Hataholi Farisi la sangga dalak fo latuda Yesus lenik dede'a sasao-namaketuk
10
Basa boe ma Yesus asa leni propensi Yudea leu, ma mamana fe'ek kala malai lee Yarden selik dulu leu. Sudi nai bee hataholi no'uk kala mai lakahohombu lala Ndia. De Ana nanoli sala, sama leo natetemen.
Markus 10:1-31
2 Hambu hataholi Farisi hida mai sangga dalak fo latuda Ndia. Ala latane lae, “Tungga ita anggaman heti-heun, mete ma touk esa kasaok so, na, bole namaketu no saon do, taa?”
3 Yesus nataa nae, “Masanenedak dei! Heti-heuk la'e-neu sasaok fo ba'i Musa fee ita nae leo bee?”
4 Ala lataa lae, “Ba'i Musa heti-heun nae, hataholi bole lamaketu, sadi fee susula namaketuk neu sao inan dei.”a
5 Yesus bala nae, “Heeh! Mamanene baa! Huu ei langga batum, de ba'i Musa sulak leo ndiak! 6 Ei boso mafalende heni tutui sososak fo faik Manetualain nakadadadik lalai ma dae-bafok! Hambu nana sulak nae,
‘Manetualain nakadadadik hataholi, touk no inak.b
7 Huu ndia de touk musi la'o ela ina-aman,
fo neu nasoda dalek esa no saon,
8 huu sila dua sala dadik leu esa so.’c
9 Mete ma Manetualain tao dua sala dadik leu esa so, na, hataholi boso fee sala lamaketu bali!”
10 Basa boe ma Yesus no ana mana tunggan nala maso leni uma esa dalek leu. Leu ndia, boe ma ala latane Yesus nanonolin isinaak ndia.
11 Yesus nataa nae, “See ndia namaketu no sao inan, de sao seluk, na hohonggek ndia so. 12 Inak boe oo leo ndiak! Mete ma namaketu no saon so, de sao seluk, na, hohonggek ndia boe!”d
Lamatuak Yesus fee baba'e-babatik neu kakanak kala
13 Faik esa, boe ma hambu hataholi la loo anan nala leni Yesus leu, fo loke Ana tao liman neu sala, fo fee sala baba'e-babatik. Tehuu Yesus ana mana tunggan nala ka'i hataholi la sila.
14 Yesus nita leo ndiak, boe ma Ana manggalau ana mana tunggan nala nae, “Mbo'i kakanak kala sila leni Au mai. Boso ka'i sala, huu hataholi fo sama leo sila ia, na, Manetualain hataholin nala sila. 15 Ei masaneda neulalau! See fo nau neni Manetualain matan mai, na ana musi dokodoe Manetualain, sama leo kakanak kala dokodoe inan no aman. Mete ma ta leo ndiak, na, sila ta landaa dadik leu Manetualain hataholin nala.”e 16 Basa boe ma Yesus holu nala kakanak kala sila, ma tao liman neu esa-esak langgan lain, de fee sala baba'e-babatik.
Hataholi kamasu'ik sangga dalak fo nasoda nakandoo no Manetualain
17 Yesus no ana mana tunggan nala sangga la'o, boe ma hataholi kamasu'ik esa nalai-nalai mesan mai, fo sangga natonggo no Ndia. Ana nakatele neu Yesus matan, boe ma natane nae, “Ama Mesen fo nana hadak nalan seli! Au sangga atane faa. Leo iak, Ama. Au musi tao leo bee, fo suek au bubuluk tebe-tebe, au bisa maso nusa sodak, fo au asoda akandoo sama-sama ua Manetualain?”
18 Yesus nataa nae, “Hatina de o mae Au ia, ‘nana hadak nalan seli’? Ta hambu hataholi esa nana hadak nalan seli, tehuu kada Manetualain mesak kana. 19 O bubuluk Manetualain palendan neme makahulun mai so nae,
‘Boso makanisa;
Boso hohongge;
Boso mamana'o;
Boso dadik sakasii pepekok;
Boso pepeko hataholi la fo ha'i mala sila buan;
Ma fee hada-holomata neu o inam ma amam.”’f
20 Boe ma hataholi ndia nataa nae, “Tetebes, Ama Mesen! Au tungga basa palenda sila neme au bei ta'e anang mai so.”
21 Yesus kasian neu hataholi ndia. Boe ma Ana nafada nae, “Tetebes! Tehuu bei ela dede'ak esa bali. Hatematak ia, o fali leo fo se'o heni basa o hatam mala. Doin nala muu baba'e sala leu hataholi mana to'ak kala. Basa ndia, na o mai fo tungga Au leo. Dei fo Manetualain bala fee o hata fe'ek nai nusa sodak.”
22 Hataholi ndia namanene nala Yesus kokolan ndia, boe ma dalen nakalalutuk. De ana fali no dalen hedis nalan seli, huu kamasu'i ndoos.
23 Boe ma Yesus suli neu-mai, de nakokola no ana mana tunggan nala nae, “Mamanene baa! Hataholi kamasu'ik memak sosotak maso nusa sodak!”
24 Ana mana tunggan nala lamanene Ndia kokolan leo ndiak, boe ma lasapangga. Tehuu Yesus kokolak nakadaik bali nae, “Mamanene neulalau! Nau dadik Manetualain hataholin, na toto'an ana seli! Boso mae dede'ak ndia lofo anak. 25 Huu hataholi kamasu'ik maso neni nusa sodak neu, fo ana dadik Manetualain hataholin, na toto'an sama leo banda onta ina-huuk esa, maso neni lalaen dale neu nesik ndandauk bolon.”
26 Yesus kokolan ndia, tao nala basa sala boe ta lalelak bali. Boe ma latatane aok lae, “Mete ma tetebes leo ndiak, na, see bisa hambu nasalala'ek bae?”
27 Yesus suli esa-esa, boe ma nafada nae, “Soa-neu hataholi, na ta bisa. Tehuu boso mafalende henin: soa-neu Manetualain, na basan mana dadik!”
28 Basa boe ma Petrus kokolak nae, “Ama! Ai lao ela basa-basan so, fo ai tungga Ama. Tehuu ai hambu hata?”
29-30 Yesus nae, “Au sangga afada ei leo iak: hataholi fo mana tungga Au, ma ana la'o ela ina-aman, ka'a-fadin, ma anan nala, osi-lutun, uen, ma basa ndia uma isin nala, fo neu tui-bengga Manetualain Hala Malolen, na dei fo ana hambu nggati falik losa la'i natun esa. Basa hata fo ana la'o elak kala sila, dei fo ana simbo falik makadotok. Ma ndia boe oo hambu doidosok huu ana tungga Au. Tehuu neu dae-bafok fai babasan, na, dei fo ana nasoda nakandoo sama-sama no Manetualain. Babalan ndindia! 31 Masanenedak baa! Hataholi fo taok aon ina-huuk, na tungga Manetualain dudu'an, na, ndia dei fo dadik hataholi kadi'i anak nalan seli. Tehuu hataholi fo taok aon kadi'ik, na tungga Manetualain dudu'an, na, ndia dei fo dadik hataholi ina-huuk.”g
Ia kala'i telun fo Lamatuak Yesus nafada la'e-neu Ndia mamaten
32 Faik ndia, Yesus asa la'ok leni Yerusalem leu. Yesus la'ok nakahuluk. Boe ma ana mana tunggan nala ma hataholi fe'ek kala tungga Ndia. Ala lasaneda hata fo Ndia kokola makahulun nae, hataholi la sangga tao lisa Ndia nai Yerusalem. Huu ndia de ala lasapangga ma bii. Yesus namanene leo ndiak, boe ma Ana noke nala kada Ndia ana mana tunggan nala mesak kasa, fo nafada seluk kasa hata fo hataholi sangga tao Ndia nai Yerusalem.
Markus 10:32-52
33 Ana kokolak nae, “Ei mamanene baa! Hatematak ia ita sangga teni Yerusalem teu. Au ia Hataholi Isi-isik. Tehuu nai ele ala se'o heni Au uu malangga anggama Yahudi la malanggan nala ma mese anggama la. Basa boe ma ala huku lisa Au. De ala fee Au uu hataholi fe'ek, kala fo ta mana malelak Manetualain. 34 Basa boe ma ala kokolak lakamamaek Au. Ala mbula ambe neu Au. Ala filo lahina Au aong. Basa bei fo ala tao lisa Au. Memak Au mate tetebes, tehuu neu binesan, Au asoda fali.”h
Yakobis no Yohanis loke fo suek ala dadik hataholi ina-huuk
35 Basa boe ma Yakobis no Yohanis fo Sabadeus anan nala leni Yesus leu. Ala loke Ndia lae, “Ama Mesen! Ai paluu.”
36 Yesus natane sala nae, “Ei paluu hata?”
37 Boe ma ala lataa lae, “Leo iak Ama! Mete ma Ama nanggatuuk to'u palenda so, na, ai moke Ama manggatutuu ai, esa nai Ama boboa konam, ma esa nai Ama boboa kiim, fo ai boe oo to'u palenda.”
38 Yesus nataa nae, “Ei dua nggei ta malelak hata fo ei mokek ia. Dei fo Au ia hambu doidosok no'un seli. De leo bee? Ei mae hetuk ei bisa lemba doidosok ndia sama-sama mia Au losa mate, do?”i
39 Ala lataa lae, “Ai bisa, Ama!”
Yesus bala nae, “Memak dei fo ei boe oo lemba doidosok ndia sama leo Au boe. 40 Tehuu dei fo see ndia nanggatuuk nai Au boboa konang ma Au boboa kiing, na Au ta ndia aketun. Ndia Manetualain haak nakeketun. Ana naketu memak see ndia nanggatuuk nai mamanak ndia so.”
41 Ledo-eik ana mana tungga fe'en nala lamanene Yakobis no Yohanis loke leo ndiak, boe ma ala luli lalan seli. 42 Boe ma Yesus noke nala basa sala, de Ana nafada sala nae, “Leo iak! Ei bubuluk so, hetu? Hataholi ina-huuk fo mana to'u palenda nateme nakanete lau-inggun nala, losa ta bisa lakababalek. Ma malanggan nala leme hataholi nusak fo ta mana malelak Manetualain, ala fee palenda lena-lenak, losa lau-inggun nala ta botik lala langgan nala. 43 Tehuu ei boso tao leo ndiak! De see neme ei mai fo ana nau dadik hataholi ina-huuk, na ana musi dadik sama leo ata fo mana ono-lau hataholi fe'ek.j 44 Ma see ndia nau dadik malanggan, na ana musi tao aon sama leo ata.k 45 Huu Au, Hataholi Isi-isik ia, ta mai fo hataholi ono-lau Au. Tehuu Au mai fo ono-lau hataholi no'uk. Au mai fee Au sodang katematuan fo soi ala hataholi no'uk sala-singgon nala.”
Lamatuak Yesus tao nahai hataholi mbokek
46 Yesus no ana mana tunggan nala ma hataholi no'un seli losa kota Yeriko. Ledo-eik ala sangga la'ok lakandoo, boe ma hambu hataholi mbokek esa nanggatuuk hule doik nai dalak bifin. Ndia naden Bartimeos, fo Timeos anan. 47 Ledo-eik ana namanene hataholi la lae, mana nesik ndia, na Yesus neme Nasaret mai, boe ma nanggou tingga-tingga nae, “Yesus! Dauk numbu-sadun! Ai mahani taa-taa Ama dook ia so! Kasian neu au dei!”
48 Hataholi la lamanene ana nanggou leo ndiak, boe ma ala ka'in lae, “Wei! O nee-nee dei!”
Tehuu ana boe nanggou natingga seluk bali nae, “Yesus! Dauk numbu-sadun! Kasian neu au dei!”
49 Boe ma Yesus hahae, de nae, “Ei mian neni ia mai!”
Boe ma ala leu lafadan lae, “Wei! O nee-nee leo! Ama Mesen noke o. Mai leo!”
50 Bartimeos namanene leo ndiak, boe ma ana nggali heni lafan, de nambadeik lai-lai fo neu natonggo no Yesus.
51 Yesus natanen nae, “O hii hata?”
Hataholi mbokek ndia nataa nae, “Ama! Au oke fo au bisa ita!”
52 Yesus nafada seluk bali nae, “Huu o mamahele mae, Au bisa tao ahai o, de hatematak ia o hai so! De muu leo!”
Boe ma Bartimeos matan hai tutik. Basa boe ma ana neu tungga Yesus.