Lamatuak Yesus tao nahai hataholi kamahedi kusta esa
8
Yesus loe neme letek lain mai, boe ma hataholi no'uk kala leu tungga Ndia. 2 Kada nggengge neuk, hambu hataholi kamahedi kusta esa mai nasale Ndia. Ana sendek, de noke tulun Yesus nae, “Lamatuak! Tulun au dei! Mete ma Lamatuak nau, na, Lamatuak bisa tao mamopo au heding ia, suek hataholi la boso nunute au bali, de au bisa uu hule-haladoi bali nai uma huhule-haladoik dale.”3 Yesus namanene leo ndiak, boe ma Ana look liman neu, de daba la'e hataholi kamahedi kusta ndia, ma kokolak nae, “Memak Au nau! O hai leo!” Nggengge neuk hataholi ndia hedin mopo tutik kana. 4 Boe ma Yesus nafadan nae, “Masanenedak baa! O hai ia so, tehuu ta bole mafada sudi see. O musi tungga ba'i Musa heti-heun dei. De muni malangga anggama muu, suek ana palisak o aom, fo ana bubuluk o hedim ia mopo tetebes so, do beik. Boe ma o musi fee tunu-hotuk dadik tanda makasi, fo suek basa hataholi la bubuluk lae, o hai tetebes so.”a
Lamatuak Yesus tao nahai malangga soldadu Roma esa, ana mana tao uen
5 Basa ndia boe ma Yesus maso neni nggolo Kapernaum neu. Nai ndia, hambu malangga soldadu Roma esa mai fo sangga noke tulun nae, 6 “Lamatuak! Au ana mana tao ueng esa namahedi belak nai uma. Ana ta bisa fo'a neme koin mai, huu ana doidoso nalan seli.”
7 Yesus nataa nae, “Malole! Dei fo Au uu fo tao ahain.”
8 Tehuu malangga soldadu ndia nae, “Lamatuak! Lamatuak boso makasosotak aom fo muu bali, huu au ta andaa simbok Lamatuak nai au umang. Sadi kada Lamatuak kokolak muma ia mai, na neu ko au ana mana tao ueng ndia, hai tutik. 9 Au bubuluk dede'ak ia, huu au malangga nggala laena koasa fo palenda au. Ma au boe aena koasa fo palenda au ana palenda nggala. Mete ma au palenda au ana palendang ae, ‘Muni ele muu’, na neu ko ana neu. Mete ma au ae, ‘Muni ia mai!’ na neu ko ana mai. Ma mete ma au adenu au hataholi mana tao ueng ae, ‘Tao ia!’ na, neu ko ana tao. De sadi kada Lamatuak kokolak, na neu ko au ana mana tao ueng ndia, hai tutik.”
10 Yesus namanene leo ndiak, boe ma Ana heran. De Ana kokolak neu hataholi no'uk kala sila fo mana tungga Ndia nae, “Heran ei! Doo basa ia, Au bei ta atonggo itak hataholi Yahudi esa boe, namahehelen tean sama leo hataholi Roma ia! 11 Mamanene baa! Huu dei fo hataholi deak no'uk sama leo hataholi Roma ia, fo leme ledo sasadun dulu mai, ma neme ledo tetesan neu, fo langgatuuk la'a feta no'u lo ba'i Abraham, ba'i Isak, ma ba'i Yakob nai Manetualain uman nai nusa sodak.b 12 Mae Manetualain hele nala hataholi Yahudi la fo dadik Ndia hataholin so, tehuu hambu no'uk kala ta mbali Ndia. Dei fo Ana timba heni sala leni mamana makiu-mumuuk leu. Lai ndia lamatani lakaleleu ma ala doidoso lalan seli.”c
13 Yesus kokolak basa leo ndia, boe ma Ana nafada malangga soldadu ndia nae, “Ama fali leo. Huu ana mana tao ues ndia hai so, sama leo Ama namahehelen.” Nandaa no ledo-eik ndia boe oo, ana mana tao ues ndia hai tutik.
Lamatuak Yesus tao nahai hataholi kamahedik makadotok
14 La'i esa, Yesus neni Petrus uman neu. Ana nita Petrus ali-inan sunggu nai koi lain, huu ana sumai. 15 Yesus to'u nala liman, boe ma ina lasik sumain mopo tutik kana. De ana fo'a neu ono-lau Yesus asa.
16 Ledo-eik ledo mulai tesa, boe ma hataholi la mai leni sila hataholi nitu nalak kala. Boe ma Yesus palenda nitu la sila nae, “Heeh, nitu! Malai heok mima hataholi la ia mai!” Boe ma nitu la sila kalua tutik. Ndia boe oo tao nahai basa hataholi kamahedik kala. 17 Ana tao basa sila, suek tao tungga hata fo Manetualain mana kokolan Yesaya sulak memak kana so nae,
“Ana tao nahai ita hedin nala.
Ma Ana lemba nala ita doidoson nala.”d
Hataholi fo mana nau tungga Lamatuak Yesus musi tungga tebe-tebe
18 Basa ndia boe ma Yesus nita hataholi makadotok mai e'o lalan. Boe ma Ana nadenu Ndia ana mana tunggan nala nae, “Mai fo ita sa'e ofak teni dano selik teu.”
19 Boe ma mese anggama esa mai nafadan nae, “Ama Mesen! Ama sudi muni bee muu, na au nau tungga akandondoo henin ua Ama!”
20 Tehuu Yesus nataan nae, “Malole boe! Tehuu masaneda leo iak. Basa hataholi la ma banda la kamamana leleo hehelik. Busa fui fali neni bolon neu. Mbuik fali neni ndunun neu. Tehuu Au, Hataholi Isi-isik ia, ta kauma hehelik fo fali uni ndia uu. Lalaka langgak boe oo taa.”
21 Boe ma hataholi fe'ek esa bali, ana tungga-tungga non, mai noke nae, “Lamatuak! Au nau tungga Lamatuak, tehuu ela au fali fo uu akaneni au ina-ama nggala dei. Mete ma au amang maten so, na, bei fo au tungga.”
22 Tehuu Yesus kokolak nae, “Leo iak! Neme naa fo hataholi fo ta kamahelek neu Manetualain, lakaneni sila hataholi mana maten nala. Huu mete ma o nau tungga Au, na, o musi tungga tebe-tebe!”
Lamatuak Yesus tao hahae ani sanggu
23 Basa ndia boe ma Yesus no ana mana tunggan nala sa'e ofak leni tasi selik leu. 24 Ledo-eik ala lala tasi lai, boe ma Yesus sunggu. Ta dook boe ma ani sanggu mai. Lii mbuka, de oe maso neni ofak dale neu. 25 Ana mana tunggan nala lita leo ndiak, boe ma ala fafae Ndia lae, “Lamatuak! Lamatuak! Fo'a fo masala'e mala ita dei! Huu ita sangga bolo mate ia so, maa!”
26 Boe ma Yesus nataa sala nae, “Wei, hatina de ei bii leo iak!? Ei ta mamahele neu Au, do?” Boe ma Ana fo'a, de Ana nadenu ani no lii nae, “Hahae leo!” Boe ma lii no ani hahae tutik.
27 Boe ma Yesus ana mana tunggan nala heran. Ala lae, “Awii! Ndia ia, see bae? Talo bee de Ana bisa palenda ani no lii, de ala tungga Ndia hihiin?”
Lamatuak Yesus tao nahai hataholi nitu nalak dua
28 Ta dook bali boe ma ala losa dano selik, nai hataholi Gadarae dae baba'en. Nai ndia hambu hataholi nitu nalak dua leo lai luak mamana hataholi kamates. Sila ndia, manggalauk nalan seli, losa ta hambu hataholi esa boe nambalani la'ok nesik ndia. Ala lita Yesus mai boe ma, 29 ala langgou lae, “Wei, Manetualain Anan! Hatina de O mai babalik ai? Mae fain bei ta losa fo sangga huku ai, tehuu O sangga tao doidoso ai so.”
30 Ta dook neme ndia mai, hambu bafi makadotok totofi dae sangga nana'ak. 31 Boe ma nitu la loke Yesus lae, “Mete ma nau husi heni ai, na, madenu ai maso mini bafi la dalek miu!”
32 Boe ma Yesus palenda sala nae, “Miu leo!” De nitu la kalua la'o ela hataholi kaduak kala sila, de ala maso leni bafi la sila dalek leu. Basa de bafi la sila lalai lapokak kala loe tungga letek bifin, de tuda leni dano dale leu. Boe ma basa sala bolo mate.