Lamatuak Yesus fee nakandandaak la'e-neu bini nai dae mata-matak kala
4
La'i esa, boe ma Yesus neni dano Galelea neu seluk. Boe ma hataholi no'uk mai lakahohombu lala Ndia. Basa de Ana hene neu nanggatuuk nai ofak esa lain fo mana seek nai ndia, suek Ana fee nanonolik. Basa hataholi malai madak lain lamanene Ndia.a
Markus 4:1-20
3 “Ei mamanene neulalau baa! Hambu hataholi esa neu ngganggali bini nai osin dale. 4 Ledo-eik ana ngganggali bini la sila, nggelok tuda lai dalak lain. Boe ma mbuik kala mai, de tututu la'a heni basa bini la sila. 5 Ma bini nggelok tuda lai dae batu. Bini la sila lanumbu lai-lai. Tehuu dae ndia ni'is, 6 de ledo-eik ledo nahaa boe ma numbun nala male, losa lamatuu de mate basa sala. Huu okan nala ta tola demak losa dae dale.
7 Bini nggelok tuda lai fii la laladan. Boe ma fii sila kabi lisa numbuk kala sila, losa ta hambu labuna-laboa. 8 Ma hambu bini nggelok bali tuda lai dae isi malole. Bini la sila lanumbu, de ala ina-huu losa labuna-laboa. Hambu nggelok buna-boan la'i telu hulu, hambu la'i nee hulu, ma hambu losa la'i natun esa.
9 De ei see kandi'i dook, na mamanene neulalau leo!”
Hatina de Lamatuak Yesus kokolak nenik nakandandaak
10 Neu faik fo Yesus mesak kana so, Ndia ana mana tungga kasanahulu duan nala ma hataholi fe'ek hida fo mana lamanene Ndia nanonolin ndia so, ala mai latonggo loon. Ala loken fo nafada sala nakandandaak ndia ndandaan. 11 Boe ma Yesus nataa nae, “Huu ei mahiik bubuluk tebe-tebe Manetualain palendan, de Au afada memak nakandandaak ndia ndandaan. Tehuu mete ma hataholi fe'ek, na Au fee nanonolik unik kada nakandandaak. 12 Hataholi fe'ek kala sila, na sama leo Manetualain mana kokolan sulak memak so nae,
‘Ala lita so, tehuu ta nau lalelak kana.
Ala lamanene so, tehuu ta nau bubuluk kana.
Neme naa fo boso ala lamahele neu Manetualain,
suek Manetualain ta paluu fee ambon neu sala so.”’b
Lamatuak Yesus nafada nakandandaak la'e-neu bini ndia ndandaan
13 Basa boe ma Yesus nafada sala nakandandaak ndia ndandaan nae, “Mete ma ei bei ta malelak nakandandaak ia ndandaan, na neme bee mai ei bisa malelak nakandandaa fe'ek kala ndandaan? 14 De nakandandaak ndia ndandaan leo iak: hataholi fo mana ngganggali bini ndia, sama leo hataholi fo mana tui-bengga Manetualain Dede'a-kokolan. 15 Ma bini fo mana tuda lai dalak, losa mbuik kala tututu la'a heni sala, na sama leo hataholi fo mana namanene Manetualain Dede'a-kokolan. Tehuu ta dook boe ma nitu la malanggan mai, de ana ha'i neni Dede'a-kokolak ndia neme hataholi dalen mai. 16 Bini fo mana tuda lai dae batu ndia, sama leo hataholi fo mana namanene ma ana simbok Dede'a-kokolak ndia no namahokok. 17 Tehuu Dede'a-kokolak ndia ta naoka. Huu ndia de ta nana mbeda nala dook nai hataholi ndia dalen. Ledo-eik hataholi fe'ek tao lakatoto'ak kana huu ana simbok Dede'a-kokolak ndia, de ana mbo'i heni tutik Dede'a-kokolak ndia. 18 Ma bini fo mana tuda lai fii laladan ndia, sama leo hataholi fo mana namanene basa Dede'a-kokolak ndia so. 19 Tehuu kada ana nasambute no dede'a mata-matak kala, fo suek nasoda nenik kada lole-lada dae-bafok. De basa dede'ak kala sila seti heni Dede'a-kokolak ndia neme dalen mai, losa ta hambu buna-boak faa boe. 20 Tehuu bini fo mana tuda lai dae isi malole ndia, sama leo hataholi fo mana pasa ndi'i doon, de ana simbok Dede'a-kokolak ndia, ma ana tungga Manetualain hihiin. Boe ma ana tao kada dede'a malole, sama leo bini mana maboak ndia. Hambu luma labuna-laboa la'i telu hulu, hambu la'i nee hulu, ma hambu losa la'i natun esa.”
Boso tatana misa bandu anak nenik lembeneu
21 Yesus kokolak nakandoo neme ofak ndia lain mai. Ana fee nakadaik nakandandaak esa seluk bali nae, “Leo bee! Ei mita mitak do taa, hataholi dede nala bandu anak, boe ma ana tatanan nenik lembeneu! Do ana taon neu mamana susungguk sosolon! Taa, hetu maa? Mete ma mbedan leo ndiak, na, manggaledon ta so. Hataholi la musi mbeda banduk neu mamana madema, fo suek manggaledok.c
Markus 4:21-41
22 De hata fo nana nafunik nai hatematak ia, dei fo nana nitak. Hata fo hatematak ia hataholi bei ta bubuluk, dei fo nana bubuluk.d 23 De see fo kandi'i dook, na mamanene neulalau leo.
24 Dudu'a neulalau! Mete ma ei uku hataholi fe'ek tataon, na, hataholi uku ei leo ndiak boe. Ma Manetualain boe oo uku nasafali ei leo ndiak. Tehuu Ndia u'ukun belan lena bali.e
25 Mete ma hataholi nau sangga bubuluk tebe-tebe Manetualain hihiin, na, malelan boe tamba. Tehuu mete ma hataholi ta tao a'afik neu Manetualain hihiin, na, nggoan boe tamba.”f
Lamatuak Yesus fee nakandandaak la'e-neu bini mana moli aok
26 Basa boe ma Yesus kokolak nakadaik nae, “Manetualain nusa palendan boe ina-huu sama leo bini fo hataholi ngganggalin nai osin. 27 Mae hataholi ndia fali, boe ma ana sunggu, de nafalende heni bini ndia so. Tehuu bini ndia nanumbu ma ana boe ina-huu nakandoo. 28 Tehuu bini ndia moli aon nai dae, boe ma nandana, nabuna, losa naboa. 29 Mete ma hade namatasa so, na, mahadeoek nalelak kada mai fo ketu-kolu leo. Manetualain nusa palendan leo ndiak boe. Basa sila, Manetualain tataon.”g
Lamatuak Yesus fee nakandandaak la'e-neu ai de'e kadi'i anak
30 Basa ndia boe ma Yesus kokolak nakadaik nae, “Au akadaik seluk nakandandaak esa bali, leo iak: ei bisa makasasamak Manetualain hataholin nala. Sososan kada lumak, tehuu tamba faik boe lamano'u. 31 Ndia nonook leo bali ai de'e kadi'i anak. 32 Mete ma ita sele ai de'ek ndia, na ana moli dadi neu ai ina-huuk nalan seli. Boe ma mbuik kala mai sangga sa'ok fo landunu leu ndia.”
33 Yesus dala nanonolin neu sala tungga sila nalelelan. 34 Mete ma Ana nanoli hataholi la, na, Ana nateme pake nakandandaak. Tehuu mete ma Ana nanoli ana mana tunggan nala, na, Ana nafada basa nakandandaak ndia ndandaan.
Lamatuak Yesus tao hahae ani sanggu
35 Ledo bobon ndia, Yesus bei nai ofak lain. Boe ma Ana nadenu ana mana tunggan nala nae, “Mai fo ita teni dano selik teu.”
36 Basa boe ma ala sa'e ofak no'u lo Yesus. De ala la'o ela hataholi nouk kala sila leme ndia. Tehuu hambu luma sa'e ofa fe'ek. 37-38 Faik ndia Yesus ndae langgan neu kailunu lain, de Ana sunggu namanee neme ofa iko. Ta dook boe ma ani sanggu mai. De lii mbuka nakandoo neni ofak dale neu, losa hihii henun. De ana mana tunggan nala bii lalan seli. Boe ma ala mai fafae Yesus lae, “Ama! Fo'a dei! Ita sangga bolo ia so! Tehuu Ama ta tao mbambalik neu ai!”
39 Yesus namanene leo ndiak, boe ma Ana fo'a, de palenda ani ndia nae, “Nee-nee leo!” Basa de Ana palenda dano nae, “Ndoo-ndoo leo!” Ani ndia hahae tutik, ma dano boe oo ndoo-ndoo memak. 40 Basa boe ma Yesus nafada ana mana tunggan nala nae, “Hatina de ei basa nggei bii leo iak? Ei ta mamahele Au, do?”
41 Basa sala bii ma heran, boe ma lakokola lae, “Ndia ia see bae? Losak ani no lii lamanene Ndia bae maa!”