Lamatuak Yesus fee nakandandaak la'e-neu hataholi fo mana sele-nggali bini nai dae mata-matak
13
Faik ndia boe, Yesus kalua neme uma ndia mai, de neu nanggatuuk neu dano Galelea bifin. 2 Boe ma hataholi no'uk kala mai lakalilimbu lalan. De Ana hene neu nanggatuuk nai ofak esa lain fo mana seek nai ndia, suek fee nanonolik. Basa hataholi malai madak lain sila lamanene Ndia.a 3 Boe ma Ana nanoli sala makadotok, nenik nakandandaak. Ana tui nae, “Hambu hataholi mana tao ue daek esa, neu ngganggali bini nai osin. 4 Ledo-eik ana ngganggali bini la sila, hambu nggelok tuda lai dalak lain. Boe ma mbuik kala mai de tututu la'a heni basa bini la sila.5 Hambu nggelok tuda lai dae batu. Bini sila lanumbu lai-lai, tehuu dae ni'i anak. 6 De ledo sadu mai, boe ma numbuk kala sila male de lamatuu heni sala. Huu okan nala ta tola demak losa dae dale.
7 Hambu bini nggelok tuda lai fii la laladan. De fii sila kabi lisa numbuk kala sila.
8 Ma hambu bini nggelok bali, tuda lai dae isi malole. Bini sila lanumbu, de ala ina-huu losa laboa. Hambu luma fee falik buna-boak la'i telu hulu, hambu la'i nee hulu, ma hambu luma losa la'i natun esa.
9 See kandi'i dook, na mamanene neulalau leo!”
Lamatuak Yesus nafada nae, hatina de Ana nahiik fee nanonolik nenik nakandandaak
10 Basa de Yesus ana mana tunggan nala mai latanen lae, “Hatina de Ama manoli hataholi no'uk kala sila munik nakandandaak?”
11 Boe ma Yesus nataa nae, “Huu ei nau malelak tebe-tebe Manetualain palendan, de Au afada memak nakandandaak ndia sosoan. Tehuu mete ma hataholi fe'ek, na, Au fee nanonolik unik kada nakandandaak. 12 Huu hataholi fo mana nau bubuluk tebe-tebe Manetualain hihiin, dei fo Manetualain feen bubuluk tamba bali. Tehuu hataholi ta mana mbali Manetualain hihiin, dei fo Manetualain tao namanggonggoak kana.b 13 Au anoli sala unik kada nakandandaak, huu:
‘Ala lita so,
tehuu ta nau bubuluk.
Ala lamanene so,
tehuu ta nau lalelak.’
14 Sila ndia sama leo hataholi fo Manetualain mana kokolan Yesaya sulak kana so nae,
‘Dei fo ei mamanene,
tehuu ei ta nau malelak.
Dei fo ei mita,
tehuu ei ta nau bubuluk hata fo ana dadi so.
15 Huu hataholi la ia dalen nala lakababatu,
ala tao lambake ndi'i doon nala,
ala tao lamboke matan nala.
De ela sala leme ndia leo, fo ndi'i doon nala mbake leo ndiak leo,
ma ela sala leme ndia leo, fo matan nala mboke leo ndiak leo.
Suek Au boso tao ahai sala,
huu ala ta nau mbali Au.’c
16 Tehuu ei ia, maua-manale bou! Huu ei mita mia ei mata hehelim mala so, ma ei mamanene mia ei ndi'i doo hehelim mala so. 17 Mamahele Au! Makahulun ele Manetualain mana kokolan ma hataholi dale ndoos sala dokodoe nau lita hata fo ei mitan so, tehuu ta bisa. Sila boe dokodoe lamanene hata fo ei mamanenem so, tehuu ta bisa.”d
Lamatuak Yesus nafada nakandandaak la'e-neu bini ndia ndandaan
18 Yesus kokolak basa leo ndiak, boe ma nafada sala nae, “De hatematak ia ei mamanene nakandandaak ndia ndandaan. 19 Bini fo mana tuda lai dalak lain ndia, na ndia hataholi fo mana mamanene Dede'a-kokolak la'e-neu Manetualain palendan, tehuu ta nalelak tebe-tebe. Boe ma nitu la malanggan mai namoa nala Dede'a-kokolak ndia neme hataholi dalen mai.
20 Bini fo mana tuda lai dae batu ndia, na ndia hataholi fo mana namanene Manetualain Dede'a-kokolan, boe ma ana simbo nalan no namahokok. 21 Tehuu Dede'a-kokolak ndia ta naoka. Huu ndia de ta nana mbedak nala dook nai hataholi ndia dalen. Neu faik fo hataholi fe'ek tao nakatoto'ak kana, huu ana simbo nala Dede'a-kokolak ndia, de ana mbo'i heni tutik kana.
22 Ma bini fo mana tuda lai fii la laladan, sama leo hataholi fo mana namanene Dede'a-kokolak ndia so. Tehuu ana nasambute nalan seli no dede'a mata-matak, fo suek kada nasoda no malole. Boe ma basa dede'ak kala sila seti heni Dede'a-kokolak neme ndia dalen mai, losa ta hambu buna-boak.
23 Tehuu bini fo mana tuda lai dae isik, sama leo hataholi fo mana pasak ndi'i doon fo simbok Dede'a-kokolak ndia, ma tungga Manetualain hihiin. De kada ana tao dede'a malole, sama leo bini mana maboak ndia. Hambu luma labuna-laboa la'i telu hulu, hambu la'i nee hulu, ma hambu losa la'i natun esa.”
Lamatuak Yesus fee nakandandaak la'e-neu na'u nai osi laladan
24 Yesus nafada nakandandaak esa bali nae, “Manetualain toto'u palendan ndia, sama leo hataholi mana ngganggali bini neulauk nai ndia osin. 25 Le'odae, basa hataholi la sunggu lamanee. Boe ma hataholi manggalauk mai, de ana ngganggali na'u fui de'en neu osi ndia. 26 Neu faik fo osi ndia mulai kalua buna-boan, boe ma ndia mana tao uen nala lita na'u fui moli no'u no hade-nggandum lai ndia. 27 Basa boe ma ala leu lafada maosik ndia lae, ‘Ama! Fain ai sele bini neulauk neu ama osin, hetu? Hatina de hatematak ia hambu na'u fui no'uk so?’
28 Maosik ndia nataa nae, ‘Ndia, hataholi manggalauk tataon.’
Boe ma mana tao uen nala lafadan lae, ‘Ama, ai miu tofa heni na'u fui sila, do?’
29 Tehuu ana nataa nae, ‘Bosok! Huu ledo-eik ei tofan, na, dei fo ita sesele neulaun nala nana fe'a henik tungga. 30 Neme naa fo ala moli no'u losa fai kokolun. Dei fo neu faik ndia, bei fo au afada hataholi mana tao ues sala ae, “Ei makaduduluk mala na'u fui la dei. Basa na, hengge bubuak esa-esak, fo hotu heni sala. Basa bei fo makaduduluk mala buna-boa neulauk kala, fo tao sala leu kama mbembedak dale.””’
Lamatuak Yesus fee nakandandaak la'e-neu ai de'e kadi'i anak
31 Basa boe ma Yesus kokolak bali nae, “Au akadaik nakandandaak esa bali, fo suek ei bisa malelak talo bee fo Manetualain dadik Manek neu hataholi no'uk kala. Ndia hataholin nala, natahuhuun sama leo ai de'e kadi'i anak, fo hataholi selen nai osin dale. 32 Mae ai de'ek ndia, kadi'i anak nalan seli, tehuu mete ma ana moli mai so, na, ana dadik ai huu ina-huuk nalan seli nai osi ndia. Losa mbuik kala mai landunu lai ba'en nala.”
Lamatuak Yesus fee nakandandaak la'e-neu lalu teik
33 Yesus nakadaik nakandadaak esa bali nae, “Manetualain hataholin ndia, sama leo lalu teik fo inak esa ha'i nalan fo seseok kana no hade uu saku esa.e Boe ma loti ndia natafuu, huu lalu teik faa anak ndia.”
Lamatuak Yesus pake nakandandaak, fo nanoli hataholi la'e-neu dede'a beuk fo bei ta lamanene nitak
34 Yesus nanoli hataholi no'uk pake tutuik mata-matak leo ndiak. Basa Ndia kokolan ndia, kada pake nakandandaak. 35 Ana fee nanonolik leo ndiak tungga hata fo Manetualain mana kokolan sulak memak kana so nae,
“Dei fo Au fee nanonolik unik nakandandaak.
Dei fo Au afada dede'ak kala fo hataholi bei ta namanene nitak,
mulai neme Manetualain nakadadadik dae-bafok ia losa hatematak ia.”f
Lamatuak Yesus nafada nakandandaak la'e-neu na'u fui mana molik nai osi laladan ndia ndandaan
36 Basa boe ma Yesus la'o ela hataholi no'uk kala sila, de Ana fali neni uma neu. Boe ma ana mana tunggan nala mai, de loken fo Ana tulun lae, “Ama! Tulun mafada ai nakandandaak la'e-neu na'u fui ndandaan dei!”
37 Boe ma Yesus nataa sala nae, “Hataholi fo mana ngganggali bini malole ndia, na ndia Au, Hataholi Isi-isik ia. 38 Ma osi ndia, na ndia dae-bafok ia. Bini malole ndia, na ndia hataholi mana maso dadik Manetualain bobonggin so. Ma na'u fui ndia, na ndia malangga nituk hataholin nala. 39 Basa boe ma hataholi manggalauk mana mai ngganggali na'u ndia, na ndia nitu la malangga ina-huun. Ma fai kokoluk ndia, na ndia dae-bafok fai babasan. Hataholi mana ketu-koluk sila, na ndia Manetualain ata nusa sodan nala. 40 Neu dae-bafok fai babasan, ala lakaduduluk lala na'u la, de hotu heni sala. 41 Huu Au, Hataholi Isi-isik ia, dei fo adenu ata nusa sodak kala mai. Dei fo leu lakabubua lala basa hataholi ta mana tungga Manetualain palendan. Ma lakabubua lala basa hataholi mana fufudi-o'odo hataholi fe'ek kala boe, fo suek boso tungga Manetualain palendan. 42 Dei fo ala mbia heni basa hataholi manggalauk sila leni ha'i naraka dalek leu, sama leo na'u nana hotuk. Nai ndia, bei fo ala lameda doidoso lalan seli, ma lamatani lakaleleu ta no hahaek. 43 Tehuu hataholi mana nasoda ndoos tungga Manetualain hihiin, dei fo ala leo lakandondoo henin lo sila Ama Manen nai nusa sodak. Nai ndia, ala lasa'a manggaledok sama leo ledo. Hataholi fo mana nau nalelak Au, na pasa neulalau ndi'i dook baa!”
Lamatuak Yesus fee nakandandaak la'e-neu bua mabeli nalan seli
44 Yesus nakadaik nakandandaak esa bali nae, “Hataholi fo mana nau nalelak Manetualain toto'u palendan ndia, na sama leo hataholi mana mahiik hambu bua mabeli nalan seli, fo hataholi fe'ek nafuni nitak nai dae bibia anak esa dale. Hataholi fo mana mahiik ndia mai kali, boe ma ana hambu buas ndia nai ndia, de namahoko nalan seli. Basa de ana natoi falik buas ndia. Boe ma ana fali lai-lai, fo neu se'o heni basa hatan nala. De neu hasa nala dae ndia, fo suek naena bua mabeli ndia.”
Lamatuak Yesus fee nakandandaak la'e-neu mutiala mabeli nalan seli
45 Yesus nakadaik bali nae, “Hataholi fo mana nau nalelak Manetualain toto'u palendan ndia, sama leo hataholi mana danggan esa, nahiik hambu mutiala mabeli nalan seli. Boe ma ana nasanggak mutiala fo hasa. 46 Ledo-eik ana natonggo no mutiala esa lolen ana seli, boe ma ana fali lai-lai, de neu se'o heni basa hatan nala. Boe ma neu hasa nala mutiala ndia, fo suek bisa naenan leo.”
Lamatuak Yesus fee nakandandaak la'e-neu naisi dala
47 Yesus nakadaik bali nae, “Manetualain toto'u palendan ndia, sama leo dala esa fo mana dolu-dala la mbo'in neni dano dale neu. Boe ma dala ndia hambu i'ak mata-matak. 48 Ledo-eik dala ndia henuk no i'ak kala, boe ma mana dolu-dala la mai hela lalan, de lenin neni dano bifin neu. Basa de langgatuuk fo laisi i'ak leme dala mai. I'a neulauk, ala taon neni lembeneu dale neu. Tehuu i'a ta neulauk, na, ala mbia henin.
49 Leo ndiak boe oo, neu dae-bafok fai babasan. Dei fo Manetualain ata nusa sodan nala mai, fo tao kofe'e basa hataholi manggalauk leme hataholi dale ndoos mai. 50 Dei fo ala mbia heni basa hataholi manggalauk leni ha'i naraka dalek leu. Nai ndia, bei fo lameda doidoso lalan seli, ma lamatani lakaleleu ta no hahaek.”
Lamatuak Yesus nanoli hataholi la'e-neu nanonoli laak, ma nanonoli beuk
51 Kokolak nate'e leo ndiak, boe ma Yesus natane sala nae, “Ei malelak basa Au kokolang isinaak ndia, do?”
Ala lataa lae, “Ai malelak, Ama!”
52 Basa boe ma Yesus nataa nasafali sala nae, “Malole! Mese anggama esa-esak nanoli tebe-tebe Manetualain Dede'a-kokolan fo nana sulak memak kana neme makahulun mai so, boe ma ana to'u natea Au nanonoling hatematak ia, na, ana sama leo maumak esa fo nahiik soi ndia kama mbembeda buan, fo natudu ndia hata laan nala sama-sama no ndia hata beun nala.”
Hataholi Nasaret timba heni Lamatuak Yesus
53 Neu faik fo Yesus nanoli nate'e hataholi no'uk kala nenik nakandandaak, boe ma Ana la'o ela mamanak ndia, 54 de fali neni Ndia nggolon neu. Nai ndia, Ana maso neni uma huhule-haladoik neu, fo nanoli hataholi la. Basa hataholi la fo mana lamanene neu Ndia, heran lalan seli. Ala lakokola lae, “Amakee! Hataholi ia malelan seli maa! Ana nanoli neme bee ia? Talo bee de losak Ana bisa tao tanda heran nala? 55 Naa te Ndia ia, kada tuka ai Anan. Ita talelak tebe-tebe Ndia inan Maria; ma Ndia fadin nala, sila Yakobis, Yusuf, Yudas ma Simon. 56 Ita boe talelak ndia fadi ina anan nala, huu ita basa nggata leo nggolok esa naa! De Ana hambu malelan ndia, neme bee mai bali? Ma Ana hambu koasa ina-huuk ndia, neme see mai bali?” 57 Huu ndia de lesuha'in nala lakase'e, losa tala nau lamanenen so bali.
Tehuu Yesus nafada nae, “Memak tetebes! Nai mamana fe'ek, na, hataholi la lahiik fee hada-holomata neu Manetualain mana kokolan. Tehuu nai ndia nggolon ma uma isi hehelin, hataholi ta nau fee hada-holomata neu ndia.”g 58 Huu dalen nala lakababatu, losa tala nau lamahele Yesus, huu ndia de Ana ta tao tanda heran no'uk nai ndia.