2-6 Nai mamanak ndia, hambu tou nitu nalak esa, losa namulu. Ana leo nai lates sala. Leledo-le'odaen ana nakahola ma nafeok lete mbumbukuk kala malai ndia, fo nakau nakandondoo henin. Ma ana tutu nahina ao-inan nenik batu. Ndia balakain ana seli. Tehuu ta hambu hataholi esa bisa hengge nalan, mae ala henggen lenik tali besi boe. Hataholi la hengge lima ein taa-taa lenik tali besi, tehuu ana tao naketu heni tali besi ndia ma ana tao natepa besi lalangge ein. Ndia balakain ana seli, losak ta hambu hataholi esa boe bisa nakalee nalan.

Ledo-eik Yesus asa konda leme ofak lain mai, de bei heta ein neu madak lain, tehuu tutik tou kamuluk ndia nita sala neme dook mai. Basa boe ma ana neme late sala mai, de nalaik neu sendek neu Yesus matan. 7-8 Yesus nita touk ndia matan leo ndiak, boe ma Yesus kokolak nae, “Wei! Nitu manggalauk! O kalua muma hataholi ia mai leo!”

Boe ma hataholi ndia nakau natingga nalan seli nae, “Wei! O sangga tao au leo beek ia! Au bubuluk O ia Yesus, fo Manetualain mana koasa nai lain seli Anan. Au hule fo O boso tao doidoso au baa!”

9 Boe ma Yesus natanen nae, “O nade see?”

Hataholi ndia nataa nae, “Au nade Legion, huu ai makadotok nalan seli, sama leo batalion no'uk!”

10 Boe ma nitu la pake hataholi ndia de noke Yesus, fo Ana boso fee sala kalua leme mamanak ndia mai.

11 Ta dook neme mamanak ndia mai, hambu hataholi hida lanea bafi lalae esa. Bafi la sila meda 2.000. Ala totofi nana'ak lai letek bifin. 12 Basa boe ma nitu la sila loke Yesus lae, “Madenu ai mini bafi la sila dalek miu.”

13 Yesus namanene leo ndia, boe ma Ana nakaheik. Tutik nitu la sila kalua leme hataholi ndia dalek mai, de ala maso leni bafi la sila dalek leu. Boe ma bafi lifu kaduak kala sila lalai lapokak kala loe tungga letek bifin leni dano dale leu, de basa sala bolo mate leme ndia.

14 Basa hataholi mana manea bafi sila lita leo ndiak, boe ma ala bii lalan seli. Basa boe ma ala lalai leu lafada basa hataholi ndule basa nggolo malai ndiak kala. Boe ma hataholi no'uk kala mai fo sangga lita hata fo mana dadik ndia so. 15 Ala mai latonggo lo Yesus, ma lita hataholi nitu nalak ndia nanggatuuk nai ndia. Dudu'an namaneu so, ma ana pake balo'as so. Basa hataholi la sila lita leo ndiak, boe ma ala bii, huu ala bubuluk, see ndia bisa husi kalua heni nitu makadotok leme hataholi ndia mai, na, memak hataholi ndia ana seli. 16 Basa boe ma ala tui lafeok lae, sila lita lo mata hehelin nala, tou kamuluk ndia hai so, ma bafi la bolo mate sala so. 17 Boe ma nggolok ndia hataholin nala mai loke fo Yesus kalua la'o ela sila mamanan ndia.

18 Ledo-eik Yesus sangga sa'e neni ofak dale neu, boe ma hataholi fo isinaak nitu nalak ndia mai noke Ndia fo ana nau tungga Ndia boe.

19 Tehuu Yesus ta nau. Ana kokolak nae, “Malolenak o fali fo mafada basa o bobonggim mala, hata fo Manetualain taon neu o so. Ma mafada sala mae, Manetualain sue o nalan seli.”

20 Basa boe ma hataholi ndia fali de ana la'ok ndule nusa kota kasanahuluk fo lateme loken lae, ‘Dekapolis’. Ana tui-bengga hata fo Yesus taon neu ndia so. Basa hataholi la fo mana lamanene tutuik ndia, ala heran lalan seli, de lae, “Memak tetebes bae maa!”

21 Basa boe ma Yesus asa fali seluk leni dano selik leu. Ledo-eik ala konda leme ofak lain mai, hataholi makadotok kala mai lakaseseti lala Ndia.

22 Nai ndia, hambu hataholi esa nade Yairus boe. Ndia ndia, malangga uma huhule-haladoik nai kota ndia. Ledo-eik ana nita Yesus, boe ma ana sendek neu Yesus matan, 23 de kokoe nae, “Ama! Au ana ina anang bei fo teuk sanahulu dua, namahedi belak, de elaba'ik maten. Ama tulun mai fo tao mahain dei.”^a

24 Boe ma Yesus tungga Yairus neni uman neu.

Tehuu neu faik fo ala mulai la'ok, boe ma hataholi no'uk kala tungga Ndia, losa ala lakaseseti lala Ndia leme kii-konak mai.

25 Nai hataholi no'uk kala sila laladan, hambu inak esa, ana hambu bulak tehuu daan ta mada ndoos losa teuk sanahulu dua ia so. 26 Ana nabasa doin ma hata-heton nala so, fo bae neu dotel asa. Ta hambu esa tao nahain boe. Tehuu hedin ndia foe nakandondoo henin. 27-29 Inak ndia namanene tutuik no'uk la'e-neu Yesus so. De ana nakaseseti neu hataholi no'uk kala sila laladan, fo nau neu deka-deka no Yesus dean. Ana dudu'a nai dalen nae, “Sadi kada au bisa kame la'e Ndia badun, na au hai ndia so!”

Ledo-eik ana kame la'e Yesus badun, nggengge neuk ndia mbo'a ndaan mada tutik kana. De ana nameda hai ndoos so.

30 Nandaa no ledo-eik ndia, Yesus nameda balakain kalua neme ao-inan dale mai. Boe ma Ana suli dea neu, de Ana mete neu hataholi no'uk kala sila. Boe ma Ana natane nae, “Ei see ndia kame la'e Au badung?”

31 Ndia ana mana tunggan nala lataa lae, “Ama mete aom leo! Hataholi desi-desi ia lakaseseti aok. De Ama matane mae, ‘See ndia kame la'e Au badung?”’

32 Tehuu Yesus mete ndule sala, fo Ana sangga bubuluk isinaak see ndia kame la'e Ndia. 33 Inak ndia namanene Yesus natane leo ndiak, boe ma ana bii nalan seli. Basa boe ma ana sendek neu Yesus matan, de ana manaku basan nae, “Ama! Au ndia kame la'e Ama badum.”

34 Boe ma Yesus nataan nae, “Huu ina mamahele tebe-tebe neu Au, de ina hai ia so. Hatematak ia ina fali no namahokok leo, huu ina toto'an basan so.”

35 Yesus bei kola-kola leo ndiak, boe ma hataholi esa neme Yairus uman mai, de nafada nae, “Kasian bae, ana fe'on maten so. De boso tao makasosotak Ama Mesen bali. Ana ta paluu neu so.”

36 Tehuu Yesus ta mbali hataholi ndia kokolan. De nafada Yairus nae, “O ta paluu bii! Kada mamahele muu Manetualain leo.” 37 Boe ma Yesus la'o ela ana mana tungga fe'en nala. Tehuu Ana noo Petrus, Yakobis ma fadin Yohanis, de ala la'ok lakandoo. 38 Ledo-eik ala losa Yairus uman, boe ma ala lita hataholi no'uk langgilo lalan seli, ma lamanene lamatani lakaleleu. 39 Yesus maso dalek neu, boe ma Ana natane sala nae, “Hatina de ei manggilo ma makaleleu leo iak? Kakanak ia ta mate. Kada ana sunggu ndia.”

40 Ala lamanene Yesus kokolan leo ndiak, boe ma basa sala hika haumemee Ndia.

Basa boe ma Ana nadenu basa sala leni deak leu. Boe ma Ana noke nala kakanak ndia inan no aman, ma ndia ana mana tungga katelun, de basa sala maso leni ana ina anak ndia kaman dale leu. 41 Boe ma Yesus to'u nala kakanak ndia liman, de Ana kokolak neu kakanak ndia nenik sila dede'a Aram nae, “Talita kum!” (Ndandaan nae, “Ina anak! Fo'a leo!”)

42-43 Nggengge neuk, ina anak ndia fo'a, de ana mulai lala'ok. Boe ma Yesus nafada inan nae, “Fee kakanak ia na'a leo!”

Basa hataholi fo lita hata fo mana dadik ndia, ala heran lalan seli. Tehuu Yesus ka'i nisak kasa nae, “Ei boso mafada esa boe mae, Au tao asoda falik kana so!”