Lasarus mamaten
11
1-2 Hambu hataholi esa, nade Lasarus. Ana leo no'u no ka'a inan dua fo Maria ma Marta lai nggolo Betania. (Maria ia, na ndia mana di'a mina kaboo menik neu Lamatuak Yesus ein, boe ma ana seka nenik ndia langga bulun.) La'i esa, Lasarus namahedi belak.a 3 Boe ma ka'a inan nala haitua halak neu Yesus lae, “Ama nonoon Lasarus, namahedi belak.”4 Ledo-eik Yesus namanene halak ndia, boe ma Ana kokolak nae, “Hedis ia, ta tao nala ana mate. Manetualain nau pake dede'ak ia fo natudu Ndia koasa ina-huun. Fo suek hataholi la so'u dema-demak Au, fo ndia Manetualain Anan.”
5 Yesus sue Marta, Maria, ma sila fadin, Lasarus. 6 Ledo-eik Ana namanene nae, Lasarus namahedi, tehuu Ana bei leo tataak faik dua bali nai lee Yarden selik. 7 Basa boe ma Ana nafada ana mana tunggan nala nae, “Mai fo ita teni seluk Lasarus nggolon teu, nai propensi Yudea.”
8 Tehuu Ndia ana mana tunggan nala sapa lae, “Ama Mesen. Bei lai-laik ia, hataholi Yahudi malanggan nala sangga mbia lisa Ama nai ele. Tehuu hatematak ia Ama nau fali neni ele neu, do?”
9 Boe ma Yesus nataa nae, “Boso bii bou! Tungga-tungga faik, ledo nasa'a neme fafain mai losa bobok. Ndia li'u sanahulu dua, hetu? Mete ma la'ok nai manggaledok, na, hataholi ta nakatunu. Huu manggaledok nasa'a nai dae-bafok ia, fo hataholi bisa nita. 10 Tehuu mete ma hataholi la'ok nai makiuk, na, ana nakatunu taa-taa, huu ana ta naena manggaledok.”b
11 Yesus kokolak nate'e leo ndiak, boe ma nafada nae, “Ita nonoon Lasarus sunggu so. Tehuu dei fo Au afofo'an.”
12 Boe ma Ndia ana mana tunggan nala lae, “Ama. Mete ma kada ana sunggu, na, ndia ndandaan nae, dei fo ana hai seluk, hetu?”
13 Ala kokolak leo ndiak, huu ala dudu'a lae, Yesus kokolak la'e-neu susunggu basa faik. Naa te Ana kokolak la'e-neu Lasarus mamaten. 14 Boe ma Yesus nafada manggaledok nae, “Leo iak. Lasarus maten so. 15 Au amahoko, huu au ta nai ele, neu ledo-eik ana bei ta mate, suek ei boso dale hedi. Huu hata fo ana sangga dadi hatematak ia, tao ei bisa mamahele Au. Mai fo ita ele teu leo!”
16 Basa boe ma Tomas fo loke lae, “kakana kaduak,” nafada ana mana tungga fe'ek kala nae, “Mai leo! Fo malolenak ita basa nggata tungga teu, fo ela ita mate no'u to Ndia.”
Lamatuak Yesus neni Betania neu, boe ma kokoe-nanasi Marta
17-19 Boe ma Yesus asa la'o leni nggolo Betania leu.
Nggolok ndia doon kada kilo telu neme kota Yerusalem mai. Boe ma hataholi Yahudi no'uk leme ele mai fo be'e ma kokoe-nanasi Marta no Maria.
Ledo-eik Yesus asa losa ele, bei fo ala bubuluk lae, hataholi latoi heni Lasarus faik haa so.
20 Neu faik fo Marta namanene nae, Yesus mai so, de ana kalua neu natonggo no Yesus. Tehuu Maria kada nahani nai uma dale. 21 Boe ma Marta nafada Yesus nae, “Awii, Ama! Mete ma Ama nai ia, na, neu ko au fading ta mate. 22 Tehuu au amahele Ama nau moke hata neu Manetualain, na neu ko Ama hambun.”
23 Boe ma Yesus nafadan nae, “Marta! Dei fo o fadim nasoda fali.”
24 Marta manaku nae, “Au bubuluk, mete ma neu dae-bafok fai babasan, dei fo Manetualain tao nasoda falik basa hataholi mana matek kala, na, Ndia boe oo tao nasoda falik au fading.”
25 Yesus nafada nae, “Au ndia tao hataholi mana matek kala lasoda fali. Au boe oo fee sodak tetebes. De hataholi fo namahele neu Au, dei fo hambu sodak ndia, mae ana mate. 26 Boe ma hataholi fo ana hambu sodak tetebes, ma namahele neu Au, dei fo nasoda nakandoo. Marta, mamahele Au kokolang, do?”
27 Marta nataa nae, “Hei, Ama! Au amahele ae, Ama ia, ndia Karistus, Hataholi fo Manetualain tudu memak kana neme makahulun mai so. De Ama ia, na Manetualain Anan fo Ana helu memak fo sangga nadenun neni dae-bafok ia mai.”
Lamatuak Yesus namatani
28 Marta kokolak nate'e leo ndiak, boe ma ana fali. De noke fadin Maria, fo dua sala mesak kasa, boe ma nafada nae, “Ama Mesen mai so. Ana sangga natonggo no o.” 29-31 Maria namanene leo ndiak, boe ma ana fo'a lai-lai fo neu natonggo Yesus. Hataholi Yahudi mana be'ek kala lanea lo Maria lai uma dale, lita ana fo'a lai-lai de nalai deak neu. Boe ma ala tungga ndia dean. Huu ala dudu'a lae, ana sangga neu namatani nai lates.
Faik ndia, Yesus asa bei ta maso leni nggolok dale leu. Ana bei nai mamanak fo Marta natonggo no Ndia. 32 Ledo-eik Maria losa mamanak ndia, boe ma nita Yesus. De ana sendek neu Yesus ein. Ana nafada nae, “Awii, Ama! Mete ma Ama nai ia, na, neu ko au fading ta maten.”
33 Ledo-eik Yesus nita ndia namatani, ma hataholi Yahudi la mana tungga ndia boe oo lakaleleu, boe ma Ana luli nai dalen, ma nameda dale hedi. 34 Ana natane nae, “Ei matoin nai bee?”
Ala lataa lae, “Mai, Ama! Mai fo mita aom leo.”
35 Boe ma Yesus namatani. 36 De hataholi Yahudi la sila lakokola lae, “Mita dei! Ana sue nalan seli neu Lasarus!”
37 Tehuu hambu luma bali na lakokola lae, “Hataholi ia, fo mana buka hataholi mbokek matan, de ana bisa nita. Hatina de Ana ta bisa nakalee nala Lasarus fo boso mate?”
Lasarus nasoda fali
38 Yesus nameda dalen hedis bali. Boe ma Ana neu deka-deka no luak fo ala latoi Lasarus nai ndia. Ala kena luak ndia so, lenik batu ina-huuk esa. 39 Boe ma Yesus nadenu hataholi malai ndia nae, “Keko heni batu lelesu luak ndia dei!”
Tehuu Marta fo mana matek ka'an ndia, sapa nae, “Awe'e, Ama! Ana mate faik haa ia so maa! Neu ko kabook so.”
40 Boe ma Yesus tao nasanenedak kana nae, “Masaneda isinaak, hetu? Au afada memak ae, mete ma Marta tebe-tebe mamahele muu Au, na, dei fo bisa mita Manetualain koasa ina-huun.”
41 Basa boe ma hambu hataholi hida keko heni batu ndia neme luak ndia bafan mai. Boe ma Yesus nasale lalai neu, de Ana nae, “Ama! Au oke makasi, huu Ama mamanene Au. 42 Au bubuluk uma makahulun mai ae, Ama mamanene taa-taa Au. Tehuu hatematak ia Au kokolak leo ndiak, suek hataholi la fo mana mambadeik lai ia bisa bubuluk lae, Ama ndia madenu Au.” 43 Ledo-eik Ana kokolak nate'e leo ndiak, boe ma Ana nanggou no hala malii nae, “Lasarus! Kalua leo!”
44 Boe ma hataholi mana matek ndia kalua neme luak dale mai. Hambu temak mamate fo nana mbotik nala ndia liman ma ein. Boe ma hambu temak fo nana mbotik neu matan. Yesus nadenu hataholi malai ndia nae, “Lofa heni temak ndia dei, fo suek ana la'ok!”
Ala heti kekedik fo sangga tao lisa Lamatuak Yesus
45 Neu faik fo ala lita Yesus tataon ndia, de hataholi Yahudi no'uk fo ala mai be'e lo Maria, lamahele neu Yesus. 46 Tehuu luma bali leu latonggo lo hataholi paltei Farisi la, fo lafada sala Yesus tataon ndia.
47 Basa boe ma malangga anggama la malanggan nala ma hataholi Farisi la lakabubua fo ala lakokola. Ala latane lae, “Hataholi ndia, tao tanda heran mata-matak kala! De ita musi tao leo bee bali? 48 Mete ma ita ela Ndia, na, dei fo basa hataholi la lamahena neu Ndia, sama leo Ndia dadik neu sila manen. No leo ndiak, na mana palenda Roma nana hehetak, de ala ladenu soldadu fo suek mai tao lakalulutu ita Uma Ina Huhule-haladoin, ma ita hataholi nusan.”
49 Teuk ndia Kayafas dadik malangga anggama la malangga ina-huun. Ana kokolak nae, “Nggoak, ee! Ei ta bubuluk hata esa boe! 50 Huu malolenak kada hataholi esa maten, suek basa hataholi fe'ek kala hambu nasalala'ek. Mete ma taa, na, dei fo soldadu Roma la tao lakalulutu heni hataholi nusa Yahudi katematuan!” 51 Kayafas ta kokolak tungga ndia hihii hehelin. Lamatuak pake ndia bafan, huu ana dadik malangga anggama la malangga ina-huun nai teuk ndia. Huu ndia de Kayafas nafada memak nae, dei fo Yesus maten soa-neu basa hataholi Yahudi la. 52 Naa te ta kada Ndia maten soa-neu hataholi Yahudi la mesak kasa, tehuu soa-neu basa Manetualain anan nala fo mana latanggelak lai dae-bafok ia. Dei fo Ana tao basa sala dadik leu hataholi nusak esa.
53 Huu Kayafas kokolan ndia, de mulai neme faik ndia mai, hataholi Yahudi malanggan nala lala halak fo sangga tao lisa Yesus.
54 De Yesus ta la'ok ledo-ledo bali neme hataholi Yahudi malanggan nala laladan nala mai. Ndia no ana mana tunggan nala heok leni kota esa leu, nade Efraim, fo deka-deka nai mamana nees. Boe ma ala leo tataak lai ndia.c
55 Faik ndia, anggama Yahudi fai malole Paska deka-deka so. Ndia natetemen, hataholi no'uk leme deak mai lakabubua lai kota Yerusalem fo tungga feta Paska lai ndia. Ala losa lakahuluk fo tao lalalao aok tungga anggama heti-heun. 56 Hataholi no'uk leni Yerusalem leu fo ala lasanggak Yesus nai ndia. Ledo-eik ala lambadeik lai Uma Ina Huhule-haladoik pasan, ala latatanek lae, “Tungga ei, na talo bee? Ei mae hetuk Yesus nau mai tungga feta anggama do, taa?” 57 Huu malangga anggama la malanggan nala ma hataholi Farisi la palenda so lae, “Mete ma hambu hataholi bubuluk Yesus nai bee, na, mafada ai dei!” Naa te ala sangga humu Ndia.