2 Losa fai seseu anggol boak, boe ma madaek nadenu ana mana tao uen esa neni hataholi mana seba osi sila neu, fo noke ndia baba'en. 3 Tehuu ledo-eik ana losa, boe ma mana seba osi sila humu lalan, de ala mbombokon. Boe ma ala ladenu falik ndia no lima loun.

4 Boe ma madaek ndia nadenu ana mana tao uen esa neu bali. Tehuu mana seba osi sila mbombokon losa langgan hinak-hinak mesan. Basa de lakamamaek kana, ma ala husi falik kana. 5 Basa boe ma madaek ndia nadenu ana mana tao ue fe'en esa neu bali. Tehuu ala tao lisan boe. Mae ala tao leo beek boe oo, madaek ndia kada nadenu nakandoo ndia ana mana tao uen nala leu taa-taa. Tehuu mana seba osi sila mbomboko lala luma, ma ala tao lisa luma. 6 Hatematak ia ela kada hataholi esak so, fo madaek ndia ana mane kisan fo ana sue nalan seli. Huu ana ta hambu dalak fe'ek so, de nadenu ana mane kisan ndia neu leo. Te ana dudu'a nae, ‘Mete ma au adenu au ana bongging neu, na, neu ko ala simbok kana no malole, ma ala lamanene neun.’

7 De ana nadenu anan neni ele neu. Tehuu ledo-eik mana seba osi sila lita kakanak ndia mai, boe ma lakokola aok lae, ‘Wei! Ei suli sudik dei! Tou lasik nadenu ana bonggin mesak kana mai so! Mete ma tou lasik maten, na, ndia ndia hambu basa pusaka la. Mai fo ita tao tisa kakanak ndia leo, fo suek ita hambu ndia pusakan ia!’ 8 Basa ndia boe ma basa sala leu humu lalan, de ala tao lisan. Boe ma ala mbia heni mbombolan neni osi deak neu. Nakandandaak ndia losa kada ia leo.”

9 Basa boe ma Yesus natane hataholi ina-huuk kala sila nae, “Tungga ei dudu'am, na madaek ndia sangga tao mana seba osi sila leo bee? Tungga Au, na ana mai fo tao nisa basa mana seba osi sila. Basa ndia, na ana seba osi anggol ndia neu hataholi fe'ek.

10 Ita basa nggata lees basa Manetualain Susula Malalaon so nae,

12 Hataholi ina-huuk kala sila lalelak memak lae, Yesus uku bebeik sila nenik nakandandaak ndia. Sila sama leo isinaak mana seba osi anggol ndia. Basa boe ma ala heti dalak fo sangga humun. Tehuu ala bii hataholi no'uk kala fo mana hii Yesus nanonolin. Boe ma ala la'o elan leo.

13 Basa boe ma hataholi Yahudi hataholi ina-huun nala ladenu hataholi Farisi hida, ma Herodes hataholi paltein leu latatanek lo Yesus fo nau latuda Ndia. 14 Boe ma ala mai, de latatanek lo Ndia lae, “Ama Mesen! Ai basa nggai bubuluk Ama dalen ndoos, ma ta pepeko malelak. Ama mete kada hataholi dalen. Ama boe oo mafada Manetualain hihiin no manggaledok, huu Ama ta mete matak. Hatematak ia, ai sangga matane dede'ak esa. Tungga ita anggama Yahudi heti-heun, na ita musi bae bea neu mana palenda Roma mane ina-huun^c do, taa?”

15 Tehuu Yesus bubuluk ala sangga doluk Ndia so, suek Ana kokolak laban mana palenda Roma. Boe ma Yesus nataa no hala belak nae, “Huu hata de ei sangga dalak fo matuda Au minik natatanek ndia! Hena matudu Au doi lilo fulak esa dei!”

16 Boe ma ala loo feen doi lilo fulak esa. Ana simbo nalan, boe ma Ana palisak kana. De Ana natane sala nae, “See mata-aon ia? Ma see naden ia?”

Boe ma ala lataa lae, “Mana palenda Roma mane ina-huun ndindia!”

17 Boe ma Yesus nae, “Naa! Mete ma leo ndiak, na, ei miu fee mana palenda hata fo mana palenda haak. Ma fee Manetualain hata fo Manetualain haak.”

Basa sala lamanene leo ndiak, boe ma ala heran lalan seli, huu Yesus nafada la'en ndia. Huu ndia de ala ta bisa latuda Ndia.

18 Hambu paltei anggama fe'ek esa, fo hataholi la seseik lae, paltei Saduki. Ala fee nanonolik lae, hataholi mana matek ta bisa nasoda fali. La'i esa, hambu hataholi Saduki hida mai fo sangga latuda Yesus boe. Ala kokolak lo Yesus lae,^d

19 “Ama Mesen! Ba'i Musa sulak fee ita la'e-neu hadak ia nae: mete ma touk esa mate la'o ela saon, tehuu anan taa, na, touk ndia fadin musi sao nala ina falu ndia, fo suek ka'a mana matek ndia, hambu numbu-saduk.^e 20 Memak Musa fee nanonolik leo ndiak. Tehuu ai nau matane leo iak: hambu touk hitu, tolanoo bonggik kala. Uluk, sao nakahuluk, boe ma maten, tehuu anan taa. 21 Boe ma fadin mana tungga ndia, sao nala ina falu ndia. Ta dook boe ma ana mate boe, ma ina falu ndia ta bonggi nala anak boe. Leo ndiak boe oo, losa fadi katelun; Ana sao nala ina falu ndia tehuu maten, ma ta bonggi nala anak boe. 22 Leo ndiak nakanondoo henin losa fadi muli anak boe oo maten. Basa boe ma ina falu ndia maten.

23 Hatematak ia, ai sangga matane leo iak: ina falu ndia sao nitak touk hitu! Tehuu mete ma neu dae-bafok fai babasan, Manetualain tao nasoda falik basa hataholi mana matek kala, na, inak ndia dadik neu see saon neme tou kahituk kala sila mai?”

24 Boe ma Yesus nataa nae, “Mete ma ei matane leo ndiak, na, ndandaan nae, ei ta malelak tebe-tebe Manetualain Susula Malalaon isin. Ma ei boe oo ta malelak Manetualain koasan. De ei ia sala malan seli so!

25 Mamanene baa! Leo iak: sasaok ta nai nusa sodak. Basa hataholi mana matek kala fo Manetualain tao nasoda falik kasa, ta sao so bali. Leo ndiak boe Manetualain ata nusa sodan nala ta sao. 26 Au boe oo afada la'e-neu hataholi mana matek kala lasoda fali, do taa. Ba'i Musa sulak la'e-neu ai huu kadi'ik fo ha'i na'an, tehuu ta kaden. Ei masaneda tutuik ndia, do taa? Ledo-eik ha'i mbila nai ai huuk ndia, boe ma Manetualain nafada ba'i Musa nae, ‘Au ia, Manetualain neme o ba'im mala mai. Fo ndia ba'i Abraham, ba'i Isak, ma ba'i Yakob. Sila basa sala lakaluku-lakatele lakandondoo henin neu Au losa hatematak ia.’^f 27 Ita bubuluk tae, ba'i la sila mate sala dook ia so. Tehuu Manetualain nafada nae, Ndia bei dadik sila Manetualain, huu ndia de ita bubuluk tae, sila lasoda fali so. De mae hataholi mate sala so boe, tehuu ala lasoda fali. Memak hataholi kasodak ndia nakaluku-nakatele neu Manetualain, tehuu hataholi mana matek taa, hetu? De mete ma ei to'u mahele nanonolik ndia nae, hataholi mana matek ta nasoda fali, na, memak ei sala malan seli ndia so!”

28 Ledo-eik Yesus bei nanggatuuk nakokola no hataholi paltei Saduki la, hambu mese anggama esa tungga namanene boe. Mese anggama ndia dudu'a nae, Yesus nataa sila natatanen ndia no malole so. Boe ma natane Yesus nae, “Ama! Au sangga atane leo iak: ita hadan heti-heun, ma anggama palendan nala no'un seli. Neme basa palenda fo neme ba'i Musa mai, bee ndia kasosoak nalan seli?”

29 Yesus nataa nae, “Palenda fo penting nalan seli nai Manetualain Susula Malalaon ndia, nae leo iak:

31 Ma palenda kaduan nae leo ia:

Palenda kaduak kala ia, penting nalan seli lena heni basan. Ta hambu palenda fe'ek fo penting nalan seli lena heni palenda kaduak kala ia.”^h

32 Basa boe ma mese anggama ndia kokolak bali neu Yesus nae, “Memak! Ama kokolam ndia, tetebes. Manetualain ndia naena haak palenda ita, ma ta hambu Manetualain fe'ek bali.ⁱ 33 Ita musi sue Ndia lena heni basa hata lala'en, losa ita dokodoe tahele Ndia, talelak Ndia, ma tao ues tingga-tingga fo tungga Ndia hihiin. Ma ita boe oo, musi sue hataholi fe'ek sama leo ita sue ita ao hehelin. Ndia, Manetualain namahoko nalan seli lena heni kada ita tungga anggama heti-heun. Ndia malolen lena heni kada ita tunu banda tunu-hotuk do, fee hata fe'ek neu Ndia.”^j

34 Yesus namanene ana nataa leo ndiak, boe ma Ana dudu'a nae, mese anggama ia nalelak no malole so. Boe ma Yesus nae, “O hii-hii dadik Manetualain hataholin so.”

Basa boe ma ta hambu hataholi fe'ek fo nambalani natatanek no Yesus so bali, huu ta hambu hataholi senggi Ndia.^k

35 Basa boe ma Yesus bei nanoli hataholi lai Manetualain Uma Ina Huhule-haladoin dale. Boe ma Ana natane sala nae, “Tungga ei dudu'am, na leo bee? Mese anggama la fee nanonolik la'e-neu Karistus ndia, fo Manetualain tudu memak neme lele uluk ele mai so. Tungga sila, na Ndia kada mane Dauk numbu-sadun. Tehuu ndia, ta tetebes. 36 Huu makahulun ele Manetualain Dula-dale Malalaon pake Dauk, de ana sulak nae,

37a Neme ndia mai, ita bubuluk tae, mane Dauk mesak kana noke Karistus ndia, na nae, ‘Lamatuak.’ Ndia ndandaan nae, mete ma hataholi la lae, Karistus ndia kada mane Dauk numbu-sadun, na ndia bei ta dai! Huu Ndia boe oo dadik mane Dauk Lamatuan fo naena haak palenda ndia!”

37b Ledo-eik Yesus kokolak isinaak leo ndiak, boe ma hataholi no'uk kala lahiik lamanene lalan seli neu Ndia. 38 Basa boe ma Ana nafada sala bali nae, “Ei musi mata neuk neu mese anggama la. Ala lahiik lala'ok pake badu manalu mana mbembembek, ma leu latonggo lo hataholi no'uk, fo suek hataholi la lita sala fo lae, ‘Wei! Sila ndia, hataholi ina-huuk bou!’ 39 Mete ma ala maso leni uma huhule-haladoik dale leu, do leu la'a feta, na, ala lateme sangga kada mamana nanggatutuu neulauk, fo suek hataholi no'uk kala lita sala. 40 Tehuu mata neuk bou! Huu ala lateme pepeko lala ina falu la boe, fo lamoa lala basa uman nala. Tehuu lai hataholi no'uk matan nala, na lafuni sila tatao manggalaun nala ndia, lenik lambadeik fo ala hule-haladoi lala dook. Ala nau fo hataholi la lae, sila hataholi dale malalaok. Tehuu dei fo Manetualain fee sala huhukuk belan seli.”

41 Basa boe ma Yesus neu nanggatuuk nasale peti derma manai Manetualain Uma Ina Huhule-haladoin. Ana nita hataholi la mai langgodi sila doi koleten neni peti ndia dalek neu. Ana nita hataholi kamasu'ik kala mai langgodi sila doi koleten no'un seli nai ndia boe. 42 Boe ma ina falu hata taak esa mai hule-haladoi boe. De ana nanggodi doik sen dua neni peti kolete dale neu. Doik ndia belin kada faa anak nalan seli.

43 Basa boe ma Yesus kapek nala ana mana tunggan nala, de nae, “Ei mete neulalau ina falu hata taak ndia dei. Ana nanggodi kada doik sen dua, tehuu ana fee lena heni neme basa hataholi la mai so. 44 Hataholi fe'ek sila langgodi doi koleten nala leme sila doi sisan mai. Tehuu ina falu ia, ana fee basa doin neu Manetualain so.”