Lamatuak Yesus tao nahai soldadu Roma ana mana tao uen
7
Yesus fee nanonolik basa leo ndiak, boe ma Ana fali neni kota Kapernaum neu. 2 Nai ndia, hambu malangga soldadu Roma esa. Ana naena ana mana tao ues esa, fo namahelen. Hataholi mana tao ues ndia namahedi, de elaba'ik maten. 3 Neu faik fo malangga soldadu ndia namanene la'e-neu Yesus, boe ma ana nadenu lasi Yahudi hida, leu loke Yesus mai fo tao nahai ana mana tao ues ndia. 4 Ala kokoe Yesus, fo mete ma bisa, na, Ana tungga no sala fo neu tao nahai hataholi ndia. Ala kokoe Ndia lae, “Ama! Hataholi Roma ia, hataholi neulauk! Ndia ndia, nandaa Ama tulun. 5 Ana nambadedei uma huhule-haladoik esa fee ita so, huu ana sue ita hataholi Yahudi.” 6 Boe ma Yesus tungga no sala.Ala bei ta losa uma, tehuu malangga soldadu ndia nadenu nonoon mai nafada Yesus so nae, “Lamatuak, boso masotak mai bali, huu au ta andaa simbok Lamatuak nai au umang. 7-8 Ma au boe oo, ta andaa asale Lamatuak. Manggaledok so ae, Lamatuak naena koasa. De sadi kada Lamatuak kokolak neme ndia mai, neu ko au ana mana tao ueng hai tutik. Au bubuluk dede'ak ia, huu au malangga nggala laena koasa, fo palenda au. Ma au boe oo aena koasa fo palenda au soldadu nggala. Mete ma au palenda au ana palendang ae, ‘Muni ele muu!’ neu ko ana neu. Mete ma au ae, ‘Muni ia mai!’ neu ko ana mai. Ma mete ma au adenu au hataholi mana tao ueng ae, ‘Tao ia!’ neu ko ana tao leo ndiak. De sadi kada Ama kokolak, neu ko au ana mana tao ueng ia, hai tutik.”
9 Yesus namanene leo ndiak, boe ma Ana heran. Ana heok aon, de nasale hataholi no'uk fo mana tungga Ndia. Boe ma Ana nae, “Heran, oo! Doo basa ia so, tehuu Au bei ta atonggo itak ua hataholi Yahudi esa boe, fo namahehelen tean sama leo hataholi Roma ia!”
10 De Yesus la'ok losa kada ndia. Boe ma malangga soldadu nonoon nala fali. Ala losa malangga soldadu ndia uman, boe ma lita ana mana tao ues ndia hai tutik so.
Lamatuak Yesus tao nasoda falik ina falu esa anan
11 Fo'a mai, boe ma Yesus no ana mana tunggan nala la'o leni nggolok esa leu, nade Nain. Hambu hataholi no'uk la'ok sama-sama lo sala. 12 Ledo-eik ala sangga dekak lo nggolok ndia lelesun dalek so, hambu hataholi bubuak esa, sangga kalua leu latoi mamate. Mana matek ndia, na ina falu esa ana tou ana kisan. 13 Ledo-eik Yesus nita ina falu ndia, boe ma Ana tuda kasian. De Ana nafada inak ndia nae, “Ina! Nee-nee leo, boso mamatani bali!”
14 Basa de Yesus neu deka-deka, de tai mamana ndondolo mamate ndia. Boe ma hataholi mana ndolo mamate sila, hahae tataak. De Yesus nafada mamate ndia nae, “Ta'e! Fo'a leo!” 15 Boe ma kakanak ndia nasoda fali, de ana fo'a nanggatuuk tutik. De ana mulai nakokola no hataholi mana mambadeik ndule ndia. Basa de Yesus nafada inak ndia nae, “Ina! Ia ina anan.”
16 Basa hataholi malai ndia, bii lalan seli! Boe ma ala koa-kio Manetualain lae, “Manetualain nadenu Ndia mana kokolan esa fo ana seli neu ita so!” Hambu fe'ek bali lae, “Manetualain mai nai ita laladan so, fo natudu Ndia dale malolen!” 17 Boe ma tutuik ndia natanggela neni sudi bee neu, nai propensi Yudea, losa nusa baba'e fe'ek boe.
Yohanis Mana Salanik nadenu nadedenun neni Lamatuak Yesus neu
18-20 Yohanis Mana Salanik ana mana tunggan nala lamanene basa dede'ak fo Yesus taok so. Basa de leu tui Yohanis nai bui dale. Boe ma ana nadenu hataholi dua leni Yesus leu, fo latanen lae, “Ama ia tebe-tebe Karistus, fo ai mahanik, do? Do ai musi mahani hataholi fe'ek bali?”
Basa de latonggo lo Yesus, boe ma latane leo ndiak.
21 Ledo-eik Yesus tao nahai hataholi no'uk hedin mata-matak, nadedenuk sila lai ndia. Ma husi kalua heni nitu neme hataholi nitu nalak mai. Ma tao nahai hataholi mbokek, de ala bisa lita.
22 Boe ma Yesus nafada Yohanis ana mana tunggan nala nae, “Ei fali miu mafada ka'a Yohanis basa hata fo ei mamanenen so, ma ei mita aom so, sama leo Manetualain mana kokolan Yesaya sulak nae,
‘Hataholi mbokek, bisa nita.
Hataholi lu'uk, fo'a fo la'ok.
Hataholi hedi kusta, dadik malalaok.
Hataholi mbakek, bisa namanene.
Hataholi kamates, nasoda fali.
Hataholi kasian, namanene Hala Malole.’a
23 Fali miu mafada ka'a Yohanis mae, ‘Hataholi ta mana mae simbok Au, dei fo laua-lanale tebe-tebe.”’
24 Neu faik fo Yohanis ana mana tunggan nala fali so, boe ma Yesus kokolak no hataholi no'uk kala sila la'e-neu Yohanis nae, “Neu faik fo ei miu sangga Yohanis nai mamana nees ndia, ei dudu'a mae sangga matonggo mia hataholi mata leo beek? Ei ta miu matonggo mia hataholi noe-na'uk, fo sama leo oo, de ani fumbun neu-mai. 25 Ei ta miu fo mita hataholi mana pake balo'a mabeli, sama leo hataholi leo nai uma manek! 26 De ei miu tilo see nai ele? Do ei miu sangga Manetualain mana kokolan? Tetebes! Ndia ndia, Manetualain mana kokolan fo ana seli. 27 Susula Malalaok sulak memak la'e-neu Yohanis nae,
‘Mamanene! Au adenu Au hataholing,
fo neu soi dalak fee O.’b
28 Nai dae-bafok ia, ta hambu hataholi esa boe, fo ana seli lena heni Yohanis. Tehuu nai Manetualain nusan, kada hataholi manai dae tete'en, ana seli lena heni Yohanis.”
29 Hataholi mana lamanene Yesus kokolan ndia, ala lalelak so lae, Manetualain dalan ndia, dala soda ndoos. Mana susu bea la boe oo leo ndiak. Huu makahulun Yohanis salani ma nanoli sala so. 30 Tehuu hataholi maleme paltei anggama Farisi ma malela heti-heu Yahudi, ta nau tungga Manetualain hihiin. Huu ndia de, ala ta loke Yohanis salani sala.c
31 Basa boe ma Yesus natane nae, “Au sangga akasasama hataholi hatematak ia, no hata? Hataholi mata leo beek sila ia? 32 Sila ndia, sama leo kakanak kala mana manggatuuk lai pasak. Ala lambue langgou ma manggalau lae,
‘Ai fuu kinuk no'u,
tehuu ei ta longge mamahoko.
Boe ma ai soda sosoda bebe'e mamate,
tehuu ei ta mamatani.’
33 Huu Yohanis Mana Salanik ta ninu anggol, ma nahiik puasa, na, ei makasasa'ek ndia mae, ‘Ndia nitu nalak!’ 34 Tehuu hatematak ia, Au, Hataholi Isi-isik ia, inu anggol ma u'a loti leo basa faik. Boe ma ei makasasa'ek Au mae, ‘Ndia ndia, memak hataholi balena'ok! Mana mafu funak bali! Neu nanonoo no mana susu bea la! Bubuak esa no hataholi papake taak kala! Ta nameda aon bali!’ 35 Tehuu ei tanda Au kokolang leo! Hataholi fo bubuluk tebe-tebe, na, ala tungga Manetualain hihiin.”
Lamatuak Yesus na'a feta nai Simon uman
36 Nai kota ndia, hambu hataholi Farisi esa, nade Simon. La'i esa, ana hoka Yesus asa mai la'a nai ndia uman. Yesus asa simbo lala hohokak ndia, boe ma leu fo sangga langgatuuk la'a. 37 Faik ndia, hambu ina kalabik esa namanene nae, Yesus sangga na'a nai ndia. Boe ma ana maso mai, ma to'u neni mina kaboo menik mabeli boto esa. 38 Ana mai dekak nesik Yesus dean. Basa de ana sendek neu Yesus ein. Boe ma ana namatani nakaleleu losa luun tuda la'e Yesus ein. Ana seka Yesus ein nenik ndia langga bulu hehelin, ma idu nakamiminak Yesus ein. Basa de ana di'a mina kaboo menik ndia neu Yesus ein.d
39 Simon ndia, bubuluk inak ndia nanggatutuu-nambadedein. Huu ndia de ana dudu'a nai dalen nae, “Ia dadik buti so, Yesus ia, ta Manetualain mana kokolan! Mete ma tebe-tebe Manetualain nadenu Ndia mai, na, neu ko Yesus bubuluk so nae, inak mana mafaloe Ndia, na, ina kalabik. Manetualain mana kokolan ta matak leo Ndia, huu hataholi malalaok ta bole deka-deka no hataholi manggenggeok kala!”
40 Tehuu Yesus bubuluk hata fo Simon dudu'ak ndia. Boe ma Ana nae, “Ka'a Simon! Leo iak, ka'a. Au sangga afada ka'a dede'ak esa.”
Boe ma Simon nataa nae, “Neu! Ama mesen kokolak leo.”
41 De Yesus ngganggali kokolak neu ndia nae, “Hambu hataholi esa, nateme fee hataholi fe'ek tonda doin. Ana fee nitak doi tonda neu hataholi dua. Ana fee esa tonda doi fulak natun lima, ma fe'ek kada lima huluk. 42 Tehuu losa fain fo fee falik doik sila, na, dua sala ta labe'i. Boe ma mana fee doi tonda ndia, tuda kasian neu dua sala. Huu ndia de ana nakambo'ik dua sala leme hutan nala mai. Mete ma tungga ka'a Simon dudu'an, na, neme hataholi kaduak kala mana tonda doik sila, na, bee ndia susuen lena mana fee doi tonda ndia?”
43 Simon ndaso tutik nae, “Neu ko mana mahuta no'uk, maa!”
Yesus nataa nae, “Tetebes, ka'a!”
44 Boe ma Ana heok nasale inak ndia, de nafada Simon nae, “Soba ka'a Simon suli neulalau inak ia. Ledo-eik Au maso uni ka'a uman mai, ka'a ta sadia oe fo safe Au eing tungga ita hadan. Tehuu inak ia, nakataba Au eing nenik ndia luun, boe ma seka nalalaon nenik ndia langga bulun. 45 Ma isinaak, ledo-eik ka'a Simon soluk Au uni uma dalek mai, ka'a Simon ta idu Au, tungga ita natetemen. Tehuu mulai neme Au maso uni uma ia dalek mai, inak ia ta hahae idu Au eing. 46 Ka'a Simon boe oo, nafalende heni hada di'a mina neu hataholi mana hokak langgan, fo isinaak Au maso mai. Tehuu inak ia, di'a mina kaboo menik mabeli ana seli neu Au eing so. 47 Ka'a Simon mamanene neulalau dei! Memak inak ia salan no'uk. Tehuu Manetualain koka heni basa salan so, huu natudu ndia susuen ma namemeda makasin no'un seli neu Au. Tehuu hataholi fo nameda aon ta tao salak no'uk, ndia boe oo nameda ta paluu hambu ambon no'uk. Huu ndia de ana ta nalelak susuek, ma ta nameda makasi nalelak neu Manetualain.”
48 Basa boe ma Yesus kokolak no inak ndia nae, “Au koka heni o sala-singgom mala so!”
49 Hataholi mana langgatuuk la'a no'u, mulai lakukutuk lae, “Wei! Ana dudu'a nae Ndia ia, see?! Ana nambalani fee ambon neu hataholi salan, maa! Naa te kada Manetualain mesak kana naena haak fo koka heni hataholi salan! Awe'ek!”
50 Tehuu Yesus nafada inak ndia nae, “Huu o mamahele Au so, de Manetualain nasala'e nala o so. Fali mua mole-damek leo!”