2-6 Ètu èèna, abhu dhèu mone èci dhu nidhu tao, ka na huj'u. Dhèu huj'u ne pea ètu era padhane dhèu madhe. Mèu-mèda na kako ca'e-puru ledhe ètu èèna, dènge pake boe mèdha-papake. Na pa'oo-parodha ma'ète boe, aa na nare hadhu ho tuku iisi na toke d'ai nu'a. Na èra titu kèna. Nèti èèna ka, dhèu èci sa bisa boe èki ne. Masi ka ra èki dènge rate bèsi èèna ka, bisa boe kahèi. Pèri-pèri hari, dhèu uj'u haga-ai na kahèi, pake rate dènge kanau bèsi, te ngaa na pama'ète aa'i si. Dhèu ne èra bia, nèti èèna ka, èci sa taha boe ne.

Ropa Yesus dènge ana madhutu Na puru nèti dedha koha, dhèu huj'u èèna ladhe nèdhi rèngu nèti kaj'èu. Hèia na kalua nèti era padhane dhèu madhe, ka na mai patitu kètu urutuu ètu madha Yesus. 7-8 Ropa ladhe nèdhi rèhu dhèu ne'e, hèia Yesus peka, na, “Hee, nidhu bhelu! Kalua pakaj'èu nèti dhèu ne'e.”

Èle èèna ka, dhèu èèna pajèka, aku nèngu na, “Weh! Èu neo tao ngaa mi ja'a? Ja'a ke'a Èu ne Yesus, Ana nèti Ama Lamatua dhu Koasa Risi Eele. Ja'a manèngi Èu baku paj'èra ja'a!”

9 Hèia Yesus karèi ne, “Ngara èu cee?”

Na dhaa, aku nèngu na, “Ngara ja'a Legion, lula ji'i ae titu kèna, sama sèmi ca kaboko sordad'u!”

10 Èle èèna ka, nidhu sèra peka re dhèu huj'u èèna, ho manèngi Yesus, sèna ka baku pua rèngu kalua nèti d'ara rae ne.

11 Kaj'èu boe nèti èèna, abhu hahi ca oka dhu dhèu madhenge. Ele boe hahi sèra dua riho ngi'u. Dhu tenge nganga'a ètu sebhe ledhe. 12 Ka nidhu sèra manèngi Yesus, aku rèngu na, “Hia ji'i maso asa d'ara hahi sèra.”

13 Tadèngi nare sèmi èèna, hèia Yesus d'èi kahèi. Ka nidhu sèra kalua nèti d'ara dhèu èèna, ka lasi asa d'ara hahi sèra. Hèia hahi sèra rai paj'ala, ka lasi asa sebhe tèbhi, ka ra manahu asa d'ara dano, hèia madhe aa'i si.

14 Ropa dhèu j'aga hahi sèra ladhe rèdhi madha j'ara dhu j'aj'i èèna, ra madha'u titu kèna. Ka rai lasi peka palème dènge dhèu ètu d'ara rae-rae dhu dètu ètu era èèna. Nèbhu boe dhèu canau-kateme mai neo re'a. 15 Dhèu sèra mai paraga dènge Yesus, ka ra ladhe la'a, na, dhèu dhu nidhu tao èèna, madhèdi ètu èèna kahèi. Dhèu èèna pake le mèdha-papake. Kahadhu na mase'a le. Rèdhi sèmi èèna, hèia dhèu sèra madha'u. Lula rèngu re'a le, ladhe dhèu cee dhu bisa babège eele nidhu nèti d'ara dhèu huj'u èèna, nèngu tare'a-re'a dhèu èra risi. 16 Èle èèna ka, dhèu aa'i-aa'i sèra lasi peka palème ètu mia-mia, aku rèngu na, “Ji'i ngèdhi le dènge madha, dhèu huj'u ne èle le. Sèmi èèna kahèi hahi dhu madhe ètu d'ara dano.” 17 Ka dhèu kabarai èèna mai manèngi ho Yesus tèke eele ka rai rèngu.

18 Ropa Yesus neo ca'e hari asa dedha koha, ka dhèu dhu èle nèti huj'u dhu nidhu tao èèna manèngi Yesus, sèna ka nèngu madhutu Ne kahèi.

19 Te ngaa Yesus kai. Ka Na peka dènge dhèu èèna, aku Nèngu na, “Be'a risi èu lèpa ka asa èmu, ho peka dènge a'ari èu, ngaa dhu Ama Lamatua tao le mi dedha èu. Peka dènge si, mema Ama Lamatua sue èu titu kèna.”

20 Èle èèna, hèia dhèu èèna pakèd'i la'e palème rae-rae nèti canguru kota, dhu ngara na ‘Dekapolis’. Na lole ngaa dhu Yesus tao le mi dedha nèngu. Dhèu-dhèu dhu tadèngi lii lolo na, malaa aa'i mèu-mèu, aku rèngu na, “Mema lèke tare'a!”

21 Èle ka, Yesus si pakèd'i hari dènge koha asa cabèka dano. Ropa ra puru nèti dedha koha, dhèu ae mai lingu rare Yesus.

22 Dhèu èci mai, ngara na Yairus. Nèngu ne, kètu èmu manèngi-mangaj'i dhèu Yahudi ètu kota èèna. Ropa nèngu nèdhi Yesus, ka mai patitu kètu urutuu ètu madha Yesus. 23 Ka na pamako, peka na, “Ama, ee! Ana bhèni ja'a, heka canguru dua tèu, pèd'a oe madhe. Mai lati ku asa èmu ja'a, sèna ka puri-pa'èle ne nèti papèd'a na.”^a

24 Hèia Yesus la'e dènge ka, madhutu Yairus asa èmu na.

Te ngaa ètu d'ara kakako rèngu, dhèu ae titu kèna, ka ra seti Ne nèti haa, nèti dhimu.

25 Ètu talora dhèu ae sèra, abhu dhèu bhèni èci dhu pèd'a dhèu bhèni. Papèd'a ne loe boe canguru dua tèu kèna. 26 Mèdha-panyau dènge doi-dhari dhèu bhèni ne'e, èle aa'i mèu-mèu ho b'ae dote. Te ngaa papèd'a na èle boe, asa na hoe. 27-29 Bhèni ne tadèngi ae le dhèu palolo ngaa dhu Yesus tao. Nèti èèna ka, na mai pasuki asa talora dhèu ae sèra, ho na padètu dènge Yesus. Na pangee, na, “Sad'i ja'a gai lèke sebhe kodho Na di, tatu papèd'a ja'a èle.”

Ropa na gai lèke sebhe kodho Yesus, kabèdhi laa raa bhèni ne tèja eele dènge. Hèia na rasa, na be'a le.

30 Lod'o èèna kahèi, Yesus rasa a'èra kalua nèti d'ara ngi'u Na. Ka Na kabib'a asa kabodho, ho ladhe asa dhèu ae sèra, ka Na karèi, peka na, “Nèti miu se, cee ka dhu gai lèke kodho Ja'a?”

31 Ka ana madhutu Na dhaa, aku rèngu na, “Ama, ladhe ku laa. Dhèu ae paseti sèmi ne'e. Nga tao ka Ama karèi, peka na, ‘Cee ka dhu gai kodho Ja'a?”’

32 Te ngaa Yesus ladhe pala-lème, neo ne'a cee ka dhu gai lèke sebhe kodho Na. 33 Ropa Yesus karèi sèmi èèna, hèia bhèni èèna madha'u bia. Èle èèna ka, na mai patitu kètu urutuu ètu madha Yesus, ka na mangaku, “Ama! Ja'a ka dhu gai lèke sebhe kodho Ama ku deo na.”

34 Hèia Yesus peka mi bhèni ne, aku Nèngu na, “Lula èu parcaya Ja'a dènge d'ara kateme, nèti èèna ka, èu èle le. Lamu ka èmu, dènge d'ara karej'e-karae.”

35 Ropa Yesus padhai lii era, hèia dhèu mai nèti èmu Yairus, aku nèngu na, “Ira ii! Ana mu madhe le. De baku paj'èra ia ka Ama Mese. Nèngu la'e ia ka sa nèi.”

36 Te ngaa Yesus pusi boe dènge lii padhai lii dhèu ne'e. Ka Na peka dènge Yairus, “Èu baku madha'u, ee! Parcaya mi Ama Lamatua di.” 37 Hèia Yesus la'e dènge ka, tèke eele ana madhutu Na cahag'e. Nèti dhoka Petrus, Yakobis dènge Yohanis. 38 Ropa d'ai èmu Yairus, rèngu rèdhi dhèu jau oob'a-jau oob'a, aa tadèngi cahag'e tangi d'ara pèd'a. 39 Yesus maso asa d'ara, ka Na karèi si, aku Nèngu na, “Nga tao ka miu maruru dènge tangi sèmi ne'e? Ana ne'e madhe boe! Nèngu dhoka bhèj'i di.”

40 Dhèu ètu sèra tadèngi Yesus peka sèmi èèna, ka ra mari pakapengo hèb'a dènge Ne.

Hèia Na pua dhèu sèra kalua aa'i nèti d'ara kama ana dhu madhe èèna. Ka Na paroa ina-ama ana bhèni ne, dènge ana madhutu Na dhèu tèlu sèra, maso asa d'ara. 41 Hèia Yesus kèpe kacui-aai ana dhu madhe ne, ka Na padhai lii pake lii rèngu, lii Aram, aku Nèngu na, “Talita kum!” (Sasoa na, “Ana bhèni! Kèd'i ka!”)

42-43 Kabèdhi laa, ana dhu madhe èèna mamuri hari. Hèia na kèd'i titu, ka na kako. Hèia Yesus peka dènge ina na, aku Nèngu na, “Hia ana ne'e na'a-ninu!”

Dhèu ae ètu sèra dhu rèdhi j'ara dhu j'aj'i ne, ra malaa titu kèna. Hèia Yesus kai si, peka na, “Mage mi peka dènge dhèu èci sa, Ja'a ka dhu pamamuri hari ana ne.”