Lamatua Yesus aj'a, sèna ka baku galaa dhèu
7
“Miu baku galaa dhèu, sèna ka Ama Lamatua baku pasala miu kahèi. 2 Ladhe miu nile dhèu sèmi mia, pe Ama Lamatua nile miu sèmi èèna kahèi. Ladhe miu ige sasala dhèu sèmi mia, bèli-camèd'a Ama Lamatua ige sasala miu sèmi èèna kahèi. 3 Masi ka sasala dhèu ciki oo'e èèna ka, èu bhèlu boe. Te ngaa sasala èu dhu kapai, èu pame'a boe ciki sa. Èci èèna ka dènge èu ladhe mèdhi ahu ca katèd'a ètu d'ara madha angalai èu, te ngaa abhu agarii aae ca laa dhu pa'abhe nare musi madha èu, dhu èu me'a more boe. 4 Nga tao ka èu bani peka na, ‘Angalai! Mai ho ja'a tiu eele ahu nèti d'ara madha èu’. Aa te ngaa èu mesa mu bisa boe mèdhi ngaa-ngaa, lula agarii aae dhu hutu nare musi madha mu. 5 Heeh! Èu ne, mema dhèu dhu padhai lii leo, tao leo! Tao eele uuru ku agarii nèti musi madha èu, heka ladhe mèdhi ahu ca katèd'a ètu d'ara madha angalai mu, sèna ka èu bisa tiu eele ahu ne kèna.a6 Baku aj'a j'ara Lamatua dhu mola-mèci mi dhèu dhu d'èi pahahe dhèu. Lula dhèu sèra nuka sèmi busa pakadhi, dhu ra kabèli mai kadhi hari miu. Rèngu sèra goa sama sèmi hahi kahèi. Ladhe dhèu hia ne mutiara dhu kab'ua, na pusi boe! Te ne'a dhoka j'èli palaho di.”
Lamatua Yesus aj'a-nori, ho baku loe manèngi-mangaj'i
7 “Ladhe miu sabaj'a,
baku loe manèngi mi Lamatua;
te èèna na, Na hia.
Ladhe patangi-tenge;
pe Na pad'elo j'ara.
Ladhe kad'eu taruu babèdho;
pe Na bhoke.
8 Te dhèu aa'i-aa'i dhu loe boe manèngi mi Lamatua,
èèna na ra sèmi rare.
Dhu patangi-tenge,
pe ra abhu.
Dhu kad'eu taruu,
pe Na bhoke èmu.
9 Miu pangee sèku! Ladhe ana manèngi roti, tatu ama na hia boe ne hadhu, si? 10 Do, ladhe ana manèngi i'a, ama na hia boe mege, sina ma? 11 Ama mi ètu sorga, mema d'ara Na hua iia titu kèna! De ladhe dhèu rai-haha dhu bhelu-katub'a sèmi miu, me'a hia mèdha dhu be'a mi ana miu, ngaa hari Ama mi! Tatu Na bagi hia miu ngaa dhu miu manèngi.
12 De, ngaa dhu èu neo dhèu leo tao mi èu, na, èu hud'i tao sèmi èèna kahèi hia nèngu. Lula ne'e ne ka, j'aj'i mi kapua nèti aa'i-aa'i dhu Musa dènge dhèu rèti lii padhai Ama Lamatua dhu peka-padhai karèi nèti uru ka.”b
Lamatua Yesus pakasame j'ara dhu susa aa hèb'a kota dhu kob'o
13 “Ladhe dhèu neo maso sorga, nèngu hud'i maso ku re hèb'a kota dhu kob'o. Te ngaa mage-mage, oo! Abhu kahèi j'ara leo dhu mud'a, aa hèb'a dhu taleo, dhu dhèu ae-ae lasi re èèna. Te j'ara sèmi èèna ka dhu lere dhèu asa naraka, ka ra cèri eele nèti Ama Lamatua. 14 Dhèu dhu neo maso sorga, hud'i madhutu ku j'ara dhu susa, aa maso re hèb'a dhu kob'o. Te, masi ka dhèu ciki di dhu kako re j'ara èèna, te ngaa j'ara dhu kob'o èèna ka, dhu nèti dhèu asa Lamatua.”
Lamatua aj'a dhèu, sèna ka baku tao madhutu dhèu kapod'e-kabèli
15 “Baku pamud'e dènge dhèu dhu tema kapod'e-kabèli, dhu d'èi padedha iisi, peka na, rèngu se dhèu rèti lii padhai Ama Lamatua. Te rèngu tao ngi'u ra be'a nuka sèmi kahib'i-kalèbho. Te ngaa rèngu se dhèu bhelu-katub'a, èci èèna ka dènge busa hui dhu mai kadhi kahib'i-kalèbho. 16 Tasamia ho miu bisa tadhe dhèu dhu kapod'e sèmi sèra? Ladhe la nèti tatao rèngu. Èèna sèmi dhèu ladhe rèdhi hua, hèia tadhe dènge ana aaj'u ne. Hua dhu be'a, mai boe nèti aj'u dhu karehe. 17 Te aj'u dhu be'a ladhe d'ai hua, hua na be'a kahèi. Te ngaa aj'u dhu karehe ladhe na hua, hua na karehe kahèi. 18 Abhu ètu mia, aj'u dhu be'a, hua na karehe, aa aj'u dhu karehe, hua na be'a? 19 Aj'u dhu hua na karehe, tatu ra patue eele, ho core asa d'ara ai.c 20 Sèmi èèna kahèi dènge rèngu dhu rèti lii padhai kapod'e-kabèli sèra. Miu tadhe si nèti tatao ra.”d
Lamatua Yesus lole dhèu dhu ale dhoka kolongara Ama Lamatua ètu hèb'a di
21 “Èèna na abhu dhèu dhu paroa Ja'a, na, ‘Lamatua!’ Te ngaa rèngu dhoka ale ètu hèb'a di. Bèli-camèd'a Ama Lamatua ètu sorga tule eele si. Te dhodhoka dhèu dhu d'èi tao madhutu dad'èi Nèngu di, dhu Na sèmi nare rèngu j'aj'i dhèu unu Na. 22 Pe ropa d'ai èle rai-haha ne, dhèu ae mangaku, peka na, Ja'a ne Lamatua rèngu. Aa dènge lii solo-mako, ra peka na, ‘Lamatua! Ji'i se la'a pakako a'aj'a Lamatua ètu mia-mia, babège nidhu dènge kolongara Lamatua, aa tao tadha-tadha malaa pake koasa nèti Lamatua.’
23 Masi ka rèngu solo-mako Ja'a sèmi èèna, te ngaa èèna na Ja'a peka dènge rèngu, na, ‘Miu se, cee? Ja'a tadhe boe miu, te miu mamuri boe madhutu dad'èi Ama Lamatua. De mi pakaj'èu ka nèti ne'e!”’e
Lamatua Yesus aj'a lula-nèti dhèu dhu d'èlu-mèu, aa dhèu dhu goa
24 “Dhèu dhu mai nanene Ja'a, hèia ra tao madhutu lii padhai Ja'a, rèngu se nuka sèmi dhèu dhu d'èlu-mèu, dhu patitu èmu ra ètu dedha hadhu kapua. 25 Nèbhu boe, ka èj'i aae mai toke èi lala, aa ngèlu aae lèke èmu ne. Te ngaa èmu ne guri boe, lula patitu ètu dedha hadhu kapua.
26 Dhèu dhu mai nanene Ja'a, te ngaa tao boe madhutu lii padhai Ja'a, nèngu ne èci èèna ka dènge dhèu goa dhu patitu èmu na ètu dedha salae. 27 Nèbhu boe, ka èj'i aae mai toke èi lala. Ngèlu aae lèke èmu ne kahèi. Hèia èmu ne guri eele, toke laho teb'o-teb'o.”
Dhèu malaa-maloha lula nanene lii padhai Lamatua Yesus