Dhèu aae nidhu sèku Lamatua Yesus
4
Ropa Yohanis sarani nare Yesus, hèia Yesus la'e, tèke eele loko Yarden. Roh Ama Lamatua bera-bera dènge Ne, ka pakako Ne asa d'ara mamoo èci. 2 Ka Yesus pea ètu èèna toke èpa nguru lod'o. Ètu era ne'e, na'a-ninu boe ngaa-ngaa, ka Na manganga titu kèna. Aa dhèu aae nidhu mai sèku Ne.3 Na peka dènge Yesus, aku nèngu na, “Ladhe Èu ne tare'a Ana Ama Lamatua, Èu dènge koasa. De tao hadhu se j'aj'i roti, ho mu'a si.”
4 Te ngaa Yesus b'ala ne, peka na, “Èu hari! Me'a boe, do? Dhu suri tèke le ètu d'ara Sasuri Ama Lamatua, peka na,
‘Mamuri dhèu rai-haha, mesa boe dhoka nèti nganga'a-nganginu di!”’a
5-6 Èle èèna ka, dhèu aae nidhu nèti hari Yesus asa era èci dhu dedha aae, hèia na paj'uj'u dènge Yesus a'èra dènge koasa paredha aa'i-aa'i ètu rai-haha ne. Hèia na pamako Yesus, na, “A'èra dènge koasa paredha aa'i-aa'i sèra, ètu d'ara kacui-aai ja'a. De ja'a dènge hak ho pangèd'u mi cee èèna ka, sad'i ja'a ko'o. 7 Aa'i-aa'i se, ja'a neo hia mi Èu. Te ngaa sad'i Èu tao ku ca j'ara, heka ja'a hia Èu kèna. Mud'a iiki-iiki! Èu pahaha iisi mi ja'a! Dhoka èèna di.”
8 Te ngaa Yesus dhaa, peka na, “Abhu ètu mia j'ara na sèmi èèna? Te ètu d'ara Sasuri Ama Lamatua, dhu suri, na,
‘Èu dhoka pahaha iisi mi Ama Lamatua di.
Aa èu sogo-tagu dhoka mi Nèngu di.”’b
9 Èle ka, dhèu aae nidhu nèti hari Yesus asa kota Yerusalem. D'ai era ne'e, na paca'e Yesus asa era dhu dedha risi ètu Èmu Kapua Manèngi-Mangaj'i. Ka na peka, “Ladhe tare'a-re'a Èu ne Ana Ama Lamatua, na, ridhu asa haha nèi! 10 Te dhu suri ètu d'ara Sasuri Ama Lamatua, peka na,
‘Pe Ama Lamatua pua ana pajuu Na nèti sorga,
ho mai j'aga Èu.
11 Èèna na ra sibhe Èu,
sèna ka haga Èu goi lèke boe hadhu sa hèi.”’c
12 Te ngaa Yesus b'ala lii nidhu ne, “Èu baku karihu kahadhu dènge Ja'a ne. Lula dhu suri tèke ètu d'ara Sasuri Ama Lamatua, na,
‘Baku sèku Ama Lamatua.”’d
13 Dhèu aae nidhu ne tenge j'ara rupa-rupa ho sèku Yesus, te ngaa tao nare boe. Ka la'e tèke eele Yesus, na mate hari lod'o dhu be'a.
Lamatua Yesus la'e Galilea ho lole Lii Lolo Be'a Ama Lamatua
14 Èle èèna ka, Yesus lèpa hari asa propensi Galilea, te Roh Lamatua dhu Mola-Mèci hia Ne koasa. Nèbhu boe ka dhèu-dhèu ètu d'ara rai èèna, mulai tadhe kolongara Na. 15 Na aj'a-nori dhèu ètu d'ara èmu manèngi-mangaj'i dhèu Yahudi ètu mia-mia. Ka dhèu koa-kio Ne, peka na, “Yesus ne dhu ele madha, nga!”
Dhèu ro'o boe sèmi rare Lamatua Yesus ètu Nasaret
16 Ca tèka, Yesus mai asa rae Na Nasaret. Lèke dènge lod'o manèngi-mangaj'i dhèu Yahudi, dhu ra pangare na ‘sabat’, hèia la'e asa d'ara èmu sabaj'a sèmi dhu tema Na tao. Ka Na kèd'i titu ho neo baca nèti Sasuri Ama Lamatua. 17 Ka ra j'ole hia Ne sasuri nèti baki Yesaya. Hèia Na bhoke tenge ayat, ka Na baca, peka na,
18 “Koasa Roh Ama Lamatua abhu ètu Ja'a.
Nèti èèna ka, Na paj'uj'u Ja'a,
ho peka-padhai Lii Lolo Be'a Ama Lamatua mi dhèu-dhèu dhu unu aad'o.
Nèngu pua le Ja'a mai,
ho lole, na,
dhu ana bèdho, èèna na patalala si;
dhu bèdhu, èèna na bisa rèdhi hari;
dhu lèke ènyi nèti dhèu, èèna na patabuli eele.
19 Te limuri ne d'ai le lod'o Lamatua,
sèna ka pala mamuri mi dhèu unu Na.”e f
20 Baca nare sasuri ne, ka Yesus lulu hari, hèia Na j'ole asa ama dhu nèd'u kasasi, ka Na madhèdi. Dhèu aa'i-aa'i ètu d'ara èmu sabaj'a èèna ladhe patae Ne. 21 Hèia Na peka dènge ra, “Dhu miu tadèngi nèti Sasuri Ama Lamatua deo na, ne'e ne, j'aj'i le!”
22 Ka dhèu sèra mulai padhai lii padedha Yesus, aku rèngu na, “Waa! Ngaa dhu Na padhai lii deo na, be'a titu kèna! Te ngaa Nèngu ne Ana Yusuf, si? Tasamia ka Na bisa sèmi ne'e ne?”
23 Hèia Yesus lole dènge si, “Tatu miu tadèngi le lii dhu peka na, ‘Wee, dote! Puri uuru ku ngi'u èu!’ Miu neo pake lii èèna, ho kabèli hari sa Ja'a, peka na, ‘Nga tao ka Èu tao boe tadha malaa èci hia ji'i ètu ne'e, sèmi dhu Èu tao le ètu kota Kapernaum nèi?’ 24 Mamola na sèmi ne'e: dhèu ro'o boe sèmi rare dhèu rèti lii padhai Ama Lamatua nèti d'ara rae unu na.g 25-26 Tare conto nuka sèmi baki Elia, ca dhèu nèti lii padhai Ama Lamatua. Ca tèka, èj'i mai boe tèlu tèu catenga. Taa èèna, abhu bhèni balu ae ètu Isra'el. Te ngaa Lamatua hia boe Elia ho soru-bara si ètu Isra'el sèra. Lamatua dhoka pua la'e asa ca dhèu bhèni balu ètu rae Sarfat, dhu dètu dènge kota Sidon. Masi ka bhèni ne dhèu Yahudi boe, te ngaa na parcaya koasa Ama Lamatua.h
27 Tare hari conto leo nèti Elisa, dhèu nèti lii padhai Ama Lamatua. Taa èèna, dhèu Yahudi ae dhu lèke èi papèd'a kusta ètu Isra'el. Te ngaa Lamatua pa'èle boe si nèti papèd'a ra. Ama Lamatua dhoka pua Elisa la'e puri-pa'èle dhèu kusta èci, ngara na Naaman, masi ka nèngu ne dhèu Siria, dhèu Yahudi boe. Te ngaa na parcaya koasa Ama Lamatua.”i
28 Ropa ra tadèngi lii padhai lii Yesus ne, hèia aa'i-aa'i ra nasa titu kèna dènge Ne. 29 Ka ra kèd'i aa'i-aa'i, ra babège eele Ne nèti d'ara èmu sabaj'a èèna. Hèia ra nuni rèti Ne asa karasa rae, ho neo tule Ne nèti dedha tèbhi ètu èèna, asa haha la'e. 30 Te ngaa Na kako asa li'u la'e re talora aae rèngu, ka tèke eele si ètu era èèna.
Lamatua Yesus babège eele nidhu nèti dhèu èci
31 Èle èèna ka, Yesus puru la'e asa kota Kapernaum ètu sebhe dano Galilea. D'ai lod'o-lod'o sabaj'a, Na aj'a-nori dhèu ètu d'ara èmu manèngi-mangaj'i. 32 Dhèu sèra malaa ladhe ra nanene lii padhai Na, te ne'a mèu isi lii holo-nori sèra.j
33 Ca tèka, ropa Yesus aj'a-nori ètu d'ara èmu manèngi-mangaj'i, abhu ca dhèu dhu nidhu tao, na pa'oo-parodha, peka na, 34 “Ee! Yesus, Dhèu Nasaret! Èu neo tao ngaa mi ji'i? Èu mai sèna ka palaho ji'i, do? Ji'i se tadhe Èu. Èu ne, Dhèu Mola, dhu uru èèna Ama Lamatua pajaji tèke ho hia mai.”
35 Te ngaa Yesus jèke ne, peka na, “Rèno laa! Hutu hèb'a èu na! Kalua ka nèti dhèu ne'e!” Cag'ag'a laa, nidhu ded'e kalabhe dhèu ne asa rai, ètu talora aae dhèu sèra. Ropa pabèbhe nare, hèia nidhu ne kalua tèke eele aa papèd'a boe isi dhèu ne hèi.
36 Dhèu aa'i-aa'i malaa-maloha, ka ra peka na, “Ira ii! Lii padhai Dhèu ne'e, dènge koasa kapai bia! Toke nidhu madhutu paredha Na kahèi, ka kalua nèti dhèu!” 37 Hèia lii lolo lula-nèti Yesus pale-lème rai èèna aa'i-aa'i.
Lamatua Yesus pa'èle papèd'a ina dhèu èmu Petrus, dènge papèd'a dhèu-dhèu leo
38 Lod'o rèngu kalua nèti èmu sabaj'a, Yesus la'e asa èmu dhèu èci, ngara na Simon.k Lod'o èèna, teto na dhu pèd'a maringi-sagoro isi pana bia. Hèia ra manèngi Yesus, peka na, “Ama! Puri-pa'èle ku bhèni heka ne, laa!” 39 Ka Yesus la'e titu ètu sebhe koi, ka puri papèd'a bhèni heka ne. Cag'ag'a laa, èi papèd'a na ele dènge ka. Hèia na kèd'i la'e lalau nganga'a hia si ra'a-rinu.
40 Ètu d'ara lod'o nihia èèna kahèi, ropa lod'o oe cèna, dhèu lere rèti dhèu pèd'a ae-ae mai asa Yesus. Èi papèd'a ra rupa-rupa. Hèia Na bane ai mi dhèu pèd'a se'e, ka aa'i-aa'i ra èle nèti papèd'a-tarègu ra. 41 Nèti dhèu pèd'a se abhu kahèi dhu nidhu tao. Hèia Yesus paredha nidhu se, sèna ka kalua nèti dhèu sèra. Ra rai kalua dènge lii taraa, peka na, “Èu ne, Ana Ama Lamatua!” Te nidhu se re'a, na, Nèngu ne Kristus, dhu Ama Lamatua pajaji karèi nèti uru ka, ho hia mai. Nèti èèna ka, Yesus kai si sèna ka bisa boe ra padhai ca hèb'a sa, lula-nèti Nèngu.
Lamatua Yesus la'e lole Lii Lolo Be'a ètu èmu-èmu sabaj'a
42 Asa bèli d'ara oe mèu sa, Yesus kèd'i, ka la'e asa era dhu kaliu èci ètu li'u kota. Hèia dhèu tenge Ne asa mia-mia. Ropa paraga dènge Ne, ka ra pamako Ne, aku rèngu na, “Ama pea ka dènge ji'i laa! Lamu iia ka asa era leo!”
43 Te ngaa Na dhaa, aku Nèngu na, “Ja'a hud'i laku asa rae-rae leo, ho peka-padhai Lii Lolo Be'a nèti paredha Ama Lamatua. Te Ama Lamatua pua Ja'a mai ne, sèna ka pakako sasab'a èèna.”
44 Hèia Na kako nèti rae èci asa rae leo, ho aj'a-nori dhèu ètu d'ara èmu-èmu sabaj'a ètu propensi Yudea.