Dhèu Parisi tenge j'ara ho pamanahu Lamatua Yesus lula-nèti j'ara pa'ia-pa'ela
19
Ropa Yesus aj'a nare aa'i j'ara sèra, hèia la'e tèke eele Galilea asa propensi Yudea, ètu cabèka loko Yarden. 2 Dhèu ae ka dhu madhutu Ne, ka Na puri-pa'èle dhèu-dhèu pèd'a ètu nèi.3 Abhu pèri-pèri dhèu Parisi dhu madhutu kahèi, dhu neo pamanahu Ne. Ka ra karèi Yesus, peka na, “Ama! Madhutu atora agama èdhi, ladhe dhèu mone leo le èmu, bisa ia eele dhèu èmu na, sad'i na abhu j'ara dhu la'e asa pa'ie-pa'ela. Sèmi èèna, do?”
4 Te ngaa Yesus b'ala si, na “Miu se dhu me'a mèu agama. Te ngaa tasamia ka miu me'a boe isi Sasuri Mola-Mèci Ama Lamatua? Te ètu d'ara sasuri nèti lii lolo uru tèka, dhu suri peka na, ‘Ama Lamatua paj'aj'i dhèu rai-haha, dhèu mone dènge dhèu bhèni.’a 5 Aa dhu suri kahèi, peka na,
‘Nèti èèna ka, dhèu mone hud'i tèke eele ina-ama na,
sèna ka la'e mamuri d'ara èci dènge dhèu èmu-kamali na,
te dua ra dhu j'aj'i le èci.’b
6 Nèti èèna ka, ladhe Ama Lamatua unu Na dhu hia dua ra j'aj'i le èci, na, dhèu rai-haha baku pacèri si hari!”
7 Ropa tadèngi rare Yesus peka sèmi èèna, dhèu Parisi se karèi hari Ne, peka na, “Ladhe sèmi èèna, nga tao ka Musa peka na, dhèu bisa pa'ia-pa'ela, sad'i nèngu tao uuru ku sasuri pa'ia hia dhèu èmu na?”c
8 Hèia Yesus dhaa, aku Nèngu na, “Musa soro tèke bèi-baki miu pa'ia-pa'ela dènge dhèu èmu-kamali ra, lula rèngu sèra kètu hadhu èci èèna ka dènge miu! Te ngaa lod'o Ama Lamatua paj'aj'i rai-haha ne, dad'èi Na sèmi boe èèna. 9 Nèti èèna ka, Ja'a pasanèd'e mema miu, ee! Ladhe bhèni ad'u uuru madha j'ara makae, dhèu èmu na bisa ia eele ne. Te ngaa ladhe ia eele bhèni ne dhu ad'u boe j'ara makae, hèia dhèu mone na leo hari dènge bhèni leo, nèngu ne tao le j'ara makae!”d
10 Ropa tadèngi lii ne'e, hèia ana madhutu Na sèra, peka na, “Ladhe sèmi èèna, be'a risi baku leo-èmu.”
11 Hèia Yesus b'ala si, aku Nèngu na, “Dhèu ae ka dhu ro'o boe sèmi rare lii padhai lii Ja'a ne. Dhodhoka dhèu dhu Ama Lamatua hag'e nare si. 12 Te abhu dhèu dhu leo boe èmu, lula karèi nèti rara iisi ne, nèngu sèmi èèna ka. Abhu kahèi dhu leo boe èmu, lula dhèu tao ne sèmi èèna. Aa abhu kahèi dhu no'o boe leo-èmu, lula na neo pakako sasab'a Ama Lamatua di. Dhèu dhu re'a mèu a'aj'a ne, hud'i laa nèngu sèmi dènge be'a.”
Lamatua Yesus hia lii mèngi-nale mi ana iiki sèra
13 Lod'o èèna, dhèu sa'u rèti ana-ana ra asa Yesus, sèna ka Yesus tao kacui-aai Na mi rèngu, aa dènge hia lii mèngi-nale. Te ngaa ana madhutu Na kai dhèu se. 14 Hèia Yesus nasa dènge ana madhutu Na, ka Na lii, aku Nèngu na, “Hud'i laa ana se mai asa Ja'a! Baku bhabhae si! Te dhèu dhu sèmi rèngu se'e ka, dhu j'aj'i dhèu unu Ama Lamatua.”
15 Èle èèna ka Yesus tao kacui-aai Na mi ana se, aa Na manèngi ho Ama Lamatua hia si mèngi-nale. Èle, hèia Yesus pakèd'i la'e, tèke eele era èèna.
Dhèu kaja tenge j'ara, sèna ka mamuri taruu dènge Ama Lamatua
16 Ca tèke, dhèu èci mai karèi Yesus, peka na, “Ama Mese! Ja'a hud'i tao ku j'ara dhu hua iia tasamia, sèna ka ke'a tare'a, na, ja'a bisa maso sorga? Te ja'a neo mamuri taruu sama-sama dènge Ama Lamatua.”
17 Hèia Yesus dhaa, peka na, “Nga tao ka, èu karèi Ja'a lula-nèti ngaa dhu hua iia? Dhodhoka Ama Lamatua di, dhu hua iia. Te ladhe èu neo mamuri taruu dènge Ne, na, mamuri la madhutu paredha Na.”
18 Ka dhèu ne karèi hari, aku nèngu na, “Paredha dhu mia èèna?”
Hèia Yesus b'ala ne, peka na,
“Baku pamadhe dhèu;
baku tao j'ara makae dènge dhèu dhu dhèu èmu boe èu;
baku mana'u;
baku j'aj'i sakasii dhu kapod'e-kabèli;e
19 pakab'ua ina-ama mu;
aa sue ku dhèu èu, sama sèmi èu sue ngi'u èu mesa mu.”f
20 Dhèu ne dhaa, na, “Paredha aa'i-aa'i sèra ja'a tao madhutu le. De, ngaa hari dhu kura?”
21 Ropa tadèngi lii dhèu ne, hèia Yesus peka na, “Ladhe èu neo madhutu aa'i dad'èi Ama Lamatua, lèpa ho pahia aa'i mèdha-panyau èu, sèna ka papala hia dhèu dhu dènge boe ngaa-ngaa sèra. Èle èèna, mai ho madhutu Ja'a. Te èèna na, Ama Lamatua pala hia èu mèdha-panyau ae-ae ètu sorga.”
22 Ropa na tadèngi nare lii Yesus, hèia dhèu ne lèpa dènge d'ara pèd'a laho mae-mae, lula nèngu kaja titu kèna.
23 Èle èèna, ka Yesus padhai lii dènge ana madhutu Na, aku Nèngu na, “Lèka la Ja'a, te dhèu kaja carui titu kèna maso sorga. 24 Carui èèna, nuka sèmi badha onta dhu kapai, maso la'e asa d'ara oka na re ro'a j'aj'au.”
25 Ropa ana madhutu se tadèngi rare, rèngu malaa, hèia ra dhaa, peka na, “Ladhe sèmi èèna, cee ka dhu bisa maso sorga?”
26 Hèia Yesus ladhe patae si, ka Na lii, peka na, “Ladhe dhèu rai-haha dhu tao, mema bisa boe. Te ngaa ladhe Ama Lamatua ka dhu tao, aa'i-aa'i bisa j'aj'i!”
27 Hèia Petrus pasanèd'e, aku nèngu na, “Ama! Ji'i se tèke eele le mèdha-panyau ji'i aa'i-aa'i, ho madhutu Ama. De ji'i abhu ngaa?”
28 Na dhaa, peka na, “Parcaya la Ja'a ne! Pe d'ai lod'o Ama Lamatua tao pahiu aa'i mèu-mèu, Ja'a Dhèu Rai-haha Tare'a-re'a ne, madhèdi ètu dedha kadera paredha aae èèna. Lod'o èèna kahèi, miu dhu madhutu Ja'a, madhèdi kahèi ètu dedha kadera paredha canguru dua sèra, sèna ka j'aj'i hakim mi canguru dua suku èdhi dhèu Isra'el!g 29 Dhèu dhu tèke eele èmu na, a'ari na, ina-ama na, ana niki na, aa oka-tedhe na, ho madhutu Ja'a, bèli-camèd'a èèna abhu hari cangasu kali. Aa d'ai ka lod'o èle rai-haha ne, nèngu kahèi abhu mamuri taruu dènge Ama Lamatua. 30 De sanèd'e paie! Madhutu ngangee Ama Lamatua, dhèu ae dhu padedha iisi na, rèngu sèra ka dhu j'aj'i mi ana iiki. Te ngaa dhèu dhu peka na, nèngu dhèu haha, aa te ngaa madhutu a'abhu Lamatua, nèngu ka dhu kapai.”h