Lamatuak Yesus nanoli hataholi fo tulu-fali hataholi kasian nala
6
Yesus fee nanonolik nakandoo nae, “Masanenedak baa! Boso tungga anggama heti-heun, fo suek hataholi koa ei. Te mete ma ei tao leo ndiak, na, ei Amam nai nusa sodak ta fee ei nggadim mala.a2 Mete ma ei sangga tulu-fali hataholi kasian nala, na, boso miu popode maam mala sudi nai bee. Tehuu mete ma ei tao leo ndiak, na, ei sama leo hataholi mana kokolak fe'ek, tehuu tao fe'ek. Ala lahiik lala'ok leni uma huhule-haladoik leu, fo suek hataholi koa sala lae, ‘Wei, hataholi la ia, ana seli lalan seli bae maa!’ Au kokolak tetebes ia! Ma hambu kokoak leo ndiak, na, ala simbo basa sila nggadin nala so. 3 De mete ma ei sangga tulu-fali hataholi kasian nala, na, boso mafada sudi see baa! 4 No leo ndiak, na hataholi malai dae-bafok ia, ta bubuluk. Tehuu ei Amam manai nusa sodak bubuluk hata fo ei taom no nee-neek. Dei fo Ana bala ei nenik baba'e-babatik makadotok.”
Lamatuak Yesus nanoli hataholi huhule-haladoik
5 “Ledo-eik ei hule-haladoi, na, boso tao aok leo hataholi mana kokolak fe'ek, tehuu tao fe'ek. Ala lahiik lala'ok leni dala hataholi no'uk leu, ma lambadeik lai uma huhule-haladoik dale, suek hataholi no'uk kala lita sala ma koa sala lae, ‘Wei! Sila ia, hataholi malalaok bou!’ Tehuu mamanene baa! No hambu kokoak leo ndiak, na, ala simbo lala sila nggadin nala so.b 6 Tehuu ei ta bole leo ndiak. Mete ma ei hule-haladoi, na, maso mini kama dale miu, fo kena lelesu. Basa na hule-haladoi nee-nee neu ei Amam. Suek hataholi fe'ek ta lita, tehuu ei Amam nita. Dei fo Ana bala fee ei nenik baba'e-babatik makadotok.
7 Mete ma ei hule-haladoi, na boso kokolak maeok miu-mai. Huu hataholi ta mana malelak Manetualain, bisa hule-haladoi leo ndiak boe. Ala dudu'a lae, Manetualain nahiik namanene sila huhule-haladoin manalu ndia. 8 Boso tao tungga leo sila baa! Huu mae ei bei ta moke hata-hata neu Amak nai nusa sodak, tehuu Ana bubuluk memak hata fo ei paluum so. 9 De mete ma hule-haladoi, na, pake conto leo iak:
‘Amak manai nusa sodak! Ama naden malalaok nalan seli.
Neme naa fo basa hataholi la so'u dema-demak Ama naden fo ana seli ndia.
10 Neme naa fo Ama dadik Manek neu basa hataholi la!
Neme naa fo basa hataholi la tao tungga Ama palendan nai dae-bafok ia,
sama leo Ama atan nala tao tungga Ama palenda nai nusa sodak.
11 Ama tulun fee ai nana'ak mana daik tungga faik.
12 Ai moke Ama koka heni ai sala-singgon nala,
sama leo ai mafalende heni hataholi salan nala fo taon neu ai.
13 Ama, manea fo ai ta tao manggalauk.
Ma masala'e mala ai, mima nitu la koasan mai.
[Huu Ama ia, Manek fo naena koasa ina-huuk ma mandela-masa'ak.
Ama to'u palenda nakandondoo henin.
Ai huhule-haladoin, kada leo ndiak Ama. Amin.]’c
14 Tehuu mamanene baa! Mete ma ei mafalende heni hataholi salan neu ei, na, dei fo ei Amam manai nusa sodak koka heni ei salam mala boe. 15 Tehuu mete ma ei ta nau mafalende heni hataholi salan neu ei, na, dei fo ei Amam ta koka heni ei salam mala boe.”d
Lamatuak Yesus nanoli hataholi la'e-neu puasa
16 “Mete ma ei hule-haladoi ma puasa, na, boso matudu ei matam mala leo mana puasak, sama leo hataholi mana kokolak fe'ek, tehuu tao fe'ek. Huu ala tao leo ndiak fo suek hataholi koa sala lae, ‘Wei! Sila ia, hataholi malalaok kala bae!’ Tehuu mamanene baa! Hambu kokoak leo ndiak, na ala simbo basa sila nggadin nala so. 17 Tehuu mete ma puasa, na, malou ei matam mala malalao ndoos, ma sau neulalau langga buluk! 18 De dei fo hataholi lita ei, na tala bubuluk lae, ei mana puasak. Tehuu ei Amam mana bubuluk. Dei fo Ana bala fee ei baba'e-babatik makadotok.”
Lamatuak Yesus nanoli hataholi la'e-neu nakaduduluk hata nai nusa sodak
19 “Boso tao ues tingga-tingga fo makaduduluk hata makadotok nai dae-bafok ia. Huu dei fo fufuk ma besi-teik tao lakalulutu sala. Boe ma na'o mai ofe ma ko'o neni sala.e 20 Tehuu malolenak ei tao ues tingga-tingga fo makaduduluk hata makadotok nai nusa sodak. Huu nai ndia, fufuk no besi-teik ta bisa tao lakalulutun. Ma na'o boe oo ta bisa mai ofe fo ko'o nenin. 21 Ei mbeda hatam mala lai bee, na neu ko ei dalem mala lakadita lai ndia boe.”
Lamatuak Yesus nanoli hataholi la'e-neu nasoda nai manggaledok
22 “Hataholi matan, sama leo banduk fo tao nanggaledo dalen. Mete ma matan manggaledok, na, ana tungga dala soda neulauk, sama leo hataholi la'ok nai manggaledok dale. 23 Tehuu mete ma matan manggasasabuk, na, ana ta tungga dala neulauk, sama leo hataholi mana la'ok nafadadaba nai makiuk dale. De mete ma manggaledok manai ei dalem mala dadik makiuk so, na, ei boe oo masoda nai makiuk dale.”
Lamatuak Yesus nanoli hataholi, fo boso dudu'a sangga sodak talo bee
24 “Hataholi ta bisa tao ues tebe-tebe fee malanggan dua, huu dei fo ana hii malanggan esa lena heni malanggan fe'ek. Bisa boe ana tungga malanggan esa, tehuu tana mbali malanggan fe'ek. Huu ndia de mete ma o tao doik dadik neu o malanggam so, na, o ta bisa mae, ‘Lamatuak ndia, fo naena haak palenda au’.
25 Huu ndia de Au afada leo iak: boso masambute dudu'a, au sangga asoda talo bee, au u'a-inu hata, ma pake hata? Ei mae hetuk masoda ndia, na kada soa-neu na'a? Ma aok ndia, soa-neu pake badu, do? Ta leo ndiak. 26 Mete sudik mbuik kala mana laa lai lalai ndia. Ta lasambute sele ma ketu-kolu fo mbeda nana'ak neu kama mbembedak dale. Tehuu ei Amam nai nusa sodak nakaboi sala nakandondoo henin. Ndia boe oo, neu ko bisa nakaboi ei lena heni sila bali. De dudu'a neulalau dei. Huu Ana timba-tai ei lena heni mbuik kala sila. 27 Mete ma hataholi nambadeik neu titilok matan, de ana nasambute no ndia ao-inan, na, ana bisa tao namadema ao-inan, do? Ta bisa! 28 Mete ma taa, na, hatina de ei masambute fo dudu'a la'e-neu balo'as bali? Miu mete sudik bungga bakung nai mook. Ta inda abas, ma ta tenu sidi.
29 Tehuu mamanene neulalau baa! Mane Soleman balo'an neulauk nalan seli, ta bisa laban bungga sila lolen.f 30 Huu Manetualain tao dalek neu bungga fo kada lasoda nai leledon ia, fo basa na, fo'a boe ma lamatuu so, fo hataholi nggali heni sala leni ha'i dale leu. Neu ko Ana papake ei lena heni bungga la sila. De, hatina de ei ta nau mamahele tebe-tebe neu Ndia? 31 De boso masambute dudu'a mae, ‘Ai sangga mi'a hata?’ do, ‘Ai sangga minu hata?’ do, ‘pake hata?’ 32 Hataholi fo ta mana namahele neu Manetualain, ala tao ues mbilu-mbuse fo lasuu hambu basa dede'ak kala sila. Tehuu ei boso leo ndiak, huu ei Amam nai nusa sodak bubuluk basa hata fo ei paluuk so. 33 Huu ndia de ei musi makalala'ok Ndia uen dei, ma musi tungga Ndia palendan, basa dei fo Ana fee tamba basa hata fo ei paluum. 34 De boso masambute dudu'a hata fo fo'a mai ei paluum. Huu fo'a mai, na nasambute fe'ek bali. Faik ia toto'an, dai ndia so.”