Nitu la malanggan soba-dou Lamatuak Yesus
4
Basa ndia, boe ma Manetualain Dulan noo Yesus neni mamana nees neu, fo suek nitu la malangga ina-huun soba-doun.a 2 Boe ma Ana puasa nai ndia, leledok 40 ma le'odaek 40. De Ana ndoe nalan seli. 3 Ledo-eik Ana ndoe leo ndiak, boe ma nitu la malangga ina-huun mai soba-doun nae, “O ia, tebe-tebe Manetualain Anan, do? Mete ma tetebes, na, palenda batu la ia fo dadik neu nana'ak leo.”4 Tehuu Yesus nataan nae, “Nana sulak nai Manetualain Susula Malalaon dale nae:
‘Hataholi ta nasoda nenik kada nana'ak.
Tehuu sila boe oo musi lamanene Manetualain Dede'a-kokolan,
ma tao tungga Ndia hihiin.”’b
5 Boe ma nitu ndia noo Yesus neni kota Yerusalem neu, fo Lamatuak kota malalaon ndia. Basa de ndia noo Yesus hene neni Uma Ina Huhule-haladoik mboin neu. 6 Boe ma nitu nae, “Mete ma tebe-tebe Manetualain Anan O, na, O makaboku sudik dae muu. Huu nana sulak nai Manetualain Susula Malalaon nae,
‘Dei fo Manetualain palenda ata nusa sodan nala,
fo lanea O.’
Nai Manetualain Susula Malalaon boe oo nana sulak nae,
‘Dei fo ala latanee lala O lenik sila liman,
fo suek O aom ta hedis, ma ta la'e batu boe.”’c
7 Tehuu Yesus nataan nae, “Nana sulak nai Manetualain Susula Malalaon boe nae,
‘Manetualain ndia, o Lamatuam.
Huu ndia de o boso soban.”’d
8 Boe ma nitu noo Yesus neni lete madema esa lain neu. De ana natudu basa nusak kala manai dae-bafok, ma basa nula-nambun nala. 9 Natudu basa sila, boe ma nitu nafada nae, “Sadi O sendek fo makaluku-makatele neu au, na dei fo au fee basa sila leu O.”
10 Tehuu Yesus nasapalak kana nae, “Heh, nitu! O malai heok ia! Huu Manetualain Susula Malalaon nafada nae,
‘O musi makaluku-makatele neu Manetualain,
ma o musi kada tao ues fee Ndia.”’e
11 Nitu namanene leo ndiak, boe ma ana la'o ela Yesus. Tehuu Manetualain ata nusa sodan nala mai fo ono-lau Ndia.
Lamatuak Yesus mulai fee nanonolik nai Galelea
12 Faik ndia, mane Herodes nandee Yohanis Mana Salanik neni bui dale neu. Ledo-eik Yesus namanene leo ndiak, boe ma Ana fali neni Galelea neu.f 13 Neni Ndia nggolon Nasaret neu, boe ma Ana la'o nakandoo fo neu leo nai nggolo Kapernaum. Nggolok ndia, nai dano Galelea bifin, fo nai Sebulon ma Naftali daen.g 14 No leo ndiak, Ana tao tungga hata fo Manetualain mana kokolan Yesaya sulak memak kana so nae,
15 “Nai Sebulon daen, ma Naftali daen,
fo dekak nai dano Galelea, nai lee Yarden boboan.
Hataholi ta Yahudi la leo lai ndia.
16 Lasoda lai makiuk dale,
tehuu hatematak ia ala lita Manggaledok so.
Huu hatematak ia Manggaledok nasa'a so
soa-neu basa hataholi la fo bei ta lalelak Manetualain.”h
17 Mulai neme faik ndia mai, Yesus mulai nanoli hataholi la nae, “Ei musi heok masadea ma la'o ela ei sala-singgom mala, fo masoda malalaok leo! Huu hatematak ia, basa hataholi la bisa maso dadik Manetualain hataholin so.”i
Lamatuak Yesus noke nala hataholi mana dolu-dala haa fo tunggan
18 Faik esa, Yesus la'ok tungga dano Galelea bifin. Ana natonggo no hataholi dua ka'a-fadik kala. Ka'ak nade Simon, tehuu hataholi lateme loken lae, Petrus. Ma fadin nade Anderias. Ala dala i'ak leme dano dale, huu dua sala sila, mana dolu-dala. 19 Boe ma Yesus noke sala nae, “Wei, mai tungga Au leo! Ei mateme sangga i'ak, tehuu hatematak ia Au sangga anoli ei, fo dadik miu mana sangga samanek.” 20 Dua sala lamanene basa leo ndiak, boe ma ala la'o ela dalan nala, de ala tungga tutik Yesus.
21 Basa ndia, boe ma Yesus la'ok nakandoo doo-doo faa bali, boe ma nita Sabadeus anan nala. Ka'ak nade Yakobis, ma fadik nade Yohanis. Dua sala lo aman tao neulalau dalan nala leme ofak dale. Boe ma Yesus noke nala dua sala fo tunggan. 22 Ala lamanene leo ndiak, boe ma ala la'o ela sila aman ma sila ofan, de ala tungga tutik Ndia.
Lamatuak Yesus nanoli hataholi, ma tao nahai hataholi kamahedik kala
23 Basa ndia, boe ma Yesus la'ok ndule propensi Galelea, fo Ana fee nanonolik nai hataholi Yahudi uma huhule-haladoin dale. Ana fee nanonolik la'e-neu Manetualain Hala Malolen, ma nafada dalan leo beek, fo hataholi bisa tungga Manetualain palendan. Ma Ndia boe oo tao nahai basa hataholi la leme hedis mata-matak kala mai.j 24 Ta dook boe ma halak la'e-neu Yesus tataon ndia, nana tui-benggak nafeok losa nusa Siria. Basa boe ma hataholi la loo sila hataholi kamahedin mata-matak kala, leni Ndia leu. Sila boe oo loo hataholi nitu nalak, mulu bi'ik, ma lu'uk. Boe ma Ana tao nahai basa sala. 25 Faik ndia, hataholi makadotok kala mai tunggan. Ala leme propensi Galelea mai, ma leme nusa Kota Kasanahuluk mai fo loken lae, Dekapolis. Hambu luma leme kota Yerusalem, leme propensi Yudea, ma leme lee Yarden boboan mai.