Lamatuak Yesus fee nanonolik, fo boso mambue soli salak neu hataholi
7
“Ei boso soli salak neu hataholi, fo suek Manetualain boso soli salak neu ei. 2 Ei timba-tai hataholi leo beek, na, neu ko Manetualain timba-tai ei leo ndiak boe. Ei uku-sudi hataholi fe'ek salan leo beek, na, neu ko Manetualain uku-sudi ei leo ndiak boe.a 3 Huu o kada tanda hataholi sala kadi'i anan, tehuu o sala ina-huum, kada o taok taa. Ndia sama leo o mita hu'uk esa nai o nonoom matan. Naa te balo ina-huuk babaa nala o matam, tehuu o ta mamedam. 4 Talo bee de o mambalani kokolak mae, ‘Tolanook! Mai fo au tulun nggue heni hu'uk ndia neme o mata de'em mai dei.’ Naa te o mesa nggo ta bisa mita hata-hata, huu balok babaa nala o matam. 5 Wei! Memak o ia mana dea-matak tebe! Tulun dei! So'u nggali heni balok ndia, neme o mata hehelim dei, bei fo o mita, fo tulun nggue heni hu'u kadi'i anak ndia neme o nonoom matan ndia mai.6 Boso manoli mana haumemeek kala la'e-neu Manetualain dede'a malalaon. Huu sila ndia, sama leo busa manggalauk, de dei fo ala pode lasafali mai sambu ei. Sila nggoan sama leo bafi. Mete ma hataholi fee sala lilo mabeli, na, ta mbali sana. Huu lalelak kada heheta-haha'i.”
Lamatuak Yesus nanoli hataholi fo hule-haladoi ta mana ketuk
7 “Mete ma ei hule-haladoi,
fo moke makandondoo henin neu Manetualain;
na, dei fo Ana fee.
Mete ma ei sangga makandondoo henin;
na, dei fo Ana natudu dalak.
Mete ma ei manggou makandondoo henin;
na, dei fo Ana soi lelesu.
8 Huu basa hataholi mana noke nakandondoo heni neu Manetualain,
dei fo ala simbo.
Mana sangga nakandondoo henin,
dei fo ala hambu.
Mana manggou nakandondoo henin,
dei fo Ana soi lelesu.
9 Ei dudu'a sudik kana dei! Mete ma hambu kakanak noke loti, na, neu ko aman ta feen batu, hetu? 10 Mete ma kakanak noke i'ak, na, aman ta feen mengge! 11 Ei Amam manai nusa sodak ndia, memak neulau hiak. De mete ma hataholi manggalauk matak leo ei, mahiik fee bua neulauk neu ei anam mala, na, nakalenak bali ei Amam! Neu ko Ana fee hata fo ei mokek ndia.
12 De o nau hata fo hataholi fe'ek tao neu o, na, o musi tao leo ndiak neu ndia boe. Huu ia, netes neme basa hata fo ba'i Musa ma Manetualain mana kokola fe'en nala fee nanonolik memak kasa neme makahulun mai so.”b
Lamatuak Yesus nanoli hataholi la'e-neu lelesu makabi'ak
13 “Mete ma hataholi nau maso neni nusa sodak neu, na, ana musi la'ok nesik lelesu makabi'ak. Huu hambu dala lofo anak ma lelesu maloa, fo hataholi no'uk lahiik lesik ndia. Tehuu mata neuk baa! Huu dala leo ndiak noo hataholi neni naraka neu, de ala lakadodook leme Manetualain mai. 14 Hataholi nau maso neni nusa sodak neu, musi nesik dala toto'ak ndia, ma maso nesik lelesu makabi'ak. Huu mae kada hataholi lumak lesik dalak ndia, tehuu dala makabi'ak ndia, noo hataholi neni Manetualain neu.”
Lamatuak Yesus nanoli hataholi fo boso tungga mana masapepekok kala
15 “Mata neuk neu mana masapepekok kala fo ala so'uk aok lae, sila ndia Manetualain mana kokolan nala. Huu ala taok aon nala malole leo bi'i-lombo. Naa te sila ndia manggalauk, sama leo busa fui fo mai na'a bi'i-lombo. 16 Talo bee fo ei bisa malelak hataholi mana tao aok malole ndia? Memetek kana leo, neme sila tataon mai. Sama leo hataholi nita boan, na, nalelak huun. Boa malole, ta kalua neme ai huu ta malole mai. 17 Ai huu malole, naboa boa malole. Tehuu ai huu ta malole, naboa boa ta malole. 18 Ta hambu ai huu malole, naboa boa ta malole. Ma ta hambu ai huu ta malole, naboa boa malole. 19 Ai huuk fo naboa boa ta malole, neu ko hataholi mai kekekon fo mbia henin neni ha'i dale neu.c 20 Leo ndiak boe oo, no mana kokolak fo tao aok malole la sila. Ei bisa malelak kasa neme sila tatao-nono'in nala mai.”d
Lamatuak Yesus nafada la'e-neu hataholi fo kada seseik Manetualain nai bafan
21 “Dei fo hambu hataholi noke Au nae, ‘Lamatuak!’, fo naena haak palenda sila. Tehuu kada ala seseik nai bafak. Dei fo Manetualain manai nusa sodak timba heni sala. Huu kada hataholi mana tungga tebe-tebe Ndia hihiin, Ana simbok kana dadik Ndia hataholin. 22 Dei fo neu dae-bafok fai babasan, hataholi no'uk kala manaku lae, Au ia fo aena haak palenda sila. Ala kokoe Au lae, ‘Lamatuak ei! Ai miu tui-bengga Lamatuak nanonolin so. Ai boe oo husi nitu la minik Lamatuak naden. Ma ai tao tanda heran mata-matak kala minik Lamatuak koasan.’
23 Mae ala lambue kokoe Au leo ndiak boe oo, tehuu dei fo Au afada sala ae, ‘Ei ia, see? Au ta alelak ei, huu ei ta masoda tungga Manetualain hihiin. De malai heok ia leo!”’e
Lamatuak Yesus fee nanonolik la'e-neu hataholi malelak ma hataholi nggoak
24 “Hataholi fo mana mai namanene Au, de tao tungga Au kokolang, na, ndia sama leo hataholi malelak fo nambadedei uman neu fanderen batu lain. 25 Doo-doo boe ma uda belak konda losa faa mai. Ani sanggu mai de mbo'i fee uma ndia. Tehuu uma ndia ta tu'u, huu nambadeik neu fanderen batu matea lain.
26 Hataholi fo mana mai namanene Au, tehuu ta tao tungga Au kokolang, na, ndia sama leo hataholi nggoak fo nambadedei uman neu salaek lain. 27 Doo-doo boe ma uda belak konda losa faa mai. Ani sanggu boe oo mai mbo'i fee uma ndia. Boe ma uma ndia tu'u henin losa lulutuk.”
Hataholi la heran lalan seli lamanene Lamatuak Yesus nanonolin fo ana seli ndia