Dhèu Parisi tenge j'ara ho neo pamanahu Lamatua Yesus lula-nèti pa'ia-pa'ela
10
Èle èèna ka, Yesus si lasi asa propensi Yudea dènge era-era ètu cabèka dhimu loko Yarden. Ètu mia-mia, dhèu ae mai lingu rare Yesus. Hèia Na aj'a si, sèmi biasa.
Markus 10:1-31
2 Dhèu Parisi pèri-pèri mai neo pamanahu Ne. Ra karèi Ne sèmi ne'e ka, “Madhutu a'abhu agama èdhi, ladhe mone dhu dènge le d'ara èmu, bisa pa'ia hari, do aad'o?”
3 Yesus dhaa, peka na, “Miu sanèd'e, do? Atora dhèu èmu-kamali dhu Musa hia èdhi uru èèna, tasamia?”
4 Ra dhaa, peka na, “Nanori Musa peka, dhèu bisa pa'ia-pa'ela, sad'i dhèu mone tao uru ku sasuri pa'ia dènge dhèu èmu na.”a
5 Hèia Yesus b'ala si, peka na, “Nanene, ee! Musa suri sèmi èèna, lula miu kètu hadhu. 6 Baku bhèlu lii lolo dhu uru tèka, lod'o Lamatua paj'aj'i dedha-liru dènge rai-haha! Dhu suri tèke, peka na,
‘Ama Lamatua paj'aj'i dhèu rai-haha, mone dènge bhèni.b
7 Nèti èèna ka, dhèu mone tèke eele ina-ama na,
ho mamuri d'ara èci dènge dhèu èmu na,
8 sèna ka dua ra j'aj'i mi èci.’c
9 Ladhe Lamatua pa'èci le rèngu dua ra, dhèu rai-haha baku pacèri eele si!”
10 Èle èèna ka, Yesus dènge ana madhutu Na lasi mesa ra asa d'ara èmu cue. Ètu èèna, rèngu karèi Ne lii aj'a deo sa.
11 Yesus dhaa, peka na, “Dhèu mone cee dhu ia eele dhèu èmu na, ho na madhèdi hari dènge dhèu bhèni leo, nèngu bersina. 12 Èci èèna ka, dènge dhèu bhèni. Ladhe nèngu ia eele dhèu èmu na, ho na leo hari dènge mone leo, nèngu bersina kahèi.”d
Lamatua Yesus hia lii mèngi-nale mi ana iiki
13 Ca tèka, dhèu rèti ana-ana rèngu asa Yesus. Ra manèngi sèna ka Yesus sabaj'a hia si, ho hia lii mèngi-nale. Te ngaa ana madhutu Yesus kai dhèu sèra.
14 Yesus ladhe nèdhi sèmi èèna, ka Na nasa dènge ana madhutu Na sèra, aku Nèngu na, “Hud'i laa ana iiki sèra mai asa Ja'a. Baku magee si. Te dhèu sèmi sèra ka dhu j'aj'i dhèu unu Ama Lamatua. 15 Miu sanèd'e paie! Dhèu cee dhu neo mai asa katanga-madha Lamatua, d'ara na kateme hud'i d'èi paraga dènge Ne, èci èèna ka ana iiki dhu d'ara d'èi paraga dènge ina-ama ra. Ladhe sèmi boe èèna, rèngu bisa boe j'aj'i dhèu unu Ama Lamatua.”e 16 Èle èèna ka, Yesus liku nare ana iiki se, ka Na tao kacui-aai Na mi dedha kètu ana iiki se èci-èci, ho Na hia si lii mamèngi.
Dhèu kaja tenge j'ara ho mamuri taruu dènge Ama Lamatua
17 Ropa Yesus si neo pakèd'i, dhèu kaja èci rai mai neo paraga dènge Ne. Hèia na pacud'u ètu madha Yesus, ka na karèi Ne, aku nèngu na, “Ama mese dhu hua iia! Ja'a neo karèi ciki. Ja'a tao tasamia, sèna ka ja'a ke'a tare'a-re'a, na, ja'a ne maso sorga ho mamuri taruu pa'èci dènge Ama Lamatua?”
18 Hèia Yesus dhaa, peka na, “Nga tao ka èu ne peka na, Ja'a ne ‘hua iia’? Dhèu rai-haha ne èci sa dhu hua iia boe. Dhoka Ama Lamatua di dhu hua iia. 19 Èu me'a le, lii paredha Ama Lamatua sèra nèti uru ka, dhu peka na:
‘Baku pamadhe dhèu;
Baku tao j'ara makae dènge dhèu dhu dhèu èmu-kamali boe èu;
Baku mana'u;
Baku j'aj'i sakasii kapod'e-kabèli;
Baku monya ho parame more mèdha-panyau dhèu;
Aa pakab'ua ina-ama èu.”’f
20 Dhèu èèna dhaa, peka na, “Tare'a, Ama Mese! Nèti ana ngèru ka mai, ja'a madhutu le lii paredha sèra aa'i-aa'i si.”
21 Yesus rasa kasia dènge dhèu ne'e, hèia Na peka, “Tare'a! Te ngaa j'ara èci era. Lèpa ka asa èmu èu, lamu pahia aa'i su'i-kakaja èu. Kab'ua na lamu pala-bagi mi dhèu dhu unu boe ngaa-ngaa. Èle èèna, heka mai kèna, ho madhutu Ja'a. Pe bèli-camèd'a Lamatua pala-bagi hia èu hari kakaja-sasu'i dhu leo ètu sorga.”
22 Ropa dhèu ne tadèngi nare lii padhai lii Yesus èèna, d'ara na laho mae-mae. La'e ka èmu dènge d'ara dhu pèd'a bia, lula nèngu dhèu kaja tare'a.
23 Hèia Yesus ladhe la'e-mai, aa peka dènge ana madhutu Na sèra, aku Nèngu na, “Mi nanene! Dhèu kaja carui titu kèna maso sorga!”
24 Ropa tadèngi rare lii padhai lii Yesus èèna, ana madhutu Na bingu. Ka Yesus tuhu hari lii padhai Na, “Mi nanene paie! Mema carui ladhe dhèu neo j'aj'i dhèu unu Ama Lamatua. Baku ngee èèna mud'a! 25 Dhèu kaja maso sorga ho j'aj'i dhèu unu Ama Lamatua, sama carui dènge badha onta ci'u dhu kapai maso asa oka na re ro'a j'aj'au.”
26 Lii padhai lii Yesus ne asa pamalaa dhèu se'e aa'i-aa'i si. Ka ra pakarèi, peka na, “Ladhe tare'a sèmi èèna, cee ka dhu bisa abhu mamuri dènge Ama Lamatua?”
27 Ka Yesus ladhe si èci-èci, hèia Na peka, aku Nèngu na, “Madhutu dhèu rai-haha, na, carui. Te ngaa baku bhèlu, madhutu Ama Lamatua, aa'i-aa'i bisa j'aj'i.”
28 Èle èèna ka, Petrus padhai lii, peka na, “Ama, ji'i tèke eele le ngaa-ngaa dhu j'aj'i unu ji'i, ho madhutu Èu. De ji'i abhu bab'ala na ngaa?”
29-30 Ka Yesus dhaa, peka na, “Ja'a neo peka dènge miu sèmi ne'e: dhèu dhu madhutu Ja'a, aa tèke eele ina-ama na, a'ari na, ana-èpu na, oka-tedhe na, sasab'a-la'a na, dènge isi èmu aa'i-aa'i, ho la'e peka-padhai Lii Lolo Be'a Ama Lamatua mi dhèu ètu mia-mia, lèpa loo limuri, nèngu abhu hari ngaa-ngaa sèra, d'ai cangasu hari. Aa'i-aa'i dhu nèngu tèke eele sèra, èèna na nèngu abhu risi hari. Aa nèngu abhu j'aj'èra kahèi, lula madhutu Ja'a. Te ngaa ladhe d'ai lod'o èle rai-haha ne, nèngu mamuri taruu pa'èci dènge Ama Lamatua. Bab'ala nèngu, sèmi èèna ka. 31 Sanèd'e paie! Dhèu dhu padedha iisi, madhutu ngangee Ama Lamatua, limuri mai nèngu j'aj'i dhèu haha d'ai seli. Te ngaa dhèu dhu ngee, na, nèngu dhèu haha di, madhutu ngangee Ama Lamatua, limuri mai nèngu j'aj'i dhèu kapai.”g
Ne'e ka tèlu hari kèna Yesus lole mamadhe Na
32 Lod'o èèna, Yesus dènge ana madhutu Na lasi asa kota Yerusalem. Yesus kako uuru. Ana madhutu Na dhèu canguru dua dènge dhèu leo dhu kako pa'èci madhutu Ne re limuri. Rèngu sanèd'e lii padhai dhu Yesus peka dènge rèngu uru èèna, peka na, dhèu neo pamadhe Ne ètu Yerusalem. Nèti èèna ka, rèngu bingu dènge madha'u. Hèia Yesus paroa nare ana madhutu Na sèra mesa ra, ho Na peka hari dènge rèngu dhèu neo tao ngaa mi dedha Nèngu ètu Yerusalem.
Markus 10:32-52
33 Yesus peka dènge si, “Mi nanene! Èdhi neo lati asa Yerusalem. Ja'a ne, Dhèu Rai-haha Tare'a-re'a. Ètu nèi, dhèu neo pahie eele Ja'a asa kètu agama Yahudi dènge mese agama sèra. Èle èèna, ra uku-ked'i pamadhe Ja'a. Ra tule eele Ja'a asa dhèu leo dhu tadhe boe Ama Lamatua. 34 Èle èèna ka, ra padhai lii pamakae Ja'a. Ra paru'e ilu mi Ja'a. Aa ra dhedhe pamae iisi Ja'a. Èle èèna, heka ra pamadhe Ja'a kèna. Mema Ja'a madhe tare'a. Te ngaa d'ai camèda, Ja'a mamuri hari.”h
Yakobis dènge Yohanis manèngi ho j'aj'i dhèu kapai
35 Èle èèna ka, ana Sabadeus, nuka Yakobis dènge Yohanis, mai asa Yesus. Ka ra manèngi, peka na, “Ama mese! Ji'i neo padhai lii dènge Ama ciki.”
36 Ka Yesus karèi si, “Miu neo ngaa?”
37 Ra dhaa, peka na, “Sèmi ne'e, Ama! Bèli-camèd'a, ladhe Ama mèd'u paredha, ji'i manèngi Ama pamadhèdi ji'i dua mi, èci re sebhe g'ana, èci hari re kariu, sèna ka ji'i paredha hèi.”
38 Yesus dhaa, peka na, “Miu dua mi se me'a boe lii manèngi miu èèna. Èèna na, Ja'a abhu j'aj'èra ae. De tasamia? Miu ngee, na, miu se bisa pasae j'aj'èra dènge Ja'a toke madhe, do?”i
39 Ka ra dhaa, peka na, “Ji'i bisa, Ama!”
Ka Yesus b'ala, peka na, “Mema, èèna na, miu pasae j'aj'èra kahèi, sama sèmi Ja'a. 40 Te ngaa cee dhu madhèdi re sebhe g'ana, do sebhe kariu Ja'a, èèna hak Ja'a aad'o. Te dhu hak ka Ama Lamatua dhu pama'ète mema le, na, cee-cee ka dhu madhèdi ètu era sèra.”
41 Ropa ana madhutu dhu leo sèra tadèngi lii manèngi Yakobis dènge Yohanis sèmi èèna, ka ra nasa bia. 42 Hèia Yesus paroa aa'i-aa'i si, ka Na peka, aku Nèngu na, “Miu me'a le, sina ma? Dhèu-dhèu kapai dhu rèd'u paredha j'eli ana kabarai sèna ka rèngu bisa boe kalau-karèto. Dhèu kapai kabarai dhu tadhe boe Lamatua hia paredha risi eele, ka ana kabarai bisa heka doa kètu. 43 Te ngaa miu baku tao sèmi èèna! Nèti talora miu, cee dhu neo j'aj'i dhèu kapai, nèngu hud'i j'aj'i ku ana pua-paleha ho lalau dhèu leo.j 44 Cee dhu neo j'aj'i dhèu kapai, nèngu hud'i tao ngi'u na sama sèmi ènu.k 45 Ja'a ne, Dhèu Rai-haha Tare'a-re'a. Ja'a mai hia boe dhèu lalau-lalo'o Ja'a. Te ngaa Ja'a mai ho lalau-lalo'o dhèu ae, dènge hia mamuri Ja'a ho sui kore dhèu ae nèti koasa sasala-sasigo rèngu.”
Lamatua Yesus puri-pa'èle dhèu bèdhu èci ètu Jeriko
46 Yesus dènge ana madhutu Na, dènge dhèu ae titu kèna kako lasi kota Jeriko. Ropa rèngu neo kako taruu, dhèu bèdhu èci madhèdi ètu sebhe j'ara, na kanata ai ho manèngi ngaa-ngaa nèti dhèu dhu kako re èèna. Ngara na Bartimeos, ana nèti Timeos. 47 Ropa na tadèngi dhèu dhu kako mai sèra, Yesus nèti rae Nasaret na kahèi, ka na rodhe, peka na, “Yesus! Ana-èpu Daud, ee! Ji'i mate Èu nèbhu ae le! Sue ku ja'a laa!”
48 Ropa ra nanene lii rodhe na, hèia dhèu sèra jèke ne, aku rèngu na, “Èu mau-mau ku laa!”
Te ngaa na rodhe asa aae, peka na, “Yesus! Ana-èpu Daud, ee! Sue ku ja'a laa!”
49 Hèia Yesus titu taha, ka Na peka, “Mèti ku na mai sa ne'e!”
Ka ra lasi peka dènge dhèu bèdhu èèna, peka na, “Èu mau-mau ka laa! Te Ama mese paroa èu nèi. De mai lati ka!”
50 Ropa nanene nare, ka Bartimeos pèci eele sig'i kalolo na, hèia na kèd'i titu la'e paraga dènge Yesus.
51 Ka Yesus karèi ne, peka na, “Èu parluu ngaa?”
Dhèu bèdhu ne dhaa, aku nèngu na, “Ama, ee! Ja'a manèngi ho ja'a bisa kèdhi.”
52 Yesus peka hari dènge ne, “Lula èu parcaya, Ja'a bisa tao paie musi madha èu. Ne'e ne kahèi musi madha èu èle dènge! De lamu ka!”
Ka musi madha Bartimeos èle dènge. Èle ka la'e madhutu Yesus.