2 Faik ndia, nitu la malanggan dudunggu Yudas, fo ndia Simon Iskariot anan, fo ana se'o heni Yesus. Boe ma Yudas naketun so fo nau tao leo ndiak, neu ledo-eik Yesus asa la'a feta Paska ndia.

3 Yesus bubuluk so nae, Manetualain nadenu Ndia neni dae-bafok ia mai, ma ta dook bali Ana musi fali neni Manetulain neu. Ma Ndia boe oo bubuluk nae, Ndia Aman nai nusa sodak fee basa-basan nai Ndia liman so. 4 Basa de Yesus fo'a la'o ela mei ndia, de Ana odu heni badun. Boe ma Ana ha'i nala handuk esa, de henggen neu Ndia laladan. 5 Basa de Ana di'a oe neu bokor anak esa. De Ana mulai safe Ndia ana mana tunggan nala ein nala. Safe nate'e esa, boe ma Ana seka namadan nenik handuk fo nana henggek nai Ndia laladan. 6 Ana safe sila esa-esak ein. Losa Simon Petrus, boe ma Petrus natane nae, “Ama boe oo nau safe au eing, do?”

7 Yesus nataa nae, “Hatematak ia, o bei ta bubuluk dede'ak hata fo Au taok ia. Tehuu doo-doo bei fo o bubuluk.”

8 Tehuu Petrus sapa nae, “Boso leo ndiak, Ama! Au ta nau Ama safe au eing.”

Boe ma Yesus nataa nae, “Mete ma Au ta safe alalao o eim, na, o ta nana mba'ak mua Au.”

9 Boe ma Simon Petrus nataa nae, “Mete ma leo ndiak, na, boso kada Ama safe au eing. Tehuu safe au limang ma au langgang boe!”

10 Basa boe ma Yesus nafadan nae, “Hataholi fo mana nadiu nate'e oe, kada paluu safe ein. Huu aon malalaok so. Memak ei dalem mala malalaok so, tehuu ta basan fo malalaok.” 11 (Yesus nae leo ndiak, huu Ana bubuluk so, see sangga se'o heni Ndia. Huu ndia de Ana nafada nae, “Ta basan fo malalaok.”)

12 Ledo-eik Yesus safe basa sila ein nala, boe ma Ana pake seluk Ndia badun, de Ana nanggatuuk seluk neu Ndia mamanan. Boe ma Ana natane sala nae, “Leo bee? Ledo-eik Au safe ei eim, ei bubuluk Au tataong ndia do, taa? 13 Ei mateme moke Au mae, ‘Ama Mesen’ ma ‘Lamatuak’. Ndia nandaa, huu memak Au leo ndiak. 14 Tehuu mete ma ei Mesem fo Lamatuak ia safe ei eim so, sama leo ata esa, na talo bee no ei? Ei boe oo musi ono-lau esa no esa; conto leo: ei boe oo musi safe esa no esa ein. 15 Huu Au dadik conto neu ei so. Au tao leo beek, na ei musi tao tungga leo ndiak boe.^a 16 Huu ata esa ta lena heni ndia malanggan. Ma nadedenuk esa ta lena heni hataholi fo mana nadenu ndia.^b 17 Huu ei bubuluk dede'ak kala ia so, de ei maua-manale mete ma ei tao tungga leo ndiak.

18 Au ta kokolak la'e-neu ei basa nggei. Au alelak tetebes hataholi fo Au hele alak kala so. Mae leo ndiak, tehuu ndia musi dadi, sama leo hata fo nana sula memak nai Manetualain Susula Malalaon so nae, ‘Hataholi fo langgatuuk la'a no'u lo au, heok lasadea fo la'o ela au so.’^c 19 Au afada no manggaledok akahuluk neu ei, fo mete ma dede'ak kala sila dadi, ma hataholi ndia se'o Au, na, dei fo ei mamahele tebe-tebe mae, Au ia ndia Karistus. 20 Tetebes! Au boe oo afada ae, see ndia nalengga dalen fo simbok no malole hataholi fo Au adenun, na ndia boe oo simbok Au. Ma see ndia simbok no malole Au, na ndia boe oo simbok Hataholi fo mana nadenu Au.”^d

21 Yesus kokolak nate'e leo ndia, boe ma Ndia dalen mulai nameda ta malole. De Ana nafada nae, “Au kokolang ia, tetebes. Esa neme ei mai, dei fo ana se'o heni Au.”

22 Ndia ana mana tunggan nala lamanene leo ndiak, boe ma esa suli esa, huu ala lakandaa. Ala ta bubuluk see fo Yesus maksut ndia. 23 Nai ndia boe hambu esa neme sila mai, fo Yesus suen (fo ndia au, Yohanis, mana sulak susulak ia).^e Au anggatuuk nai Yesus boboan. 24 Boe ma Simon Petrus fee sein fo au soba sangga bubuluk Yesus maksut ndia, see.

25 Boe ma au hodok dekak ua Yesus, fo atane ae, “Hataholi fo Ama maksut ndia, see bae?”

26 Boe ma Yesus nataa nae, “Leo iak. Au sangga ha'i ala loti bibiak esa, fo domben neni manggo dale neu, boe ma Au feen neu hataholi fo Au afadak ndia.” Ana dombe nate'e loti ndia, boe ma Ana feen neu Yudas, fo Simon Iskariot anan. 27 Simbo nala loti ndia, boe ma nitu la malanggan maso neni Yudas dalek neu. Boe ma Yesus nafadan nae, “Lai-lai leo! O sangga tao hata, na taon leo. Boso mahani bali.” 28 Tehuu hataholi esa boe neme sila mai fo mana manggatuuk lai ndia ta lalelak hatina de Yesus kokolak leo ndiak. 29 Huu Yudas dadik neu sila mana to'u doin, de hambu luma dudu'a lae Yesus nafadak isinaak ndia fo nadenu Yudas nae, “Muu hasa hata fo ita paluu ta'a nai feta Paska.” Ma hambu luma boe dudu'a lae Ana nafadak ndia nae, “Muu fee doik faa neu hataholi ena taak kala.”

30 Ledo-eik Yudas simbo nala loti ndia so, boe ma ana la'o kalua lai-lai. Neu faik fo ana kalua ndia, le'odaek so.

31 Ledo-eik Yudas kalua so, boe ma Yesus nafada nae, “Au ia, Hataholi Isi-isik. Hatematak ia fain losa so, fo Manetualain so'u dema-demak Au. Ma ndia boe oo, dei fo tao nala hataholi lita Manetualain koasa ina-huun. 32 Huu Au nana mba'ak ua Manetualain, ma natudu Ndia koasa ina-huun, de Ana so'u dema-demak Au. Ma Ndia ta pake nahani bali.

33 Ana nggala ei! Mae Au sue ei ana seli, tehuu ta dook bali, na Au ta ua ei no'u so bali. Dei fo ei sangga Au, tehuu ta hambu. Au afada ei ia, sama leo hata fo Au afada hataholi Yahudi malanggan nala ae, ‘Au uni mamanak esa uu, fo ei ta bisa tungga.’^f 34 Au fee ei palenda beuk esa, leo iak: ei musi masue ao esa no esa, sama leo Au sue ei. De ei boe oo musi masue ao esa no esa.^g 35 Mete ma ei masue ao leo ndiak, na, basa hataholi la bisa bubuluk lae, ei ia, Au ana mana tungga nggala.”

36 Boe ma Simon Petrus natane Ndia nae, “Lamatuak sangga bee muu?”

Boe ma Yesus nafada nae, “Au uni mamanak esa uu, fo o bei ta bisa muu hatematak ia. Tehuu babasan, o muni ndia muu boe.”

37 Petrus natane, nae “Lamatuak! Hatina de au bei ta bisa tungga hatematak ia? Huu au ahehele so fo mate soa-neu Lamatuak maa!”

38 Yesus nataa nae, “Tetebes, do? O nau fee o sodam fo mate soa-neu Au? Teteben leo iak: manu bei ta kokoa, tehuu o malelesi Au la'i telu so.”