4 Tehuu Yesus ana mana tunggan esa nade Yudas Iskariot, fo dei fo ana se'o heni Yesus, sapa nae, 5 “Wei! Hatina de ana ta se'o mina kaboo menik ndia? Huu ndia belin sama leo hataholi esa nggadin teuk esa. Malolenak se'on, fo doin feen neu hataholi mana to'a-taak kala!”^c 6 Naa te Yudas kokolak leo ndiak, ta huu ana sue hataholi mana to'a-taak kala. Tehuu ndia nakodaa. Ana dadik Yesus asa mana to'u doin, tehuu nambue na'a doi kaas.

7 Tehuu Yesus nataa nae, “Elan neme naa. Ledo-eik ana mbeda ma di'a mina kaboo menik ia, ndia sama leo ana tao nahehele Au mbombolang fo suek latoi Au. 8 Hataholi mana to'a-taak kala lo ei taa-taa lai ei laladam mala. Tehuu dei fo Au ta sama-sama ua ei akandoo.”^d

9 Basa boe ma hataholi Yahudi no'uk bubuluk lae, Yesus nai nggolo Betania. Ala mai fo sangga lita Ndia. Sila boe oo mai fo sangga lita Lasarus. Huu ala lamanene so lae, Yesus tao nasoda falik Lasarus neme mamaten mai so. 10 Tehuu malangga anggama la malanggan nala lakokola sangga dalak fo tao lisa Lasarus boe. 11 Huu hataholi Yahudi la no'uk lamanene la'e-neu Lasarus tutuin so, de ala lamahele leu Yesus. Ala ta nau lamanene hataholi Yahudi malanggan nala bali.

12 Neu fo'a mai, hataholi no'uk mana mai tungga feta Paska nai kota Yerusalem sila, lamanene lae, Yesus sangga neni ndia neu boe. 13 Basa de ala leu tati lala palam doon, fo suek leu soluk Yesus mamain, sama leo Ndia ndia, hataholi ina-huuk. Boe ma ala eki landaa-landaa lae,

14 Boe ma Yesus hambu banda keledei tenak esa, de Ana sa'e neu lain. Ndia sama leo mana kokolan lele uluk sulak memak nai Manetualain Susula Malalaon so nae,

16 Faik ndia, Yesus ana mana tunggan nala ta bubuluk dede'ak ia ndandaan. Tehuu dei fo, neu faik fo Ana nasoda fali neme Ndia mamaten mai, ma Manetualain so'uk dema-demak Ndia, bei fo ala lasaneda dede'ak kala fo Manetualain Susula Malalaon nana sulak la'e-neu Ndia. Sila boe oo lasaneda hataholi no'uk kala ia tataon neu Ndia.

17 Neu faik fo Yesus tao nasoda falik Lasarus neme ndia mamaten mai, boe ma noke ndia fo ana kalua neme lates dale mai, hambu hataholi no'uk sama-sama lo Yesus. De hatematak ia, ala tui kii-konak la'e-neu hata fo makahulun sila mesak kasa litan so. 18 Huu ndia de hataholi no'uk leu soluk Yesus deka-dekak no Yerusalem, huu ala lamanene so lae, Ana tao tanda heran ndia so. 19 Boe ma hataholi Farisi la lakokola lae, “Awee'! Mita dei! Basa hataholi lai dae-bafok ia lambue fo sangga tungga Ndia! Dei fo sasai-main, ita ndia to'a-taa! Mete ma leo ndiak, na, ita nau tao talo bee bali?”

20 Hambu hataholi Yunani hida, sama-sama lo hataholi fe'ek kala leni Yerusalem leu, fo sangga tungga feta Paska lai ndia. Ala mai lakaluku-lakatele neu Manetualain lai Ndia boe. 21 Boe ma ala mai latonggo lo Filipus, fo neme nggolo Betsaida mai, nai propensi Galelea. Ala loke lae, “Ka'a! Ai nau matonggo mia Yesus.”

22 Boe ma Filipus neu nafada Anderias. De dua sala leu lakokola lo Yesus. 23-24 Basa de Yesus nafada sala nae, “Au faing losa so. De Au musi mate dei, bei fo Manetualain nau so'u dema-demak Au. Tetebes ndia! Ita takasasaman no bini esa. Mete ma ita sele hade de'ek esa, na, ana musi nakalulutuk nai dae dale dei, bei fo ana moli fo ana kalua buna-boak makadotok. Huu mete ma ta leo ndiak, na, ana bei nahele kada hade de'ek esa. 25 Hataholi fo sue nalan seli ndia sodan nai dae-bafok ia losa ana ta mbali Manetualain hihiin, na dei fo hataholi ndia sodan nakalulutuk henin. Tehuu hataholi fo fee ndia sodan tungga Manetualain hihiin, na dei fo ana hambu sodak tetebes fo ta mana ketuk.^h 26 Hataholi fo nau ono-lau Au, na ana musi tungga nakandoo Au. Huu ndia de Au nai bee, na Au hataholi mana tungga nggala lai ndia boe. Mete ma hataholi esa ono-lau Au, dei fo Au Amang nai nusa sodak fee hadak neu ndia.”

27 Yesus kokolak nakadaik nae, “Au daleng nameda hedis. Tehuu Au sangga kokolak talo bee bali? Au musi oke ae, ‘Ama! Mbo'i Au, fo ela Au boso mate hatematak ia,’ do? Taa! Au ta oke leo ndiak, huu Ana nadenu Au mai, suek Au mate. 28 De Au oke leo iak: ‘Ama. Ela kada Au tungga Ama hihiin, fo basa hataholi la so'u dema-demak Ama naden.”’

Boe ma halak esa neme lalai mai nae, “Au so'u dema-demak Au nadeng so. Ma Au boe oo nau so'u dema-demak seluk bali.”

29 Basa de hataholi no'uk mana lambadeik lai ndia boe oo lamanene halak ndia, de lae, “Awee'! hambu manggu'uk!”

Hambu hataholi luma bali lae, “Taa! Manetualain ata nusa sodan esa mai nakokola no Ndia.”

30 Tehuu Yesus nafada nae, “Halak isinaak ndia soa-neu ei, ta soa-neu Au. 31 Hatematak ia hataholi lai dae-bafok ia musi lasale Manetualain, fo Ana naketu sila dede'an nala. Ndia boe oo nau husi heni Mana Tao Manggalauk, fo mana to'u palenda nai dae-bafok ia. 32 Mete ma hataholi la londa Au nai ai ngganggek lain, na, dei fo Au sangga hela basa hataholi la fo lamahele Au.” 33 (Ana kokolak leo ndiak, fo dei fo natudu Ndia mamaten no dala leo beek.)

34 Boe ma hataholi malai ndia latane lae, “Ai mamanene mitak neme Manetualain Heti-heun mai nae, mete ma Karistus fo nana seseik Hataholi Isi-isik, neni dae-bafok ia mai, na, dei fo Ana nasoda nakandoo. De hatina de Ama kokolak mae, ‘Dei fo ala nau londa Hataholi Isi-isik neu ai ngganggek?’ Tungga Ama, na Hataholi Isi-isik ndia, see?”ⁱ

35 Boe ma Yesus nataa nae, “Ta dook bali, na Au manggaledong ta nasa'a neu ei so bali. De neu faik fo Au bei nai ia, na ei musi masoda ndoos, fo suek manggalauk boso nakalee nala manggaledok fo manai ei dalem mala. Huu hataholi mana la'ok nai makiuk, ta bubuluk ana bee neu. 36 Neu faik fo Au manggaledong bei nai ia, na, ei musi mamahele neu Au, fo suek ei dadik hataholi fo nasoda nai manggaledok, fo bubuluk ei nau bee miu.”

Yesus kokolak nate'e leo ndiak, boe ma Ana heok neme hataholi no'uk kala mai, fo suek Ndia bisa mesak kana.

37 Mae Yesus tao tanda heran no'uk neu hataholi no'uk kala matan so, tehuu tala nau lamahele Ndia. 38 Ndia sama leo Manetualain mana kokolan Yesaya nafada nitak memak nae,

39 Huu ndia de hataholi Yahudi luma sila ta bisa lamahele neu Lamatuak hatematak ia, sama leo Yesaya sulak nai mamana fe'ek nae,

41 Yesaya kokolak leo ndiak, huu ana nita Yesus koasan so, de ana tui memak la'e-neu Yesus.

42 Mae leo ndiak, tehuu hataholi no'uk lamahele neu Yesus. Ta kada hataholi basa faik, te hambu hataholi Yahudi malanggan nala luma boe oo lamahele neu Ndia. Tehuu tala nau manaku Yesus nai hataholi no'uk matan, huu ala bii, dei fo hataholi Farisi la nau husi kalua heni sala leme uma huhule-haladoik mai. 43 Huu hataholi Yahudi malanggan nala sila lahiik lena fo hambu kokoak leme hataholi nai dae-bafok ia mai, lena heni hambu kokoak neme Manetualain mai.

44 Boe ma Yesus kokolak no hala belak nae, “Hataholi fo namahele neu Au, na ana ta namahele neu Au mesa nggau, tehuu ndia boe oo namahele neu Hataholi mana madenu Au. 45 Huu mete ma hataholi lita Au, na, ndia boe oo nita Hataholi mana madenu Au. 46 Au mai fo dadik sama leo manggaledok neu dae-bafok ia. Ela basa hataholi fo mana lamahele neu Au, ta lasoda lai makiuk. 47 Mete ma hambu hataholi namanene neu Au Dede'a-kokolang, tehuu ta tao tunggan, na, Au ta aketu ndia huhukun. Au maksut uni dae-bafok ia mai, ta aketu hataholi la huhukun, tehuu Au mai asala'e ala hataholi la leme sila sala-singgon nala mai. 48 Tehuu losa dae-bafok fai babasan hataholi fo mana timba heni Au, ma ta nau simbok Au Dede'a-kokolang, na, dei fo hambu huhukuk tungga Au Dede'a-kokolang ndia. No leo ndiak, Au Dede'a-kokolang dadik neu sila mana maketun. 49 Huu Au ta kokolak itak unik Au nade heheling. Tehuu Au kokolak unik Au Amang nai nusa sodak naden. Huu Ndia ndia nadenu Au. Ma Ndia palenda Au fo Au musi kokolak hata. 50 Au boe oo bubuluk ae, Ndia palendan ndia neni sodak tetebes fo ta mana ketuk. Huu ndia de Au kokolang nandaa no hata fo Au Amang nadenu fo Au kokolak.”