Kapala urusan dhu ne'a pa'uri
16
Ka Yesus hia lii upama èci mi ana madhutu Na, peka na, “Dhèu kaja ca dhèu dhu ded'e dhèu sab'a na èci j'aj'i kapala urusan. Te ngaa nèbhu-nèbhu, na tadèngi dhèu palolo, peka na, kapala urusan ne mulai kapod'e-kabèli ka parugi nèngu. 2 Hèia dhèu kaja ne paroa kapala urusan na, ka peka dènge ne, ‘Èu ne, tasamia? Ja'a tadèngi, na, èu kapod'e mèdha-panyau ja'a. De lamu suri ku ngaa dhu èu ad'u-ue ètu d'ara sasab'a èu, ho ja'a parisa ku. Ladhe parisa kore, ja'a kalua eele èu.’3 Ropa na tadèngi nare, hèia kapala urusan ne mulai pajiko, na, ‘Ja'a ne j'èra kèna! Ja'a neo sab'a ngaa hari? Pare rai, ja'a èra boe. J'aj'i dhèu hèb'a mènyi, ja'a makae. 4 Ladhe ja'a sab'a heka ètu ne'e, ja'a hud'i tenge j'ara ku, sèna ka dhèu leo bisa hari sèmi rare ja'a ho sab'a.’
5 Nèti èèna ka, na paroa nare aa'i dhèu dhu pakèlu lamatua na. Na karèi dhèu uru, aku nèngu na, ‘Ee! Kèlu èu ca ngaa ètu lamatua ja'a?’
6 Dhèu ne dhaa, peka na, ‘Ja'a dhu pakèlu èi lèngi saitun èpa riho liter.’a
Hèia kapala urusan ne peka, na, ‘Tare'a. Sasuri pakèlu èu ka ne'e. Ciu eele ka, madhèdi ho suri gati sasuri kèlu dhu hiu, peka na, kèlu èu dua riho liter di.’
7 Ka karèi dhèu pakèlu ka dua, peka na, ‘Aa èu hari, kèlu ca ngaa?’
Ka dhèu ne dhaa, na, ‘Ja'a pakèlu are, cariho karo.’b
Hèia kapala urusan ne peka, na, ‘Ciu eele sasuri dhui èèna, ho suri dhu hiu hari, peka na, kèlu èu, aru ngasu karo di.’
8 Na tao sèmi ne'e ka, toke lamatua na ne'a tatao nèngu. Te ngaa lamatua ne hud'i mangaku, na, dhèu kapala urusan dhu bhelu ne mema mèu kapod'e-kabèli.
De Ja'a lolo lii upama ne, sèna ka miu me'a, na, ladhe pasoro dènge dhèu parcaya, dhèu dhu parcaya boe d'èlu-mèu risi tenge j'ara ho pa'oto ngi'u ra ètu talora aae kabarai limuri ne.
9 Miu ngee sèku. Masi ka dhèu rai-haha ne karihu kaj'alu re mèdha-panyau ra, te ngaa be'a risi miu pake mèdha-panyau miu sèra, ho soru-bara dhèu. Dènge j'ara sèmi èèna, miu abhu angalai ae. Masi ka mèdha se èle, te ngaa bèli-camèd'a Lamatua tao tèke era hia miu ètu sorga.
10 Ladhe dhèu mola ètu j'ara dhu ana iiki, tatu na mola kahèi ètu j'ara-j'ara dhu kapai. Te ngaa ladhe dhèu mèu kapod'e ètu j'ara dhu ana iiki, tatu na kapod'e kahèi ètu j'ara dhu kapai. 11 Ladhe dhèu parcaya heka miu, ho uri mèdha-panyau ètu j'ara-j'ara dhu ana iiki ètu rai-haha ne, tasamia ka Lamatua parcaya miu ètu j'ara-j'ara dhu kapai? 12 Ladhe miu bisa boe uri mèdha-panyau dhèu leo, na, dhèu cee ka dhu bani ho hia miu mèdha-panyau ra?
13 Dhèu sab'a èci bisa boe nanene dua lamatua. Te aad'o na, nèngu d'èi boe èci, aa sue èci. Nèngu d'ara kateme dènge ca dhèu, te ngaa pusi boe dènge èci. Sèmi èèna kahèi dènge miu. Te dhèu bisa boe sue Ama Lamatua palere dènge sue doi-dhari.”c
Lamatua Yesus padhai lii nèti doi-dhari, nèti Lii Lolo Be'a, aa nèti pa'ia-pa'ela
14 Lod'o èèna, abhu dhèu Parisi pèri-pèri dhu nanene lii padhai Yesus deo na. Ka ra sasei Ne, lula rèngu se dhèu manga'a doi-dhari. 15 Te ngaa Yesus peka dènge si, “Masi ka miu pamèu iisi ètu madha dhèu, te ngaa Ama Lamatua ne'a d'ara bhelu miu. Abhu j'ara ae dhu dhèu rai-haha ded'e padedha-dedha, te ngaa Ama Lamatua peka na, j'ara sèra karehe, aa dhu madenge dènge rèngu.
16 Toke mamai Yohanis tuka sarani, èdhi dhèu Yahudi muri madhutu atora nèti baki Musa aa nèti dhèu rèti lii padhai Lamatua. Te ngaa limuri ne, Lii Lolo Be'a nèti Lamatua pale-lème le ètu mia-mia. Dhèu ae dhu tenge le j'ara, sèna ka ra mamuri madhutu dad'èi Lamatua.d 17 Masi ka dedha-liru dènge rai-haha ne ele, te ngaa Atora nèti Ama Lamatua ciki sa, ele boe. Ca katèd'a sa ele boe hèi!e
18 Dhèu dhu pa'ia-pa'ela dènge dhèu èmu na, aa na madhèdi hari dènge bhèni leo, nèngu bersina. Aa dhèu dhu leo dènge bhèni dhu pa'ia-pa'ela, nèngu bersina kahèi.”f
Lii lolo dhèu kaja dènge Lasarus
19 Ka Yesus lole tabha hari, peka na, “Abhu dhèu kaja ca dhèu. Nèngu d'èi pake mèdha-papake dhu be'a-be'a, tao nèti bèla alus. Mèu-mèda na'a-ninu nganga'a dhu be'a hua, aa karae taruu. 20 Ètu kota ne'e, abhu kahèi ca dhèu dhu dènge boe ngaa-ngaa. Ngara na, Lasarus. Ngi'u na dhu pènu dènge kamèu. Bèli-bèli angalai na rèti pamadhèdi ne ètu hèb'a tedhe dhèu kaja èèna. 21 Na sanao teko-teko abhu kaha'i nganga'a nèti dhèu kaja ne, sèna ka bisa na'a, te ngaa na abhu boe ngaa-ngaa. Dhoka busa di mai, ho j'ore nana kamèu na.
22 Nèbhu boe ka, Lasarus madhe. Hèia ana pajuu Ama Lamatua mai nèti sorga, ka rèti lasi pamadhèdi ne ètu baboa Abraham.
Aa nèbhu boe ka, dhèu kaja ne madhe kahèi, ka dhèu ded'e lasi padhane. 23 Te ngaa dhèu kaja ne maso boe sorga. Nèngu maso asa d'ara naraka, sama-sama dènge dhèu-dhèu leo dhu madhe le. Ètu era nèi, dhèu kaja ne abhu j'aj'èra taa-taa. Ca tèka na boti kètu, ka ladhe nèdhi Lasarus madhèdi ètu baboa baki Abraham. 24 Hèia na pa'oo, peka na, ‘Baki Abraham, ee! Sue ku ja'a laa! Pua ku Lasarus cèb'u kolo ai na asa d'ara èi, sèna ka mai pabasa ku kolo he'o ja'a ne. Te ja'a j'èra titu kèna ètu d'ara ai naraka ne!’
25 Te ngaa Abraham dhaa, peka na, ‘Ana, ee! Sanèd'e ku! Uru èèna lod'o èu mamuri era ètu rai-haha nèi, èu abhu le aa'i-aa'i dhu be'a. Te ngaa Lasarus ne, unu dhodhoka sasusa di. Ka limuri ne, Lamatua pakarej'e ne ètu ne'e, te ngaa èu pasae more j'aj'èra. 26 Risi-risi hari, ètu talora aae èu dènge ji'i, Lamatua tao tèke loe aae èci dhu taleo dènge marèma. De dhèu nèti ne'e bisa boe dhiu asa era èèna, aa dhèu nèti èèna bisa boe pège sa ne'e mai.’
27 Hèia dhèu kaja ne pamako hari, aku nèngu na, ‘Ladhe sèmi èèna, baki Abraham pua Lasarus la'e asa èmu ama ku. 28 Te ja'a ne dènge ari dhèu mone, dhèu lèmi era. Sèna ka Lasarus la'e pasanèd'e si, ho ra lèpa ka asa Lamatua. Masi ka lod'o d'ai ra madhe, rèngu maso ia ka asa era j'aj'èra ne.’
29 Te ngaa Abraham b'ala ne, ‘Ama Lamatua hia le rèngu sasuri nèti baki Musa dènge dhèu rèti lii padhai Na. Ari mu si, bisa baca pahari-pahari ho re'a dad'èi Lamatua.’
30 Te ngaa dhèu kaja ne pasisu, peka na, ‘Baki Abraham, ee! Èèna dhae d'ai mèka. Rèngu sèi pahae boe Lii Holo-Nori Ama Lamatua! Hud'i abhu ku ca dhèu nèti talora dhèu madhe la'e asa rèngu, heka rèngu ele-ho'a, aa neo nanene kèna.’
31 Te ngaa Abraham dhaa, peka na, ‘Ladhe rèngu sèi ro'o boe nanene lii holo-nori nèti Musa dènge nèti dhèu rèti lii padhai Lamatua, na, masi ka dhèu madhe bhodho nèti d'ara ro'a ra, ho padhai lii dènge rèngu èèna ka, rèngu ro'o boe nanene.”’