3 Faik ndia, malangga anggama Yahudi malanggan nala, ma lasi hadak kala lakabubua lai Kayafas uman. Kayafas ndia, na ndia malangga anggama Yahudi malangga ina-huun. 4 Ala lasanggak dalak, fo nau humu Yesus no nee-neek, fo tao lisan. 5 Tehuu ala heti dalak lae, “Tataak dei! Ita boso humun lai-lai, huu fai malole la dekak so. Boso losak hataholi no'uk fo mana mahiik Ndia, ala tao nahuuk.”

6 Nai nggolo Betania, hambu hataholi esa, nade Simon. Makahulun, hataholi la nunuten, huu ana hambu hedi kusta. Tehuu hatematak ia, ana hai so. Faik ndia fai malole bei ta losa, de Yesus asa leu la'a lai Simon uman. 7 Ledo-eik ala la'a, boe ma inak esa mai natonggo no Yesus. Ana to'u boto esa, nana taok neme batu mabeli mai.^b Boto ndia isin mina kaboo menik fo belin ana seli. Boe ma inak ndia, femba natepa boto ndia lesuha'in. Boe ma ana di'a didilo mina ndia faa-faa neu Yesus langgan, fo dadik tanda ana fee hada-holomata neu Ndia.

8 Tehuu ledo-eik Yesus ana mana tunggan nala lita inak ndia tao leo ndiak, boe ma ala luli, de lakokola lae, “Talo bee de ana mbombo'a heni mina mabeli nalan seli ndia no sosoa taak? 9 Malolenak ana se'o heni mina ndia leo! Fo suek doin, baba'e sala leu hataholi mana to'a-taak kala!”

10 Tehuu Yesus bubuluk sila dudu'an nala ndia, de Ana kokolak nae, “Ei ta bole tao makatoto'ak inak ia! Elan neme naa! Au amahoko, huu ana di'a mina neu Au aong. 11 Huu hataholi mana to'a-taak kala lai ei laladam mala taa-taa. Tehuu ta dook bali, te Au ta sama-sama ua ei so.^c 12 Ma inak ia, di'a mina ia, na nahehele Au aong so sama leo ana ngganggali memak bungga neu Au mbombolang. 13 Masaneda neulalau baa! Sudi nai bee mesan fo Manetualain Tutui Malolen ia nana tui-benggak ndule dae-bafok ia, sila boe oo neu ko tui inak ia malolen! Fo suek basa hataholi la lasanedan.”

14 Hataholi esa neme Yesus ana mana tungga kasanahulu duan nala mai, nade Yudas Iskariot. Faik ndia boe, ana kalua neu sangga malangga anggama Yahudi malanggan nala, fo sangga fee Yesus neu sila. 15 Losa sila, boe ma ana natane nae, “Ama nggala ei! Mete ma au tulun humu Yesus ndia, na, ei fee au hata?”

Boe ma lataa lae, “Mete ma o nau se'o heni Ndia neu ai, na, ai bae.” Boe ma ala hingga lala doi lilo fulak telu hulu, de feen neu Yudas.^d 16 Basa boe ma Yudas kalua, de ana mulai sangga dalak fo sangga fee Yesus neu sala.

17 Tungga-tungga teuk, hataholi Yahudi la fai malole la doon faik hitu. Ala loke lae fai malole ndia, nade ‘Feta Loti Ta Pake Lalu Teik’.^e Faik ndia feta sangga mulai so, de Yesus ana mana tunggan nala latane Ndia lae, “Ama! Le'odaen ia ita mulai ita fai malolen nala. De Ama nau ai miu hala bi'i-lombo, ma sadia mamanak feta Paska nai bee?”

18 Boe ma Ana nataa nae, “Ei maso kota miu, dei fo ei matonggo mia touk esa. Mafadan leo iak: ‘Ka'a! Ama Mesen nameda ta dook bali, te Ana mate so. De Ana noke mamanak nai ka'a uman, fo Ana paken tao feta Paska no ana mana tunggan nala.”’

19 Ndia ana mana tunggan nala lamanene leo ndiak, boe ma leu tao tungga Ndia kokolan ndia. De ala sadia la'a feta Paska lai ndia.

20 Le'odae boe ma Yesus no ana mana tungga kasanahulu duan nala langgatuuk la'a feta. 21 Ledo-eik ala la'a, boe ma Ana kokolak nae, “Ei mamanene baa! Hambu hataholi esa neme ei mai, dei fo se'o heni Au uni hataholi fe'ek kala uu.”

22 Ala lamanene leo ndiak, boe ma lameda ta malole. De sila esa-esak natane Yesus nae, “Hataholi fo Ama kokolak ndia, ta ndia au, hetu?”

23 Boe ma Yesus nataa nae, “Hataholi fo mana dombe lotin neni manggo ia sama-sama no Au, ndia ndia se'o heni Au.^f 24 Masanenedak baa! Au, Hataholi Isi-isik ia, musi mate sama leo nana sulak memak nai Manetualain Susula Malalaon so. Tehuu mata neuk! Huu hataholi fo mana sangga se'o heni Au ndia, dei fo ana hambu soe! Malolenak inan ta bonggi ndia!”

25 Basa boe ma Yudas boe natane tungga nae, “Neu ko hataholi fo Ama kokolak ndia, ta ndia au, hetu?”

Boe ma Yesus nataa nae, “Memak o mesa nggo mae leo ndiak. Tehuu see bali?”

26 Ledo-eik bei la'a, boe ma Yesus ha'i nala loti balok esa, de noke makasi neu Manetualain. Boe ma Ana bibi'i loti ndia, de Ana loon neu ana mana tunggan nala, ma nafada nae, “Loti ia, na Au aong ndindia. Ei ha'i malan fo mi'a leo!”

27 Basa boe ma Ana ha'i nala nggalaas esa henuk no anggol oek, de noke makasi neu Manetualain. Boe ma Ana loon neu ana mana tunggan nala, ma nafada nae, “Ei basa nggei ha'i malan fo minu. 28 Anggol oek ia, na Au daang ndindia. Dei fo Au mate, na Au daang faa henin fo nasala'e nala hataholi no'uk kala leme sala-singgon nala mai. Daak ia dadik buti fo fee nasanenedak nae, hata fo Manetualain heluk ndia so, memak hatematak ia dadi so. Ha'i malan fo minu leo!^g 29 Tehuu mamanene neulalau! Mulai neme le'odaen ia mai, Au ta inu anggol oek so bali. Dei fo mete ma Au ua Au Amang manggatuuk to'u palenda nai nusa sodak, bei fo Au inu ua ei bali.”

30 Basa boe ma ala soda sosodak esa fo koa-kio Manetualain. Boe ma le'odaen ndia boe, ala kalua leni lete Setun leu.

31 Ledo-eik ala bela'o, boe ma Yesus nafada memak ana mana tunggan nala nae, “Dei fo le'odaen ia, ei basa nggei malai la'o ela Au. Huu nana sulak memak nai Manetualain Susula Malalaon so nae,

32 Memak Au mate. Tehuu neu ko Au asoda fali, fo Au uu ahani ei nai propensi Galelea ele.”ⁱ

33 Tehuu Petrus sapa nae, “Ama! Mae basa hataholi fe'ek kala lalai la'o ela Ama, tehuu au taa!”

34 Boe ma Yesus nataa nae, “Leo ndiak do, Petrus? Mamahele Au! Le'odaen ia, manu bei ta kokoa, tehuu o malelesi Au la'i telu so mae, o ta malelak Au!”

35 Tehuu Petrus nahele nae, “Taa Ama! Mete ma Ama mate, na, au boe oo mate tungga no'u. Huu au ta bisa alai la'o ela Ama!” Petrus nonoo fe'en nala esa-esak lae leo ndia boe.

36 Basa de Yesus asa la'ok lakandoo leni lete Setun leu, losa osi esa, nade Getsemani.^j Nai ndia, Ana nafada ana mana tunggan nala nae, “Ei manggatuuk tataak mai ia dei, huu Au sangga uu hule-haladoi nai ele.” 37 Tehuu noke nala Petrus, Yakobis, ma Yohanis, de telu sala leu no'u lo Ndia. Mulai neme ledo-eik ndia mai boe oo, Ndia dalen nameda hedis ma ta ndoo-ndoo. 38 Dei fo ala la'ok doo-doo ana, tehuu nafada sala nae, “Au dale hedi alan seli! Au ameda leo bali Au sangga mate. Ei manggatuuk be'e manea mia Au nai ia dei.”

39 Boe ma Ana la'o dook faa mata neu, de Ana sendek, de hule-haladoi nae, “Ama susuek aa! Mete ma Ama nakaheik, na, boso Au tanggon doidosok ia. Tehuu boso tungga Au hihiing; ela kada tungga Ama hihiin.”

40 Hule-haladoi nate'e, boe ma Ana fali neni ana mana tungga katelun nala sila neu. Tehuu ala sunggu lamanee. Boe ma Ana nafofo'a sala, de nafada Petrus nae, “Heeh, Petrus! Hatina de ei sunggu? Au nai ele kada ta doo anak, tehuu ei ta bisa be'e faa boe! 41 Kukuku mamaneu ei matam mala dei. Basa na, fo'a fo manea mia Au! Memak ei dalem mala lahiik tao malole, tehuu ei aom mala ta matea. De malolenak ei hule-haladoi, fo mete ma hambu soba-douk, na, ei bisa mahele.”

42 Boe ma Ana neu hule-haladoi bali nae, “Ama! Mete ma Au musi lemba doidosok ia, na, ela kada tungga Ama hihiin.” 43 Hule-haladoi basa, boe ma Ana fali neni ana mana tungga katelun nala sila neu. Tehuu ala sunggu seluk bali, huu matan nala nduak.

44 Boe ma Ana la'o ela sala, de neu hule-haladoi la'i esa bali. Ana noke seluk Aman, fo boso mbo'in Ana lemba doidosok ndia, tehuu ela kada tungga Aman hihiin. 45 Hule-haladoi nate'e boe ma Ana fali fo nafofo'a ana mana tungga mana sungguk kala sila nae, “Ei bei sunggu makandoo ia, do? Fo'a leo! Hataholi fo mana sangga se'o heni Au, Hataholi Isi-isik ia, dekak mai so. Hatematak ia ala sangga humu Au, fo fee Au uu hataholi manggalauk kala liman nala. 46 Weih! Fo'a leo! Malaak ei matam mala fo suli sudik mini ele miu. Hataholi fo mana se'o heni Au ndia, mai so.”

47 Ledo-eik Yesus bei kokolak leo ndiak, Yudas mai no hataholi makadotok so. Ala mai leni tafa ma ai keke'uk, fo sangga humu Ndia. Ala tao leo ndiak, tungga palenda neme malangga anggama Yahudi malanggan nala ma lasi hadak kala. 48 Yudas fee tanda memak neu sala nae, “Ei mete neulalau baa! Hataholi fo Au idun ndia, na ei humu mala Ndia leo! Huu hataholi fo ei sanggak ndindia!”

49 Ledo-eik ala losa Yesus, boe ma Yudas nakandoo neni Ndia matan neu, de nae “Soda-molek Ama Mesen!” Boe ma Yudas holu nalan, de idun.

50 Boe ma Yesus natanen nae, “Wei Yudas! O mamaim ia, no maksut leo iak, do?” Boe ma hataholi makadotok kala sila mata leu, de sangga humu Ndia.

51 Tehuu nggengge neuk Yesus hataholin esa fe'a nala tafan, de ana sambi ketu heni hataholi esa ndi'i doon. (Hataholi makahinak ndia, na ata neme malangga anggama Yahudi malangga ina-huun mai.) 52 Yesus nita leo ndiak, boe ma nafada hataholi ndia nae, “Mamana falik tafa ndia neni mamanan neu. Huu hataholi fo nasoda no nakaminak tafa, na, dei fo ndia boe oo mate nenik tafa. 53 O ta bubuluk, do? Au bisa oke Au Amang fo nadenu Ndia atan nala lifu-lifuk kala^k leme nusa sodak mai, fo ala mai tulu-fali Au. 54 Tehuu bosok. Elan neme naa, fo hataholi la ia humu lala Au. Huu basan nana sulak memak nai Manetualain Susula Malalaon la'e-neu Au, musi ana dadi.”

55 Basa boe ma Yesus kokolak neu hataholi makadotok kala sila fo mana mai humu Ndia nae, “Weih! Ei mae hetuk Au ia hataholi manggalauk, do? Hatina de ei mai humu Au minik tafa ma ai keke'uk? Naa te tungga-tungga faik Au anoli ei nai Manetualain Uma Ina Huhule-haladoin, tehuu ta hambu esa tao hata-hata neu Au.^l 56 Tehuu neme naa! Mai, humu mala Au leo! Huu basa ia nana sulak memak neme makahulun mai nai Manetualain Susula Malalaon so.”

Yesus ana mana tunggan nala lita leo ndia, boe ma ala bii lalan seli. De ala lalai la'o ela Ndia.

57 Basa ndia boe ma hataholi fo mana humu Yesus loon neni Kayafas uman neu, fo ndia malangga anggama Yahudi malangga ina-huun, huu hataholi ina-huun nala lakabubua lai ndia so. Fo ndia, malangga anggama Yahudi malanggan nala, mese anggama la, ma lasi hadak kala. 58 Ledo-eik ala loo Ndia, te Petrus tungga nafufunik nesik dea, losa malangga ina-huuk uman. Petrus boe oo maso neni uma pasan neu, de nanggatuuk no'u no hataholi malai sila la. Huu ana nau bubuluk hata fo dei fo ana dadi. 59 Nai uma ndia dalek, malangga anggama Yahudi malanggan nala lakokola aok lo basa hataholi mana makaneni dede'a anggama. Basa sala sangga buti, ma sangga dalak fo huku mate Yesus. 60 Tehuu mae ala fee sakasii pepekok no'uk kala boe oo, ta hambu buti esa boe fo bisa paken. Babasan ala hambu sakasii dua. 61 Sakasii kaduak kala sila lae, “Ai mamanene mitak Hataholi ia kokolak nae, ‘Dei fo Au tao atu'u heni Uma Ina Huhule-haladoik. Tehuu dei fo Au ambadedei falik kana nai faik telu dalen.”’^m

62 Basa de malangga anggama Yahudi malangga ina-huun nambadeik neu basa hataholi mana manggatuuk lai ndia matan. Boe ma natane Yesus nae, “O mamanene hataholi no'uk kala soli salak neu O. Tehuu hatina de kada O nee-nee?” 63 Tehuu Yesus ta nataa hata-hata. Boe ma malangga ina-huuk ndia natane bali nae, “Au sangga atane ia! Tehuu O musi mataa tebe-tebe sama leo O mataa neu Manetualain, fo mana masoda nai nusa sodak. Hambu hataholi nae, O ia, Karistus, fo Manetualain Anan fo Ana helun neme makahulun mai so. Tetebes ndia, do?”

64 Basa boe ma Yesus nataa nae, “Memak tetebes leo ama kokolan ndia. Tehuu masanenedak baa! Huu dei fo ei basa nggei mita Au, Hataholi Isi-isik ia. Dei fo Au anggatuuk nai nusa sodak nai Manetualain boboa konan, fo to'u palenda no'u ua Ndia fo mana koasa manai lain seli. Basa ndia, na dei fo Au konda fali maing ua ko'as.”ⁿ

65 Malangga ina-huuk ndia namanene Yesus kokolan ndia, boe ma ana luli nalan seli, losa ana lu'i sida ndia badu nalun. De ana eki neu basa hataholi la fo mana langgatuuk lai ndia nae, “Weih! Ita ta paluu sakasii so bali! Ei mamanene minik ei ndi'i doo hehelim mala, Ndia kokolan, hetu! Ana so'uk aon dadik Manetualain Anan ia so. Kokolak nakadadaek nalan seli ia so! Ei basa nggei bubuluk so mae, tungga ita heti-heu anggaman, na mete ma hambu hataholi tao aon sama leo Manetualain, na, hataholi ndia musi maten! 66 De hatematak ia, ei sangga maketun mae, hata?”

Boe ma basa sala eki lae, “Memak hataholi ia, sala tetebes! De musi huku maten!”^o

67 Boe ma hataholi hida mata leu fo mbula ambe neu Yesus. De ala mbomboko lakamiminak kana ma famban.^p 68 Boe ma ala haumemee Ndia lae, “Weih! O ia, Karistus, hetu? Soba O neuk dei! See ndia tutu O?”

69 Faik ndia, Petrus bei nanggatuuk nai uma ndia pasan. Basa de ata inak esa mai kokolak noon nae, “Isinaak, o boe oo sama-sama mua Yesus, fo hataholi Nasaret ndia, hetu?”

70 Tehuu ana nalelesi neu hataholi no'uk kala sila matan nae, “Taa! Hatina de o matane leo ndiak! Au ta alelak Ndia maa.” 71 Basa de Petrus kalua fo nambadeik neu lelesu mba'a matan.

Boe ma ina fe'ek esa nitan nai ndia. De ana nafada hataholi malai ndiak kala nae, “Wei, isinaak au ita hataholi ia sama-sama no Yesus, fo hataholi Nasaret ndia.”

72 Boe ma Petrus sapan nae, “Fama o kamuluk! Au ta alelak Hataholi ia maa! Au soo!”

73 Ta dook bali, boe ma hataholi fe'ek esa nai ndia kokolak bali nae, “Heeh! O boso pepeko bali mae, o ta sama-sama mua hataholi ndia! Huu ai mamanene o kokolam ndia sama matetuk leo hataholi Galelea!”

74 Tehuu ana a'ali, de laban nae, “Wei! Au soo unik Manetualain naden! Au ta alelak Hataholi ndia!” Nandaa no kokolan ndia, boe ma manu kokoa.

75 Petrus namanene manu kokoa, boe ma nasaneda Yesus kokolan isinaak nae, “Manu bei ta kokoa, tehuu o malelesi Au la'i telu so.” Nasaneda leo ndiak, boe ma ana neni deak neu de namatani nasakekedu.