Inak kala mana tungga Lamatuak Yesus
8
Ta dook bali, boe ma Yesus no ana mana tungga kasanahulu duan nala, la'ok ndule kota ma nggolok kala malai ndia. Ala la'o leu lafada hataholi la la'e-neu Manetualain palendan. Ndia dadik hala malole neu sala. 2 Nai bubuak ndia dalek hambu inak hida tungga boe. Inak kala ia, hambu litak hedis mata-matak, ma hambu litak nitu nalak. Tehuu Yesus tao nahai basa sala so. Matak leo Maria maneme nggolo Magdala mai. Makahulun, Yesus husi kalua nitak nitu hitu leme ndia mai. 3 Hambu Susana ma ina Yohana boe. Ina Yohana ia, na ndia ama Kusa saon. Kusa ndia, na malanggga mana makanenik, nai mane Herodes uma manen. Ma bei hambu ina fe'ek no'uk la'ok sama-sama lo Yesus asa. Inak kala ia pake sila doi hehelin, fo tanggon Yesus asa doi dalan.aNakandandaak la'e-neu bini fo hataholi sele-nggalin nai dae mata-matak
4 La'i esa, hataholi la kalua leme nggolok no'uk mai, fo sangga Yesus. Ledo-eik hataholi no'uk kala lakabubua so, boe ma Ana tui fee sala nakandandaak esa nae, 5 “Hambu hataholi mana tao ue daek esa neu ngganggali bini nai ndia osin. Bini luma tuda lai dalak. Ledo-eik hataholi la la'ok lesik ndia, boe ma ala heheta bini la sila. Basa boe ma mbuik kala mai, de tututu la'a labasa sala. 6 Bini luma bali, na tuda lai dae batu. Bini sila mulai lanumbu, tehuu male heni sala, huu oe ta dai. 7 Bini fe'ek luma tuda lai mamana dilak. Tehuu ledo-eik bini la mulai lanumbu, boe ma dilak kala kabi lisa sala. 8 Tehuu bini fe'ek bali, tuda lai dae isi mamina. Ala lanumbu, boe ma moli dadik ina-huuk losa labuna-laboa. Bini la sila fee buna-boak la'i natun esa.”
Yesus tui basa leo ndiak, boe ma Ana nggoe nakandandaak ndia, de kokolak no hala malii nae, “Ei fo mana pasa ndi'i dook, na, dudu'a neulalau!”
Lamatuak Yesus nafada nae, hatina de Ana nahiik pake nakandandaak
9 Basa boe ma Yesus ana mana tunggan nala latane nakandandaak ndia sosoan.
10 Ana nataa nae, “Leo iak! Huu ei tungga tebe-tebe Manetualain hihiin so, de Au buka ledo-ledo fo ei bubuluk, talo bee fo Manetualain nau palenda Ndia hataholin nala. Tehuu hataholi fe'ek kala ta nau mbali Manetualain hihiin. Huu ndia de Au anoli sala unik kada nakandandaak. Huu Manetualain mana kokolan sulak memak la'e-neu hataholi la ia so nae,
‘Ala lita so,
tehuu ta nau lalelak.
Ala lamanene so,
tehuu ta nau bubuluk.”’b
Lamatuak Yesus nafada nakandandaak la'e-neu bini ndia ndandaan
11 Boe ma Yesus nafada nakandandaak ndia ndandaan nae, “Bini ndia, na, ndia Manetualain Dede'a-kokolan. 12 Bini fo mana tuda lai dalak ndia, na ndia hataholi fo mana namanene Manetualain Dede'a-kokolan, tehuu basa boe ma nitu la malanggan mai namoa nala Dede'a-kokolak ndia neme sila dalen mai. No leo ndiak, ala ta lamahele Manetualain, ma ta hambu nasalala'ek. 13 Bini fo mana tuda lai dae batu, na ndia hataholi fo mana namanene Manetualain Dede'a-kokolan no namahokok. Tehuu okan nala ta tola losa dook. Ala mulai lamahele, tehuu mete ma toto'ak la'e sala so, na lofo anak ala tuda. 14 Bini fo mana tuda lai mamana dilak ndia, na ndia hataholi fo mana namanene ma simbok Manetualain Dede'a-kokolan. Tehuu ta dook boe ma ala lafalende heni Dede'a-kokolak ndia, huu lasambute lena lo kada sila dede'a hehelin, ma sila hata-heton mata-matak, ma lahiik kada lasoda no namahokok. Huu ndia de sila namahehelen ndia, ta hambu buna-boak faa boe. 15 Tehuu bini fo mana tuda nai dae isi mamina ndia, na ndia hataholi fo dalen malole ma ndoos. Ledo-eik ala lamanene Manetualain Dede'a-kokolan, boe ma ala mbeda neulalaun nai dalen nala. No leo ndiak, na ala lamahele lakandoo, ma tao dede'a malole no'uk.”
Nakandandaak la'e-neu tatana banduk nenik ule dae
16 Basa de Yesus kokolak bali nae, “Ta bisa hataholi dede bandu anak, boe ma tatanan nenik ule dae. Ma ta hambu hataholi tao banduk neu koi sosolon. Huu mete ma leo ndiak, na, hataholi ta bisa nita manggaledon bali. Banduk sosoan, na ndia taon neu mamana madema fo suek sa'an tao manggaledo hataholi mana neni dalek mai.c 17 Basa hata fo nana nafunik hatematak ia, dei fo dadik nana nitak. Ma basa hata fo hataholi ta bubuluk hatematak ia, dei fo hataholi bubuluk kana.d
18 De ei musi dudu'a neulalau dede'ak kala ia. Hataholi fo tebe-tebe sangga bubuluk Manetualain hihiin, malelan boe tamba. Tehuu hataholi fo ta mbali Manetualain hihiin, nggoan boe tamba.”e
Lamatuak Yesus bobonggi teteben nala
19 La'i esa, Yesus nasambute no hataholi no'uk kala. Boe ma inan no fadin nala mai fo sangga latonggo lo Ndia. Tehuu ala ta bisa deka-deka lo Ndia, huu hataholi no'un seli. 20 Boe ma hambu hataholi neu nafada Yesus nae, “Ama! Ama inam ma fadim mala lai deak. Ala sangga latonggo lo Ama.”
21 Boe ma Ana nataa nae, “Hei! Tehuu leo iak. Au inang ma Au tolanoo tetebe nggala, sila hataholi fo mana lamanene Manetualain Dede'a-kokolan, boe ma tao tunggan.”
Lamatuak Yesus tao hahae ani sanggu
22 La'i esa, Yesus noke ana mana tunggan nala nae, “Mai ita sa'e ofak, fo teni tasi selik teu.” Boe ma ala sa'e leu ofak esa, de mulai la'o. 23 Ledo-eik ala lala tasi lai, boe ma Yesus sunggu. Ta dook boe ma ani sanggu mai. Lii mbuka neni ofak dale neu. De ala hihii hambu soe so.
24 Ana mana tunggan nala lita leo ndiak, boe ma ala fafae Yesus lae, “Lamatuak! Lamatuak! Fo'a fo tulun dei! Ita sangga bolo mate ia so!”
Boe ma Yesus fo'a. De Ana nafada ani ma lii nae, “Hahae leo!” Boe ma lii ma ani hahae tutik.
25 Basa de Ana nafada ana mana tunggan nala nae, “Hatina de ei bei ta mamahele Au boe?”
Ala bii ma heran. Boe ma ala latatanek esa no esa lae, “Awii! Yesus ia, see? Talo bee de Ana bisa palenda ani ma lii, de ala tungga Ndia hihiin?”
Lamatuak Yesus husi heni nitu neme hataholi kamuluk mai
26 Ta dook boe ma ala losa dae baba'ek Garasa, nai tasi Galelea selik.f 27-29 Nai ndia, hambu hataholi esa nitu nalak dook so. Uman taa, ma kada ana leo nai lates. Tungga faik ana la'ok neu-mai, no nakaholak. Huu nitu la palendan nakandondoo henin. Hataholi henggen taa-taa lenik tali besi ma liti besi so, tehuu ana tao naketun. Boe ma nitu la lambue lakasetin fo nalai neni mamana nees neu.
Ledo-eik Yesus asa konda leme ofak mai, hataholi kamuluk ndia neni Ndia neu. Hataholi ndia nakau, boe ma lololi neu Yesus ein. De Yesus palendan nae, “Heeh, nitu! Kalua muma hataholi ia mai!”
Boe ma hataholi kamuluk ndia nakau nae, “Wei! Boso babalik au! Huu au bubuluk O ia, Yesus, Manetualain fo Naden Manai Lain Seli Anan! O boso tao doidoso au!”
30 Yesus natanen nae, “O nade see?”
Boe ma nitu ndia nataa nae, “Legion, huu ai no'uk, sama leo soldadu lifu-lifuk.” Ana nae leo ndiak, huu hambu nitu no'uk masok fo leo lai ndia aon dale.
31 Nitu la sila lambue loke lakandoo Yesus, fo boso nadenu sala leni Bolo Doidosok leu, fo ndia mamana kena koasa manggalauk kala.
32 Tehuu deka-deka nai ndia, hambu bafi bubua ina-huuk esa totofi dae, fo sangga nana'ak lai letek ndia bifin. Boe ma nitu la loke Yesus lae, “Kada madenu ai maso mini bafi la sila dalek miu!” Boe ma Yesus nakaheik. 33 Basa boe ma nitu la kalua la'o ela touk ndia, de maso leni bafi la sila dalek leu. Basa bafi la sila dadik lamulu, de ala lalai lapokak kala konda leme letek ndia mai, de tuda leni tasi dale leu. Boe ma basa sala bolo mate.
34 Mana manea bafi la lita leo ndiak, boe ma ala lalai ndule nggolok kala malai ndia, de ala tui basa mana dadik kala sila. 35 Hataholi no'uk kala lamanene tutuik leo ndiak, boe ma ala kalua leni mamanak ndia leu. Ala nau lita aon, hata fo mana dadik nai ndia so. Losa ndia, boe ma lita hataholi nitu nalak ndia nanggatuuk ndoo-ndoo dekak no Yesus ein. Ana pake balo'as so, ma mulun mopon so. Basa sala lita leo ndiak, boe ma ala bii. 36 De hataholi la fo mana lita dede'ak isinaak ndia, lafada hataholi fo bei fo mana maik sila, talo bee fo hataholi kamuluk ndia hai so. 37 Boe ma basa hataholi Gerasa mana leo lai dae baba'ek kala sila, loke Yesus fo Ana la'o ela sala, huu basa sala bii lalan seli.
Boe ma Yesus asa hene leni ofak dale leu, fo sangga fali leni tasi Galelea selik leu.
38 Tehuu hataholi fo isinaak nitu nalak ndia, nambue kokoe Yesus nae, “Ama! Mbo'i au tungga Ama boe!”
Tehuu Yesus bala nae, 39 “Kada leo iak! Malolenak o fali muni o bobonggim mala muu, fo tui sala la'e-neu Manetualain malolen, fo Ana taon neu o so.”
Basa boe ma hataholi ndia la'o ndule kota ndia, de ana tui basa hataholi la'e-neu Yesus tao nahain.
Lamatuak Yesus tao nasoda falik Yairus ana ina anan, ma tao nahai inak mana mbo'a daak
40 Basa boe ma Yesus asa sa'e ofak fali leni tasi Galelea selik leu. Ledo-eik ala konda leme ofak mai, hataholi no'uk kala lahani Ndia taa-taa so. Ala mai lakalilimbu fo sangga soluk Ndia. 41-42 Nai ndia boe oo hambu hataholi esa, nade Yairus. Ndia ndia, malangga uma huhule-haladoik nai kota ndia. Ndia anan, kada kisak; ana ina anak teuk sanahulu dua. Hatematak ia ina anak ndia namahedi belak, elaba'ik maten. Ledo-eik Yairus nita Yesus mamain, ana sendek neu Yesus matan. Ana noke Yesus neni uman neu, fo tulun ndia ana ina anan.
Ledo-eik Yesus nataa nae hei, boe ma ala la'o leni Yairus uman leu. Tehuu hataholi no'uk kala lasuu tungga boe. Huu ndia de ala la'ok lakaseseti.
43 Hambu inak esa la'ok tungga sala boe. Ana hambu bulak ta no hahaen, teuk sanahulu dua ia so. Ana nabasa doin ma hata-heton nala so, fo bae neu dotel asa. Tehuu ta hambu esa bisa tao nahain. Ndia hedin ndia, nambue foe nakandoo.g 44 Boe ma ana neu deka-deka no Yesus dean. De ana daba la'e Yesus badu mbedan. Ledo-eik ana daba la'en, boe ma ndia mbo'a daan mada tutik.
45 Nggengge neuk Yesus nambadeik, boe ma natane nae, “See ndia kame la'e Au ia?”
Tehuu ta hambu hataholi esa manaku boe. Boe ma Petrus nae, “Lamatuak boe oo! Hataholi no'uk lakaseseti leo iak! Ala lambue latumbuk leme dea mai so.”
46 Tehuu Yesus nafadan nae, “Taa! Isinaak Au ameda koasa kalua neme Au mai. De Au bubuluk hataholi esa daba la'e Au.”
47 Ledo-eik inak ndia nameda ndia ta bisa kekek, boe ma ana bii nalan seli. Ana dele, de ana sendek neu Yesus. Boe ma ana tui dede'an huu-okan, neu basa hataholi no'uk kala matan. De ana nafada nae, nandaa no ana daba la'e Yesus, boe ma ana hai tutik.
48 Boe ma Yesus nafada ndia nae, “Ka'a inak! O hai so, huu o mamahele Au. Fali uma muu leo mua mole-dame!”
49 Ledo-eik Yesus bei kola-kola no inak ndia, tehuu Yairus hataholin esa mai nafadan nae, “Awii, ama! Ama anan taak kana so! Ana mate so, de boso tao nasambutek neu Ama Mesen bali.”
50 Tehuu ledo-eik Yesus namanene hataholi ndia nafafadan, boe ma Ana nafada Yairus nae, “Ka'a! Kada nee-nee! Boso bii! Kada mamahele Manetualain. Ndia ndia nasala'e nala ka'a anan.”
51-53 Ledo-eik ala losa Yairus uman, hataholi la henuk lai ndia so. Ala lamatani lakaleleu. Boe ma Yesus ka'i sala nae, “Ei hahae mamatani leo! Kakanak ia ta mate. Kada ana sunggu!”
Tehuu hataholi la kada hika kolombimbiin, huu sila ndia lita matan kakanak ndia ketu ani hahaen so. Boe ma Yesus noke nala ina anak ndia ina-aman, Petrus, Yohanis, ma Yakobis, fo maso dalek leu no'u lo Ndia. Fe'ek kala Ana nadenu sala lahani lai kada deak.
54 Ala maso, boe ma Yesus to'u nala kakanak ndia liman, ma noke nae, “Ina anak! fo'a leo!” 55 Kada nggengge neuk kakanak ndia nasoda fali, de ana fo'a tutik. Basa boe ma Yesus nadenu ina anak ndia inan nae, “Fee kakanak ia na'a dei!” 56 Ina anak ndia ina-aman heran lalan seli. Tehuu Yesus fee nasanenedak neu sala, fo suek ala boso tui-bengga dede'ak ia neu hataholi la.