Ala dala lala i'ak makadotok
5
La'i esa, Yesus nanoli hataholi la leme dano Galelea bifin.a Hataholi no'uk mai fo sangga lamanene Manetualain Dede'a-kokolan. Losa ala lakaseseti ma lakahohombu lala Yesus. 2 Deka-deka nai ndia, hambu mana dolu-dala la tao lalalao sila dalan nala lai madak lain. Boe ma Yesus nita ofak louk dua see lai ndia. 3 Esa neme ofak kala sila mai, na Simon ofan. Basa de Yesus sa'e neni Simon ofan lain neu, de noke fo tumbu ofak ndia neni oe madema faa neu. Boe ma nanggatuuk de nanoli hataholi no'uk kala sila.b4 Ana fee nanonolik nate'e, boe ma nafada Simon nae, “Simon! Teni oe madema faa teu, fo nggali o dalam neu ndia. Huu dei fo ei hambu i'ak no'uk.”
5 Tehuu Simon nataan nae, “Lamatuak boe oo! Ai tao ues mbilu-mbuse le'odae katemak esa so, tehuu ta hambu i'ak esa boe! Tehuu Ama nae leo ndiak so, na, neu! Au akonda sudik kana.”c 6 Boe ma ala lakonda dala. Ledo-eik sangga hela falik dala ndia lain mai, ta bubuluk te dala ndia henuk no i'ak makadotok so, losa dala mulai sida so.d 7 Boe ma Simon nanggou nonoon nala malai ofa fe'ek, fo mai tulu-falin. De ala mai hulu i'ak neni ofak dale neu, losa ofak kaduak kala sila henuk no i'ak, de uak ala bolo. 8-10 Simon nonoo mana dolu-dalan nala, Yakobis no Yohanis, fo ndia ama Sebedeus anan nala lai ndia boe. Ala heran lalan seli, huu ala hambu i'ak makadotok leo ndiak. Ledo-eik Simon Petrus nita hata fo mana dadik ndia so, boe ma tutik ana sendek neu Yesus matan nae, “Au ia hataholi esa fo mana tao salak no'un seli so. De malolenak Lamatuak boso dekak mua au bali.”e
Tehuu Yesus nataa nae, “Simon! Boso mambue dudu'a dede'ak ndia, huu Au sangga pake ei. Ei ia mateme sangga i'ak. Tehuu hatematak ia, Au anoli ei sangga hataholi fo tungga Au.”
11 Basa boe ma ala hela tutik sila ofan de taon neni madak lain neu. Boe ma ala la'o ela basa-basan, de tungga Yesus.
Lamatuak Yesus tao nahai hataholi kamahedi kusta esa
12 Nai nggolok esa, Yesus natonggo no hataholi esa fo ao-inan henuk no hedi kusta so. Ledo-eik nita Yesus, boe ma ana sendek ma nakatele losa dae. De nae, “Ama, aa! Fali mala au dei! Huu au bubuluk, Ama bisa tao mamopo au heding ia, fo suek hataholi boso nunute au bali. Sadi Ama nau.”
13 Boe ma Yesus look liman neu fo nafaloen. De Ana kokolak nae, “Au nau! O hai leo!” Kokolak basa, boe ma hataholi ndia hedi kustan mopo henin tutik. 14 Basa de Yesus fee nasanenedak neun nae, “Masanenedak neulalau! O hai ia so, tehuu o ta bole mafada sudi see, baa! O musi tungga ba'i Musa palendan dei. De muni malangga anggama muu, fo ana palisak o ao-inam, suek ana bubuluk o hedim mopo tetebes so, do beik. Boe ma o musi fee tunu-hotuk tanda makasi, fo suek basa hataholi bubuluk lae, o hai tetebes so.”f
15 Mae Yesus ka'in, tehuu tutuik la'e-neu Ndia koasan ndia, nana natanggelak neme bafak mai neni bafak neu, neni sudi bee neu. De hataholi la lafaa lakandoo leu fo sangga lamanene Ana nanoli sala. Boe ma Ana tao nahai hataholi no'uk leme sila hedin mata-matak mai. 16 Tehuu Yesus boe oo nahiik heok la'o ela hataholi no'uk sila, fo neu hule-haladoi nai mamana nees.
Lamatuak Yesus tao nahai hataholi lu'uk esa
17 La'i esa, Yesus nanoli hataholi la leme uma esa. Faik ndia hambu hataholi leme paltei anggama Farisi mai ma mese anggama hida, mai tungga lamanene Ndia. Ala mai leme nggolo-nggolok malai propensi Galelea, propensi Yudea, ma kota Yerusalem mai. Manetualain fee koasa neu Yesus fo tao nahai hataholi kamahedik kala. 18-19 Faik ndia, hataholi hida ndolo leni hataholi lu'uk esa nai mamana ndondolok lain. Ala lasusua tingga-tingga leni hataholi lu'uk ndia, fo Yesus tao nahain. Tehuu uma ndia nakase'e no hataholi so, de mae lakaseseti dalek leu boe oo, ta bisa. Huu ndia de ala loo hataholi lu'uk ndia neni uma lain neu. De ala tao bolok fo lakonda hataholi lu'uk ndia nai mamana ndondolok lain. Ala lakondan neu hataholi no'uk kala laladan, ndandaak neu Yesus matan. 20 Yesus nita leo ndiak, boe ma Ana bubuluk nae, ala lamahele Ndia bisa tao nahai sila nonoon ndia. Boe ma Ana kokolak no hataholi lu'uk ndia nae, “Ana, ei! Au koka heni o sala-singgom mala so.”
21 Hataholi Farisi ma mese anggama la lamanene Yesus kokolak leo ndiak, boe ma ala mulai latatanek lae, “Heeh! Kada Manetualain mesak kana naena haak fo koka heni hataholi sala-singgon nala. Ndia ia see, de losak ana tao aon leo Manetualain! Ia ia, kokolak nakadadaek nalan seli!”
22 Tehuu Yesus bubuluk sila dalen. Boe ma Ana kokolak nae, “Hatina de ei dudu'a mae, Au ia kokolak akadadaek? 23-24 Au ia, Hataholi Isi-Isik. Ma Au aena haak fo fee ambon neu hataholi sala-singgon. Mete ma kada Au afada hataholi lu'uk ia ae, ‘Au fee ambon neu o sala-singgom so’, na, ei ta mita Au koasang nai dae-bafok ia. Tehuu mete ma Au ae, ‘Fo'a leo! Lu'a mala o mamana ndondolom, fo fali leo.’ Mete ma ana fo'a tutik, na, bei fo ei mita Au koasang. Huu ndia de Au nau tao ahai hataholi lu'uk ia, fo suek ei boe oo bubuluk Au aena haak fo fee ambon neu hataholi sala-singgon.”
Boe ma Ana heok nasafali de kokolak no hataholi lu'uk ndia nae, “Mambadeik leo! Lu'a mala o mamana ndondolom fo fali leo!”
25 Kada nggengge neuk, hataholi ndia fo'a nambadeik neu hataholi no'uk kala matan, de ana lu'a nala ndia mamana ndondolon. Boe ma ana fali, ma so'uk koa-kiok neu Manetualain. 26 Basa hataholi lita leo ndiak, boe ma ala heran. De ala so'u dema-demak Manetualain naden lae, “Manetualain koasan ana seli! Leledon ia ita tita to ita mata de'e hehelin so la'e-neu dede'ak manai lain seli.”
Lamatuak Yesus noke nala Lewi fo tungga Ndia
27 Ta dook boe ma Yesus kalua neme uma ndia mai, de nita hataholi mana susu bea esa, nanggatuuk nai mamana susu bea. Hataholi ndia nade, Lewi.g Boe ma Yesus noken nae, “Mai tungga Au!” 28 Lewi namanene leo ndiak, boe ma ana fo'a tutik, de la'o ela basa malai ndiak kala, fo tungga Yesus.
29 Basa boe ma Lewi tao feta ina-huuk, de hoka Yesus neni uman neu. Ndia boe oo hoka nonoo mana susu bean nala, ma nana hoka fe'ek kala, fo mai la'a feta. 30 Tehuu hambu hataholi paltei anggama Farisi hida ma mese anggama la, manggalau Yesus ana mana tunggan nala lae, “Hatina de ei manggatuuk mi'a mia hataholi papake taak kala, sama leo mana susu bea, ma hataholi ta malole la sila? Hataholi neulauk, ta bole seseok no hataholi mata-aok leo sila!”h
31 Tehuu Yesus nafada sala nae, “Hataholi kamahedik memak paluu dotel. Tehuu hataholi ta kamahedik ta paluu. 32 Au mai akaneni hataholi ta malole. Tehuu Au ta mai akaneni hataholi fo nameda aon ndoos so!”
Mese anggama la lasisimbo bafak lo Lamatuak Yesus la'e-neu puasa
33 Boe ma hataholi maleme paltei Farisi, ma mese anggama la manggalau Yesus lae, “Leo iak, Ama! Yohanis Mana Salanik ana mana tunggan nala puasa ma hule-haladoi bali-bali. Hataholi Farisi ana mana tunggan nala leo ndiak boe. Tehuu hatina de Ama ana mana tunggan nala lambue la'a-linu lakandoo? Sila ta puasa lalelak, do?”
34 Tehuu Yesus bala sala nenik nakandandaak nae, “Memak ei bubuluk so, mete ma hambu feta kabin, na, nana hokak kala ta puasa, tehuu ala la'a-linu losa lakabete. Mete ma tou mana kabin bei nai ndia, na, neu ko basa sala la'a-linu leu esa. 35 Tehuu la'i esa, mete ma hataholi fe'ek humu leni tou mana kabin ndia dei, na, ndia nonoon nala lameda dale hedi, bei fo ala puasa.”
36 Basa boe ma Yesus fee nakandandaak esa bali nae, “Ta hambu hataholi ha'i nala tema beuk bibiak esa, fo tandan neu badu laak sidan. Huu mete ma safe badu ndia, na, tema beuk nana tandak ndia kukulu, ma badu laak ndia sidan boe namaloa. 37-38 Leo ndiak boe, hataholi ta di'a tua beuk neu samba laak nalan seli, huu dei fo sambak ndia sidan, boe ma loo heni tua ndia. De tua beuk, musi di'an neni samba beuk dale neu.i [No leo ndiak, Yesus nanoli sala nae, Ndia nanonoli beun, boso seseok kana no hataholi Farisi la nanonoli laan.] 39 Hataholi fo ninu nitak anggol oe laak so, na, ana ta hii ninu anggol oe beuk. Huu ana bubuluk nae, ‘Anggol fo nana mbeda nala dook ndia so, ladan nai lain seli!”’