Lamatua' Yesus nanori nae 'afi' fua sala' neu atahori
7
“Ama 'afi' fua sala' neu atahori, fo Lamatualain o 'afi fua sala' neu nggi boe. 2 Ama nile atahori ta'o bee, na, dei fo Lamatualain o nile nggi 'ona' naa boe. Ama 'uku-uli atahori laen salan ta'o bee, na, dei fo Lamatualain o 'uku-uli nggi ta'o naa boe.a 3 Te hii 'a mete atahori sala anak na, te sala monaem, na, ho nda mita sa. Mae sala' nese. Naa 'ona' mita afu deke' sa sia nonoom mata na. Tao-tao te balok monae' a bambi nala matam, te nda med'a sa. 4 Ta'o bee fo mbarani 'ola' mae, ‘Toronoo'! 'Uma fo au 'ose hendi afu mia mata dekem dei.’ Tao-tao te nda mita balok mana bambi nala matam sa. 5 Wae! Mema' ho, atahori mana dea-rala' teb'e! Nggari hendi balok a mia matam dei, naa fo mete mita noo malole, fo 'ose hendi afu deke bib'ia ana' mia nonoom mata na.6 'Afi' minori dala meumare' so'al Lamatualain fee mana ma'a'e'ei' ra. Huu ara 'ona' busa de'ulaka' dei fo heo' bali' rema fo 'ero nggi. Nggoa na ra 'ona' fafi ra. Mete ma atahori fee rante mafelit, na, ana nda taoafi' sa! Huu ana nahine 'a tab'u-roroo 'a.”
Lamatua' Yesus nanori nae hule-o'e 'afi nama'etu
7 “Mete ma ama hule-o'e,
na mo'e mikindoo' mbali Lamatualain,
dei fo Ana fee.
Mete ma sangga mikindoo 'a,
dei fo Ana natud'u dala'.
Mete ma mimeli mikindoo 'a,
na dei fo Ana soi lelesu a.
8 Te basa atahori mana ro'e rakandoo 'a mbali Lamatualain,
na dei fo ara simbo.
Mana sangga nakandoo' a,
dei fo hambu,
Mana nameli nakandoo' a,
na dei fo Ana soi lelesu a.
9 Ama du'a sob'a! Mete ma hambu ana' sa no'e roti, ne'o aman nda fee ne fatu sa, to? 10 Do mete ma 'ana' a no'e 'u'u, na, aman nda fee ne mengge sa! 11 Hei Amam mana sia sorga, mema' malolen seli. De atahori fo de'ulaka' mata' 'ona' hei ia ra o, hii 'a fee sud'i 'a malole neu ana ma ra, na, saa fai hei Amam! Dei fo Ana fee saa fo ama mo'e' a.
12 Dad'i saa fo ho nau atahori tao neu nggo, na, ho musi tao ta'o naa neu e boe. Huu ia, netehuu' mia basa ba'i Musa noo Lamatualain mana 'ola-'ola na ra ranori eni' a lele ulu' a.”b
Lamatua' Yesus nanori so'al lelesu makab'ia'
13 “Mete ma atahori sa nae sorga neu, na, ana musi lao' tungga lelesu makab'ia'. Te hambu dala mud'a' noo lelesu loa', fo atahori hetar hii tungga 'a. Te besa-b'esa, o! Huu dala' mana 'ona' naa nendi atahori naraka reu, fo saranggaa mia Lamatualain. 14 Atahori mana nae sorga neu musi tungga dala doid'oso' ma lelesu makab'ia'. 'Ona' mae 'aka' atahori hid'a 'a lao' sia naa o, dala makab'ia' 'ona' naa nendi atahori nisi' Lamatualain.”
Lamatua' Yesus nanori fo 'afi' tungga mana peko-leleko' ra
15 “Besa-b'esa moo mana pepeko-leleko' mana so'u ao na ra rae, sira Lamatualain mana 'ola-'ola na. Huu ara tao ao na ra malole' 'ona' bib'i lombo a. Tao-tao te sira de'ulaka', 'ona' busa fui mana nema naa bib'i lombo. 16 Ta'o bee fo bisa mihine atahori mana peko-leleko' 'ona' naa? Mete sia 'a tatao-nono'i na ra. 'Ona' atahori mete boa', fo rahine boa' naa huu na. Boa malole', nda kalua mia hau huu nda malole' sa. 17 Huu hau huu malole' nab'oa boa malole' boe. Te hau huu nda malole' sa nab'oa boa nda malole' sa boe. 18 Nda hambu hau huu malole' fo nab'oa' boa nda malole' sa. Ma nda hambu hau huu nda malole' sa nab'oa boa malole'. 19 Hau huu mana nab'oa nda malole' a sa, dei fo ara rema 'ungga e fo nggari e ai rala neu.c 20 'Ona' naa boe neu mana 'ola-'ola' pepeko-leleko' ra. Ama mihine se mia sira tatao-nono'i na ra.”d
Lamatua' Yesus 'ola' so'al atahori mana 'ingga Lamatualain sia 'a bafa na ra
21 “Dei fo hambu atahori ro'e Au rae, ‘Lamatua'!’, naeni mana na'ena hak parenda se. Te ara 'ola' sia 'a bafa na ra. Dei fo Lamatualain sia sorga timba hendi se. Huu, 'aka' atahori mana tungga teb'e-teb'e' Eni hihii-nanaun, Ana simbo nala se dad'i atahori na. 22 Dei fo lele' fai matete'en, atahori hetar rataa rae, Au ia sira Lamatua na. Ara kokoe Au rae, ‘Lamatua', e! Hai mii dui-b'engga Nenori ma. Hai 'use-'oi nitu ra mendi' Naram. Ma hai tao manad'ad'i' mata'-mata' mendi' koasa Ma.’
23 Mae ara 'aka' kokoe Au ta'o naa o, dei fo Au 'ufad'e se 'ae, ‘Hei ia ra, seka? Au nda 'uhine nggi sa, huu ama nda misod'a tungga Lamatualain hihii-nanaun sa. Dad'i dinggo' hela ia leo!’”e
Lamatua' Yesus nanori so'al atahori mahine' noo atahori nggoa' ra
24 “Atahori mana nema rena Au, fo tao tungga Au 'o'ola ngga, eni 'ona' atahori mahine', mana naririi umen sia fatu netehuu' ata. 25 Doo-d'oo ma 'ud'an monae' a nggangga losa oe' a lala. Ma sanggu anin o nema uli-fae ume naa. Te ume naa nda foi sa, huu neneneririi' sia fatu netehuu manggatee' a ata.
26 Atahori mana nema rena Au, te nda tao tungga 'o'ola ngga sa, eni 'ona' atahori nggoa' mana naririi umen sia sara'ae' ata. 27 Doo-d'oo ma 'ud'a monae' a nggangga nema losa oe a lala. Ma sanggu anin o nema uli-fae ume a boe. Ma ume a foi hendi' e losa nambalulutu.”
Atahori ra titindindii 'a rena Lamatua' Yesus nenori manaselin