2 Ladhe miu neo soru-bara dhèu kasia, mage lami palolo asa mia-mia. Te ladhe miu se tao sèmi èèna, miu ca ropa dènge dhèu dhu padhai lii leo, tao leo. Dhèu sèmi sèra, d'èi lasi karihu asa d'ara èmu sabaj'a ho dhèu koa si, peka na, ‘Ira ii! Dhèu ne maj'èni madhutu atora agama, nga!’ Ja'a peka mola-mola kèna! Dhèu dhu tema sèmi rare lii koa-kad'iri nèti dhèu, rèngu se abhu le pala ra. 3 De ladhe miu neo soru-bara dhèu dhu dènge boe ngaa-ngaa, mage mi palolo kahèi! 4 Dènge sèmi èèna, dhèu ètu rai-haha ne re'a boe. Te ngaa Ama miu ètu sorga dhu ne'a ngaa dhu miu tao pahuni. Pe Nèngu ka dhu b'ala hia miu berkat ae-ae.”

5 “Lod'o miu sabaj'a, miu baku tao nuka sèmi dhèu dhu padhai lii leo, tao leo. Dhèu se d'èi lasi asa j'ara dhu dhèu ae-ae, aa titu ètu d'ara èmu manèngi-mangaj'i ho dhèu koa-kad'iri si, peka na, ‘Dhèu se, dhèu mola-mèci!’ Te ngaa nanene pabe'a-be'a! Dènge rèngu abhu koa sèmi èèna, rèngu sèmi rare le pala ra.^b 6 Te ngaa miu baku sèmi èèna. Ladhe miu manèngi-mangaj'i, lami asa d'ara kama ho bèdho babèdho na. Èle èèna, heka mi sabaj'a mau-mau hia Ama mi ètu sorga. Masi ka dhèu leo rèdhi boe, te ngaa Ama miu ladhe nèdhi. Bèli-camèd'a Na b'ala hia miu berkat ae-ae.

7 Ladhe miu sabaj'a, baku padhai lii dhu dènge boe kolo-kapua. Te dhèu dhu tadhe boe Ama Lamatua sabaj'a sèmi èèna ka. Rèngu pangee, na, Ama Lamatua d'èi nanene lii manèngi ra dhu madhera lola-lola èèna. 8 Mage mi madhutu j'ara rèngu sèra! Te masi ka miu dhae manèngi mèka ngaa-ngaa nèti Ama mi ètu sorga, te ngaa Nèngu dhu ne'a mema le, ngaa dhu miu parluu. 9 De ladhe sabaj'a, na, madhutu la conto sèmi ne'e:

14 Te ngaa sanèd'e, ee! Ladhe miu pabhèlu eele sasala dhu dhèu tao mi miu, èèna na Ama mi ètu sorga saku eele sasala-sasigo miu kahèi. 15 Te ngaa ladhe miu mo'o boe pabhèlu eele sasala dhu dhèu tao mi miu, bèli-camèd'a Ama mi bhèlu boe sasala miu kahèi.”^d

16 “Ladhe miu manèngi-mangaj'i aa puasa, mage mi tao rèhu susa, nuka sèmi dhèu dhu padhai lii leo, tao leo. Te ra ad'u-ue j'ara èèna, ho dhèu pad'iri si, peka na, ‘Dhèu se'e se, dhèu mola-mèci!’ Te ngaa sanèd'e, ee! Dènge sèmi rare koa-kad'iri sèmi èèna, na, rèngu abhu le pala ra. 17 Te ngaa ladhe miu puasa, lèu pamèu-mèu rèhu mi, aa sageri paie kètu miu! 18 De ladhe dhèu rèdhi miu, re'a boe na, miu dhu puasa. Te ngaa Ama miu ne'a. Pe Na pala hia miu mèngi-nale ae-ae.”

19 “Miu baku sab'a taruu, ho dhodhoka pakaboko mèdha-panyau ae-ae ètu rai-haha ne di. Te hub'u dènge rutu pa'ele iie aa'i si. Aa dhèu mana'u mai pa'ele iie era tatèka mèdha-panyau, aa mana'u rèti si.^e 20 Te ngaa be'a risi miu maj'èni sab'a, sèna ka pakaboko mèdha-panyau ae-ae ètu sorga. Te ètu era nèi, abhu boe hub'u dènge rutu dhu pa'ele iie si, aa abhu boe dhèu mana'u, ho mai mana'u rèti. 21 Te ladhe miu tèka mèdha-panyau miu ètu era mia, na, tatu d'ara miu ètu èèna kahèi.”

22 “Musi madha dhèu, nuka sèmi labhu dhu pasaraa d'ara ra. Ladhe musi madha na mèu, nèngu madhutu j'ara mamuri dhu hua iia, èci èèna ka dènge dhèu dhu kako ètu d'ara saraa. 23 Te ngaa ladhe musi madha na ahu, nèngu bisa boe kako madhutu madha j'ara mola, nuka sèmi dhèu dhu gogo ai lae-lae ètu d'ara maroga. De ladhe saraa ètu d'ara miu j'aj'i maroga, na miu mamuri d'ara maroga kahèi.”

24 “Dhèu bisa boe sab'a hia dua lamatua, lula èèna na nèngu d'èi risi ca dhèu di. Bisa kahèi nèngu madhutu lamatua èci, aa pusi-pahae boe dhu leo. Nèti èèna ka, èu bisa boe peka na, ‘Ama Lamatua èèna, Lamatua ja'a,’ ladhe èu tao doi-dhari j'aj'i mi lamatua èu.

25 Nèti èèna ka, Ja'a peka dènge miu sèmi ne'e: baku bhute pangee, na, ja'a mamuri tasa mera mia, ku'a-kinu ngaa, pake ngaa? Miu pangee na, mamuri ne dhoka ta'a-tinu, di? Aa ngi'u ne, dhoka pake mèdha-papake, di? Aad'o sèmi èèna. 26 Ladhe ku manu-bhui dhu lela ètu talora liru. Rèngu bhute rèdhi boe sèla hini, dènge puu-g'ètu, ho tèka nganga'a ètu d'ara soka. Te ngaa Ama miu ètu sorga piara manu-bhui sèra taruu. Tatu Nèngu kab'oi miu risi eele nèti rèngu. De ngee pabe'a-be'a. Te Ama Lamatua pakab'ua miu risi nèti manu-bhui sèra. 27 Ladhe dhèu titu ètu madha tèru, ho na bhute dènge lalau ngi'u na, nèngu bisa pamadhera hari ngi'u na, do? Bisa boe! 28 Ladhe bisa boe, na, nga tao ka miu bhute dènge pangee hari mèdha-papake? Lami ladhe ku hela bunga dhu muri tab'a ètu d'ara pad'a sod'a. Rèngu manyèru boe hèngu, aa manènu boe sig'i sa hèi.

29 Te ngaa sanèd'e ku la! Mèdha-papake dhèu aae Soleman dhu kab'ua risi, saraga na bisa boe segi saraga hela bunga ne.^f 30 Te Ama Lamatua taru kira mi bunga dhu muri dhoka doe ne'e, aa bèli madhe, ho dhèu core asa d'ara ai. Ladhe Na tao sèmi èèna, tatu Nèngu papake miu risi eele nèti hela bunga sèra. De tasamia ka miu parcaya pa'èra boe mi Nèngu? 31 De baku mi pangee na, ‘Ji'i neo nga'a ngaa?’ do, ‘Neo nginu ngaa?’ do, ‘Neo pake ngaa?’ 32 Dhèu dhu parcaya boe Ama Lamatua, rèngu sab'a loe boe ho neo abhu aa'i-aa'i se. Te ngaa miu baku tao sèmi èèna, te Ama miu ètu sorga dhu ne'a aa'i le, ngaa-ngaa dhu miu parluu. 33 Te ngaa miu hud'i pakako uuru ku sasab'a Na, aa hud'i madhutu ku paredha Na, heka Na hia miu aa'i-aa'i dhu miu parluu. 34 De baku bhute pangee, na, bèli miu parluu ngaa. Te bèli èèna dènge bhabhute unu na. Sasusa lod'o doe ne'e, èle ètu doe ne'e kahèi.”