Hataholi Farisi la sangga dalak fo latuda Lamatuak Yesus, nenik dede'a sasao-namaketuk
19
Yesus fee basa nanonolik sila, boe ma Ana la'o ela Galelea fo neni propensi Yudea neu, nai lee Yarden selik ele. 2 Hataholi no'uk kala tungga Ndia, boe ma Ana tao nahai hataholi kamahedik nai ele.3 Hambu hataholi Farisi hida mai fo nau latuda Ndia. Ala latane lae, “Ama aa! Tungga ita anggaman heti-heun, mete ma touk sao so, na, bole namaketu no saon, nenik sudi tuten hata do, leo bee?”
4 Tehuu Ana nataa nae, “Ei ia, hataholi malela anggama. Tehuu hatina de ei ta nau bubuluk Manetualain Susula Malalaon isin? Huu nai tutui sososak nana sulak nae, ‘Manetualain nakadadadik nala hataholi touk ma inak.’a 5 Ma nana sulak bali nae,
‘Huu ndia de touk musi la'o ela ndia ina-aman,
fo neu dalek esa no saon,
te dua sala dadik esa so.’b
6 Huu ndia de mete ma Manetualain mesak kana tao dua sala dadik neu esa, na, hataholi ta bole tao sala lamaketu bali!”
7 Hataholi Farisi la lamanene Yesus kokolak leo ndiak, boe ma ala latane bali lae, “Mete ma leo ndiak, na, hatina de ba'i Musa nae, hataholi bole lamaketu, sadi ana fee susula namaketuk neu saon dei?”c
8 Boe ma Yesus nataa nae, “Ba'i Musa mbo'i ei bei-ba'im mala lamaketu lo sao inak, huu sila ndia, langga batun nala leo ei! Tehuu neu faik fo Manetualain nakadadadik dae-bafok ia, Ndia hihiin ta leo ndiak. 9 Huu ndia de Au afada baa! Mete ma sao inak tao eok nakahuluk, na, touk bole namaketu noon. Mete ma sao inak ta tao eok, tehuu touk namaketu noon, de ana sao ina fe'ek bali, na, ana hohongge ndia so!”d
10 Ndia ana mana tunggan nala lamanene Ndia kokolan leo ndia, boe ma ala kokolak lae, “Mete ma leo ndiak, na, malolenak boso sao bali.”
11 Boe ma Yesus nataa nae, “Ta basa hataholi la simbok Au kokolang ia. Kada hataholi fo Manetualain tudu nalan so. 12 Hambu hataholi ta sao, huu bonggin mai leo ndiak so. Hambu fe'ek tana sao boe, huu hataholi taon leo ndiak. Ma hambu fe'ek bali hele ta sao boe, huu ana nau kada nakalala'ok Manetualain uen. Hataholi fo mana bisa nalelak nanonolik ia, na elan fo ana simbon leo.”
Lamatuak Yesus fee baba'e-babatik neu kakana anak kala
13 Faik ndia, hataholi la ko'o loo anan nala leni Yesus leu, fo suek Ana tao liman ma kokolak baba'e-babatik fee sala. Tehuu Ndia ana mana tunggan nala ka'i hataholi la sila. 14 Boe ma Ana manggalau ana mana tunggan nala nae, “Ela kakanak kala sila leni Au mai! Boso ka'i sala! Huu hataholi fo sama leo iak ia, na ndia Manetualain hataholin ndia.”
15 Basa de Ana tao liman neu kakana anak kala sila, ma noke Manetualain fee baba'e-babatik neu sala. Basa boe ma Ana la'o ela mamanak ndia.
Hataholi kamasu'ik sangga dalak fo nasoda nakandoo no Manetualain
16 Boe ma la'i esa, hambu hataholi mai natane Yesus nae, “Ama Mesen! Au musi tao hata malole leo beek, fo suek au bubuluk no teteben ae, au bisa maso nusa sodak? Huu au nau asoda akandondoo henin ua Manetualain.”
17 Boe ma Ana nataa nae, “Hatina de o matane Au la'e-neu hata fo malole? Kada Manetualain mesak kana malole. Mete ma o nau masoda mua Ndia, na, tungga Ndia palendan.”
18 Hataholi ndia natane bali nae, “Palenda beek ndia?”
Boe ma Yesus nataa nae,
“Boso makanisa;
boso tao eok;
boso mamana'o;
boso dadik sakasii pepekok;e
19 fee hada-holomata neu o ina-amam;
ma sue o tolanoom, sama leo o sue o ao hehelim.”f
20 Hataholi ndia nataa nae, “Naa, basa palenda sila, au tao tungga sala so. Hata fo bei ta dai bali?”
21 Yesus namanene leo ndiak, boe ma Ana nae, “Naa! Mete ma o nau tungga basa Manetualain hihiin, na, fali fo se'o heni basa o hatam mala. Basa na, baba'e sala leu hataholi hata taak kala. Bei fo o mai tungga Au. Huu dei fo Manetualain bala fee o hata makadotok nai nusa sodak.”
22 Hataholi ndia namanene leo ndiak, boe ma ana fali no dalen hedis, huu ndia kamasu'ik nalan seli.
23 Boe ma Yesus kokolak no ana mana tunggan nala nae, “Mamahele Au, huu hataholi kamasu'ik toto'ak nalan seli maso neni nusa sodak neu. 24 Toto'ak ndia sama leo banda onta maso neni lalae dale neu nesik ndandauk bolon.”
25 Ndia ana mana tunggan nala lamanene leo ndiak, boe ma ala heran lalan seli. De ala lataa lae, “Mete ma leo ndiak, na, see ndia bisa maso neni nusa sodak neu?”
26 Ana mete neulalau sala, boe ma Ana kokolak nae, “Mete ma hataholi taon, na, memak ta bisa. Tehuu mete ma Manetualain taon, na, basan bisa dadi!”
27 Boe ma Petrus tao nasanenedak nae, “Ama! Ai la'o ela basa ai hatan nala fo tungga Ama. Tehuu ai hambu hata?”
28 Ana nataa nae, “Mamahele Au! Dei fo mete ma Manetualain tao basan dadik beuk, na, Au, Hataholi Isi-isik ia, anggatuuk nai kadela mana palenda ina-huuk. Faik ndia, ei fo mana tungga Au, manggatuuk nai kadela mana palenda kasanahulu duak kala boe, fo dadik mana maketu neu ita leo Israel kasanahulu duan nala!g 29 Hataholi fo mana la'o ela uman, ka'a-fadin, ina-aman, anan nala, ma osin, fo tungga Au, dei fo ana simbo falik la'i natun esa. Ma neu dae-bafok fai babasan, na ndia boe oo hambu sodak no Manetualain nakandondoo henin. 30 De masanenedak baa! Tungga Manetualain dudu'an, na, hambu hataholi no'uk fo taok aon ina-huuk, na sila ndia hataholi kadi'ik nalan seli. Tehuu hataholi fo taok aon kadi'ik, na sila ndia hataholi ina-huuk, tungga Manetualain dudu'an.”h