Malangga makanenik fo masapedok
16
Basa de Yesus tui nakadaik nakandandaak esa bali neu ana mana tunggan nala nae, “Hambu hataholi kamasu'ik esa, fee hataholi esa tao ues, dadik ndia malangga makanenin. Tehuu doo-doo boe ma malanggan namanene nae, malangga makanenik ndia mulai naputak fo tao nakahehenik ndia. 2 De ana noke nala malangga makanenik ndia, fo nafadan nae, ‘O ia, talo bee? Au amanene o mambue maputak au hata-hetong. Hatematak ia o muu tao susula laporan tao ues fo au palisak kana dei. Te basa ndia, na, au sangga fee o hahae.’3 Malangga makanenik namanene leo ndiak, boe ma ana dudu'a neu-mai nae, ‘Au soe ia so, maa! Hatematak ia, au sangga tao hata? Au ta abe'i foi dae. Dadik mana hule-hulek boe oo, au mae. 4 Mete ma au ta bisa tao ues nai ia so bali, na, au sangga dalak, fo suek hataholi fe'ek kala bei nau tulun simbok au.’
5 Huu ndia de ana mulai noke nala basa hataholi mana mahutak neu ndia malanggan. Ana natane hataholi kaesan nae, ‘Wei! O mahuta hida nai au malanggang?’
6 Hataholi ndia nataa nae, ‘Au hutang mina setun liter lifun haa.’a
Boe ma malangga makanenik nae, ‘Tetebes! Ia o susula hutam. Hatematak ia sii henin leo, basa de ana nanggatuuk, fo sulak lai-lai susula huta beuk nae, o mahuta kada mina liter lifun duak.’
7 Basa de neu natane hataholi kaduan nae, ‘O bali, mahuta ba'u bee?’
Ana nataa nae, ‘Au ahuta hade karon lifun esa.’b
Malangga makanenik ndia nafada nae, ‘Sii heni o susula huta laan ndia, basa na sulak beuk mae, kada karon natun faluk.’
8 Ana tao leo ndiak, losa malanggan bubuluk ndia kekedin. Tehuu malanggan ndia musi manaku nae, malangga makanenik fo manggalauk ndia, memak masapedok.
Au afada nakandandaak ia, suek ei bubuluk mae, mete ma nakasasaman no hataholi kamahelek, na, hataholi ta kamahelek memak sodan masapedon lena nai lau-inggu laladan hatematak ia.
9 De ei dudu'a sudik kana. Mae hataholi dae-bafok nambue tao dede'a manggalauk pake sila hata-heton, tehuu malolenak ei pake ei hata-heto dae-bafom fo tulu-fali hataholi. No leo ndiak, na ei boe oo hambu nonook makadotok. Mae hata-heto sila basan, tehuu dei fo Manetualain sadia mamanak fee ei nai nusa sodak.
10 Mete ma hataholi ndoos nai dede'a kadi'i anak kala, na, neu ko ana ndoos nai dede'a ina-huuk boe. Tehuu mete ma hataholi naputak nai dede'a kadi'i anak kala, na, neu ko naputak nai dede'a ina-huuk boe. 11 Mete ma hataholi ta bisa namahele ei, fo makaneni hata-heto basa faik, no dede'a kadi'ik nai dae-bafok ia, na talo bee fo Manetualain bisa namahele ei nai dede'a ina-huuk? 12 Mete ma ei ta bisa makaneni hataholi fe'ek hata-heton, na, see nambalani nau fee hata-heton neu ei?
13 Ata esa ta bisa namanene malanggan dua. Huu dei fo ana binci esa, ma sue esa. Do dalen katemak neu esa, ma ta mbali esa. Leo ndiak boe no ei, huu hataholi ta bisa sue Manetualain, sama-sama no doik.”c
Lamatuak Yesus kokolak la'e-neu doik, Manetualain Hala Malolen, ma sasao-namaketuk
14 Faik ndia, hambu hataholi Farisi hida tungga lamanene Yesus kokolan isinaak ndia. Boe ma ala haumemee Ndia, huu ala balena'o doik. 15 Tehuu Yesus nataa nae, “Wei! Mae ei tao malalao aok nai hataholi matan, tehuu Manetualain bubuluk ei dalem sila manggalauk. Hambu dede'ak no'uk, fo hataholi so'u dema-demak, naa te Manetualain taok dede'ak ndia manggalauk, ma Ana nunute sala.
16 Losa Yohanis Mana Salanik mamain, ita hataholi Yahudi tasoda tungga ba'i Musa ma Manetualain mana kokolan nala heti-heun. Tehuu hatematak ia, Manetualain Hala Malolen natanggela sudi nai bee so. Hataholi no'uk lasusua tingga-tingga, fo suek ala lasoda tungga Manetualain hihiin.d 17 Mae lalai ma dae-bafok mopon, tehuu Manetualain heti-heun ta mopo faa boe. Titi-koma esa ta mopo boe!e
18 Hataholi fo namaketu heni sao inan, boe ma sao seluk bali no ina fe'ek, na ana hohongge. Basa de hataholi sao no ina sao elak, na ndia hohongge boe.”f
Tutuik la'e-neu hataholi kamasu'ik ma Lasarus
19 Yesus tui nakadaik nae, “Hambu hataholi kamasu'ik esa, nahiik pake balo'a malole fo nana taok neme tema banggana'uk mai. Leledo-le'odaen ana na'a-ninu malada-malada, ma ana sosoa aon. 20 Nai ndia boe oo hambu hataholi to'a-taak esa. Ndia naden Lasarus. Ndia aon henuk no bisu mbuluk. Tungga faik nonoon nala loon, fo taon neu hataholi kamasu'ik ndia lelesu mason. 21 Ana nahiik na'a neme hataholi kamasu'ik ndia nana'a elan nala mai, tehuu ana ta hambu hata-hata. Kada busa la mai lalamemei ndia bisun nanan.
22 Basa boe ma Lasarus maten. Boe ma Manetualain ata nusa sodan mai ha'i nalan, de nanggatutuun neu ba'i Abraham boboan.
Ta dook boe ma hataholi kamasu'ik ndia mate, de hataholi la latoin. 23 Tehuu ndia ta maso nusa sodak. Ana maso neni naraka neu, sama-sama no hataholi mana matek no'uk. Nai ndia, ana hambu doidosok taa-taa. Boe ma la'i esa, ana botik matan, de nita Lasarus nanggatuuk namahoko nai ba'i Abraham boboan. 24 Boe ma ana nanggou nae, ‘Ba'i Abraham! Kasian neu au dei! Madenu Lasarus dombe lima ku'u mbedan neu oe, fo mai nakadoen neu kada au maa mbedang boe oo, malole. Huu au doidoso mamates nai ha'i naraka ia!’
25 Tehuu Abraham nataa nae, ‘Ana, ei! Masaneda neulalau dei. Fai maneuk, neu fo faik o bei masoda nai dae-bafok, o hambu basa malole. Tehuu Lasarus kada hambu toto'ak. De hatematak ia Manetualain kokoe-nanasi ndia nai ia, tehuu o doidoso. 26 Nakalenak bali, nai o ma ai laladan, Manetualain tao leak maloa esa. De hataholi malai ia ta bisa leni ndia leu, ma hataholi malai ndia ta bisa leni ia mai.’
27 Boe ma hataholi kamasu'ik ndia noke nae, ‘Mete ma leo ndiak, na, ba'i tulun madenu Lasarus neni au amang uman neu dei. 28 Huu au fadi toung lima bei lai ele. Madenu Lasarus fee nasanenedak neu sala, fo ala fali leni Manetualain leu. Fo suek ala mate, na, boso maso leni mamana doidosok ia mai.’
29 Tehuu Abraham nataa nae, ‘Manetualain fee sala ba'i Musa ma Manetualain mana kokolan nala susulan so. O fadim mala bisa lees bali-bali, fo lalelak Manetualain hihiin.’
30 Tehuu hataholi kamasu'ik ndia sapa nae, ‘Ba'i Abraham! Ndia bei ta dai. Ala ta mbali Manetualain Dede'a-kokolan! Musi hambu hataholi mana matek kalua neme lates dale mai, fo neu nafada sala, bei fo ala hondak, boe ma nau lamanene.’
31 Tehuu Abraham nataa nae, ‘Mete ma ala ta nau lamanene ba'i Musa ma Manetualain mana kokolan nala dede'a-kokolan, na, mae hataholi mana matek kalua neme lates dale mai, fo neu kokolak no sala boe oo, ala ta nau lamanene.”’