalai ma dae-bafok. Au oke makasi no'un seli, huu Ama kena dede'ak kala ia leme hataholi fo taok aon malelak, ma mana koaok kala. Tehuu Ama buka basa dede'ak kala ia neu kakana anak kala, ma hataholi madale taidaek kala. Tetebes, Ama! Huu ndia ndia, tao nala Ama dalen namahoko!”

22 Basa de Yesus nafada hataholi no'uk kala nae, “Mamanene baa! Au Amang nai nusa sodak fee basa koasa neu Au so. Mana bubuluk no teteben nae, Au ia see, na kada Amak. Ma mana bubuluk no teteben, Amak see, na kada Ama Anan, fo ndia Au. Ma Au hele hataholi fe'ek, fo afada sala, fo suek ala lalelak Ndia.”^m

23 Basa de Yesus heok nasale ana mana tunggan nala, ma nafada sala nae, “Ei maua-manale tetebes, huu ei mita Manetualain koasan so. 24 Manek kala ma basa mana kokola makahulun ele dokodoe sangga lita Lamatuak koasan fo ei mitan so, tehuu sila ta bisa. Sila boe oo dokodoe sangga lamanene hata fo ei mamanenen so, tehuu sila ta bisa.”

25 La'i esa, mana malela heti-heu Yahudi esa nambadeik fo sangga natuda Yesus. Ana natane nae, “Ama Mesen! Tulun mafada dei! Au musi tao hata, fo ela au bubuluk au bisa hambu sodak akandoo sama-sama ua Manetualain nai nusa sodak?”

26 Yesus nataa nae, “Ba'i Musa sulak hata la'e-neu dede'ak ia? O dudu'am leo beek la'e-neu ndia?”

27 Hataholi ndia nafada nae, “Ana sulak nae:

Boe ma nana sulak nae, ‘O musi sue o tolanoom, sama leo o sue o ao-ina hehelim.”’ⁿ

28 Yesus bala nae, “Tetebes! Mete ma o tungga leo ndiak, na, o masoda makandondoo henin mua Manetualain.”^o

29 Tehuu hataholi ndia sangga taok aon leo hataholi ndoos. Basa de natane Yesus nae, “Tehuu au ‘tolanoong’, ndia see?”

30 Boe ma Yesus nataa nae, “Leo iak! Au sangga afada nakandandaak esa. Dei fo o mafada Au, see ndia ‘tolanoo’ tetebes. Tutuin leo iak: Hambu hataholi Yahudi esa neme kota Yerusalem mai, loe neni Yeriko neu. Tehuu kada nggengge neuk, na'o mana mamoak kala mai lambuen. Ala mbombokon, basa de lamoa lala doin, ma basa balo'an nala. Boe ma ala mbia henin neni dalak bifin neu, de la'o elan. Hataholi ndia elaba'ik maten so.

31 Tehuu ta bubuluk te malangga anggama Yahudi esa loe nesik ndia boe. Ledo-eik ana nita hataholi makahinak ndia lengga-lengga neme dalak bifin, ana ta hahae fo tulun hataholi ndia. Ana heok neni selik neu, de la'ok nakandoo. 32 Ta dook boe ma hataholi fe'ek esa nesik ndia. Ndia ndia, hataholi neme leo Lewi mai, fo nateme tulu-fali nai Manetualain Uma Ina Huhule-haladoin. Ledo-eik ana nita hataholi ndia lee-lee nai dalak bifin, ana kada neu mete deka-deka, tehuu ta tulu-fali sana. Boe ma ana heok neni selik neu, de la'ok nakandoo.

33-34 Ta dook bali, hambu hataholi esa neme dae Samaria mai, nesik ndia no ndia banda keledein. Ita basa nggata bubuluk tae, hataholi Yahudi lateme suli latahihiik hataholi Samaria la. Ledo-eik hataholi Samaria ia nita hataholi nana namoak ndia, boe ma dalen tuda kasian neun. Ana neu deka-deka fo sangga tulu-fali hataholi ndia. Ana di'a anggol fo tao nalalao hataholi ndia hinan nala, de ana tao mina neun. Boe ma fefeo neulalaun, de nakahehenek kana neni banda keledein lain neu. Basa boe ma noo hataholi ndia losa kota, de ana feen leo tataak nai uma sesebak, ma nakaneni neulalaun.^p

35 Neu fo'a mai, hataholi Samaria ndia bae nakahuluk doi lilo fulak^q dua neu mauma sesebak, ma nafadan nae, ‘Pake doik ia fo makaneni neulalau hataholi kamahedik ndia, losa ana hai. Mete ma ta dai, na, tulun pake tataak ama doin dei. Neu faik fo au fali maing, dei fo au nggati basa ama doin.”’

36 Yesus nakandandaan losa ndia leo. Basa de Ana natane malela heti-heuk ndia nae, “Tungga o, na see ndia ‘tolanoo’ tetebes, neu hataholi nana namoak ndia?”

37 Hataholi ndia nataa nae, “Neu ko ndia hataholi mana tuda kasian neu hataholi ndia.”

Yesus nae, “Tetebes, ka'a! Muu leo, fo tao tunggan.”

38-40 Basa boe ma Yesus no ana mana tunggan nala la'ok lakandoo leni Yerusalem leu. De ala singgo nai nggolok esa. Nai ndia hambu hataholi dua ka'a-fadik, nade Marta ma Maria. Marta noke Yesus asa leo tataak nai ndia uman. Basa de ala leo tataak lai ndia.

Ledo-eik Yesus nanggatuuk fo nanoli hataholi la, Marta nasambute tao nana'a-nininuk nai dapu dale. Tehuu fadin Maria, nanggatuuk deka-deka neu Yesus ein, fo namanene Ndia kokolan. Ta dook boe ma Marta maso mai, de manggalau neu Yesus nae, “Ama! Talo bee ia! Au asambute alan seli tao nana'a-nininuk, naa te au fading kada nanggatuuk neulalau nai ia. Tulun dei! Madenun neu tulu-fali au nai dapu dale!”^r

41 Tehuu Lamatuak Yesus nataa nae, “Marta. O ia, masambute mua kada dudu'a mata-matak. 42 Malole boe, tehuu hatematak ia hambu dede'ak esa penting lena. Maria nanggatuuk fo namanene Au Dede'a-kokolang. Ana hele nala neulaun nalan seli so. Hataholi ta bisa namoa nala Dede'a-kokolak neme ndia mai.”