Dhèu aae nidhu dadugu-rariu Lamatua Yesus
4
Èle ka, Roh Ama Lamatua nèti Yesus asa d'ara mamoo, sèna ka dhèu aae nidhu sèku Ne.a 2 Ètu era ne'e, Yesus na'a-ninu boe èpa nguru lod'o mèu-mèda. Hèia Na manganga titu kèna. 3 Ropa Na manganga sèmi èèna, hèia dhèu aae nidhu mai sèku Ne, peka na, “Èu ne tare'a-re'a Ana Ama Lamatua, do? Ladhe tare'a, na, paredha hadhu se, ho j'aj'i nganga'a.”4 Te ngaa Yesus dhaa, na, “Dhu suri ètu d'ara Sasuri Mola-Mèci Ama Lamatua, peka na:
‘Dhèu rai-haha mamuri mesa boe nèti nganga'a di.
Te ngaa rèngu hud'i nanene ku Lii Holo-Nori Ama Lamatua,
aa tao madhutu dad'èi Na kahèi.”’b
5 Ka dhèu aae nidhu nèti Yesus asa kota Yerusalem, kota Lamatua dhu mola-mèci èèna. Èle ka, na nèti Yesus asa era dhu dedha risi ètu Èmu Kapua Manèngi-Mangaj'i. 6 Hèia nidhu ne, peka, “Ladhe Èu ne tare'a-re'a Ana Ama Lamatua, Èu ridhu sèku asa haha nèi. Te dhu suri tèke ètu d'ara Sasuri Mola-Mèci Ama Lamatua, na,
‘Pe Ama Lamatua pua ana pajuu nèti sorga,
sèna ka j'aga Èu.’
Aa ètu d'ara Sasuri Mola-Mèci Ama Lamatua, dhu suri kahèi,
‘Pe ra kanata ai ra, ho sibhe Èu,
sèna ka ngi'u Èu pèd'a boe, aa haga Èu goi lèke boe hadhu sa hèi.”’c
7 Te ngaa Yesus b'ala, aku Nèngu na, “Abhu kahèi dhu suri tèke ètu d'ara Sasuri Mola-Mèci Ama Lamatua, dhu peka na,
‘Ama Lamatua èèna, Lamatua èu.
De èu baku pua Ne pake koasa Na, sèna ka pad'elo bukti, peka na,
Nèngu èèna, tare'a-re'a Ama Lamatua.”’d
8 Èle èèna ka, dhèu aae nidhu ne nèti hari Yesus asa kolo ledhe dhu dedha aae. Hèia na pad'elo aa'i saraga dènge babe'a negara aa'i-aa'i ètu rai-haha ne. 9 Ropa na pad'elo nare, hèia dhèu aae nidhu ne peka, aku nèngu na, “Sad'i Èu patitu kètu urutuu, sèna ka pahaha iisi mi ja'a, pe ja'a hia aa'i se'e se mi Èu.”
10 Te ngaa Yesus jèke ne, peka na, “He, nidhu! Pakaj'èu nèti era ne'e ne! Te Sasuri Mola-Mèci Ama Lamatua, suri na,
‘Èu hud'i pahaha iisi mi Ama Lamatua,
aa èu ne hud'i sab'a ku dhoka hia Nèngu di.”’e
11 Ropa dhèu aae nidhu tadèngi lii ne, hèia na tèke eele Yesus. Te ngaa ana pajuu Ama Lamatua nèti sorga mai uri Ne.
Lamatua Yesus mulai aj'a-nori dhèu ètu Galilea
12 Tèu èèna, dhèu aae Herodes pamaso Yohanis tuka sarani asa d'ara èmu bèdho. Ropa Yesus tadèngi, hèia Na lèpa asa Galilea.f 13 La'e asa rae Na Nasaret, èle ka la'e taruu pea ètu rae Kapernaum. Rae èèna ètu sebhe dano Galilea, ètu rai Sebulon dènge Naftali.g 14 Dènge j'ara ne, Na tao madhutu ngaa dhu dhèu nèti lii padhai Ama Lamatua, ngara na Yesaya, suri tèke, peka na,
15 “Rai Sebulon dènge rai Naftali
dhu padètu dènge dano Galilea ètu sebhe haa loko Yarden.
Dhèu Yahudi boe pea ètu era sèra kahèi.
16 Rèngu dhu mamuri ètu d'ara maroga,
te ngaa limuri ne, rèdhi le saraa.
Aa saraa ne heo le
palème mi dhèu aa'i-aa'i dhu tadhe mèka Ama Lamatua.”h
17 Karèi nèti lod'o èèna, Yesus mulai aj'a-nori dhèu, peka na, “Miu hud'i soro kabodho aa tèke eele sasala-sasigo miu, ho mamuri ka dènge mola-mèci! Te limuri ne dhèu aa'i-aa'i bisa le j'aj'i dhèu unu Ama Lamatua.”i
Lamatua Yesus paroa nare dhèu sab'a dhasi dhèu èpa ho madhutu Ne
18 Ca tèka, Yesus kako re sebhe dano Galilea. Na paraga dènge dhèu dua dhu pa'a'ari. Èci ngara na Simon, dhu tema paroa ne, Petrus. Aa ari na, Anderias. Dua ra dhu pèku i'a ètu dano Galilea, lula dua ra dhèu sab'a dhasi. 19 Hèia Yesus paroa si, aku Nèngu na, “Mai ku madhutu Ja'a! Miu biasa tenge i'a, te ngaa limuri ne Ja'a neo aj'a miu ho j'aj'i tuka tenge dhèu.” 20 Ropa ra tadèngi rare, hèia dua ra tèke eele dènge ka pèku ra, lasi madhutu Yesus.
21 Èle ka, Yesus kako hari ciki, hèia ladhe nèdhi ana Sabadeus, dhèu dua. A'a, ngara na Yakobis, aa ari na, Yohanis. Dua ra dhu lalau paie pèku ètu dedha koha sama-sama dènge ama ra. Hèia Yesus paroa dua ra, sèna ka madhutu Ne. 22 Ropa ra tadèngi rare, hèia ra tèke eele ama dènge koha ra, lasi madhutu Ne.
Lamatua Yesus aj'a-nori dhèu, aa puri-pa'èle dhèu pèd'a
23 Èle ka, Yesus si kako palème propensi Galilea, ho Na aj'a-nori dhèu ètu d'ara èmu sabaj'a dhèu Yahudi. Na aj'a Lii Lolo Be'a Ama Lamatua, aa Na peka j'ara-j'ara tasamia, sèna ka dhèu bisa madhutu paredha Ama Lamatua. Aa Na puri-pa'èle kahèi dhèu nèti rupa-rupa papèd'a-tarègu.j 24 Nèbhu boe ka, tatao Yesus ne dhèu lolo palème toke d'ai propensi Siria aa'i-aa'i. Hèia dhèu rèti dhèu ra dhu lèke rupa-rupa papèd'a asa Yesus. Dhèu se rèti kahèi dhèu dhu nidhu tao, dhu huj'u kahib'i, dènge dhu karuku. Ka Na puri-pa'èle aa'i si. 25 Lod'o èèna, dhèu ae-ae mai madhutu Ne. Dhèu se mai nèti propensi Galilea, aa nèti rai Canguru Kota, dhu ra peka na, Dekapolis. Dhèu cahag'e mai nèti kota Yerusalem, nèti propensi Yudea, aa nèti cabèka dhimu loko Yarden.