Ala humu lala Lamatuak Yesus
18
Ledo-eik Yesus hule-haladoi nate'e leo ndiak, boe ma Ana kalua sama-sama no Ndia ana mana tunggan nala. Leni osi esa leu nai lee Kidron selik. Boe ma ala leni dalek leu.2-3 Faik ndia, malangga anggama Yahudi la malanggan nala, ma hataholi paltei anggama Farisi la fee Yudas soldadu ma mana manea hida so. Huu ana nau se'o heni Yesus. Yudas boe oo bubuluk osi ndia, huu Yesus nakabubua la'i no'uk no Ndia ana mana tunggan nala lai ndia so. De Yudas asa leni osi ndia leu leni mbele, lantera ma tee-tafa.
4 Naa te Yesus bubuluk basa hata fo neu ko ana dadi neu Ndia. Boe ma Ana mata neu, de natane nae, “Ei sangga see?”
5 Boe ma lataa lae, “Ai sangga hataholi esa, nade Yesus, neme nggolo Nasaret mai.”
Boe ma Yesus nafada nae, “Au ndia ia.” Faik ndia, Yudas nambadeik sama-sama no sala. Ndia ndia, fo se'o heni Yesus. 6 Ledo-eik Yesus kokolak nae, “Au ndia ia,” boe ma soldadu la sila heok leme Ndia mai, de ala tu'u leu dae.
7 Boe ma Yesus natane seluk kasa nae, “Ei sangga see?”
Boe ma ala lataa lae, “Yesus, hataholi Nasaret.”
8 Boe ma Yesus nafada nae, “Au afada ndia isinaak so ae, Au, ndia ia. De mete ma ei sangga Au, na, boso humu hataholi fe'ek. Ela sala leu leo.” 9 (Ana kokolak leo ndiak fo taon ana dadi hata fo Ana kokolak nitak nae, “Ama. Basa hataholi la fo Ama fee sala leu Au so, ta mopo esa boe.”)
10 Faik ndia, Simon Petrus neni tafa keke'uk esa. Boe ma ana fe'a nalan, de ana sambi ketu hataholi esa ndi'i doo konan. (Hataholi ndia, nade Malkus. Ndia ndia, ata neme malangga anggama Yahudi la malangga ina-huun mai.) 11 Boe ma Yesus nadenu Petrus nae, “Wei, Petrus! Mamana falik o tafam ndia. Huu Au Amang nafada so nae, Au musi hambu doidosok matak leo iak. De neme naa! Ndia sama leo Ana fee Au nggalaa isi makaheduk esa. Elan neme naa, fo Au inu heni basan.”a
Ala loo Yesus neu nasale malangga anggama la malangga ina-huun
12 Basa boe ma malangga soldadu, soldadu la, ma hataholi Yahudi mana manean nala humu lala Yesus, de ala mba'a Ndia. 13 Boe ma ala loo Ndia lakahuluk leni Anas leu. Anas ndia, na Kayafas ali-aman. Teuk ndia, Kayafas dadik malangga anggama Yahudi la malangga ina-huun. 14 Kayafas ia, nanoli-nafada nitak hataholi Yahudi malanggan nala nae, “Malolenak kada hataholi esak maten, suek basa hataholi fe'ek kala hambu nasalala'ek.”b
Petrus nalelesi nae, ta nalelak Lamatuak Yesus
15 Simon Petrus tungga Yesus nesik dea, sama-sama no Yesus ana mana tunggan esa bali, fo ndia au Yohanis. Anggama Yahudi la malangga ina-huun nalelak au. Huu ndia de au bisa maso uni ndia uman pasan uu, sama-sama ua Yesus. 16 Tehuu Petrus nambadeik nai deak, dekak no lelesu mba'a. Boe ma au kalua, de akokola ua inak esa fo nanea nai ndia, fo suek au bisa ua Petrus dalek neu. 17 Boe ma inak ndia natane Petrus nae, “Wei! O ia, Hataholi ndia ana mana tunggan esa, do?”
Tehuu Petrus nataa nae, “Taa!”
18 Faik ndia, manilik so. Huu ndia de hataholi mana maneak kala ma ata la lambadeik dala ha'i. Boe ma Petrus neu, fo dala ha'i no'u no sala.
Malangga anggama la malangga ina-huun palisak Lamatuak Yesus
19 Faik ndia, Anas fo anggama Yahudi la malangga ina-huu laan palisak Yesus la'e-neu Ndia nanonolin ma Ndia ana mana tunggan nala.
20 Boe ma Yesus nafada nae, “Au kokolak manggaledok fo basa hataholi la bisa lamanene. Au fee nanonolik taa-taa nai mamanak fo ita hataholi Yahudin nala lateme lakabubua, fo ndia ita uma huhule-haladoin nala, ma nai Manetualain Uma Ina Huhule-haladoin. Au ta kokolak afufunik. 21 Hatina de o matane Au? Kada matane hataholi la fo mana lamanene Au kokolang. Huu neu ko ala bubuluk hata fo Au kokolak so.”
22 Neu faik fo Ana kokolak leo ndiak, boe ma hataholi mana maneak esa fo nambadeik nai ndia, ana famba Yesus, de nae, “O boso kokolak leo ndiak neu malangga ina-huuk!”
23 Boe ma Yesus nafadan nae, “Mete ma Au kokolak sala so, na, matudu salan ndia bee. Tehuu mete ma Au kokolak ndoos, na, hatina de o famba Au?”
24 Basa boe ma Anas nadenu hataholi la loo Ndia neni Kayafas neu, fo mana dadik anggama Yahudi la malanggan ina-huun. Ledo-eik ala loo Ndia neu, Ndia bei nana mba'ak.
Petrus nalelesi seluk Lamatuak Yesus bali
25 Faik ndia, Simon Petrus bei nambadeik dala ha'i. Boe ma hataholi fe'ek kala malai ndiak kala latanen lae, “O ia, Ndia ana mana tunggan esa, hetu?”
Tehuu Petrus nalelesi nae, “Taa!”
26 Nai ndia boe hambu anggama Yahudi la malangga ina-huun atan esa. Ndia ndia boe, bei bobonggik neme hataholi fo Petrus sambi heni ndi'i doon ndia. Boe ma ana natane nae, “Wei! O ndia isinaak muma osi ndia, hetu? Huu au ita o muma ndia!”
27 Tehuu Petrus nalelesi seluk bali, boe ma manu kokoa memak.
Lamatuak Yesus nasale nggubenol Pilatus
28 Fafai anan, ala loo Yesus leme Kayafas mai fo leni nggubenol Pilatus uma dinas leu fo nai soldadu Roma la kota musun.c Hataholi Yahudi la ta maso leni hataholi Roma la mamanan leu, huu ndia tao nanggenggeo sala, fo ala ta bisa la'a feta Paska. 29 Nggubenol Pilatus neni deak neu fo natonggo no hataholi Yahudi la sila. Boe ma ana natane nae, “Ei soli salak hata neu Hataholi ia?”
30 Ala lataa lae, “Leo iak ama. Ndia ia hataholi manggalauk, mete ma taa, na, ai ta mai babalik ama, ma ta fee Ndia neu ama liman.”
31 Boe ma nggubenol nafada sala nae, “Leo iak. Ela ei makaneni Ndia dede'an, tungga ei hataholi Yahudi la heti-heun.”
Boe ma hataholi Yahudi malanggan nala lafada lae, “Ta bisa ama. Ai hataholi Yahudi la ta maena haak fo maketu huku mate so bali. Ndia kada ei mana palenda Roma maena haak leo ndiak.” 32 (Ledo-eik ala kokolak leo ndiak, tungga hata fo Yesus kokolak nitak nai makahulun, dadi so. Huu Ana nafada Ndia hataholin nala nae, dei fo Ana mate tungga mana palenda Roma dala tataon, fo ala mbaku Ndia neu ai ngganggek.)d
33 Basa de nggubenol maso fali neni soldadu la kota musun neu. Boe ma noke nala Yesus, de natanen nae, “Leo bee? O ia, hataholi Yahudi la manen, do?”
34 Yesus natane nasafalin nae, “Ama mesak kana ndia matane leo ndiak do, hambu hataholi fe'ek nafada ama la'e-neu Au?”
35 Boe ma nggubenol nataa nae, “Heeh! Au ia ta hataholi Yahudi, hetu? O hataholi nusam mesak kasa sila fee o mai so. Nakelenak malangga anggama la malanggan nala. Huu O ia, tao hata? Hena O mafada au dei!”
36 Boe ma Yesus nafada nae, “Au ta manek neme dae-bafok ia mai. Mete ma Au dadi manek leo manek nai dae-bafok ia, na, neu ko Au ata nggala lahuu ma lasala'e lala Au fo suek hataholi Yahudi la boso humu lala Au. Tehuu Au ata nggala ta tao leo ndiak. Memak Au ia, Manek, tehuu ta hambu hataholi esa nai dae-bafok ia so'u Au fo to'u koasa.”
37 Boe ma nggubenol natane seluk nae, “De O ia Manek, do?”
Yesus nataa nae, “Ama mesak kana mae Au dadik Manek. Teteben, na bonggi Au fo dadik Manek. Au boe uni dae-bafok ia mai fo dadik Manek, fo suek afada la'e-neu dede'a ndoos sala. Basa hataholi mana to'u tea-tea dede'a ndoos, na, sila ndia, lamanene Au.”
38a Boe ma nggubenol natane Ndia nae, “Dede'a ndoos ndia, na hata?”
Ala laketu huku mate Lamatuak Yesus
38b Neu faik fo nggubenol Pilatus kokolak nate'e leo ndiak, boe ma ana kalua seluk neni hataholi Yahudi la neu. Ana kokolak nae, “Au palisak Ndia so, tehuu au ta hambu Ndia salan esa boe.
39 Tehuu ei matemen, tungga-tungga teuk nai feta Paska, au musi mbo'i heni hataholi bui esa neu ei. De teuk ia, ei nau fo au mbo'i heni hataholi Yahudi la manen do, leo bee?”
40 Basa sala eki landaa-landaa lae, “Boso mbo'i heni Hataholi ia! Mbo'i heni kada Barabas leo!” Naa te Barabas ndia, hataholi esa manggalaun ana seli.e