2 Na aj'a si lii holo-nori rupa-rupa pake lii pakasame. Aku Nèngu sèmi ne'e ka:^a

3 “Nanene paie-iie! Dhèu èci la'e ceb'e hini ètu d'ara oka na. 4 Ropa na ceb'e hini sèra, cahag'e lèke ètu sebhe j'ara. Kabèdhi laa, manu-bhui mai ka ra'a aa'i. 5 Cahag'e hari lèke ètu era rai dhu pènu dènge hadhu. Hini sèra muri, te ngaa rai isi dhoka ciki oo'e di. 6 Ropa lod'o rea mai, ana nganga'a sèra kamale eele hèia madhe aa'i si, lula amo d'ai boe d'ara rai.

7 Hini cahag'e lèke ètu dedha rai dhu pènu dènge j'u'u padhudhu. Ropa j'u'u sèra muri, hèlu rare ana nganga'a sèra, ka j'aj'i boe hua-hela. 8 Te ngaa hini cahag'e lèke ètu dedha rai hèu mèngi. Hini sèra muri dènge sega. Hua ae titu kèna. Cahag'e dhu abhu d'ai tèlu nguru hari, cahag'e èna nguru hari, aa cahag'e d'ai cangasu hari.

9 De ladhe cee dènge ro'a dhilu, na, nanene paie!”

10 Ca tèka, Yesus mesa Na. Hèia ana madhutu Na dhèu canguru dua dènge pèri-pèri dhèu dhu tadèngi le lii holo-nori Na, mai paraga dènge Ne. Ka ra karèi sasoa nèti lii pakasame èèna. 11 Hèia Yesus dhaa, “Lula miu tare'a-re'a neo me'a Lii Holo-Nori Ama Lamatua, Ja'a neo peka dènge miu. Te ngaa mi dhèu leo, Ja'a pake lii pakasame. 12 Tatao dhèu leo sèra sama sèmi dhèu nèti lii padhai Ama Lamatua suri tèke, peka na,

13 Èle èèna ka, Yesus peka dènge dhèu sèra sasoa lii pakasame hini èèna, aku Nèngu na, “Ladhe miu me'a boe sasoa nèti lii upama deo na, carui risi hari miu me'a sasoa lii pakasame dhu leo. 14 De sasoa na sèmi ne'e ka: dhèu dhu ceb'e hini èèna, nuka dhèu dhu lole Lii Holo-Nori Ama Lamatua. 15 Hini dhu lèke ètu sebhe j'ara ka manu-bhui mai ra'a aa'i, nuka sèmi dhèu dhu nanene Lii Holo-Nori Ama Lamatua. Te ngaa nèbhu boe, dhèu aae nidhu mai parame rare Lii Holo-Nori nèti d'ara dhèu èèna. 16 Aa hini dhu lèke ètu dedha hadhu, nuka sèmi dhèu dhu nanene, ka na sèmi nare Lii Holo-Nori èèna dènge d'ara karej'e. 17 Te ngaa Lii Holo-Nori ne, taha nèbhu boe ètu d'ara dhèu èèna. Ropa nèngu paraga j'aj'èra lula na sèmi nare lii ne'e, na tèke eele. 18 Aa hini dhu lèke ètu talora j'u'u dhu padudhu, èci èèna ka dènge Lii Holo-Nori Ama Lamatua dhu dhèu nanene. 19 Te ngaa dhèu èèna bhute dhoka dènge rupa-rupa madha j'ara rai-haha dhu pakarej'e ngi'u na. Nèti èèna ka, j'ara se'e seti eele Lii Holo-Nori Ama Lamatua nèti d'ara nèngu, ka j'aj'i heka ngaa-ngaa. 20 Te ngaa hini dhu lèke ètu dedha rai hèu mèngi, nuka sèmi dhèu dhu pasa dhilu ho nanene Lii Holo-Nori Ama Lamatua dènge karej'e-karae. Tatao nèngu madhutu dad'èi Ama Lamatua dènge d'ara kateme. Dhèu ne'e tao j'ara-j'ara dhu pakarej'e d'ara Ama Lamatua, sama sèmi hini dhu nèti hua-hela. Abhu kahèi d'ai tèlu nguru hari, cahag'e d'ai èna nguru hari, aa abhu kahèi dhu d'ai cangasu hari.”

21 Nèti dedha koha, Yesus tuhu hari lii padhai Na. Na peka hari lii upama èci, aku Nèngu na, “Tasamia, ee! Miu mèdhi le, do dhae? Dhèu suru rare labhu, ka saguru eele hari dènge soe! Ka ra tèke asa ro'a koi la'e! Aad'o, sina ma? Te ladhe sèmi èèna, tèdhi boe saraa nèngu. Dhèu hud'i tao labhu ètu era dhu dedha, sèna ka dhèu rèdhi saraa nèngu.^c

22 Ngaa dhu dhèu pahuni deo ne'e, bèli-camèd'a dhèu rèdhi aa'i. Te ngaa dhu dhèu re'a boe lod'o deo ne'e, bèli-camèd'a dhèu re'a aa'i.^d 23 De ladhe cee dhu dènge ro'a dhilu, na, nanene paie!

24 Nanene paie-iie! Ladhe miu tenge sasala dhèu, na, dhèu leo tenge sasala miu kahèi. Sèmi èèna kahèi, Ama Lamatua tenge sasala miu. Te ngaa Na tao bia risi hari nèti èèna.^e

25 Ladhe dhèu èci neo tenge tare'a-re'a dad'èi Lamatua, nèngu asa d'èlu-mèu. Te ngaa ladhe dhèu pusi-pahae boe dad'èi Lamatua, nèngu j'aj'i asa goa.”^f

26 Èle èèna ka, Yesus tuhu hari lii padhai Na, aku Nèngu na, “Paredha Ama Lamatua asa tabha kapai, sama sèmi hini dhu dhèu ceb'e ètu d'ara oka na. 27 Nèngu ceb'e nare, ka la'e bhèj'i. Tao heka ai hèb'a mi hini sèra. Te ngaa hini sèra muri, ka asa kapai. 28 Hini se muri unu ra. Mulai ti rèu, hela, toke d'ai huri. 29 Ropa kasere nare nganga'a dhu ètu d'ara oka mami, dhèu unu oka heka la'e puu-g'ètu kèna. Sèmi èèna kahèi, paredha Ama Lamatua. Lamatua ka dhu ad'u-ue aa'i-aa'i sèra.”^g

30 Èle èèna ka, Yesus padhai lii hari, “Ja'a peka hari lii upama èci sèmi ne'e ka: miu ladhe sèku, dhèu dhu j'aj'i unu Lamatua sèra. Uru èèna ciki di, nèbhu-nèbhu j'aj'i ae. 31 Èèna sama sèmi lamusi aj'u dhu ana iiki-iiki. 32 Ladhe èdhi sèla lamusi èèna, na muri mai, j'aj'i aj'u dhu kapai aae. Manu-bhui nèti mia-mia mai tèka tenge mamaho, dènge tao rèd'a ètu kolo aj'u èèna.”

33 J'ara-j'ara a'aj'a Yesus madhutu rare'a dhèu. 34 Ladhe Na aj'a dhèu leo, Na pake lii pakasame. Te ngaa ladhe Na aj'a ana madhutu Na, Nèngu peka aa'i-aa'i sasoa lii pakasame sèra.

35 D'ai lod'o nihia na, Yesus aj'a dhèu nèti dedha koha era. Hèia Na pua ana madhutu Na sèra, peka na, “Mai èdhi pakèd'i lati asa cabèka dano.”

36 Ka ra ca'e koha èci dènge Yesus. Ra pakèd'i tèke eele dhèu ae sèra ètu èèna. Te ngaa dhèu cahag'e ca'e koha leo madhutu Yesus si. 37-38 Lod'o èèna, Yesus pasaluu kètu Na mi nanèlu, ka bhèj'i luu ètu hui koha. Nèbhu boe ka, ngèlu aae mai. Naha kapai, ka èi tao sabhori oe pènu koha Yesus si. Nèti èèna ka, ana madhutu Yesus sèra madha'u bia. Hèia ra parèi Ne, “Ama! Kèd'i ku laa! Èdhi oe molo kèna! Te ngaa Ama pusi-pahae boe!”

39 Ropa Yesus tadèngi lii parèi ra, ka Na kèd'i, hèia Na kai ngèlu, peka na, “Mau ka!” Ka Na paredha naha, aku Nèngu na, “Mera ka!” Hèia ngèlu mau, aa naha mera dènge ka. 40 Èle èèna ka, Yesus jèke ana madhutu Na, peka na, “Nga tao ka miu madha'u sèmi èèna? Miu parcaya Ja'a, do aad'o?”

41 Rèngu aa'i-aa'i ra madha'u dènge malaa, ka èci peka dènge èci, “Te dhèu ngaa ne? Ka bisa ngèlu dènge naha, madhutu lii paredha Nèngu?”