Lamatua' Yesus nanori fo tulu-fali atahori mana susa' ra
6
Yesus nanori nakandoo nae, “Misined'a, e! 'Afi' tungga-tungga 'a agama hohoro-lalanen fo atahori koa-b'ob'o'u nggi. Te mete ma ama tao ta'o naa, na, hei Amam mana sia sorga nda fee nggi bala-b'ae' saa sa boe.a2 Mete ma hei nau tulu-fali atahori mana kasian ra, na, 'afi' mii bengga leli sia bee-b'ee. Te mete ma hei tao ta'o naa, na, hei 'ona' atahori mana 'ola' laen, te tao laen. Ara hii 'a lao-lao' risi' ume hule-o'e huu' a fo atahori koa se 'oi, ‘Wei, atahori ia ra, seli teb'e, o!’ Au 'ola' noo matetu'! Te noo 'a koaot 'ona' naa, ara simbo sira hahambun ena. 3 Dad'i mete ma hei mae tulu-fali atahori mana kasian ra, na, 'afi' mifad'e esa-esa boe, e! 4 Noo ta'o naa, atahori sia raefafo' ia nda rahine sa. Te hei Amam sia sorga nahine saa fo ama tao nee-nee' naa. Dei fo Ana bala-b'ae nggi noo papala-b'ab'anggi' naen seli.”
Lamatua' Yesus nanori atahori hule-o'e
5 “Lele' ama hule-o'e, na, 'afi' tao aom 'ona' atahori mana 'ola' laen, te tao laen. Ara hii 'a reu lao-lao' sia dala rarame' a, ma rambarii' sia ume hule-o'e' rala, fo atahori hetar rita ma koa-koa' se rae, ‘Wue! Sira ia, atahori meumare', o!’ Te rena, e! Te mete ma ara simbo kokoa' naa, na, ara simbo rala hahambu na ra ena.b 6 Te ama 'afi' ta'o naa. Mete ma mae hule-o'e, na, kama rala mii fo ena lelesu a. Ma hule-o'e nee-nee mbali Amam. Mae atahori nda rita nggi sa o, Amam nita nggi. Dei fo Ana bala-b'ae fee nggi papala-b'ab'anggi' naen seli.
7 Mete ma ama hule-o'e, na, 'afi' 'ola' le'u-lolo neu-nema. Te atahori nda mana rahine Lamatualain sa o hule-o'e rahine 'ona' naa boe. Ara du'a rae, mete ma hule-o'e loa-naru' 'ona' naa, na, Lamatualain hii 'a rena ma nataa se. 8 'Afi' tao tungga 'ona' se, e! Te mae ama nda fe'e mo'e saa mbali Ama' sia sorga sa o, Ana bub'ulu' mema' hei parluum ena. 9 Dad'i mete ma hule-o'e, na, hule-o'e 'ona' ia:
‘Ama' sia sorga! Ama' naram meumare manaseli'.
Hela fo basa atahori so'u rananaru Ama' nara manaseli ma.
10 Hela fo Ama' dad'i mane' soa' neu basa atahori!
Hela neu fo basa atahori tao tungga Ama' parendan sia raefafo' ia,
'Ona' basa mana sia sorga ra tao tungga Ama' parendan sia sorga.
11 Ama' tulun pala-b'anggi fee hai nanaa manad'ai' tungga-tungga fai.
12 Hai mo'e Ama' 'ose hendi basa hai sala-kilu ma ra,
'Ona' hai lilii' hendi atahori mana tao sala' neu hai boe.
13 Ama', munea hai fo hai 'afi' tao de'ulaka'.
Ma mbo'i hendi hai mia nitu a koasa na.
[Te Ama', Mane' mana na'ena koasa ma mandete-masa'a'.
Ama' mana to'u parenda' mukundoo 'a.
Hai hule-o'em ba'u 'a naa ena, Ama'. Amin.]’c
14 Te rena, e! Mete ma ama lilii' hendi atahori salan, dei fo Amam sia sorga o 'ose hendi sala-kilu ma ra boe. 15 Te mete ma ama nda nau lilii' hendi atahori salan, dei fo Ama' sia sorga o, nda nau lilii' hendi sala ma ra sa boe.”d
Lamatua' Yesus nanori atahori so'al puasa
16 “Mete ma ama hule-o'e noo puasa, na, 'afi' tao mata masaloe' 'ona' atahori mana 'ola' laen te tao laen. Huu ara tao ta'o naa fo atahori koa se rae, ‘Wii! Sira ia, atahori meumare', o!’ Te rena, e! Noo koaot naa, ara simbo rala hahambu na ra ena. 17 Te mete ma ama puasa, na, safe mata ma ra meu'-meu', ma sau langga ma ra malolole! 18 Dad'i dei fo atahori rita nggi o, nda rahine rae, ama puasa sa. Te hei Amam bub'ulu'. Dei fo Ana bala-b'ae fee nggi noo papala-b'ab'anggi' naen seli.”
Lamatua' Yesus nanori so'al ne'ed'uru hata-heto' sia sorga
19 “'Afi' tao ues nggate-nggate fo mi'id'uru hata-heto' nae-nae sia raefafo' ia. Te dei fo fufu' noo rurutu' tao nalutu se. Ma na'o ra rema bonggar fo ha'i rendi se.e 20 Te malole lena' ama nggate-nggate tao ues mi'id'uru hata-heto' nae-nae sia sorga. Te sia naa fufu' noo rurutu' a nda tao nalutu se sa. Na'o ra o nda reu bonggar fo ha'i rendi se sa boe. 21 Hei mbed'a' hata-heto ma ra sia bee, na, ne'o rala ma ra sia naa boe.”
Lamatua' Yesus nanori atahori so'al masod'a' sia manggarelo' a rala
22 “Atahori matan, 'ona' lambu mana naronda sia ralan rala. Mete ma matan manggarelo', na, ana tungga dala masod'a malole', 'ona' atahori mana lao' sia manggarelo' a. 23 Te mete ma matan mana malaafu', na, ana nda tungga dala malole' a sa, 'ona' atahori mana lao' hama-hama sia ma'ahatu' a. Dad'i mete ma manggarelo' mana sia rala ma ra dad'i ma'ahatu ena, na, hei o misod'a sia ma'ahatu manaseli' a boe.”
Lamatua' Yesus nanori atahori fo 'afi' du'a doa' masod'a na ra ta'o bee
24 “Atahori sa nda bisa tao ues teb'e-teb'e' fee neu malangga rua lao esa' sa, huu dei fo ana hii malangga esa lena' malangga laen. Boe ma ana bisa tungga malanggan esa, ma nda taoafi' neu malanggan esa ka sa. Huu naa, de nda bisa 'ola' mae, ‘Lamatualain naa, au Lamatua ngga,’ mete ma tao doi' a dad'i lamatua ma.
25 Naeni de Au 'ufad'e ta'o ia: 'afi' du'a doa' mae, au 'usod'a ta'o bee, au 'ae 'ua saa, 'inu saa, pake-nggao saa? Hei du'a mae masod'a' naa, 'aka' nanaa-nininu' a, do? Boe ma aom naa, 'aka' pake-nggao' a, do? Nda ta'o naa sa. 26 Mete sob'a mbui mana ratambele sia lalai a. Ara nda sela-nggari ma 'etu-'oru fo mbed'a nanaat sia soka-pole' ra sa. Te hei Amam sia sorga na'ab'oi se nakandoo 'a. Ana o bisa na'ab'oi nala nggi lena' se fai. Dad'i du'a malolole dei. Te Ana nile nggi lena' mbui' naa ra. 27 Mete ma atahori rambarii' sia tiro-ao fo lole-lau aon, na, ana bisa tao namanaru aon, do? Nda bisa sa! 28 Mete ma hoko', na, ta'o bee de ama fe'e du'a doa' bua-lo'as fai? Mii se'u mita buna' ra sia moo-loa'. Ara nda pod'e' 'ab'as, ma tenu-lolo sa.
29 Te rena malolole, o! Mane Soleman bua-b'a'un meulau manaseli na o, nda naseli' buna' naa ra meulaun sa. 30 Lamatualain tao mata' neu buna' mana nasod'a 'aka' fai' ia, te mbila' neu ana mate fo atahori nggari e ai rala neu. Mete ma Ana tao ta'o naa, dei fo Ana pake-nggao nggi lena' buna' naa ra. De saa de ama nda mimihere teb'e-teb'e' neu E sa?f 31 Dad'i ama sud'i boe du'a doa' mae, ‘Ata taa saa?’ do, ‘Tinu saa?’ do, ‘Pake-nggao saa?’ 32 Atahori nda mana ramahere neu Lamatualain sa, ara tao ues rita' mamate na ra fo nau hambu basa naa ra. Te ama 'afi' ta'o naa, huu hei Amam sia sorga bub'ulu' basa saa fo ama parluu' a ena. 33 Te 'aka' na hei musi milalao ue-tataos noo teb'e-teb'e' dei, boe ma musi tungga parendan, dei fo Ana fee selu' basa saa fo ama parluu' ra. 34 Dad'i 'afi' du'a doa' saa fo ama parluu mbila. Te fai' esa noo eni sususa na. Fai' ia sususan dai ena.”