Lamatua Yesus puri-pa'èle ana sab'a ca dhèu nèti komedhaa sordad'u Roma
7
Ropa aj'a nare, ka Yesus lèpa asa kota Kapernaum. 2 Ca dhèu komedhaa sordad'u Roma pea ètu ne'e. Abhu dhèu sab'a na èci dhu nèngu parcaya. Dhèu sab'a ne dhu pèd'a oe madhe. 3 Lod'o èèna, komedhaa tadèngi le tatao Yesus, hèia na pua dhèu heka Yahudi pèri-pèri lasi manèngi Yesus mai puri dhèu sab'a ne. 4 D'ai nèi, ra pamako Yesus, sèna ka Na la'e palere dènge rèngu. Ra manèngi, peka na, “Dhèu Roma ne, dhèu be'a! Ama hud'i tolong ne. 5 Te nèngu ka patitu èmu sabaj'a cue hia ji'i, lula na sue èdhi dhèu Yahudi.” 6 Ka Yesus madhutu dènge si.Rèngu dhae rare mèka èmu, te ngaa komedhaa ne pua le angalai na la'e peka dènge Yesus, na, “Ama roca ia ka mai asa d'ara èmu ja'a, te ja'a nia boe sèmi Ama asa d'ara èmu ja'a. 7-8 Aa ja'a nia boe kahèi ara dhiu asa katanga madha Ama. Ja'a ke'a Ama dènge koasa. De sad'i Ama padhai lii nèti èèna, tatu dhèu sab'a ja'a ne èle dènge nèti papèd'a na. Ja'a ke'a j'ara ne'e ne, lula ja'a dènge dhèu paredha dedha kahèi, dhu dènge koasa ho paredha ja'a. Aa ja'a dènge koasa kahèi ho paredha sordad'u ja'a. Ladhe ja'a hia paredha mi sordad'u ja'a, peka na, ‘Lamu sa nèi!’ tatu la'e dènge. Aa ladhe ja'a peka, na, ‘Mai sa ne'e.’ tatu na mai. Aa ladhe ja'a pua dhèu sab'a ja'a, ‘Sab'a ne'e.’ tatu na sab'a madhutu kahèi. De sad'i Ama padhai lii di, dhèu sab'a ja'a ne, èle dènge.”
9 Ropa tadèngi sèmi èèna, Yesus malaa. Ka Na kabib'a sa dhèu ae dhu madhutu Na sèra, hèia Na peka, “Nia kahèi nga! Nèbhu nare sange ne'e, Ja'a paraga kèdhi mèka dènge dhèu Yahudi dhu lèka èra sama sèmi dhèu Roma ne!”
10 De Yesus d'ai dhoka era èèna di. Hèia angalai komedhaa se lèpa. Ropa d'ai èmu komedhaa, ladhe na, dhèu sab'a ne èle le nèti papèd'a na.
Lamatua Yesus pamamuri hari ana nèti ca dhèu bhèni balu
11 Asa bèli èèna, Yesus dènge ana madhutu Na, pakèd'i lasi asa rae èci, ngara na Nain. Dhèu ae kako palere dènge Ne. 12 Ropa rèngu oe dètu dènge hèb'a tedhe maso asa rae ne, ra paraga dènge dhèu ca nau lasi padhane dhèu madhe. Dhèu madhe ne, ana mone mesa nèti ca dhèu bhèni balu. 13 Ropa Yesus nèdhi bhèni balu ne, ka d'ara Na roe. Hèia Na lii dènge bhèni ne, aku Nèngu na, “Ina! Tangi ia ka!”
14 Hèia Yesus la'e padètu-dètu, ka Na g'ag'e karad'a dhèu madhe ne. Ka dhèu dhu pasae karad'a ne titu taha. Hèia Yesus lii dènge dhèu madhe, aku Nèngu na, “Ana! Kèd'i ka!” 15 Ka ana ne mamuri hari, hèia na kèd'i madhèdi. Èle èèna ka, na padhai lii dènge dhèu ae dhu titu reo rare ne. Aa Yesus peka dènge bhèni balu ne, aku Nèngu na, “Ina! Ana mu ka ne'e.”
16 Dhèu aa'i-aa'i ètu sèra madha'u titu kèna! Ka ra koa-kio Ama Lamatua, peka na, “Ama Lamatua pua le ca dhèu Na dhu kapai risi, dhu nèti lii padhai Na hia èdhi!” Abhu hari dhu leo, peka na, “Ama Lamatua mai le ètu talora aae èdhi, ho pad'elo d'ara hua iia Na!” 17 Hèia lii lolo ne, ra palolo d'ai mia-mia ètu propensi Yudea dènge era leo kahèi.
Yohanis tuka sarani, pua dhèu dua lasi paraga dènge Lamatua Yesus
18-20 Ana madhutu Yohanis tadèngi aa'i le ngaa-ngaa dhu Yesus ad'u-ue. Ka lasi lole dènge Yohanis ètu d'ara bèdho. Hèia na pua dhèu dua lasi, ho karèi Ne, peka na, “Ama ne tare'a-re'a Kristus dhu ji'i mate tae-tae, do? Do, ji'i mate hari ku dhèu leo?”
Èle ka ra paraga dènge Yesus, ka ra karèi sèmi èèna ka.
21 Lod'o ana madhutu Yohanis se ètu èèna, Yesus puri-pa'èle dhèu ae nèti papèd'a ra. Na bata eele nidhu nèti dhèu. Aa Na pa'èle dhèu bèdhu, ka rèdhi hari.
22 Ka Yesus peka dènge ra, “Lèpa ka ho mi peka dènge a'a Ku Yohanis, aa'i-aa'i dhu miu tadèngi dènge mèdhi unu mi, sèmi dhu dhèu nèti lii padhai Ama Lamatua, ngara na Yesaya, suri tèke,
‘Dhèu bèdhu rèdhi hari.
Dhèu karuku, kèd'i ho kako hari.
Dhèu pèd'a kusta, isi ra milu hari.
Dhèu katele-katipa, tadèngi hari.
Dhèu madhe, mamuri hari.
Dhèu dhu dènge boe unu, nanene Lii Lolo Be'a.’a
23 Lami ho peka kahèi dènge a'a Ku Yohanis, na, ‘Dhèu dhu makae boe sèmi rare Ja'a, rèngu abhu a'oto.”’
24 Ropa ana madhutu Yohanis se lèpa, hèia Yesus peka dènge dhèu ae sèra lula-nèti Yohanis, na, “Lod'o miu lami tenge Yohanis ètu d'ara pad'a sod'a èèna, miu pangee, na, paraga dènge dhèu dhu lalole na sèmi ngaa? Tatu miu lami boe ho paraga dènge dhèu dhu roe aai-roe èèla, nuka sèmi kalai èèu dhu bhabheu madhutu lai ngèlu di! 25 Tatu lami boe ho ladhe dhèu dhu pake mèdha-papake dhu kab'ua aae, te dhèu sèmi èèna, era pea na dhodhoka ètu d'ara èmu dhèu aae di! 26 De miu lami tenge dhèu cee ètu nèi? Miu pangee na lami tenge dhèu nèti lii padhai Ama Lamatua, do? Tare'a! Te nèngu risi nèti ca dhèu nèti padhai lii Lamatua. 27 Te ètu d'ara Sasuri Mola-Mèci dhu suri tèke le, na,
‘Nanene! Ja'a pua dhèu Ja'a,
sèna ka bhoke j'ara hia Èu.’b
28 Ètu rai-haha ne, abhu boe ca dhèu sa dhu kapai risi nèti Yohanis. Te ngaa dhèu dhu ana iiki-iiki ètu talora aae dhèu unu Ama Lamatua, kapai risi nèti Yohanis.”
29 Dhèu dhu tadèngi lii padhai Yesus, rèngu re'a le, peka na, j'ara Lamatua èèna, j'ara mamuri dhu lèke. Sèmi èèna kahèi dènge dhèu roro bea sèra. Lula rèngu uru èèna abhu sarani aa nanene kahèi lii aj'a-nori nèti Yohanis. 30 Te ngaa dhèu nèti partei agama Parisi dènge dhèu d'èlu-mèu atora agama Yahudi sèra, ro'o boe madhutu dad'èi Ama Lamatua. Nèti èèna ka, ra manèngi boe Yohanis sarani si.c
31 Hèia Yesus karèi dhèu se'e, aku Nèngu na, “Ja'a pakasame dhèu-dhèu taa limuri se'e dènge ngaa? Dhèu sèmi ngaa ka see? 32 Rèngu se, èci èèna ka dènge ana-ana dhu madhèdi ètu d'ara pasa. Ra re'a dhoka pa'oo-parodha dènge ka'uu-kamuki, peka na,
‘Ji'i aa'i-aa'i mi tiu sakino,
te ngaa miu roge boe dènge karej'e.
Aa ji'i sod'a lii beke dhèu madhe,
te ngaa miu tangi boe.’
33 Te, Yohanis tuka sarani ninu boe èi anggor, aa na d'èi puasa, miu ka'uu-kamuki, peka na, ‘Nèngu ne nidhu tao!’ 34 Te ngaa limuri ne, Ja'a, Dhèu Rai-haha Tare'a-re'a ne, tema kinu èi anggor dènge ku'a roti. Ka miu ka'uu-kamuki, peka na, ‘Dhèu ne, dhèu gagoo-gagehu! Aa tema mahu! Pa'angalai dènge dhèu roro bea! Aa partei èci dènge dhèu dhu laku-laku boe! Dhu ne'a heka ngi'u na!’ 35 Te ngaa mi patadhe lii Ja'a ne! Dhèu dhu re'a mèu, tatu rèngu madhutu dad'èi Ama Lamatua.”
Lamatua Yesus na'a-ninu ètu èmu Simon
36 Ètu d'ara kota ne, abhu dhèu Parisi ca dhèu, ngara na Simon. Ca lod'o, na nèru Yesus si mai ra'a asa èmu nèngu. Hèia Yesus si lasi madhèdi, ka neo ra'a. 37 Lod'o èèna, bhèni kajeo ca dhèu tadèngi kahèi, na, Yesus si neo ra'a-rinu ètu èèna. Ka na maso la'e, nèd'u dènge èi hèu mèngi ca boto dhu kab'ua aae. 38 Na mai padètu dènge Yesus re kabodho Na. Hèia na patitu kètu urutuu na ètu haga Yesus. Na tangi d'ara pèd'a dènge roma iisi, toke èi madha na hae lèke haga Yesus. Ka na seka haga Yesus pake rèu kètu na, aa na loe boe uu haga Yesus kahèi. Èle ka, na pasuti èi hèu mèngi èèna mi haga Yesus.d
39 Simon ne'a mèu j'ara mamuri bhèni ne. Nèti èèna ka, na pajiko ètu d'ara na, “Ne'e j'aj'i mi tadha, na, Yesus ne, dhèu dhu nèti boe lii padhai Ama Lamatua! Ladhe tare'a-re'a Ama Lamatua ka dhu pua Ne mai, tatu Nèngu ne'a, na, bhèni dhu g'ag'e Nèngu ne, bhèni kajeo. Dhèu rèti lii padhai Ama Lamatua, sèmi boe Nèngu ne, lula dhèu mola-mèci bisa boe padètu dènge dhèu kaj'alu!”
40 Te ngaa Yesus ne'a ngaa dhu Simon ngee. Ka Na peka, aku Nèngu na, “Simon! Sèmi ne'e. Ja'a neo peka dènge èu ca j'ara.”
Hèia Simon dhaa, aku nèngu na, “Ama Mese, peka laa.”
41 Ka Yesus core lii, peka na, “Abhu ca dhèu dhu tema hia dhèu pija doi na. Uru èèna, na hia nèdhi dhèu dua pija doi na. Dhèu èci, abhu lèmi ngasu doi iia, aa ca dhèu hari lèmi nguru di. 42 Te ngaa d'ai lod'o pula doi se'e, dua ra bisa boe b'ae rare. Ka dhèu dhu hia pija, rasa kasia mi rèngu dua ra. Nèti èèna ka, na peka mi dua ra, sèna ka b'ae ia ka kèlu ra sèra. De madhutu èu, nèti dhèu dua se, cee ka dhu sue risi dhèu tema hia dhèu pija doi ne?”
43 Ètu d'ara ciki oo'e na kahèi, Simon dhaa, peka na, “Tatu dhèu dhu kèlu na ae risi!”
Ka Yesus dhaa, na, “Mema tare'a!”
44 Ka Yesus ladhe bhèni ne, hèia Na peka dènge Simon, aku Nèngu na, “Èu ladhe sèku bhèni ne. Deo na Ja'a maso asa d'ara èmu èu, èu tèke boe èi sèna ka rase haga Ja'a, madhutu ad'a èdhi. Te ngaa bhèni ne pabasa haga Ja'a dènge èi madha na, ka na seka pake rèu kètu na. 45 Aa ropa èu soru Ja'a maso asa d'ara èmu èu, èu uu boe Ja'a, madhutu ad'a èdhi. Te ngaa karèi nèti Ja'a ètu d'ara èmu èu, bhèni ne loe boe uu haga Ja'a. 46 Èu bhèlu eele ad'a dhu palona èi hèu mèngi mi kètu tamu, ropa Ja'a mai deo na. Te ngaa bhèni ne bhori le èi hèu mèngi dhu kab'ua titu kèna mi haga Ja'a. 47 Èu nanene paie! Sasala bhèni ne, mema ae. Te ngaa Lamatua saku eele aa'i le, lula na pad'elo le sasue na dènge manèngi makasi ae-ae mi Ja'a. Te ngaa bagi dhèu dhu rasa na tao boe sasala ae, nèngu ngee na parluu boe abhu abho ae kahèi. Nèti èèna ka, nèngu ne'a boe sue aa ne'a boe manèngi makasi mi Lamatua.”
48 Hèia Yesus lii dènge bhèni ne, peka na, “Ja'a saku eele le sasala èu aa'i-aa'i ra!”
49 Dhèu aa'i-aa'i dhu madhèdi ra'a palere-lere, paka'uu, aku rèngu na, “Huuh! Na ngee na, Nèngu ne cee?! Na bani titu kèna saku eele sasala-sasigo dhèu! J'ara ne'e ne dhodhoka Ama Lamatua mesa Na, dhu dènge hak ho saku eele sasala dhèu!”
50 Te ngaa Yesus peka dènge bhèni ne, aku Nèngu na, “Lula èu lèka le Ja'a, nèti èèna ka Lamatua hia le èu mamuri. Lèpa ka dènge mera-milu!”