4 Aj'a nare, hèia Na padhai lii dènge Simon, peka na, “Simon! Padedha hari ku asa d'ara marèma, ho core pèku la'a. Te èèna na miu abhu i'a ae.”

5 Ka Simon dhaa, peka na, “Te ngaa, Ama. Ji'i sab'a d'ai madhe d'ara camèd'a kateme kèna, te abhu boe ci'u sa hèi! Te ngaa lula Ama ku peka le sèmi èèna, ja'a madhutu! Ja'a papuru sèku.”^c 6 Hèia ra papuru pèku. Ropa ra neo ère paca'e hari, re'a boe na pèku ne dhu pènu dènge i'a, ka mulai mae.^d 7 Hèia Simon rodhe angalai na ètu koha leo sèra, ho mai bara rèngu ère pèku. Ka ra da'u i'a tao asa d'ara koha, toke koha dua bua se pènu dènge i'a, ka oe cène. 8-10 Angalai Simon se, nuka Yakobis dènge Yohanis, ana nèti Sabadeus, ètu era èèna kahèi. Rèngu se malaa, lula ra abhu i'a ae titu kèna. Ropa Simon Petrus ladhe nèdhi ngaa dhu j'aj'i ne, hèia na patitu dènge ka, kètu urutuu na ètu madha Yesus, hèia na peka, “Ja'a ne, ca dhèu dhu ue le sasala ae-ae. De be'a risi, Lamatua padètu ia ka dènge ja'a.”^e

Te ngaa Yesus dhaa, peka na, “Simon! Pangee ia ka j'ara ne'e, te Ja'a neo pake miu se. Miu tema le tenge i'a. Te ngaa deo ne'e ne, Ja'a aj'a miu sèna ka tenge dhèu ho madhutu Ja'a.”

11 Èle ka, rèngu nuni dènge ka koha ra asa dedha nebhe. Ka lasi tèke eele ka ngaa-ngaa ra aa'i-aa'i, lasi madhutu Yesus.

12 Ètu rae èci, Yesus paraga dènge ca dhèu dhu ngi'u na pènu dènge èi papèd'a kusta. Ropa dhèu ne nèdhi Yesus, ka la'e patitu kètu urutuu na, aa na pacud'u d'ai rai. Hèia na lii, aku nèngu na, “Ama! Sue ku ja'a laa! Te ja'a ke'a, na, Ama bisa puri-pa'èle papèd'a ja'a ne, sèna ka dhèu madenge ia ka dènge ja'a. Sad'i Ama mo'o.”

13 Ka Yesus j'ole kacui-aai Na ho g'ag'e ne. Aa Na peka, “Ja'a ko'o! Èu èle dènge kèna!” Ropa Na padhai lii nare, èi papèd'a dhèu ne èle dènge. 14 Hèia Yesus pasanèd'e ne, peka na, “Baku bhèlu, ee! Èu èle le, te ngaa baku peka dènge dhèu èci sa! Èu hud'i madhutu uuru ku paredha baki Musa. De lamu asa ama agama, ho na parisa ngi'u èu, sèna ka ne'a èi papèd'a ne èle tare'a, do dhae. Èle èèna na, èu hia mèdha èci sèmi tadha makasi, sèna ka dhèu aa'i-aa'i re'a, èu ne èle tare'a le nèti papèd'a.”^f

15 Masi ka Yesus kai, te ngaa lii lolo nèti koasa Na, pale-lème nèti dhèu èci asa èci d'ai mia-mia. Ka dhèu mai sèmi tao cèci sa, ho ra nanene Na aj'a-nori. Hèia Na puri-pa'èle dhèu ae nèti rupa-rupa èi papèd'a ra. 16 Te ngaa catèka-catèka, Yesus d'èi kahèi patalele iisi, ho la'e manèngi-mangaj'i asa era dhu kaliu.

17 Ca lod'o, Yesus aj'a dhèu ètu d'ara èmu cue. Lod'o èèna, abhu kahèi dhèu nèti partei agama Parisi, dènge pèri-pèri mese agama, mai ho nanene lii padhai Na. Dhèu se mai nèti rae-rae ètu propensi Galilea, propensi Yudea, dènge kota Yerusalem. Ama Lamatua hia Yesus koasa, sèna ka pa'èle dhèu-dhèu pèd'a. 18-19 Lod'o èèna, dhèu pèri-pèri ded'e rèti dhèu karuku èci ètu dedha karad'a. Rèngu tenge-tenge j'ara, sèna ka Yesus puri-pa'èle ne. Te ngaa ètu d'ara èmu ne, dhèu sèmi tao cacèci sa, ka rèngu bisa boe pasuki asa d'ara. Nèti èèna ka, ra ded'e dhèu ne asa kolo èmu. Rare dedha, ka ra bèdi eele rèu èmu, sèna ka tao ro'a, ho dulu dhèu karuku ne dènge karad'a kateme asa haha la'e. Ra dulu dhèu ne'e asa talora aae dhèu ae-ae se, lèke mola-mola ètu madha Yesus. 20 Ropa nèdhi sèmi èèna, hèia Yesus ne'a, na, rèngu se parcaya, na, Nèngu bisa pa'èle angalai ra nèti karuku na. Ka Na lii dènge dhèu karuku ne, aku Nèngu na, “Ana, ee! Ja'a saku pamèu le sasala èu.”

21 Ropa tadèngi Yesus padhai lii sèmi èèna, ka dhèu Parisi dènge mese agama sèra, pakarèi, na, “Eeh! Dhoka Ama Lamatua dhu dènge hak di, ho saku eele sasala-sasigo dhèu. Cee ka Nèngu ne, ka Na tao iisi Na nuka sèmi Ama Lamatua! Ne'e ne pa'ele iie kolongara Lamatua!”

22 Te ngaa Yesus dhu ne'a d'ai d'ara rèngu. Hèia Na peka, “Nga tao ka miu se ngee, na, Ja'a ne padhai lii pa'ele iie kolongara Lamatua? 23-24 Ja'a ne Dhèu Rai-haha Tare'a-re'a. Aa Ja'a ne dènge hak kahèi, ho abho sasala-sasigo dhèu. Ladhe Ja'a lii dènge dhèu karuku ne, ‘Ja'a abho le sasala èu,’ miu mèdhi boe koasa Ja'a ètu rai-haha ne. Te ngaa ladhe Ja'a peka na, ‘Kèd'i ka! Ded'e karad'a èu, ho lèpa ka.’ Ladhe nèngu kèd'i dènge ka, na, miu heka mèdhi koasa Ja'a. Nèti èèna ka, Ja'a neo puri-pa'èle dhèu karuku ne, sèna ka miu me'a, na, Ja'a dènge hak ho abho sasala-sasigo dhèu.”

Ka Na piku asa dhèu karuku ne, aa lii, peka na, “Titu ka! Ded'e karad'a èu, ho lèpa ka!”

25 Cag'ag'a laa, dhèu ne kèd'i titu ètu madha dhèu ae sèra, ka kèpe nare karad'a na. Hèia na lèpa ka dènge koa-kio kolongara Ama Lamatua. 26 Rèdhi sèmi èèna, ka dhèu aa'i-aa'i se malaa. Ka ra ded'e padedha-dedha kolongara Ama Lamatua, peka na, “Lamatua kapai risi eele! Deo ne'e ne, èdhi tèdhi le dènge musi madha èdhi unu ti, tadha malaa dhu kapai!”

27 Nèbhu boe ka Yesus kalua nèti d'ara èmu, hèia ladhe nèdhi dhèu roro bea ca dhèu, dhu madhèdi ètu era roro doi bea. Ngara dhèu ne, Lewi.^g Ka Yesus peka dènge ne, “Mai ka madhutu Ja'a!” 28 Ropa tadèngi lii paroa ne, hèia Lewi kèd'i dènge ka, tèke eele aa'i-aa'i sèra, la'e madhutu Yesus.

29 Èle ka, Lewi tao tatao kapai ètu èmu na, ka na nèru Yesus. Aa na nèru kahèi angalai na dhèu roro bea sèra, dènge tamu-tamu dhu leo ho lasi ra'a-rinu. 30 Te ngaa pèri-pèri dhèu nèti partei agama Parisi, dènge mese-mese agama, ka'uu-kamuki mi ana madhutu Yesus, aku rèngu na, “Tasamia ka miu mi'a-minu pa'èci dènge dhèu dhu laku boe, nuka dhèu roro bea, dènge dhèu karehe sèra? Dhèu be'a bisa boe pa'èci dènge dhèu sèmi sèra sa!”^h

31 Ka Yesus lii dènge rèngu, peka na, “Dhèu pèd'a parluu dote-matarii. Te ngaa dhu pèd'a boe, parluu boe. 32 Mamai Ja'a ne, ho lalau-lalo'o dhèu karehe sèra. Te ngaa Ja'a mai boe ho uri dhèu dhu ngee na, ngi'u ra mola le.”

33 Hèia dhèu nèti partei agama Parisi dènge mese-mese agama ka'ugu mi Yesus, peka na, “Sèmi ne'e, Ama! Ana madhutu Yohanis tuka sarani dhèu, rèngu tema puasa dènge sabaj'a. Ana-ana madhutu dhèu Parisi sèmi èèna kahèi. Te ngaa tasamia ka, ana madhutu Ama sèra, loe boe dènge ra'a-rinu? Rèngu se re'a boe puasa, do?”

34 Ka Na dhaa pake lii pakasame, aku Nèngu na, “Miu me'a le, ladhe dhèu tao pesta kab'i, dhèu-dhèu dhu ra nèru sèra, bisa boe puasa, te ngaa ra'a toke bècu. Ladhe mone dhu kab'i èèna, dènge rèngu era, tatu rèngu ra'a palere aa'i-aa'i ra. 35 Te ngaa ropa dhèu leo rai rèti mone dhu kab'i ne, hèia angalai na susa, heka ra puasa kèna.”

36 Hèia Yesus padhai lii pakasame èci hari, peka na, “Abhu mèka dhèu dhu rare bèla hiu ca'èta, ho kalape mi kodho dhui dhu mae. Te ladhe base kodho ne, bèla hiu dhu kalape la'a èèna karuku, na kodho ne asa mae aae. 37-38 Sèmi èèna kahèi, dhua dhu heka rèti nèti kapua, dhèu bhori boe asa sabha dhui. Te aad'o na, sabha madhore eele, aa dhua èèna soli soo-soo asa rai la'e. De dhua dhu hiu, hud'i bhori ku asa d'ara sabha hiu.ⁱ [Sèmi èèna ka, Yesus aj'a si, peka na, lii aj'a Na dhu hiu bisa boe pab'ali dènge lii aj'a dhu dhui nèti dhèu Parisi.] 39 Dhèu dhu rinu rèdhi le èi anggor dhui, d'èi boe rinu dhu hiu. Te dhu re'a na, ‘Èi anggor dhu kee risi nuka èi anggor dhui!”’