5 Losa uma ndia, tehuu tou mana kabin bei ta no mamain boe. Dook boe ma ina anak kala matan nala nduak, de ala sunggu lamanee.

6 Naa te neu fatilada, boe ma lamanene hataholi la eki lae, ‘Wei! Tou mana kabin mai so! Mai teu soluk kana leo!’ 7 Ina anak kala sila lamanene leo ndiak, boe ma ala fo'a no'u. Basa de ala lahehele sila bandu anan nala. 8 Tehuu ina ana nggoak kala kokolak lo sila nonoon nala lae, ‘Wei, tolanoo nggala ei! Tulun ba'e fee ai mina faa dei, huu ai bandun nala sangga mate sala ia so!’ 9 Tehuu ina ana malelak kala sila lataa lae, ‘Awii! Boso mamanasa, te ta bisa maa. Ai minan ta dai neu ita basa nggata! Malolenak kada ei miu hasa mina nai kios leo.’ 10 Boe ma leu hasa mina. Tehuu ledo-eik ala kalua, boe ma tou mana kabin ndia losa so. Boe ma ina ana malelak kala sila maso tungga leni mamana feta leu, sama-sama lo mana kabin ma basa nana hokak kala. Sila basa sala maso leni uma dale leu, boe ma hataholi kena lelesu.

11 Basa de ina ana nggoak kala sila mai. Ala langgou kokoe lae, ‘Ama! Ama aa! Tulun soi lelesu dei!’ 12 Tehuu ana nataa nae, ‘Weih, ta bisa bou. Huu au ta alelak ei!’^b

13 Huu ndia de ei musi mahehele fo manea makandondoo henin, huu ei boe oo ta bubuluk Au mamaing, la'e-neu fai hida do, li'u hida.”

14 Basa de Yesus tuti nakandandaak esa bali nae, “Mete ma Au la'o ela ei so, na, ei musi tao ues neulalau soa-neu Au, sama leo nakandandaak ia. Leo iak: malanggan esa sangga neni nusa dook neu. Neu faik fo ana nahehele sangga la'o, boe ma noke nala atan nala, de ana palenda sala nae, ‘Ei pake doik ia dadik neu poko. Mete ma au fali, na ei musi mafada au, ei hambu bunak ba'u bee.’ 15 Boe ma ana fee ndia ata makasososan doi lilo mbilas alukosu lima,^c fo ana nakabubunak doik kala sila. Boe ma ana fee ata kaduan, doik alukosu dua, ma ata katelun doik alukosu esa, tungga sila esa-esak nabebe'in. Basa de ana neni dook neu.

16 Ata kaesan simbo nala doik kala sila, boe ma ana kalua tutik fo neu danggan. Ta dook boe ma ana hambu bunan doik alukosu lima bali. 17 Leo ndiak boe no ata kaduan. Ana hambu bunan doik alukosu dua bali. 18 Tehuu ata katelun fo mana simbo doik alukosu esa ndia, neu kali bolok, de nafuni malanggan doin ndia.

19 Dook boe ma, bei fo malanggan ndia fali main. De nakabubua nala ndia atan nala fo mulai palisak ndia doin nala fo ala lakanenik sila. 20 Ata kaesan ndia maso de ana fee doik alukosu sanahulu, boe ma nae, ‘Ama! Ia, ama doin. Fain ama fee au doik alukosu lima. Tehuu hatematak ia, au hambu bunan alukosu lima bali.’

21 No leo ndiak, malanggan ndia namahoko. De ana nafada nae, ‘Malole! O ia, ata malole. O tao ues no manggatek so, ma o tungga makandondoo henin au palendang, mae au ta nai ia. Huu o bisa makaneni dede'a kadi'i leo iak, de dei fo au so'u ala o fo makaneni dede'a ina-huuk bali. Dei fo au tao feta fo ita basa nggata tamahoko takasoe.’

22 Basa boe ma ata kaduan ndia mai, de fee ndia malanggan doik alukosu haa, ma nae, ‘Ama! Makahulun ama fee au, doik alukosu dua. Kada mete aom, huu au hambu bunan doik alukosu dua bali.’

23 Boe ma malanggan ndia namahoko. De ana nafada nae, ‘Malole! O ia boe, ata malole. O manggate tao ues so, ma o tungga makandondoo henin au palendang, mae au ta nai ia. Huu o bisa makaneni dede'a kadi'ik leo iak, de dei fo au so'u ala o makaneni dede'a ina-huuk lena bali. Dei fo au tao feta fo ita basa nggata tamahoko takasoe.’

24 Basa de ata katelun ndia mai. Boe ma ana nafada nae, ‘Ama! Au bubuluk ama ia hataholi fo ta hambu dale kasian. Ama ha'i mala hata fo hataholi fe'ek taon, ma ketu-kolu mala hata fo hataholi fe'ek selen. 25 Au bii, boso losak doik kala ia mopo heni sala, fo ama huku au. Huu ndia de au afuni neulalaun. Ia, ama! Mala falik kana huu ama doin alukosu esa ia bei sodak!’

26 Malanggan ndia namanene leo ndiak, boe ma ana nasapalak kana nae, ‘O ia ata manggalauk, ma mbela-tuam ana seli! Mete ma o bubuluk so mae, au ha'i ala hata fo hataholi fe'ek taon, ma ketu-kolu ala hata fo hataholi fe'ek selen, 27 na, hatina de o ta muu mbeda au doing neu bank leo? Fo suek au fali, na, au hambu bunan, mae kada faak boe oo, malole ndia!’

28 Basa de malanggan ndia nadenu ata fe'en nala nae, ‘Ha'i mala ndia doin, fo feen neu ata fo mana hambu bunan doik alukosu lima ndia. 29 Huu hataholi mana makaneni no malole, hata fo ana to'un, dei fo ana hambu no'uk bali. Tehuu hataholi fo ta nau nakaneni hata fo ana to'un ndia, dei fo ala ha'i lala basan neme ndia mai.^d

30 Humu mala ata fo sosoa taak ia. Hela loloson fo mbia henin deak neu. Elan namatani ma doidoso nai mamana makiuk ele!”’^e

31 Basa boe ma Yesus kokolak nakandoo nae, “Au, Hataholi Isi-isik ia, dei fo konda mai pake Au Amang koasa ina-huun, sama-sama ua Ndia ata nusa sodan nala. Boe ma Au anggatuuk nai Au kadela mana palendang fo ana seli ndia, fo palisak basa hataholi la sodan nala.^f 32 Dei fo basa hataholi fo mana masoda nitak nai dae-bafok, ala mai lasale Au. Basa na, Au tada kofe'ek kasa, sama leo mana hoo tada kofe'e bi'i-lombo neme bi'i-aek mai, fo dadik bubuak dua. 33 Hataholi mana tao tungga Manetualain hihiin, Au tao sala leu Au boboa konang. Tehuu fe'ek kala, Au tao sala leu Au boboa kiing. 34 Faik ndia, Au to'u palenda sama leo Manek. Dei fo Au afada hataholi malai Au boboa konang ae, ‘Ei ia mana simbo baba'e-babatik neme Au Amang mai. Mai fo maso mini Ndia uman dale miu, fo nana sadia memak neme sososan mai neu ei so. 35 Au hoka ei, huu makahulun ledo-eik Au ndoe, ei fee Au u'a. Ledo-eik Au maa mada, ei fee Au inu. Au mai sama leo hataholi nusa dea, tehuu ei simbok Au nai ei umam mala. 36 Au balo'ang taa, tehuu ei fee Au balo'as. Au amahedi, tehuu ei mai makaneni Au. Au nai bui dale, tehuu ei mai tilo Au.’

37 Hataholi dale ndoos sala sila malai Au boboa konang lamanene leo ndiak, dei fo ala lataa lasafali lae, ‘Lamatuak aa, ia talo bee ia so? Lamatuak nae, Lamatuak ndoe, na ai feen na'a. Lamatuak maa mada, na ai feen ninu. 38 Lamatuak sama leo hataholi nusa dea, na ai simbok kana nai ai uman nala. Lamatuak balo'an taa, na ai feen. 39 Lamatuak namahedi, na ai miu makanenin. Lamatuak nai bui dale, na ai miu tulu-falin. Tehuu fai hida ai tao dede'a leo ndiak?’

40 Dei fo Au ataa sala ae, ‘Mamahele neu Au! Huu ledo-eik ei tao dede'a leo ndiak neu Au hataholi nggala, mae tao neu hataholi papake taak kala boe oo, na, ndia ei tao neu Au ndia so!’

41 Boe ma Au afada hataholi malai Au boboa kiing ae, ‘Heeh! hataholi manggalauk kala! Manetualain sumba-soo ei so. Boke malai heok ia! Dei fo Au adenu hataholi mbia ei mini ha'i naraka mbila ta mana matek miu. Te Manetualain sadia mamana doidosok ndia neu nitu la ma sila malangga ina-huun so. 42 Au husi heni ei, huu ledo-eik Au ndoe, ei ta fee Au u'a. Ledo-eik Au maa mada, ei ta fee Au inu. 43 Au mai sama leo hataholi nusa dea, tehuu ei ta simbok Au nai ei umam mala. Au balo'ang taa, tehuu ei ta fee Au balo'as. Au amahedi, tehuu ei ta mai makaneni Au. Au nai bui dale, tehuu ei ta tulu-fali Au.’

44 Hataholi manggalauk kala sila lamanene leo ndiak, dei fo ala lataa lae, ‘Lamatuak, talo bee ia so? Lamatuak nae Lamatuak ndoe, tehuu ai ta fee O mu'a. Lamatuak maa mada, tehuu ai ta fee O minu. Lamatuak sama leo hataholi nusa dea, tehuu ai ta simbok O nai ai uman. Lamatuak balo'an taa, tehuu ai ta fee O. Lamatuak namahedi, tehuu ai ta makaneni. Lamatuak nai bui dale, tehuu ai ta miu tulu-fali. Tehuu fai hida ai tao leo ndiak neu Lamatuak?’

45 Dei fo Au ataa sala ae, ‘Mamahele Au! Huu ledo-eik ei ta tulu-fali hataholi papake taak kala, na ndia sama leo ei ta tulu-fali Au.’ 46 Basa boe ma hataholi manggalauk kala sila hambu doidosok lakandondoo henin losa dodoon neu. Tehuu hataholi dale ndoos sala sila, hambu sodak lakandondoo henin lo Manetualain losa dodoon neu.”^g