2 Au koa ei, huu mae leo bee boe oo, ei masaneda makandoo. Ma basa dede'ak fo au anoli ei so, na ei bei tao tunggan. Malolen seli! 3 Tehuu hambu dede'ak esa fo au sangga asanenedak ei leo iak: boso mafalende heni ei dadadim neme bee mai. Tou kamahelek esa-esak naoka nai Karistus fo mana dadik ndia malanggan. Inak dadadin neme touk mai. Ma Karistus neme Manetualain mai.^b

4 Touk boso mboti langgan, neu faik fo ana hule-haladoi, do, neu faik fo nafada Lamatuak hehelun. Te ndia sama leo ana tao nakamamaek Karistus, huu ta fee hada-holomata tungga ita natetemen. 5 Tehuu inak musi mboti langgan neu faik fo ana hule-haladoi, do neu faik fo nafada Lamatuak hehelun. Te mete ma taa, na, ndia sama leo ana tao nakamamaek saon, huu ana ta fee hada-holomata tungga ita natetemen. Ma ndia boe oo, tao nakamamaek ndia ao hehelin, sama leo mete ma inak nggeu momoik langgan. 6 Huu mete ma hambu inak ta nau mboti langgan, fo dadik tanda nae, ana fee hada-holomata neu saon, na, malolenak ana nggute keke'u langga bulun. Tehuu mete ma ana nameda langga momoin ndia, tao nakamamaek ndia, na, malolenak ana mboti langgan leo.

7 Soba dudu'a leo iak: touk ta paluu mboti langgan, huu Manetualain tao touk tungga Ndia mata-aon. Huu ndia de touk dadik buna-boak fo natudu Manetualain ana selin. Ma inak boe oo, dadik buna-boak fo natudu touk ana selin.^c 8 Huu ledo-eik Manetualain nakadadadik dae-bafok ia, Ana ta tao touk neme inak mai. Tehuu Ana tao inak neme touk mai. 9 Ma Ana ta tao touk soa-neu inak. Tehuu Ana tao inak soa-neu touk.^d 10 De malolenak inak mboti langgan, fo hataholi bubuluk lae, ana pake ndia haak fo hule-haladoi, ma nafada Lamatuak hehelun tungga teteben. Ata nusa sodak boe oo, bubuluk leo ndiak. 11 Tehuu mete ma sila nana mba'ak lo Lamatuak, na, inak ma touk, ta esa-esak no ndia soda hehelin. 12 Makasososan, Manetualain tao inak neme touk mai. Tehuu basa boe ma inak ndia bonggi nala touk. Ma Manetualain ndia tao, de basan dadi.

13 Ei dudu'a sudik! Mete ma inak hule-haladoi neu Manetualain, ma ta mboti langgan, tungga ei, na, ndia malole, do taa? 14 Tungga ei hadam nai kota Korintus, mete ma touk langga bulun manalu, na, ndia tao nakamamaek kana, do? 15 Tehuu mete ma inak langga bulun manalu, na, ndia malolen ana seli, hetu? Lamatuak feen langga bulu manalu, fo mboti nala langgan. Tetebes ndia.

16 Tehuu mete ma hambu mana nau nasisimbo bafak nakandoo la'e-neu dede'ak ia, na, masanenedak te ita natetemen ndia, neme ita malanggan, ma salanik kala mai.

17 Hatematak ia, au sangga kokolak dede'ak esa bali. Nai dede'ak ia, au ta koa ei. Huu ledo-eik ei makabubua, ei ta tao tungga ndoon, tehuu ei boe tamba babalik kana bali.

18 Makasososan, au amanene lae, ledo-eik ei makabubua tao ibadat, ei mababa'ek kala. Luma leme au amanenek ndia, neu ko hambu ndoon. 19 (Memak, huu ei tao bubua-bubuak ndia, dei fo nana nitak see ndia tetebes namanene neu ita Lamatuan, ma see ndia ta nau namanene neu Ndia.)

20 Huu ledo-eik ei hataholi salanik makabubua fo mi'a nai Lamatuak mein, na ei musi masaneda Lamatuak Yesus. Ndia ndia, tetebes. Tehuu ei ta tao leo ndiak. 21 Ndia butin, fo ndia ledo-eik ei manggatuuk mi'a, hambu luma ta lahani hataholi fe'ek, hambu mana na'a balena'o, ma hambu fe'ek bali linu mafuk. Losa hataholi fe'ek ta hambu baba'ek, de ala ndoe. 22 Talo bee ia!? Ei uma hehelim taa, fo mi'a-minu nai ndia, do? Do, ei maksut tao makalulutu Manetualain salanin nala nade malolen? Do, ei nau tao makamamaek hataholi mana to'a-taak kala? Ei nau au kokolak talo bee? Ei nau au koa ei nai dede'ak ia, do? Boso mamahehenak!

23 Lamatuak Yesus mesak kana nafada memak dede'ak ia neu au, ma au feen neu ei bali. Nae, ledo-eik hataholi la lahehele fo sangga tao lisa Ndia, le'odaen ndia Ana ha'i nala loti balok esa. 24 Boe ma Ana hule-haladoi noke makasi neu Manetualain. Basa de Ana nafada ana mana tunggan nala nae, “Mi'a loti ia. Ia Au aong. Dei fo ala tao lakalulutu Au aong soa-neu ei. De ei musi mi'a loti ia, fo ei masaneda Au.”

25 Ledo-eik la'a late'e so, Ana tao sama boe no nggalaas fo isin anggol oek nae, “Anggol oek ia ndandaan, na ndia: Manetualain mba'a hehelu beuk no ei. Ma Au daang musi faa henin losa Au mate dei, bei fo heheluk ndia bisa dadi. De la'i-la'ik ei minu anggol oek leo iak, na, ei musi masaneda Au mamateng.”^e 26 La'i-la'ik ei tao tataos fo mi'a loti leo iak, ma minu neme nggalaas mai leo iak, losa Lamatuak fali main, na ndia sama leo ei tui seluk la'e-neu Ndia mamaten.

27 Huu ndia de, mete ma hambu hataholi na'a loti, ma ninu neme nggalaas ndia mai, fo nasanenedak ita Lamatuan, tehuu dalen ta ndoos, na, dei fo Manetualain huku ndia. Huu Lamatuak Yesus aon ma daan. De mete ma hataholi dalen ta ndoos, na, ta nandaa na'a ma ninu nai ndia, huu ndia kada tao nakadadaek Lamatuak Yesus. 28 Malolenak, hataholi esa-esak palisak ndia dale hehelin dei. Boe ma mete ma ana namahele tebe-tebe dalen ndoos, bei fo ana bisa na'a loti ndia, ma ninu anggol oek ndia. 29 Tehuu hambu hataholi na'a ma ninu no dale ta ndoos. Huu ala dudu'a lae, “Yesus mamaten ndia, sosoan ta faa boe. Yesus ao-inan sosoan ta soa-neu au.” Hataholi leo ndiak lemba aon sila nenenin, huu dei fo ala hambu huhukuk. 30 Huu ndia de nai ei laladam mala ele, hambu mana ma'a-malek, hambu kamahedik, ma hambu mana matek so.

31 Tehuu mete ma ita palisak neulalau ita dalen dei, na, ita ta hambu huhukuk leo ndiak. 32 Mete ma ita Lamatuan huku ita, na, Ana tao leo ndiak fo nanoli ita tungga dala ndoos. Huu Ana ta nau ita hambu huhukuk, ma dei fo takalulutuk no'u to basa hataholi dae-bafok ia.

33 De tolanoo susue nggala ei! Mete ma ei makabubua fo mi'a nai Lamatuak mein, na, esa musi nahani esa. 34 Mete ma hambu mana ndoek nalan seli, na, malolenak na'a nai uman dei. Basa dei fo, mete ma ei makabubua no'u, na, ei boso hambu huhukuk.

La'e-neu dede'a fe'ek kala fo ei matanek ndia, au uni ele uu dei, bei fo au hetin.