2 Ma Yesus nae, “Malole boe! Hule-o'e ta'o ia:

5-6 Basa de Yesus nanori selu' se so'al dala hule-o'e'. Ana fee nekendandaa' nae, “'Ona' neofaa ma hambu nonoom esa mia doo-d'oo' nema nae numban sia ume ma. Te nda mu'ena saa fo fee ne naa sa boe. Boe ma, muu sia nonoom laen umen, fo 'aka' mo'e mia dea' mae, ‘'A'a, e! Fee au roti bue' telu dei! Huu au hambu fui' sia ume, te au nda 'u'ena saa sa boe! 'A'a, tulun dei! Bue' telu' a!! Dei fo au nggati!”

7 Ne'o nonoom nataa nggo nae, ‘Te 'a'a fai, o! Atahori mana sunggu' masambeta' ra o, 'a'a nema ngganggu fai! Lelesu ra mana nggoe nisa' ena, ia! Anak ara mana sunggu' masambeta' ena. 'Afi' mumunasa, e! Te fai' ruma dei, 'a'a!’

8 Mae 'ona' naa o, musuned'a malolole. 'Ita' mae atahori naa nda fela fo fee nggo sa o, huu ho eni nonoon, de mete ma 'aka' mo'e mukundondoo' a, na, dei fo ana fela fo fee nggo.

9 'Ona' naa boe, noo hule-o'e' a.

10 Huu basa atahori mana ro'e rakandoo 'a neu Lamatualain, dei fo ara simbo. Mana sangga nakandoo' ra, dei fo ara hambu. Mana nameli nakandoo' ra, dei fo Ana soi lelesu a. 11 Hei du'a sob'a! Hambu sia bee, ama' sa, mete ma anan no'e 'u'u, na, ana fee ne mengge? 12 Do, mete ma anan no'e manutelo', na, ana fee 'ura'? Nda bisa ta'o naa sa, to? 13 Atahori mema' de'ulaka'. Te hei Amam sia sorga, Netehun malole' teb'e. Dad'i mete ma atahori de'ulaka' 'ona' hei, te hii fee sud'i' saa malole' neu ana ma ra, saa fai Ama'! Ana nda fee 'a saa fo hei parluu' a sa, te lena' naa fai, Ana fee Dula-d'ale Meumaren neu atahori mana no'e mbali E.”

14 Lao esa, Yesus 'oi nitur mia atahori esa nda mana bale nala' sa. 'Oi basa ma, atahori naa 'ola' nala' neu' ena. Atahori mana sia naa ra heran bali-b'ali'. 15 Te hambu ruma rae, “Mema', Ana bisa 'oi nitur! Huu Ana hambu koasa mia nitu ra malanggan, naeni Balseb'ul.”^a

16 Atahori laen ra rae sob'a Yesus. De ara ro'e fo Ana tao selu' manad'ad'i manaseli' esa fai fo natud'u neu sira 'oi, Eni koasan mema' mia Lamatualain.^b

17 Te Yesus nahine dud'u'a de'ulaka na ra ena. Boe ma Ana 'ola' nae, “Mete ma sia nusa monae' sa, rauinggu na ra ratofa, ne'o nusa monae' naa nambalutu. 'Ona' naa boe, mete ma sia ume sa rala, ume isi na ra 'aka' rareresi esa noo esa, na, ne'o ume-loo naa nda dad'i malole' sa ena! 18 Dad'i mete ma nitu ra 'aka' ratofa, ma esa 'oi esa, na, sira malanggan nda hambu to'u parenda' doo' sa ena! De nda maso' dud'u'at sa, mete ma hei mae Au 'oi nitur 'endi' nitur koasan! 19 Misined'a, e! Hei atahori ma ra o 'oi rahine nitu ra boe. Ara 'oi rendi' nitur koasan, do? Hoko', to! Dad'i ama 'afi' 'ola' leli' mae, Au 'oi nitu ra 'endi' nitur koasa na. Dei fo atahori ma ra ra'etu' rae, saa fo hei mifad'e' naa, sala. 20 Te mete ma Au 'oi nitu ra 'endi' Lamatualain koasan, naa natud'u 'oi, Lamatualain parendan sia hei mata ma ra ena. Sia, te hei 'ona' nda bub'ulu' sa.

21 Mete ma atahori ma'ad'ere' sa to'u sisiro dii-'ona', fo nanea malolole umen, ne'o eni sud'i 'a saa na ra nda mopo sa. 22 Te dei fo hambu atahori ma'ad'ere' lena' e fai, nema tao nasenggi' e, ma rambas nala atahori naa sisiro na ra. Basa ma, ana 'amba-'ao nendi basa atahori naa hata-heto na ra de neu bab'anggi fee ana ded'enu na ra. Doo basa ia ena atahori ma'ad'ere' kaesan namahere sisiro na. Te ia naa ana nda namahena sisiron sa ena.^c

23 Misined'a malolole! Atahori nda mana na'ab'ue noo Au sa, eni, lab'an Au. Boe ma atahori nda mana tulun Au sia ue-tatao ngga ra sa, na, atahori naa kai-b'aa' a.”^d

24 Yesus 'ola' nakandoo nae, “Mete ma hita 'oi hendi nitu mia atahori sa, ana nisi' mamana rou' fo sangga mamana hahae'. Huu ana nda hambu mamana' sa, boe ma ana du'a nae, ‘Hee! Nda hambu mamana' sa, de malole lena' au heo' bali' 'isi' atahori dalahulu na.’ 25 Basa ma ana bali', te neu hambu mamana' naa, nenesapu meu' ma nenembed'a-nggao malole' ena. 26 Boe ma nitu a neu no'e nonoon hitu fai, de'ulaka na ra lena' e fai, de basa se reu leo sia atahori naa. De 'ale' ia atahori naa masod'an boe hambu sosoe'.”

27 Lele' Yesus fe'e 'ola-'ola' noo atahori nae' naa ra, hambu ina' sa nameli sia naa nae, “Mamam ua-nalen malole', huu ana mana bonggi ma nasusu nggo!”

28 Yesus nataa nae, “Teb'e, mama! Te mana hambu ua-nale malole' lena', naeni atahori mana pasa ndikin fo rena Lamatualain Ded'ea-'o'olan, ma tao tungga!”

29 Lele' Yesus fe'e 'ola-'ola', atahori hetar heo rala E. Boe ma Ana 'ola' nae, “Atahori 'ale' ia ra rahine tao 'a de'ulaka' ra. Ara 'aka' ro'e fo Au tao manad'ad'i manaseli' fee se, fo rahine Au ia, teb'e-teb'e' Lamatualain atahori na. Tao-tao te fe'esa'an Lamatualain tao manad'ad'i manaseli' fee se nendi' mana 'ola-'olan Yunus. Naa dai ena! 30 Ma'ahulun, Yunus nafad'e atahori kota Niniwe nae, ara musi doa' dei. Naa, saa mana dad'i neu Yunus lele' naa, dad'i bukti fee neu se 'oi, Lamatualain mana denu e. Au, Atahori Matetu' ia, o ta'o naa boe. Au 'uma 'ufad'e nggi, fo ama musi doa' dei. Ma saa mana nae dad'i sia Au, dad'i bukti fee atahori 'oras ia 'oi, mema' Lamatualain mana denu Au.^e

31 Dei fo sia fai matete'en, mete ma Lamatualain dad'i Mana Ma'etu' Ded'eat, dei fo ina mane' mana nema mia 'ona nema, nasod'a bali', fo nambarii' dad'i sakasii. Ana dud'u fo fua sala' neu basa hei mana masod'a' 'oras ia nae, ‘Basa hei ia ra, nggoa'!’ Fe'esa'an ina mane' naa nema mia doo-d'oo' fo nita noo matan mane Soleman mahine na. Tao-tao te, ia naa hambu Atahori sia talad'a ma ra, manaseli' lena' mane Soleman. Te hei nda nau taoafi' mbei neu E sa boe.^f

32 Nda 'aka' mesa' ne sa! Dei fo atahori mia Niniwe ra o fela rambarii' fo dud'u hei mana fe'e masod'a' 'oras ia rae, ‘Basa hei, nggoa' ra!’ Ara 'ola' ta'o naa, huu fai' naa, lele' Yunus neu nafad'e Lamatualain hihii-nanaun, ma ara doa' reu' ena. Tao-tao te, 'oras ia Atahori manaseli' lena' Yunus, sia hei talad'am, te hei nda doa' sa boe!”^g

33 Yesus tute selu' 'o'olan nae, “Atahori rambila' lambu ti'oek, boe ma mbed'a' e sia mamana naru' ata, fo ana tao manggarelo kama naa fee neu basa atahori mana rala reu. Nda hambu atahori rambila' lambu, basa ma tatana e rendi' boa, fo funi e.^h Naa nda na'ena ngguna' saa sa boe.ⁱ 34 Hei mata ma ra o 'ona' lambu boe. Ana tao manggarelo hei rala ma ra. Mete ma mata' a ma'ahatu', na, atahori mete basa' e noo rala de'ulaka'. Te mete ma mata' a manggarelo', na, atahori mete basa' e noo rala malole'. 35 Tao malolole fo manggarelo' mana sia rala ma ra, dad'i manggarelo' seli, 'ona' relo a ronda na. Ronda' mana sia ralam naa, 'afi' 'ona' fulan rondan, fo tita' a salao'. 36 Mete ma rala ma ra manggarelo', losa nda hambu sosod'a' esa ma'ahatu' sa boe, na, basa masod'a ma ra manggarelo', 'ona' lambu monae' fee manggarelo' neu masod'a ma ra”.

37 Yesus 'ola' basa ma, atahori esa mia partei agama Farisi ra no'e E fo nema naa sia ume na. Losa naa ma, Yesus ume rala neu de neu 'endo' sia mei nanaa' a. 38 Tenu ume' a titindindii' a mete Yesus 'endo' naa, te nda safe liman na'ahulu' tungga atahori Farisi ra hohoro-lalanen sa.

39 Basa ma Yesus nafad'e e nae, “Hei atahori Farisi ra manaseli'! Hei to'u mihere' hei agamam hohoro-lalanen! Hei misined'a safe mimeu' a pingga' ma nggalaas ra dean na losa nakahahad'ok, te nda misined'a tao mimeu rala manggenggeo ma ra, mana de'ulaka' ma bare-na'o seli. 40 Manggonggoa', e! 'Afi' lilii'. Lamatualain mana tao dea' ma rala' boe. 41 Te malole lena', hei fee atahori mana to'a-taa' ra mia saa fo hei enam, naa fo hei bisa meumare' sia Lamatualain mata na.

42 Hei atahori Farisi ra! Dei fo hei hambu sosoe'! So'al fee Lamatualain bab'anggi esa mia bab'anggi' sanahulu, hei reken noo matetu' basa' e, anak-moko. Losa hei bumbu huu ana' mia osi o, hei reken mates! Te hei nda taoafi' neu saa fo nggunan seli sa. So'al susue' neu Lamatualain, ma dala ndoo-tetu' a, hei lilii' hendi se neu' ena! Mema' hita musi fee takandoo neu Lamatualain, Eni hahambun, te 'afi' lilii' hendi dala-d'ala' fo nggunan lena' ra.^j

43 Dei fo hei hambu sosoe'! Huu hei hii 'a sangga mamana meulau' sia ume hule-o'e', ma hii 'a sangga had'a-hormat sia atahori hetar mata na.

44 Dei fo hei hambu sosoe'! Hei 'ona' rates, raen tetu' ena. Atahori lao' sia naa, te nda rahine rae, sia naa hambu rates sa, huu sia rates ata rae a meu', te sia ralan ma'afoo mburu. Tao-tao te, tungga hita 'ad'at na, atahori mana tab'u rates tao nanggenggeo aon, de nda nandaa ume hule-o'e' rala neu sa. Hei atahori Farisi ra 'ona' rates naa boe! Sia dea' hei meu ma ra seli. Te rala ma ra sofe' noo ma'amburu'.”

45 Hambu mahine hukun Yahud'i esa sia naa, nggaso Yesus 'o'olan nae, “Ama Meser! Ama' ded'ea-'o'olam faa' ra naa, dai hai boe!”

46 Yesus nataa e nae, “Teb'e! Hei mana mihine hukun Yahud'i ra, hela fo ama hambu sosoe' boe! Hei nda tulufali atahori ma tao minggafa masod'a na ra sa, te ama boe tao mi'isususa' se noo agamam hohoro-lalane mamab'era ma ra. Ma fee se lemba hei hohoro-lalane mata'-mata' ma ra. Te hei nda tulun lemba sob'a mamab'era' naa noo lima 'u'u ma ra esa sa boe!

47 Dei fo hei hambu sususa'! Huu hei mbute-mue mifefela rii fatu' fee Lamatualain mana 'ola-'ola dalahulu na ra fo fee had'a-hormat neu se. Tao-tao te, hei bei-ba'i ma ra mana tao risa mana 'ola-'ola' naa ra! 48 Hei o ei' esa moo bei-ba'i ma ra boe. Ara nda simbo Lamatualain mana 'ola-'ola na ra, ma tao risa se. Basa ma hei lutu-mbatu rates fee mana 'ola-'ola' ra, fo dad'i bukti 'oi, hei o tungga bei-ba'i ma ra boe. 49 Huu naa, Lamatualain fo mana nahine basa' e, 'ola' nita nae, ‘Dei fo Au denu mana 'ola-'ola ngga ra roo ded'enu' laen ra fo reu sia atahori Isra'el ra. Basa ma, atahori naa ra tao doid'oso ruma, ma tao risa ruma.’

50-51 Atahori mana rasod'a 'ale' ia, musi lemba-d'oi atahori mana tao risa Lamatualain mana 'ola-'ola na ra. Naa reken mia Lamatualain tao raefafo' ia, eni' a Habel mamaten, losa ma'ab'ui oe-oe' a, Sakaria. Eni ia, fo ara risa mia mei tunu-hotu' a noo Kama Meumare' a talad'an, sia Lamatualain Ume Hule-o'e Huu na. Hei o lemba mala huhuku-d'od'oki na ra boe!^k

52 Hei mana mihine hukun Yahud'i ra, e! Dei fo ama hambu sosoe'! Huu hei mana to'u nggoe' fo soi lelesu fo atahori hambu rahine malolole Lamatualain hihii-nanau na. Te hei nda maso' naa mii sa. De'ulakan lena' fai, hei bambi mala atahori, fo ara nda bisa maso' naa reu sa!”

53-54 Lele' Yesus 'ola' basa ma, meser agama roo atahori Farisi ra ramue E. Eni' a lele' naa, ara 'aka' ratane mata'-mata' fo rae te'e-sii ra'atutud'a' E. Ara sangga dala' rakandondoo' a fo tao nemuet roo E.