Ala kokolak leo ndiak, huu bei faik dua bali, hataholi Yahudi la fai malolen nala, fo ala foin nade ‘Fai Paska’, ma ‘Fai Feta Loti Ta Pake Lalu Teik.’ Ma nai fai malole sila, ala lasaneda neu lele uluk, ledo-eik sila bei-ba'in nala kalua leme nusa Masir mai.^a

3 Nai nggolo Betania, hambu hataholi esa nade Simon. Makahulun hataholi la nunuten, huu ana hambu hedi kusta. Tehuu hatematak ia ana hai so.

Faik ndia, fai malole la bei ta losa, Yesus no ana mana tunggan nala leu la'a-linu lai Simon uman. Ledo-eik la'a-linu, boe ma inak esa mai natonggo no Yesus. Ana to'u boto esa fo nana taok neme batu mai. Isin mina kaboo meni isi-isik fo belin seli.^b Boe ma inak ndia femba natepa boto ndia lesuha'in. De ana di'a mina ndia faa-faa neu Yesus langgan fo dadik tanda nae, ana fee hada-holomata neu Yesus.

4 Tehuu hambu hataholi fe'ek hida la'a-linu tungga lai ndia boe. Ledo-eik ala lita inak tataon ndia, boe ma ala luli, de ala kokolak koao lae, “Ah! Ina hatak ia, de ana mbombo'a heni mina kaboo meni kabelik ndia no sosoan taa! 5 Malolenak kada ana se'o mina ndia! Fo neu baba'e doi no'uk sila neu hataholi mana to'a-taak kala! Mina kaboo menik ndia belin, sama leo hataholi esa nggadin teuk esa.” Basa boe ma ala ka'i belak neu ndia bali.

6 Tehuu Yesus bala sala nae, “Ei boso makatoto'ak inak ia! Boso mbali tataon ndia! Au amahoko, huu ana di'a mina kaboo menik ia neu Au aong so. 7 Hataholi kasian nala lo ei tungga-tungga faik. De ei bisa tulu-fali sala sudi neu faik bee. Tehuu Au na, ta dook bali te Au ta sama-sama ua ei so.^c 8 Au sodang ta nala dook so. Ma isinaak inak ia di'a mina neu Au, na ana nalalau memak Au aong so, sama leo ana loloo memak bungga neu Au mbombolang neu faik fo latoi Au so. 9 Masanenedak matalolole baa! Nai mamanak bee fo Manetualain Tutui Malolen ia nana tui-benggak ndule dae-bafok ia, na neu ko ala tui inak ia tatao malolen ndia. Fo suek basa hataholi la lasanenedak ndia.”

10 Basa boe ma hambu esa neme Yesus ana mana tungga kasanahulu duan nala mai, nade Yudas Iskariot. Ana kalua neu sangga malangga anggama Yahudi la malanggan nala fo sangga se'o heni Yesus neu sala. Ana losa sila, boe ma nafada ndia maksut. 11 Ledo-eik malanggan nala lamanene Yudas kokolan ndia, boe ma ala lamahoko lalan seli. De ala helun lae, “Mete ma o nau se'o heni Yesus neu ai, na, neu ko ai bae o.” Boe ma Yudas kalua, de ana mulai sangga dalak fo fee Yesus neu sala.

12 Faik ndia tuda la'e-neu fai kaesan neme hataholi Yahudi fai malolen nala. De faik ndia, ala lateme hotu loti ta pake lalu teik, ma ala hala bi'i-lombo boe. Basa ndia boe ma Yesus ana mana tunggan nala mai latanen lae, “Ama aa! Faik ia, ita fai malole Paska. De Ama nau ai miu sadia mamanak feta Paska nai bee?”

13 Boe ma Yesus nadenu ana mana tunggan dua nae, “Ei dua nggei makahuluk mini kota miu. Dei fo nai ele, ei matonggo mia touk esa lu'a oe neu nggusi anak esa. Ei miu tunggan leo. 14 Mete ma ana maso neni uma bee dalek neu, na, ei tunggan mini ndia miu. Basa na mafada maumak mae, ‘Ama! Ai Ama Mesen noke mamanak esa, fo Ana sangga paken tao feta Paska no Ndia ana mana tunggan nala.’ 15 Basa dei fo hataholi ndia natudu ei kama maloa esa nai uma tadan lain. Ana sadia nala kama ndia mana daik so. Kada ei dua nggei miu fo sadia nana'ak nai ndia leo.”

16 De dua sala la'o leni kota leu. Nai ele, ala latonggo lo basa hata fo Yesus nafada memak neu sala so. Boe ma ala sadia lala basa-basan, fo Yesus asa la'a feta Paska lai ndia. Basa boe ma dua sala leu loke Yesus asa.

17 Ledo-eik ledo mulai tesa so, boe ma Yesus no ana mana tungga kasanahulu duan nala leni ndia leu.

18 Basa boe ma langgatuuk, de la'a-linu sama-sama. Ledo-eik ala bei la'a-linu, boe ma Yesus nakokola nae, “Ei mamanene baa! Hambu hataholi esa neme ei mai, dei fo ana se'o heni Au neu hataholi fe'ek kala.”^d

19 Ala lamanene leo ndiak, boe ma lameda dalen nala ta malole. Boe ma sila esa-esak latane Yesus lae, “Hataholi fo Ama mafadak ndia, ta ndia au, hetu?”

20 Yesus nataa nae, “Hataholi fo mana dombe lotin sama-sama no Au, neni manggo ia dalek neu, na ndia ndia se'o heni Au. 21 Masanenedak baa! Au fo Hataholi Isi-isik ia musi mate, sama leo ala sulak memak nai Manetualain Susula Malalaon dalek so. Tehuu mata neuk! Hataholi fo mana se'o Au ndia, dei fo ana lemba ndia soen! Malolenak inan ta bonggi ndia!”

22 Ledo-eik ala bei la'a-linu, boe ma Yesus ha'i nala loti balok esa, de noke makasi neu Manetualain. Basa boe ma Ana bibi'i loti ndia, de Ana loon neu ana mana tunggan nala. Boe ma nae, “Loti ia Au aong ndindia. De ha'i malan fo mi'a leo.”

23 Basa boe ma Ana ha'i nala nggalaas fo isin anggol oek. Ndia boe oo noke makasi neu Manetualain. Boe ma Ana loo nggalaas ndia neu ana mana tunggan nala fo linu. 24 De nae, “Anggol oek ia, Au daang ndindia. Dei fo faa henin fo nasala'e nala hataholi no'uk kala. Daak ia dadik buti fo tao nasanenedak nae, hata fo Manetualain helu basan so, memak hatematak ia ana dadi so. De ha'i malan fo minu leo.^e

25 Mamanene neulalau dei! Mulai neme le'odaen ia mai, Au ta inu anggol oek ia so, losa Au anggatuuk palenda sama-sama ua Au Amang nai nusa sodak, bei fo Au inu seluk bali.”

26 Basa boe ma ala soda sosodak esa, fo ala koa-kio Manetualain. De ala kalua le'odaen ndia fo leni lete Setun lain leu.

27 Ledo-eik ala bei la'o-la'o, boe ma Yesus nafada memak kasa nae, “Dei fo le'odaen ia, ei basa nggei malai la'o ela Au. Ndia sama leo nana sulak memak nai Manetualain Susula Malalaon dale so nae,

28 Memak Au mate. Tehuu mete ma Au asoda fali so, na, dei fo Au akahuluk ei uni propensi Galelea uu.”^g

29 Basa boe ma Petrus sapa nae, “Ama! Mae basa hataholi fe'ek kala ia lalai la'o ela Ama, tehuu au taa!”

30 Yesus nataa nae, “Petrus! Masanenedak dei! Le'odaen ia, manu bei ta kokoa la'i dua, tehuu o kokolak la'i telu so mae, o ta malelak Au!”

31 Tehuu Petrus nataa tingga-tingga nae, “Taa, Ama! Mete ma Ama mate, na, au boe oo mate sama-sama ua Ama. Huu au ta alai la'o ela Ama, ma ta alelesi Ama!”

Petrus nonoo fe'en nala esa-esak lae leo ndia boe.

32 Basa boe ma Yesus asa la'o lakandoo, losa osi esa nai Lete Setun, nade ‘Getsemani’. Boe ma Yesus nafada sala nae, “Ei manggatuuk mahani mima ia leo! Au sangga uu hule-haladoi nai ele.”

33 Boe ma Yesus noke no Petrus, Yakobis, ma Yohanis, fo leu no'u. Mulai neme faik ndia mai, Ndia dalen nameda hedis, ma ta tesa. 34 Ana nafada sala nae, “Au daleng hedin seli! Au ameda nonook bali Au sangga mate ia so. Ei manggatuuk manea mima ia dei.”

35-36 Basa de Ana la'ok hodok neu dook faa, boe ma Ana sendek neu dae fo hule-haladoi nae, “Ama susuek! Mete ma Ama nau, na, Au boso lemba doidoso matak leo iak. Au bubuluk memak so ae, ta hambu hata esa boe fo Ama ta bisa taon. De mete ma Ama nau, na, makadodook doidosok ia neme Au mai. Tehuu boso tungga Au hihiing; ela kada tungga Ama hihiin.”

37 Basa boe ma Ana fali neni ana mana tungga katelun nala neu, tehuu ala sunggu lamanee. Ana fafae nafo'a sala, boe ma nafada Petrus nae, “Wei Petrus!^h O sunggu, do? Au uni ele uu ta doo anak boe, tehuu ei ta manea faa boe?! 38 Kukuku mamaneneu ei matam mala dei. Basa na fo'a fo manea mia Au! Ei dalem memak nahiik tao malole, tehuu ei ao-mbaam ta balakaik. De malolenak ei hule-haladoi fo mete ma hambu soba-douk, na, ei ta nana senggik.”ⁱ

39 Basa boe ma Yesus neu hule-haladoi la'i esa bali. Ana noke seluk neu Manetualain, fo boso fee Ndia lemba doidosok ndia. 40 Boe ma Ana fali seluk neni ana mana tungga katelun nala sila neu. Tehuu ala sunggu seluk bali, huu matan nala lamabela lalan seli. Basa boe ma Ana fafae nafo'a seluk kasa, tehuu ala ta bubuluk lataa Ndia lae leo bee.

41 Basa boe ma Yesus la'o ela sala fo neu hule-haladoi kala'i telun. Boe ma Ana fali seluk fo fafae nafo'a sala. Ana nae, “Ei bei sunggu, do? Dai ndia so! Fo'a leo! Hataholi fo mana se'o Au, Hataholi Isi-isik ia, ana deka so. Hatematak ia ala sangga humu Au so fo ala fee Au uni hataholi manggalauk kala liman neu. 42 Fo'a leo! Mamaneneu ei matam mala fo mita sudik mini ele miu dei! Hataholi mana se'o Au ndia, ana mai so. Mai fo teu tatonggo to sala!”

43 Ledo-eik Yesus bei kola-kola leo ndiak, boe ma nggengge neuk Yudas no hataholi no'uk kala mai so. Ala mai leni tafa keke'uk ma ai keke'uk fo sangga humu Yesus. Ala tao leo ndiak, na tungga palenda neme malangga Yahudin nala mai. Sila ndia, malangga anggama la malanggan nala, mese anggama la, ma lasi hadak kala. 44 Yudas fee memak kasa tanda so nae, “Ei mete matalolole baa! Mete ma au idu see, na, ei humu malan leo! Huu Ndia ndia, hataholi fo ei sanggak!”

45 De ledo-eik Yudas asa losa ndia, boe ma ana nakandoo nasale nala Yesus. Boe ma nae, “Ama mesen!” Ma Yudas holu nalan, de idun. 46 Boe ma hataholi nouk kala sila mata leu, de ala humu lala Yesus.

47 Tehuu Yesus hataholin esa fe'a nala tafa keke'un, de sambi naketu hataholi esa ndi'i doon. Hataholi ndi'i doo ketuk ndia, na malangga anggama Yahudi malangga ina-huun atan. 48 Boe ma Yesus kokolak no hataholi la sila fo mana mai humu lala Ndia nae, “Talo bee? Ei mae hetuk Au ia hataholi manggalauk, do? De ei mai humu Au minik tafa ma ai keke'uk? 49 Tungga-tungga faik Au anoli ei nai Manetualain Uma Ina Huhule-haladoin dale, tehuu ta hambu hataholi esa boe mai humu nala Au. Mai humu mala Au leo! Huu dede'ak ia nana sulak memak neme makahulun mai nai Manetualain Susula Malalaon so.”^j

50 Yesus ana mana tunggan nala bii lalan seli. Boe ma lalai la'o ela Yesus mesak kana.

51 Nai ndia boe, hambu ta'e anak esa ana tungga do'o-do'o Yesus dean. Ana naluse tema bibiak esa. Hataholi la sila boe oo sangga humun. 52 Tehuu ala to'u lala kada tema nalusen. De ana nalai fali no nakaholak, huu ana bii nalan seli.

53 Basa boe ma ala loo Yesus neni malangga anggama Yahudi malangga ina-huun uman neu. Hataholi ina-huuk kala lakabubua lai ndia so. Sila ndia, malangga anggama la malanggan nala, mese anggama la, ma lasi hadak kala.

54 Neu faik fo ala loo Yesus ndia, boe ma Petrus tungga nafufunik nesik dea, de ana losa malangga anggama Yahudi malangga ina-huun uman. Ndia boe oo maso neni uma pasan neu, de nanggatuuk dala ha'i no'u no hataholi mana manea lai ndia.

55 Nai uma ndia dalek, malangga anggama la lakokola lo hataholi mana maketu dede'a anggama la. Basa sala sangga buti fo nau fee salak neu Yesus, huu ala sangga huku lisa Ndia. Tehuu ala ta hambu buti faa boe. 56 Boe ma ala loke lala sakasii no'uk fo ala sangga tao latuda Yesus. Tehuu kokolan nala sila, ta nandaa esa no esa boe.

57 Boe ma hambu sakasii hida bali fo'a lambadeik fo kokolak pepekok lae, 58 “Ai mamanene hataholi ia kokolak nae, ‘Dei fo Au tao atu'u heni Uma Ina Huhule-haladoik fo hataholi la lambadedein lenik liman nala. Boe ma fai katelun, dei fo Au ambadedei falik Uma ndia, tehuu ta pake hataholi liman.”’^k 59 Tehuu kokolan nala sila, ta nandaa esa no esa boe.

60 Basa boe ma malangga anggama Yahudi malangga ina-huun fo'a nambadeik neu basa hataholi la sila matan nai mamana naketu dede'ak ndia. De natane Yesus nae, “Hataholi no'uk kala kalaak O so! Tehuu hatina de kada O nee-nee?”

61 Yesus ta nataa faa boe. Basa boe ma malangga anggama Yahudi malangga ina-huun ndia natane seluk kana nae, “Soba O mafada dei. Tetebes O ia Karistus, Manetualain Anan fo nana helu memak neme makahulun mai ndia so, do?”

62 Yesus nataa nae, “Memak tetebes, Au ndindia. Dei fo ei basa nggei mita Au, Hataholi Isi-isik ia, anggatuuk nai nusa sodak fo nai Manetualain boboa konan. Ndia koasan ana seli! Dei fo Au ma Ndia, to'u palenda no'u. Basa ndia, na dei fo Au konda ua ko'as neme nusa sodak mai.”^l

63 Malangga anggama Yahudi malangga ina-huun namanene Yesus kokolak leo ndiak, boe ma ana luli nalan seli, losa ana sii heni badu nalun. Basa boe ma ana nafada no hala belak neu hataholi mana manggatuuk lai mamana naketu dede'ak ndia nae, “Ita ta paluu sakasii so! 64 Ei mamanene minik ei ndi'i doo hehelim mala so, Ndia mesak kana kokolak leo ndiak, hetu? Ana so'uk aon dadik neu Manetualain Anan. Ana kokolak nakadadaek nalan seli ia so! Tungga anggama heti-heun, mete ma hambu hataholi esa tao aon sama leo Manetualain, na, hataholi ndia musi maten! De hatematak ia, ei sangga maketun leo bee?”

Boe ma basa sala laketu lae, “Memak hataholi ia ana sala tetebes! Huu ndia de musi huku nisan!”^m

65 Boe ma hataholi hida mata leu, de ala mbula ambe neu Yesus. Ala mboti ketu matan, de ala mbombokon. Boe ma latanen lae, “Soba O neuk sudik. See ndia tutu O?” Basa boe ma ala palenda hataholi mana manea Uma Ina Huhule-haladoik ndia, fo hela loo Yesus. Ala loo Ndia, boe ma ala famba lakamiminak Ndia.

66-67 Faik ndia, Petrus bei nanggatuuk nai uma pasan. Boe ma malangga anggama Yahudi malangga ina-huun ata inan esa mai, de nitan ana dala ha'i. Boe ma ana mete besa-besa no Petrus matan, de kokolak nae, “Isinaak o boe oo tungga sama-sama mua Yesus, hataholi Nasaret ndia, hetu? Tetebes, hetu?”

68 Tehuu Petrus nataa nae, “Taa! Hatina de o matane leo ndiak! Au ta alelak Ndia.” Basa boe ma Petrus fo'a kalua, de neu nambadeik nai lelesu mba'a matan. [Nandaa no ledo-eik ndia, boe ma manu kokoa.]ⁿ

69 Boe ma ata inak ndia nita seluk Petrus. De ana nafada hataholi malai ndia nae, “Ndia ia, esa neme hataholi la sila mai!”

70 Tehuu Petrus sapa nae, “Fama o kamuluk! Au ta alelak Hataholi ndia maa!”

Doo-doo boe ma hataholi fe'ek esa manai ndia kokolak neu Petrus bali nae, “Wei! O bei masapepeko bali mae, o ta sama-sama mua hataholi la sila! Wei! Ei basa nggei hataholi Galelea, hetu?”

71 Tehuu Petrus tebe-tebe nalelesi seluk bali nae, “Wei. Au soo! Au ta alelak hataholi ndia faa boe!”

72 Nandaa no ana kokolak leo ndiak, boe ma manu kokoa seluk kala'i duan. Boe ma Petrus nasaneda Yesus kokolan isinaak ndia nae, “Manu bei ta kokoa la'i dua, tehuu o malelesi Au la'i telu so.”

Petrus nasaneda leo ndiak, boe ma ana namatani nakaleleu.