Lamatua' Yesus dui nekendandaa' so'al atahori mana tao ues sia osi anggor
12
Basa naa, Yesus 'ola' nakandoo noo malangga agama Yahud'i ra malangga na ra, meser agama ra, ma lasi-lasi 'ad'at Yahud'i ra. Ana fee nekendandaa' nae, “Hambu atahori esa neu tati osi anggor esa sia rae na. Ana lutu rereo' osi a. Ma 'ali baak fo tad'a neu anggor oe na. Boe ma naririi mamana nenea naru' esa, de sela hau anggor. Basa ma, ana nad'ene osi naa neu atahori laen, fo ara ue-tao fo banggi buna-b'oa na. De ana lao nusa doo-d'oo' neu.a 
Markus 12:1-17
2 Losa fai 'etu boa anggor boe ma, tenu osi' a denu aten esa neu nisi' atahori mana tao osi a, fo no'e eni bab'anggi na. 3 Te ana losa ma, mana tao osi ra to'u rala e, de popoko e. Basa ma ara denu e bali' noo lima rou'.
4 Basa ma tenu osi' a denu aten esa fai. Te mana tao osi ra popoko langgan losa hina'-hina'. Boe ma ra'amamae' ma 'oi hendi e. 5 Basa ma, tenu osi' a denu selu' aten esa fai. Te ara tao risa e. Mae ara tao ta'o bee o, tenu osi' a denu ate na ra reu rakandoo 'a. Te mana tao osi ra popoko ruma, ma tao risa ruma. 6 Ia naa, hela 'aka' a atahori esa ena. Eni tenu osi' a ana mone 'ise susue na. Huu nda hambu dala' laen sa ena, de ana denu ana' naa. Ana du'a nae, ‘Mete ma au denu ana ngga neu, na, tantu ara simbo e noo malolole, ma ara rena e.’
7 De ana denu anan neu. Te mana tao osi ra rita ana' naa nema, boe ma ara 'ola-'ola' rae, ‘Naa! Mete dei! Tou lasi' a denu anan nema mata'! Lele' tou lasi' a mate, na, eni ia mana simbo nala basa hata-heto' naa ra. La'i fo tao tisa e, fo ata soa hata-heto na ra!’ 8 Basa ma ara humu e, de tao risa e. Boe ma ara mbia hendi ao-sisin nisi' osi dea'. Dud'uin losa 'a naa ena.”
9 Yesus dui basa ma, natane atahori monae' ra nae, “Tungga dud'u'a ma ra, na, tenu osi' a nae tao mana tao osi ra ta'o bee? Tungga Au, tantu ana nema fo tao nisa basa se. Basa naa, ana nad'ene osi anggor naa neu atahori laen fai.
10 Basa nggita se'u-tita sia Lamatualain Susura Meumaren 'oi,
‘Hambu fatu esa fo tukan ra nggari hendi ena.
Te ia naa, fatu naa dad'i neu fatu netehuu'.
11 Lamatualain mana tengga nala, ma na'e'endo fatu naa.
Naa de, ata tita malolen seli!’”b
12 Atahori moko-monaen ra rahine neu' ena rae, Yesus nggari ded'eat naa neu sira nendi' nekendandaa' naa. Sira 'ona' mana tao osi naa ra. Basa ma ara sangga dala' fo rae humu Yesus. Te ara hia atahori hetar mana hii rena Yesus nenori na. De ara lao hela E.
Atahori rae ra'atutud'a' Yesus rendi' bea bab'ae na
13 Basa ma, atahori Yahud'i ra atahori moko-monae na ra, denu atahori Farisi ba'u bee, roo atahori mia Herod'es partei na ra, reu raselu-b'ale roo Yesus, fo rae ra'atutud'a' E. 14 Boe ma ara rema, de raselu-bale roo Yesus rae, “Papa Meser! Basa hai mihine mae Papa ralan tetu', ma nda pepeko-leleko' sa. Papa mete atahori rala na ra. Papa o nafad'e Lamatualain hihii-nanaun noo relo-relo, huu Papa nda mete mata' sa. Ia naa, hai mae mitane dala' esa. Tungga hita atoran agama Yahud'in, na, hita musi bae bea neu mana parenda Roma mane monaen,c do 'afi'?”
15 Te Yesus nahine ara rae te'e-sii E, fo 'ola' lab'an mana parenda Roma. De nataa nahere' nae, “Ta'o bee de ama mae mi'itutud'a' Au noo dala' naa! Fee doi fula' esa, fo Au mete sob'a dei!”
16 Basa ma ara loo fee Ne doi fula' esa. Yesus ha'i nala, de se'u namemeu' doi' naa. Boe ma natane mbali se nae, “Gambar ia, seka mata na? Ma ia, seka nara na?”
Ara rataa rae, “Naa, mana parenda Roma mane monae na!”
17 Boe ma Yesus nae, “Mete ma ta'o naa, na, fee neu mana parenda saa fo mana parenda 'ena na. Ma fee neu Lamatualain saa fo Lamatualain 'ena na.”
Ara rena Ana 'ola' na'o naa, ma basa se ndii-ndii' a, huu Ana 'ola' ndaa. Naa de, ara nda bisa te'e-sii rala E sa.
Atahori mates ra rasod'a bali', ma atahori sao sia sorga, do hoko'?
18 Hambu partei agama laen esa, fo atahori rae, ‘partei Saduki’. Ara ranori rae, atahori mates nda bisa rasod'a bali' sa. Lao esa, hambu atahori Saduki hira rema rae te'e-sii Yesus. Ara 'ola' roo Yesus rae,d
Markus 12:18-34
19 “Papa Meser! Ba'i Musa sura' hela fee hai 'ad'at ia nae: mete ma tou' esa mate hela saon, ma ana' nese, na, tou' naa 'od'in musi sao nala ina falu naa, fo fee tititi-nonosi' neu 'a'a mana mate na.e 20 Mema' Musa nanori ta'o naa. Te hai mae mitane ta'o ia: hambu tou' hitu 'od'i-'a'a. 'A'a ka sao na'ahulu'. Basa ma ana mate, te nda maana' sa. 21 Boe ma 'od'i mana tungga eni a, sao nala bali' ina falu naa. Nda doo' sa ma, ana mate, nda hambu ana' sa boe. Od'i katelun o 'ona' naa boe. Ana sao bali' noo ina falu naa, te ana mate, ma ana' nese. 22 'Ona' naa losa 'od'i murin o mate boe. Basa ma, ina falu naa mate.
23 Ia naa, hai mae mitane ta'o ia: ina' naa sao tou' hitu ena! Te mete ma raefafo' a natete'e fo Lamatualain fee atahori mates ra rasod'a bali', na, ina' naa dad'i neu seka saon mia tou' kahitu' naa ra?”
24 Boe ma Yesus nae, “Mete ma mitane ta'o naa, naa nda mihine Lamatualain Susura Meumaren isin sa. Hei o nda mihine Lamatualain koasan sa. De hei ia ra sala ena!
25 Rena, e! Ta'o ia: sia sorga, nda hambu esa sao sa. Basa atahori mates fo Lamatualain fee se rasod'a bali', ara nda sao sa ena. 'Ona' naa boe Lamatualain ate na ra sia sorga nda sao sa boe. 26 Au o 'ufad'e so'al atahori mates ra rasod'a bali', do hoko'. Sia ba'i Musa susuran, ana sura' so'al hau ana' mana lalangge' te nda kad'e sa. Hei misined'a dud'uit naa, do hoko'? Lele' ai a mbila mia hau naa, Lamatualain nafad'e Musa nae, ‘Au ia ho ba'i ma ra Lamatualain na. Naeni ba'i Abraham, ba'i Isak, ma ba'i Yakob. Basa se be'utee neu Au losa ia nema.’f 27 Hita tahine tae, ba'i' naa ra, mate doo' ena. Te, huu Lamatualain nafad'e nae, Eni fe'e dad'i neu sira Lamatualain na, naa de hita tahine tae, ara rasod'a bali' ena. De mae atahori mate ena o, ara rasod'a bali'. Mema' atahori masod'a' mana be'utee neu Lamatualain, nda atahori mates ra sa, to? De mete ma hei to'u mikindoo nenori' mana nae, atahori mates ra nda rasod'a bali' sa, na, hei talalu sala ena!”
Sue-lai Lamatualain ma sue-lai atahori
28 Lele' naa, meser agama esa rena Yesus 'ola-'ola' noo atahori partei Saduki ra. Meser agama naa du'a nae, Yesus nataa sira noo malole'. Basa ma ana natane Yesus nae, “Papa! Au 'ae 'utane ta'o ia: hita parenda 'ad'at noo parenda agaman, naen seli. Mia basa se, bee ka lena'?”
29 Yesus nataa nae, “Parenda manaseli' sia Lamatualain Susura Meumaren, nae ta'o ia:
‘Basa atahori Isra'el ra, e! Rena matalolole!
Lamatualain naa, mema' hita Lamatuan,
ma na'ena hak parenda nggita!
Nda hambu laen sa, 'aka' Eni ena!
30 De ama musi sue-lai E lena' basa e.
Huu na, ama musi hii E nakandoo 'a,
mihine E,
ma manggate tungga hihii-nanau na.’g
31 Ma parenda' karuan nae ta'o ia:
‘Ho musi sue atahori laen, 'ona' a ho sue aom boe.’
Parenda' karua' ia ra manaseli'. Nda hambu parenda' laen lena' mia parenda' karua' ia ra sa.”h
32 Basa ma, meser agama naa 'ola' neu Yesus fai nae, “Mema'! Papa nafad'e naa, teb'e'. Lamatualain mana na'ena hak parenda nggita, ma nda hambu Lamatua' laen sa ena.i 33 Ata musi sue E lena' basa e, losa ata hii E nakandoo 'a, tahine E, ma manggate tungga hihii-nanau na. Ata o musi sue atahori laen, 'ona' a hita sue ao ta ra boe. Mete ma ata tao 'ona' naa, na, Lamatualain namaho'o lena' mia ata tao tungga 'a atoran agama hihii na. Naa malole lena' mia hita fee' a banda tutunu-hohotu', do fee sud'i 'a saa laen neu E.”j
34 Yesus rena ana nataa na'o naa ma, Ana du'a nae meser agama ia nahine noo malole' ena. Boe ma Yesus nae, “Ho mae' a dad'i Lamatualain atahorin ena.”
Basa naa ma, nda hambu atahori laen rambarani raselu-b'ale roo Yesus, huu nda hambu atahori rasenggi' E sa ena.k
Kristus, mema' mane Daud tititi-nonosin, te Eni o mane Daud Lamatuan boe
35 Lele' Yesus fe'e nanori atahori ra sia Lamatualain Ume Hule-o'e Huun, natane atahori ra nae, “Tungga hei dud'u'am, na, ta'o bee? Meser agama ra ranori rae Kristus naa, Atahori fo Lamatualain dud'u basa mia fai ma'ahulu na. Tungga sira, Eni dad'i' a mane Daud a tititi-nonosi na. Te naa nda teb'e sa.
Markus 12:35-44
‘Lamatualain nafad'e neu au lamatua ngga ena nae,
“'Uma 'endo' muu mamana malole' sia Au bob'oa 'ona ngga.
Dei fo Au tao musu ma ra losa ara ta'alok neu nggo.’”l
37a Mia naa nema ata tahine tae, mane Daud no'e Kristus nae, ‘Lamatua'’. Sosoan, mete ma atahori rae Kristus dad'i' a mane Daud tititi-nonosin, na, naa nda fe'e dai sa! Huu Eni o dad'i mane Daud lamatuan, mana na'ena hak parenda eni boe!”
Lamatua' Yesus nae besa-b'esa mbali meser agama ra pepeko-leleko na
37b Lele' Yesus 'ola' na'o naa faa' ra, ma atahori hetar hii rena E. 38 Ma Ana nafad'e selu' se nae, “Ama musi besa-b'esa mbali meser agama ra. Ara hii 'a lao-lao' rendi' sira bad'u naru na ra, fo reu randaa roo atahori, fo ara rita se, na, rae, ‘Wii! Ia ra atahori moko ra, o!’ 39 Mete ma ara risi' ume hule-o'e' a, do tungga fefetas, na, ara sangga mamana e'endo malole', fo atahori hetar rita se. 40 De besa-b'esa, e! Te ara o pepeko-leleko' ina falu ra rakandoo 'a, fo rambas rala basa ume na ra. Te sia atahori hetar matan, ara funi de'ulaka na ra, ma rambarii' hule-o'e doon seli. Ara hii 'a fo atahori rafad'e rae sira rala na ra meu'. Te dei fo Lamatualain fee huku-d'oki' beran seli neu se.”
Ina falu mana tud'a-loloe' esa fee doi kolete nae' lena' basa e
41 Basa naa ma, Yesus neu 'endo' mbali peti kolete a sia Lamatualain Ume Hule-o'e Huu na. Ana mete atahori ra rema mbed'a doi kolete neu peti a rala. Ana nita atahori mamasu'i-ma'ena' ra rema mbed'a doi kolete nae' nisi' peti rala neu. 42 Boe ma, hambu ina falu mana tud'a-loloe' esa o nema hule-o'e boe. Ana mbed'a doi' sen rua nisi' peti a rala. Doi' naa, felin mbei anak a.