3-4 Tehuu Yesus nataa sala nae, “Leo bee bae? Ei ta masaneda ba'i Dauk tutuin ndia? Ba'i Dauk no ana mana tunggan nala ndoe lalan seli so. Boe ma ala maso leni Manetualain Tenda Huhule-haladoin dale leu, de ha'i lala loti fo malangga anggama la feen neu Manetualain so, de ala la'a. Naa te kada malangga anggama la bole la'a loti ndia. Hataholi fe'ek ta bole la'a. Boe ma ba'i Dauk asa la'a, tehuu ta hambu hataholi soli salak neu sala. Nonook bali ei ta lees malelak Manetualain Susula Malalaon boe!^b 5 Nai ndia boe, nana sulak la'e-neu malangga anggama la fo mana ono-lau nai uma huhule-haladoik, nandaa no fai hahae tao ues. Tehuu sila ta hambu salak hata-hata.^c 6 Mamanene baa! Makahulun uma huhule-haladoik penting, tehuu hatematak ia hambu penting lena bali. Na ndia Au, Hataholi Isi-isik ia. 7 Nai Manetualain Susula Malalaon, Manetualain nae, ‘Au hihiing leo iak: Au hataholi nggala musi latudu namemeda kasian esa no esa. Mete ma ta tao leo ndiak, na, sila banda tunu-hotun fo leni sala leu Au ndia, sosoan ta faa boe.’ Naa, mete ma ei bubuluk neulalau Manetualain kokolan ndia, na, ei ta soli salak neu Au ana mana tungga nggala. Huu ala ta tao salak hata esa boe, maa!^d 8 De Au ia, Hataholi Isi-isik. Au aena haak fo aketu ae, hataholi bole tao hata nandaa no fai hahae tao ues.”

9 Basa boe ma Yesus la'o ela mamanak ndia, de neni sila uma huhule-haladoin neu. 10 Nai ndia, hambu touk esa liman seli kamates. Hataholi Farisi la lasanggak dalak fo soli salak neu Yesus, mete ma Ana tao nahai hataholi liman seli kamates ndia, nandaa no fai hahae tao ues. De ala latane Ndia lae, “Tungga ita anggaman heti-heun, na hataholi bole tao nahai hataholi nandaa no fai hahae tao ues, do taa?”

11 Boe ma Yesus nataa nae, “Mete ma hataholi bi'i-lombon esa tuda neni bolok dale neu, nandaa no fai hahae tao ues, na, mabi'ik neu ha'i nala bi'i-lombo ndia neni lain mai, hetu?^e 12 Naa! Manetualain sue hataholi, lena heni mabi'ik sue ndia bi'i-lombon. Huu ndia de hataholi bole tao dede'a malole nandaa no fai hahae tao ues.”

13 Basa de Ana kokolak no hataholi liman seli kamates ndia nae, “Ka'a! Look o limam mai!” Boe ma ana look lima kamaten ndia neu, de limak ndia hai tutik, sama leo ndia liman seli boe.

14 Hataholi Falisi la lita leo ndiak, boe ma ala manggalau. De ala fo'a la'o ela uma huhule-haladoik ndia, boe ma leu lalahalak lae, “Ita musi sangga dalak fo tao tisa Ndia!”

15 Tehuu Yesus bubuluk sila dudu'a manggalaun ndia, huu ndia de Ana la'o neni mamana fe'ek neu. Hataholi no'uk kala tunggan, boe ma Ana tao nahai basa hataholi kamahedik kala. 16 Tehuu Ana ka'i sala nae, “Ei boso mafada hataholi fe'ek kala mae, Au ia, see.” 17 Huu Au tao leo ndiak tungga hata fo Manetualain nafada Ndia mana kokolan Yesaya so nae,

22 Boe ma la'i esa, hataholi la loo hataholi nitu nalak esa losa ana mboke ma ta bisa kokolak neni Yesus neu. Boe ma Yesus husi kalua heni nitu ndia, de tao nahain. Basa boe ma hataholi ndia bisa nita, ma bisa kokolak tutik. 23 Basa hataholi la lita leo ndiak, boe ma ala heran lalan seli. Ala lakokola lae, “Fama Ndia ia, Dauk numbu-sadun, fo Manetualain mana kokolan nala sulak memak kana neme makahulun ele mai so! Ndia ia, Hataholi fo ita tahanik ndia so!”

24 Tehuu ledo-eik hataholi Farisi la lamanene leo ndiak, boe ma ala ta simbok. Basa de lakokola lae, “Wei! Hataholi ia bisa husi kalua heni nitu, huu nitu la malanggan Balsebuul ndia fee koasa neu Ndia.”^g

25 Tehuu Yesus bubuluk hataholi Farisi la kokolan ndia. De nafada sala nae, “Ei kokolam ndia, ta maso langga utek! Mete ma nai nusak esa dalek, lau-inggun nala lahuu, na, talo bee fo nusak ndia bei bisa nakatataka! Leo ndiak boe, mete ma hataholi la lai kota esa dalek do, lai uma esa dalek, lasii-lala'u ao esa no esa, ala lasidak losa lakalulutuk bou! 26 De mete ma nitu la lambue lamusuk ma lahusik kala esa no esa, na, sila malanggan ta bisa to'u palenda nala dook so bali! 27 Masanenedak baa! Ei hataholim mala husi lalelak nitu boe. Ala pake nitu koasan, do? Taa! De ei boso kokolak madabak mae, Au pake nitu koasan fo husi nitu. Dei fo ei hataholim mala mesak kasa laketu lae, hata fo ei soli salak ndia, sala. 28 Tehuu mete ma tetebes Au husi nitu pake koasa neme Manetualain Dulan mai, na, ndia natudu nae, Manetualain ndia memak Manek fo mana memak nai ei matam mala so.

29 Mete ma mana mamoak esa sangga mai namoa buas nai hataholi balakaik esa uman, na, ana musi hengge nisak hataholi ndia dei. Basa ndia, bei fo ana bisa namoa nala hataholi ndia buan nala.^h

30 Masaneda neulalau! Huu hataholi fo ta paltei esa no Au, na ndia ndia musu no Au. Ma hataholi fo ta tulu-fali Au ueng, na, ndia ndia kada tao naodek.ⁱ 31 De mamanene neulalau Au kokolang ia! Manetualain sadia koka heni hataholi la sala-singgon so. Ma mete ma hambu hataholi kokolak ta malole neu hataholi fe'ek, na, Manetualain bei sadia fee ambon neu ndia. Tehuu mete ma hambu hataholi nambalani kokolak ta malole neu Manetualain Dula-dale Malalaon, na, Manetualain ta koka heni ndia salan. 32 Mete ma hataholi kokolak manggalauk neu Au, Hataholi Isi-isik ia, na, Manetualain sadia fee ambon neu ndia. Tehuu mete ma hataholi kokolak nakadadaek Manetualain Dula-dale Malalaon, na, mae losa dae-bafok babasan boe oo, Manetualain ta koka heni ndia sala-singgon!”^j

33 Basa de Yesus kokolak nakandoo neu hataholi Farisi la sila nae, “Dudu'a neulalau! Ai huu malole naboa boa malole. Tehuu ai huu ta malole naboa boa ta malole. Huu neme boan mai, hataholi bisa bubuluk lae, ai huuk ndia malole do, taa.^k 34 Tehuu ei ia sama leo mengge masapepekok! Ei ta bisa kokolak dede'a malole. Huu hata fo nana mbedak nai hataholi dalen, na dei fo kalua neme bafan mai.^l 35 Hataholi malole, neu ko kokolak malole, huu dede'a malole la sila nana mbedak nai ndia dalen. Tehuu hataholi manggalauk, neu ko kokolak manggalauk, huu dede'a manggalauk kala sila nana mbedak nai ndia dalen.

36 Mamahele Au! Huu dei fo neu dae-bafok fai babasan, na Manetualain palisak basa hataholi la dede'an nala. Faik ndia, hataholi esa-esak musi tanggon-natataak ndia dede'a-kokolan sosoa taak ndia. 37 De mata neuk baa! Huu dei fo Manetualain timba-tai ei dede'a-kokolam mala, ma naketu nae, ei nana hukuk do, taa.”

38 Mese anggama ma hataholi Farisi luma lamanene Yesus kokolan leo ndiak, boe ma loke Ndia lae, “Ama Mesen! Ai mahiik mita Ama tao tanda heran, fo dadik buti nae, Ama koasam ndia tebe-tebe neme Manetualain mai.”^m

39 Tehuu Yesus nasapalak kasa nae, “Amakee! Ei hataholi hatematak ia, ta nau mamanene neu Manetualain! Ei malelak kada tao manggalauk! Mae ei moke tao tanda heran, tehuu Au ta tao. Huu makahulun Manetualain tao tanda heran nenik Ndia mana kokolan Yunus so. Ndia dai so!ⁿ 40 Yunus leo leledok telu ma le'odaek telu, nai i'a ina-huuk tein dale. Leo ndiak boe Au, Hataholi Isi-isik ia. Dei fo Au leo leledok telu ma le'odaek telu, nai lua batu mamana hataholi kamates.^o 41 Dei fo neu dae-bafok fai babasan, mete ma Manetualain dadik mana maketu, na, hataholi Niniwe la dadik neu sakasii fo kalaak ei lae, ‘Ei basa nggei ia, nggoak!’ Makahulun, hataholi Niniwe la lamanene neu Manetualain mana kokolan Yunus, boe ma ala hondak ma la'o ela sila sala-singgon nala. Tehuu ei ta nau. Naa te hatematak ia, hambu Hataholi nai ei laladam mala fo ana seli lena heni Yunus, fo ndia Au ia. Tehuu ei ta nau mbali Au faa boe.^p 42 Dei fo neu dae-bafok fai babasan, mete ma Manetualain dadik mana maketu, na, ina mane Seba neme kona ele mai, nambadeik dadik sakasii boe. Ana tuduk lima ku'un fo kalaak ei basa nggei mana masodak hatematak ia nae, ‘Ei basa nggei ia, nggoak!’ Makahulun, ina manek ndia neme dook ele mai, fo nita no mata de'e hehelin mane Soleman malelan. Naa te hatematak ia, hambu Hataholi nai ei laladam mala ana seli lena heni mane Soleman, fo ndia Au ia. Tehuu ei ta nau mbali Au faa boe.”^q

43 “Mete ma nitu nana husik neme hataholi esa mai, na, nitu ndia neni mamana nees neu, suek ana hahae aon. Tehuu ta hambu mamanak fo nandaa noon. 44 Boe ma ana dudu'a nae, ‘Wei! Ta hambu mamanak leo iak, na, malolenak au fali uu leo seluk nai hataholi makahuluk ndia.’ Boe ma ana fali, de nita mamanak ndia malalaok ma nana heti neulalauk so. 45 Basa boe ma nitu ndia neu noke nala nonoon hitu, fo manggalaun lena heni ndia bali. Boe ma basa sala leu leo lai hataholi ndia, de lakamomotu lalan. De hatematak ia, hataholi ndia sodan soe nalan seli so. Leo ndiak boe oo la'e-neu hataholi hatematak kala ia.”^r

46 Faik ndia, Yesus bei nakokola no hataholi no'uk kala. Boe ma inan no fadin nala mai fo sangga latonggo loon. Kada lambadeik leu uma deak, de ladenu hataholi neu noke Ndia. 47 De hataholi neu nafada Ndia nae, “Ama! Ama inam ma fadim mala lai deak. Ala sangga latonggo lo Ama.”^s

48 Boe ma Yesus nataa nae, “Au ina tetebeng ndia, see? Ma Au tolanoo tetebeng ndia, see?” 49 Boe ma Ana tuduk neu hataholi la fo mana tungga Ndia, ma nafada nae, “Mete ia! Te sila ia, na Au inang ma Au tolanoo nggala. 50 Te hataholi mana tao tungga Au Amang nai nusa sodak hihiin, na sila ndia Au bobonggi tetebe nggala.”