3 Neme Yesus ana mana tungga kasanahulu duan nala mai, esa nade Yudas Iskariot. Neu faik fo malangga anggama Yahudi malanggan nala sangga dalak fo sangga tao lisa Yesus, nitu la malanggan maso neni Yudas dalen neu. 4 De ana kalua neu sangga malangga anggama malanggan nala, ma malangga mana manea Uma Ina Huhule-haladoik. Ana nau nala halak fo se'o heni Yesus neu sala. 5 Ledo-eik malanggan nala lamanene Yudas kokolan leo ndiak, boe ma lamahoko lalan seli. Ala helun lae, “Neu! Mete ma o nau se'o Yesus neu ai, na, neu ko ai bae.” 6 Yudas nakaheik. De ana mulai sangga lelak fo se'o heni Yesus no nee-neek neu sala, fo suek hataholi no'uk kala ta bubuluk.

7 Boe ma hataholi Yahudi fai malolen ndia losa, de ala nau hala bi'i-lombo ana, fo tao feta Paska. 8 Basa de Yesus nadenu Petrus ma Yohanis nae, “Ei dua nggei la'ok makahuluk dei, fo sadia fee ita nana'a feta Paska sama-sama.”

9 Boe ma dua sala latane lae, “Ama! Ai musi sadia nana'ak nai bee?”

10 Ana nataa nae, “Mete ma ei maso mini kota Yerusalem miu, dei fo ei matonggo mia touk esa nasaa nggusi oe. Miu tunggan losa uman. 11 Mafada maumak ndia mae, ‘Ai Ama Mesen noke kama fo sangga paken tao feta Paska no ana mana tunggan nala. Hambu, do?’ 12 Dei fo maumak ndia natudu ei mamanak esa nai uma tadan lain. Ana sadia nalan mana tesa memak so. Ela kada ei dua nggei miu sadia nana'ak nai ndia leo.”

13 Basa de dua sala leu. Boe ma latonggo lo basa hata fo Yesus nafada memak neu sala so. De ala sadia nana'a Paska nai ndia.

14 Ledo-eik basan nana sadiak so, Yesus asa mai. Ana ha'i mamanak dekak no mei, ma Ndia nadedenun nala boe oo langgatuuk la'a feta. 15 Boe ma Yesus nafada sala nae, “Au ahiik alan seli anggatuuk u'a feta Paska ia ua ei so, nakahuluk neme Au hambu doidosok mai. 16 Tanda neulalau ia. Huu basa ia, na, Au ta anggatuuk u'a feta Paska seluk ua ei so bali. Dei fo hataholi bubuluk ledo-ledo lae, Amak Manetualain to'u palenda, bei fo Au u'a feta seluk bali.”

17 Basa de Ana ha'i nala nggalaas fo isin anggol oek. Boe ma Ana noke makasi neu Manetualain, de loo nggalaas ndia neu sala. Basa boe ma Ana kokolak nae, “Simbo mala nggalaas ia, fo ei esa-esa minu. 18 Masanenedak, baa! Mulai neme le'odaen ia mai, Au ta inu anggol oek so bali. Dei fo hataholi bubuluk ledo-ledo lae, Amak Manetualain to'u palenda, bei fo Au inu bali.”

19 Boe ma Ana ha'i nala loti balok esa, de noke makasi neu Manetualain. Boe ma Ana bibi'i loti ndia, de loon neu sala. Ana nae, “Loti ia, Au aong fo Au feen neu ei basa nggei. La'i-la'ik ei mi'a loti ia, na ei masaneda Au.” 20 Ledo-eik ala la'a basa so, boe ma Ana ha'i nala nggalaas fo anggol oek nai dalek. De Ana kokolak bali nae, “Anggol ia, na Au daang faa henin fo nasala'e nala ei. Manetualain pake Au daang ia, fo Ana mba'a hehelu beuk no ei.^b

21 Tehuu mata neuk, huu hambu hataholi fo hatematak ia nanggatuuk na'a sama-sama no ita nai mei ia, dei fo ana se'o heni Au.^c 22 Memak Au, Hataholi Isi-isik, musi mate tungga Manetualain hihiin. Tehuu hataholi mana se'o heni Au ndia, mata neuk! Huu dei fo ana lemba soen!”

23 Yesus ana mana tunggan nala lamanene leo ndiak, boe ma ala mulai latatanek lae, “Meda see ndia nau tao manggalauk neu Ndia leo ndiak?”

24 Boe ma Yesus ana mana tunggan nala mulai lasisimbo bafak lae, see neme sila mai ina-huuk nalan seli.^d 25 Tehuu Yesus ka'i sala nae, “Nai hataholi nusak kala fo ta lalelak Manetualain, manek kala tuni-ndeni lau-inggun nala, ma palenda lena-lenak. Naa te ala nau fo lau-inggu la loke sala lae, ‘Amak mana tulu-fali lau-inggu.’ 26 Tehuu ei ta bole leo ndiak. Mana nau dadik hataholi ina-huuk, sodan musi tebe-tebe dadik sama leo hataholi kadi'ik fo ono-lau basa hataholi. Mana nau dadik malanggan, musi ono-lau sama leo ata.^e 27 Ei dudu'a sudik kana, hataholi ina-huuk na ndia see? Hataholi mana nanggatuuk nai mei do, mana ono-lau mei? Neu ko hataholi mana nanggatuuk ndia hataholi ina-huuk. Naa te Au ta tao Au aong leo ndiak. Au mai fo ono-lau ei.^f

28 Ei ia sama-sama mia Au taa-taa, neu faik fo Au hambu doidosok. 29 Au Amang so'u nala Au so fo to'u palenda nai Ndia nusan. De hatematak ia Au boe oo so'u ala ei, 30 fo suek dei fo ei manggatuuk mi'a nai mei esa mia Au nai nusa sodak. Au boe oo fee koasa fo ei palenda leo kasanahulu duak kala malai Israel.”^g

31 Basa boe ma Yesus nafada Petrus nae, “Petrus. Nitu la malanggan nau soba tao kofe'e ei basa nggei mima Au mai, sama leo hataholi da'i isik fo tao kofe'e taak neme isik mai.^h 32 Tehuu Au hule-haladoi fee o, Petrus, fo suek o mamahele makandoo neu Au. Mete ma o fali muni Au mai so, na, dei fo o musi matetea o tolanoom mala dalen.”

33 Boe ma Petrus nataa nae, “Taa, Ama! Au ta la'o ela Ama. Huu au sadia maso bui sama-sama ua Ama. Mae au mate sama-sama ua Ama boe oo, malole.”

34 Tehuu Yesus nataa nae, “Petrus! Mamanene neulalau. Le'odaen ia, manu bei ta kokoa, tehuu o malelesi la'i telu so mae, o ta malelak au.”

35 Basa boe ma Yesus kokolak no sala nae, “Fai maneuk, neu faik fo Au adenu ei, fo miu mafada Au Hala Maloleng sudi nai bee, na, Au ae ei ta bole mini doik, tas, ma tabu eis. Faik ndia, ei kulan hata?”

Boe ma ala lataa no'u lae, “Fai maneuk ai ta kulan hata esa boe!”ⁱ

36 Boe ma Ana kokolak nakadaik nae, “Tehuu hatematak ia fe'e so. Mete ma ei madoi, na, minin. Mete ma hambu tas, na, minin boe. Mete ma tafa taa, na, miu se'o ei badum esa fo miu hasa. 37 Huu hataholi Yahudi la tao Au leo hataholi manggalauk. De doo-doo bali, te ala mai humu Au. Huu ndia nandaa no hata fo ba'i Yesaya sulak memak so nae:

38 Ala lafada lae, “Ama! Ai mini fela dua.”

Boe ma Yesus nataa nae, “Dai so. Boso kokolak ndia bali!”

39 Yesus no ana mana tunggan nala la'a basa feta Paska, boe ma ala kalua leni lete Setun leu, sama leo natetemek. 40 Losa ndia, boe ma Ana nafada sala nae, “Ei musi hule-haladoi, fo suek ei boso hambu soba-douk.”

41 Basa de Ana heok faa neme sila mai. Ana la'ok ta doo anak, boe ma sendek fo hule-haladoi nae, 42 “Ama! Mete ma Ama nau, na, makadodook doidosok ia neme Au mai. Tehuu boso tungga Au hihiing; elan fo tungga kada Ama hihiin.” 43 [Boe ma Manetualain ata nusa sodan esa mai, fo tao natetea Ndia dalen. 44 Huu Ana doidoso nalan seli so, losa mbusen titi sama leo daak.]^k

45 Ana hule-haladoi nate'e, boe ma Ana fo'a de neu natonggo no ana mana tunggan nala. Tehuu ala sunggu, huu ala manggu lalan seli ma dale hedi. 46 Boe ma Yesus nafada sala nae, “Hatina de ei sunggu?! Malolenak ei hule-haladoi fo suek soba-douk mai, na, ei ta tuda.”

47 Yesus bei kokolak leo ndiak, te Yudas (esa neme ana mana tungga kasanahulu duan nala sila), mai no hataholi no'uk. Ana neu deka-deka Yesus, fo sangga holu-idu Ndia. 48 Tehuu Yesus nafadan nae, “Wei, Yudas! O nau se'o heni Hataholi Isi-isik ia, munik i'iduk, do?”

49 Neu faik fo Yesus ana mana tungga fe'en nala bubuluk Yudas dudu'a manggalaun leo ndiak, boe ma latane Yesus lae, “Ama! Ai laba sala leo, do? Huu ai mini fela.” 50 Boe ma esa neme sila mai, fe'a nala felan, de sambi ketu hataholi esa ndi'i doo konan. Hataholi ndia, na, malangga anggama Yahudi malangga ina-huun atan.

51 Tehuu Yesus nataa nae, “Neme naa leo! Boso laba sala!” Boe ma Ana daba hataholi ndia ndi'i doon, de tao nahain.

52 Hataholi la fo mana mai humu Yesus ndia: malangga anggama Yahudi malanggan nala, lasi hadak kala, mana manea Uma Ina Huhule-haladoik, ma hataholi fe'ek bali. Yesus natane sala nae, “Leo bee? Ei dudu'a mae Au ia, hataholi manggalauk, losa ei mai humu Au pake tafa, ma ai keke'uk, do? 53 Tungga faik Au anoli ei nai Uma Ina Huhule-haladoik, tehuu ta hambu hataholi esa boe mai humu Au. Tehuu neme naa leo! Ei faim ia so. Hatematak ia nitu la malanggan koasan ia!”^l

54 Basa de ala humu lala Yesus, boe ma hela loo Ndia neni malangga anggama Yahudi malangga ina-huun uman neu. Petrus boe oo tungga nafufunik nesik dea. 55 Nai uma ndia pasan hataholi lana'a ha'i ina-huuk. Petrus boe oo neu nanggatuuk dala ha'i tungga nai ndia. 56 Ata inak esa nita Petrus nanggatuuk deka ha'i. Ana mete neulalau Petrus matan, basa de nafada hataholi fe'ek malai ndia nae, “Wei! Hataholi ia boe oo do'o-do'o no Yesus!”

57 Tehuu Petrus nalelesi nae, “Taa! Au ta alelak Hataholi ndia, maa. O bubuluk hata?”

58 Ta dook boe ma hataholi esa heok matan de nita Petrus, boe ma kokolak nae, “Memak o ia, esa neme Yesus hataholin nala mai, hetu?”

Tehuu Petrus sapa nae, “Taa! O kada kokolak madabak!”

59 Meda li'u esa bali, boe ma hataholi fe'ek esa bali kokolak nae, “Wei! Au bubuluk, hataholi ia, Yesus ana mana tunggan esa, huu ndia boe oo hataholi Galelea.”

60 Tehuu Petrus nalelesi tingga-tingga nae, “O kokolak pepekok ndia!” Nandaa no Petrus kokolak leo ndiak, boe ma manu kokoa.

61 Boe ma Yesus heok matan fo suli ndia. De Petrus nasaneda Yesus kokolan isinaak ndia nae, “Le'odaen ia, manu bei ta kokoa, tehuu o malelesi Au la'i telu so.” 62 Petrus nasaneda leo ndiak, boe ma ana kalua neme uma pasan mai, ma namatani nakaleleu.

63 Basa boe ma hataholi mana manea Yesus ndia, mulai haumemee ma mbomboko lakamiminak Ndia. 64 Boe ma ala mboti matan nenik temak, de latanen lae, “Heh! Mete ma o ia Manetualain mana kokolan, na, soba o neuk! See ndia, tutu o?” 65 Basa de ala a'ali langge'an.

66 Fafai anan, malangga anggama Yahudi malanggan nala, mese anggama, ma lasi hadak kala lakabubua so, fo palisak Yesus dede'an. Basa de ala ladenu hataholi hela loo Yesus neni mamana naketu dede'a anggama neu. 67 Ledo-eik Ana maso dalek neu so, boe ma ala latanen lae, “Soba O mafada dei! O ia memak tebe-tebe Karistus, do?”

Boe ma Yesus nataa nae, “Mae Au ataa tetebes boe oo, ei ta mamahele. 68 Boe ma mete ma Au atane ei dede'ak esa, na, neu ko ei ta mataa. 69 Ta dook bali, Manetualain nau pake Ndia koasan fo ana seli, fo so'u laik Au, Hataholi Isi-isik ia. Boe ma Au anggatuuk nai Ndia boboa konan, fo palenda sama-sama ua Ndia.”^m

70 Basa sala lamanene leo ndiak, boe ma latane lae, “Mete ma leo ndiak, na, o dudu'a mae, o ia, Manetualain Anan, do?”

Boe ma Yesus nataa nae, “Memak, ei kokolan ndia, tetebes.”

71 Basa boe ma hataholi mana tao dede'ak kala sila kokolak landaa lae, “Ita basa nggata tamanene aon so, hetu? Ana so'u aon dadik Manetualain Anan. Ia tao nala Manetualain dalen kulan so! Tungga ita anggaman heti-heun, mete ma hambu hataholi tao aon sama leo Manetualain, na, hataholi ndia musi huku nisan. De leo bee? Ita ta paluu sakasii bali. Huku mate Ndia leo.”