3 “Dhèu kasia, rèngu oto,

11 Ladhe dhèu leo paj'èra miu, lula miu madhutu Ja'a, miu oto kahèi. Ladhe dhèu padhai kaked'u miu, aa lole pa'ele iie kolongara miu, miu oto kahèi.^f 12 Masi ka sèmi èèna, te ngaa miu hud'i pakasee iisi aa pakarej'e d'ara, lula Ama Lamatua dhu sadia nare le pala dhu ae hia miu ètu sorga. Te ngaa sanèd'e! Mesa boe miu di dhu dui j'aj'èra sèmi èèna, te lod'o uru sèra dhèu dhu paj'èra le kahèi dhèu rèti lii padhai Ama Lamatua.”^g

13 “Ladhe èdhi d'èi sèna ka nganga'a j'aj'i be'a, na, èdhi tao ku masi. Sèmi èèna kahèi dènge dhèu dhu mamuri ètu rai-haha ne, rèngu parluu miu. Te ngaa ladhe masi sèro heka, gaguna na, ngaa? Dhoka core eele di ètu j'ara, ho dhèu j'èli ne.^h

14 Miu hud'i mamuri ku sèmi labhu kahèi, sèna ka dhèu ae bisa ladhe rèdhi miu dènge be'a. Miu hud'i heo lo'a-lo'a ku, nuka sèmi kota ètu kolo ledhe, dhu dhèu aa'i-aa'i ladhe rèdhi ne.ⁱ 15 Ladhe dhèu paheo labhu iiki, ra saguru boe ne dènge èru rai, te ngaa ra padhèdi labhu ne ètu era dedha, ho pasaraa aa'i d'ara èmu.^j 16 Miu hud'i mamuri ku sèmi èèna. Mamuri miu hud'i saraa ku, sèna ka dhèu leo ladhe rèdhi mamuri miu dhu be'a. Ropa dhèu ladhe rèdhi mamuri miu sèmi èèna, ra ded'e padedha-dedha kolongara Ama Lamatua, peka na, ‘Ira ii! Ama miu ètu sorga, kapai titu kèna, nga!”’^k

17 “Mage miu pangee na, mamai Ja'a asa rai-haha ne, sèna ka tao eele atora Ama Lamatua dhu pangèd'u mi Musa. Aa baku pangee na, Ja'a pusi-pahae boe dènge ngaa dhu uru èèna, dhèu rèti lii padhai Ama Lamatua peka tèke le. Te mamai Ja'a ne, sèna ka pamèci j'ara aa'i-aa'i, nuka sèmi mia dhu ra peka tèke. 18 Nèti èèna ka, nanene paie-iie! Liru dènge rai-haha bisa mèka laho aa'i, ladhe aa'i-aa'i j'aj'i mèka madhutu atora Ama Lamatua. Masi ka ca katèd'a èèna ka, bisa boe ele nèti atora se.^l 19 Nèti dhèu unu Ama Lamatua aa'i-aa'i, ladhe abhu dhu sisu atora Ama Lamatua, lula na pangee, na, ‘Atora ne, ana iiki-iiki di, de gaguna na aad'o!’ Hèia na aj'a sèmi èèna kahèi mi dhèu leo, pe Ama Lamatua ètu sorga, tao ne j'aj'i mi ca dhèu ana iiki. Te ngaa bagi mi dhèu dhu tao madhutu aa'i atora Ama Lamatua, hèia na aj'a-nori dhèu leo sèmi èèna, bèli-camèd'a Ama Lamatua pakab'ua ne. 20 Parcaya la Ja'a! Miu hud'i mamuri mola, risi nèti mese agama dènge dhèu partei agama Parisi sèra. Ladhe aad'o, na, miu bisa boe j'aj'i dhèu unu Ama Lamatua.”

21 “Miu dhu me'a le atora Musa dhu hia mi bèi-baki èdhi, peka na, ‘Baku pamadhe dhèu, te dhèu cee dhu pamadhe dhèu nèngu lèke huku.’^m 22 Te ngaa Ja'a peka dènge miu sèmi ne'e: baku panasa, te dhèu cee dhu nasa dènge a'ari na, èèna na nèngu lèke huku. Dhèu dhu jèke a'ari na, ka peka na, ‘Èu bod'o kabao!’ pe nèngu la'e dhaa asa dhèu heka-dhèu heka agama. Aa dhèu cee dhu jèke a'ari na, ‘Goa, ee!’ nèngu lèke huku ètu ai naraka.

23 De ladhe èu dhu mèti mèdha persembahan hia Ama Lamatua, te ngaa èu sanèd'e, na, abhu a'ari dhu nasa era dènge èu, 24 tèke eele uuru ku mèdha persembahan sèra. Hèia lamu padame ku dènge a'ari mu, èle, na heka mai hia persembahan se asa Ama Lamatua kèna.

25 Ladhe ca dhèu neo tao lii langu dènge èu, be'a risi lamu lai-lai ho padame dènge ne. Ladhe aad'o, dhèu ne nèti èu asa hakim. Hèia hakim saraka èu sa polisi, ka ra pamaso èu asa d'ara bèdho. 26 Ja'a pasanèd'e tare'a-re'a mi èu ne! Èèna na èu pea taruu ètu d'ara bèdho, toke b'ae aa'i mèu-mèu kèlu-g'ètu èu sèra.”

27 “Miu dhu me'a le atora Musa, dhu peka na, ‘Baku bersina.’ⁿ 28 Te ngaa Ja'a neo peka na, sèmi ne'e: dhèu dhu ladhe nèdhi dhèu bhèni èci, hèia d'ara na neo j'unu pa'èci dènge ne, na, dhèu mone ne bersina le dènge bhèni ne ètu d'ara na. 29 Ladhe èu tao sala pake musi madha g'ana èu, na, ed'o eele ne. Te be'a risi èu maso sorga dènge musi madha cabèka di, aa baku ra pèci mu asa d'ara ai naraka dènge musi madha dua-dua.^o 30 Aa ladhe èu tao sala dènge kacui-aai g'ana èu, poro eele kacui-aai ne. Te be'a risi èu maso sorga dènge kacui-aai cabèka di, aa baku ra pèci mu asa d'ara ai naraka dènge kacui-aai dhu kateme iisi.”^p

31 “Miu dhu me'a le atora Musa, na, ‘Dhèu dhu pa'ia dènge dhèu èmu-kamali na, nèngu hud'i hia ku sasuri pa'ia mi bhèni èèna.’^q 32 Te ngaa Ja'a peka sèmi ne'e: ladhe abhu dhèu dhu ia eele dhèu èmu na, te ngaa bhèni ne tao nèdhi boe j'ara makae, hèia bhèni ne leo hari èmu, na, dhèu èmu uuru èèna ka dhu tao nèngu j'aj'i bersina. Aa ladhe abhu dhèu mone dhu leo nare bhèni dhu dhèu èmu na ia eele, na, rèngu dua ra bersina kahèi.”^r

33 “Miu dhu me'a le atora Musa dhu na hia mi bèi-baki èdhi, peka na, ‘Ladhe èu pajaji pake lii soo-subha, dhu ale kolongara Ama Lamatua, na, èu dhu pa'èki le dènge soo-subha èèna.’^s 34 Te ngaa Ja'a peka sèmi ne'e: ladhe èu neo pajaji, na, mage mu j'oka subha. Baku subha dènge ngara sorga, lula sorga èèna era pea Ama Lamatua.^t 35 Mage subha pake ngara rai-haha, lula rai-haha ne, era bane haga Ama Lamatua. Aa mage subha pake ngara Yerusalem, lula Yerusalem èèna, kota nèti Dhèu Aae Kapai.^u 36 Baku subha pake ngara kab'a kètu miu. Te miu dènge boe koasa ho paredha rèu kètu miu, sèna ka ca loa sa j'aj'i mèdhi do j'aj'i pudhi. 37 De ladhe miu neo pajaji, dhu peka oo, na, peka la ‘oo’ di. Te ngaa ladhe aad'o, na, peka la, ‘aad'o’ di. Ladhe miu peka risi nèti èèna, sèra sa j'aj'aj'i nèti nidhu.”

38 “Miu dhu me'a le atora Musa, dhu peka na, ‘Ladhe dhèu cee dhu pa'ele iie musi madha miu, na, pa'ele iie kahèi musi madha na. Aa ladhe abhu dhèu dhu pakabhui eele ngutu èu, na, pakabhui eele ngutu na kahèi.’^v 39 Te ngaa Ja'a peka dènge miu sèmi ne'e: baku b'ala bhabhelu dènge bhabhelu. Ladhe dhèu tèb'e ripi èu cabèka, na hud'i laa, na tèb'e hari ripi dhu leo. 40 Ladhe dhèu neo tenge lii langu dènge èu, ho neo nare kodho èu, na, hia ne kodho pana èu kahèi. 41 Ladhe sordad'u ca dhèu laka-seti èu ho pasae mèdha na kako d'ai ca kilometer, na, èu pasae mèti kaj'èu na toke dua kilometer. 42 Ladhe dhèu neo manèngi nare mèdha èu èci, na, hia la. Aa ladhe dhèu neo pija mèdha èu, na, hia la.”

43 “Miu tadèngi le, dhu peka na, ‘Sue la a'ari èu, aa nasa la dènge dhèu dhu nasa dènge èu.’^w 44 Te ngaa Ja'a peka sèmi ne'e: èu hud'i sue ku dhèu dhu nasa dènge èu, aa manèngi ho Lamatua hia mèngi-nale mi dhèu dhu paj'èra èu. 45 Ladhe èu tao sèmi èèna, èu pad'elo, na, èu ana Ama ètu sorga. Lula Nèngu ka tao madha lod'o hia dhèu dhu be'a, dènge dhèu dhu bhelu. Na papuru èj'i hia dhèu dhu tao madhutu paredha Na, aa mi dhèu dhu lab'a paredha Na kahèi. 46 De ladhe èu sue dhoka dhèu dhu sue èu, èu ngee na Ama Lamatua hud'i b'ala hia èu mèngi-nale, do? Aad'o! Te dhèu bhelu kahèi ne'a sue angalai na, dhu sue nèngu. 47 De ladhe èu me'a dhoka hia lii maho'o mi angalai èu, na, kolo-karisi na ngaa? Te dhèu dhu parcaya boe Ama Lamatua, re'a ad'u-ue j'ara sèmi èèna kahèi. 48 De sanèd'e, ee! Ama mu ètu sorga sue dhèu aa'i-aa'i. De èu hud'i tao madhutu ku sèmi èèna kahèi!”^x