Lamatuak Yesus nasanenedak kasa fo mata neuk neu mese anggama ma hataholi Farisi la
23
Basa boe ma Yesus nanoli ana mana tunggan nala, sama-sama lo hataholi no'uk kala fo mana tungga sila. 2 Ana nafada nae, “Mese anggama ma hataholi Farisi la to'u haak, fo fee nanonolik la'e-neu ba'i Musa heti-heun nala. 3 Huu ndia de ei musi mamanene sala ma tungga sila nanonolin. Tehuu boso tungga hata fo ala taon, huu ala ta tao tungga sila nanonoli hehelin. 4 Ala lakaseti hataholi fo lemba sila anggaman heti-heun mabela ndia. Tehuu sila mesak kasa ta nau tulun hataholi la, fo tungga heti-heuk ndia. 5 Basa hata fo ala taok, ala tao fo suek hataholi koa sala. conto leo: buas esa fo isin Manetualain Dede'a-kokolan, fo ala mba'an neu langgan nala ma liman nala. Tehuu ala boe tao ina-huu sila enan nala, fo suek hataholi koa sala lae, ‘Wei! Sila ndia, hataholi malalaok bou!’a 6 Mete ma ala maso leni uma huhule-haladoik leu do, ala tungga feta, na, ala lateme sangga mamana nanggatuuk neulauk nalan seli, fo hataholi no'uk kala lita sala. 7 Mete ma ala pasak leu, na, sila boe oo lahiik hataholi la fee sala hadak. Ala sangga fo suek hataholi la do'ok kasa lae, ‘Soda-molek, ama mese nana hadak’. 8 Tehuu ei boso tungga sila heheo-hihilun ndia! Hataholi ta bole loke ei lae, ‘ama mesen’, huu ei mesem kada esak. Ma ei basa nggei ia, tolanook kala. 9 Boso soso'uk hataholi dae-bafok mae, ‘ama’, huu ei Amam nai nusa sodak kada esak. 10 Hataholi boe oo ta bole loke ei lae, ‘lamatuak’, huu ei Lamatuam kada esak, fo ndia Au ia, fo Manetualain helun neme makahulun mai fo nadenun mai so. 11 Huu ndia de Au ae ei ta bole soso'uk aok sama leo hataholi mana sangga hadak kala sila. See neme ei mai nau dadik hataholi ina-huuk, na ana musi dadik sama leo ata fo ono-lau hataholi fe'ek.b 12 Te hataholi fo mana nau soso'uk aok, dei fo Manetualain tao natudan. Tehuu hataholi fo mana tao aon sama leo hataholi kadi'ik, dei fo Manetualain so'u laik kana.”c
Lamatuak Yesus ka'i malangga anggama la, huu ala kokolak fe'ek, tehuu tao fe'ek
13 Basa boe ma Yesus kokolak tuti bali nae, “Heeh, ei mese anggama ma hataholi Farisi la! Memak ei ia, hataholi mana dea-matak! Dei fo ei hambu soe, huu ei ta mamahele Au, Hataholi fo Manetualain helu memak sangga nadenun mai so. Ma manggalaun lena bali, ei matabaa mala hataholi fo mana nau maso neni Manetualain palendan mai, fo ala boso lamahele neu Au.
14 [Heeh, ei mese anggama ma hataholi Farisi la! Memak ei ia, hataholi mana dea-matak! Dei fo ei hambu soe, huu ei mambue masapepeko ina falu la, fo basa na ei mamoa mala uman nala. Tehuu nai hataholi no'uk matan, na, ei mafuni ei manggalaun nala sila, ma mambadeik hule-haladoi mala dook fo suek hataholi la lae, ei dalem mala malalaok. Tehuu dei fo Manetualain huku ei, belak nalan seli.]d
15 Heeh, ei mese anggama ma hataholi Farisi la! Memak ei ia, hataholi mana dea-matak! Neu ko ei hambu soe, huu ei sa'e ofak sudi bee miu, ma loe-nda'e letek, kada nau sangga hataholi esak, fo ana maso neni ei paltei anggamam neu. Tehuu mete ma ana maso so, na, ei tao ndia sodan manggalaun lena bali, losa ana hambu huhukuk nai naraka belan la'i dua neme ei mai.
16 Wei! Ei dalem mala lakatema so, tehuu hatina de ei bei nau matudu dalak neu hataholi fe'ek bali? Dei fo ei hambu soe, huu ei fee nanonoli madabak mae, ‘Mete ma hataholi so'uk heheluk nenik soo, ma seseik Uma Ina Huhule-haladoik, na, hataholi ndia ta nana mba'ak no hehelun ndia. Tehuu mete ma ana so'uk heheluk nenik soo, ma seseik bua lilo mbilas manai Uma Ina Huhule-haladoik dalek, na, bei fo ndia nana mba'ak no hehelun ndia.’ 17 Ei ia nggoam ana seli! Ei mae hetuk Manetualain tao bua lilo mbilas ndia penting lena, neme Ndia Uma Ina Huhule-haladoin mai? Taa! Huu Uma ndia tao bua sala sila dadik malalaok!
18 Ei boe oo fee nanonoli madabak mae, ‘Mete ma hataholi so'uk heheluk nenik soo, ma seseik mei tunu-hotuk manai Uma Ina Huhule-haladoik, na, hataholi ndia ta nana mba'ak no hehelun ndia. Tehuu mete ma ana so'uk heheluk nenik soo, ma seseik tunu-hotuk manai mei ndia, na, bei fo ana nana mba'ak no hehelun ndia.’ 19 Ei ia, mboke tebe-tebe so. Mei tunu-hotuk ndia, penting lena heni tunu-hotuk manai mei ndia lain. Huu mei ndia, tao nala hataholi bisa fee tunu-hotun dadik malalaok neu Manetualain. 20 Huu ndia de mete ma hataholi soo ma seseik mei tunu-hotuk ndia, na, malolenak seseik mei ndia, ma basa hata manai mei ndia lain boe. 21 Ma mete ma hataholi soo ma seseik Uma Ina Huhule-haladoik, na, malolenak seseik Uma ndia sama-sama no Manetualain naden, huu Ana leo nai ndia. 22 Ma mete ma hataholi soo ma seseik nusa sodak, na, ndia ndia sama leo seseik Manetualain kadela palendan, sama-sama no Ndia naden, huu Ndia nanggatuuk to'u palenda nai ndia.e
23 Heeh, ei mese anggama ma hataholi Farisi la! Memak ei ia, hataholi mana dea-matak! Dei fo ei hambu soe, huu ei malelam ana seli mahihinggak fo fee Manetualain baba'ek esa neme baba'ek sanahulu mai. Ei mambue mahinggak basa-basan, losa ei bumbu-fanim mala nai osi dale boe oo, ei hinggan. Conto leo ei hingga lutu-lutuk ei daladaim, adas makeek, ma jintan. Naa te ei mafalende heni Manetualain heti-heun fo penting seli so! Huu ei ta masoda no ndoos. Ei ta sue hataholi kasian nala. Ma ei ta masoda makandoo tungga Manetualain hihiin. Malolenak ei tao tungga basa sila dei, bei fo ei miu hingga ei bumbu-fanim mala, fo ei nau fee Manetualain.f 24 Ei dalem mala lakatema so, tehuu hatina de ei bei nau matudu dalak neu hataholi fe'ek bali? Ei tao heti-heuk losa lutu-lutuk, fo madenu hataholi fe'ek kala tunggan, tehuu Manetualain heti-heun manai lain nalan seli, ei mesa nggei ta tungga sana. Sama leo ei palisak lutu-lutuk fo se'e heni mbena anak neme ei oe nininum mai. Tehuu banda ina-huuk leo kamba, na ei kodo katemak kana!
25 Heeh, ei mese anggama ma hataholi Farisi la! Memak ei ia, hataholi mana dea-matak! Dei fo ei hambu soe, huu ei safe mala ei pingga-manggom mala losa langgahado, tehuu ndia kada nai dean nala. Naa te dalen nala manggenggeo ndoos neme ei mamoam ma ei balena'om mai.
26 Weeh! Hataholi Farisi mbokek kala! Safe makahuluk ei pingga-manggom mala dalen! No leo ndiak, na baba'e deak boe oo bisa dadik malalaok!
27 Heeh, ei mese anggama ma hataholi Farisi la! Memak ei ia, hataholi mana dea-matak! Dei fo ei hambu soe, huu ei ia sama leo lates nana dama fulak. Hataholi nita deak, lolen ana seli. Tehuu dalek henuk no mana matek kala dui-loun, ma basa kaboo mbuluk.g 28 Ei boe oo sama! Ei mahiik tao aok nonook leo hataholi malalaok. Nai deak, na hataholi nita ei, sama leo hataholi dale ndoos. Naa te ei dalem mala henuk no dede'a manggalauk. Huu ei kokolak fe'ek, tehuu tao fe'ek, ma mafalende heni Manetualain palendan nala.
29 Heeh, ei mese anggama ma hataholi Farisi la! Memak ei ia, hataholi mana dea-matak! Dei fo ei hambu soe! Ei tao late ina-huuk kala fee Manetualain mana kokolan nala, ma heu malole hataholi neulauk kala laten. 30 Tehuu ei mae, ‘Leo ita tasoda lelek esa to ita bei-ba'in nala, na, neu ko ita ta tungga tao tisa Manetualain mana kokolan nala.’ 31 No leo ndiak, ei malengga seluk ei dede'a kafunim hehelim mala mae, ei manggalaum sama leo ei bei-ba'im mala boe. 32 De malolenak, ei tao manggalauk leo ndiak losa mate'en, tungga ei bei-ba'im salan nala!
33 Ei ia tebe-tebe manggalaum sama leo mengge kalasok. Ei mae hetuk Manetualain ta huku ei? Boso mamahena! Neu ko Ana mbia heni ei mini ha'i naraka dale miu! 34 Mamanene baa! Dei fo Au adenu fee ei Au nadedenu nggala, fo lanoli ma latudu ei Manetualain dala soda ndoon. Tehuu dei fo ei tao misa luma, ma mbaku misa luma leu ai ngganggek. Hambu luma boe oo, ei filo sala lai uma huhule-haladoik kala, ma hambu luma, ei tao doidoso sala, losa lalai leme kota esa mai, leni kota fe'ek leu. 35 Makahulun ele, ei bei-ba'im tao nisa Habel. Naa te ndia ndia, hataholi dale ndoos. Ei bei-ba'im mala lambue tao lisa lakandondoo henin hataholi dale ndoos sala neme numbu-saduk esa mai, neni numbu-saduk esa neu. Losa Sakaria, fo Barakia anan. Ala tao lisan neme Uma Ina Huhule-haladoik pasan, dekak no mei tunu-hotuk. Huu ei tungga ei bei-ba'im mala manggalaun ndia, de ei musi tanggon basa hataholi ndoos sala sila daan nala. 36 Memak tetebes! Tehuu ei fo hatematak ia, dei fo nana hukuk, huu dede'a manggalauk kala fo ei bei-ba'im mala taon neme makahulun ndia mai.”
Lamatuak Yesus tuda kasian neu hataholi Yerusalem asa
37 “Wei hataholi Yerusalem! Ei ia, mambue tao misa Manetualain mana kokolan nala, ma mbia misa nadedenuk kala mana nau mai tulu-fali ei. Au ambue kokoe ei taa-taa fo mini Au mai, sama leo manu ina nasulu nala anan nala neu lidan dale. Tehuu ei ta nau. 38 Huu ndia de Manetualain ta mbali ei umam so. Boe ma mbila-binesak, louk so. 39 Mamanene neulalau baa! Huu ei ta mita Au bali, losa neu fain ei manaku mae, ‘Ai moke fo Manetualain fee baba'e-babatik neu Hataholi ia, huu Manetualain nadenu Ndia.’ Ei manaku leo ndiak, bei fo ei mita Au bali.”