3-4 Te Yesus nataa nae, “Ta'o bee, o! Hei nda misined'a ba'i Daud dud'uin sa, do? Ba'i Daud noo ana mana tungga na ra ndoe de tei na ra rad'iro-d'oro huu ndoe rala seli. Boe ma ana nisi' Lamatualain Lalaat Hule-o'en rala, de ha'i roti fo malangga agama ra fee neu Lamatualain ena, fo ara raa. Tao-tao te 'aka' malangga agama ra bole raa roti naa. Atahori laen nda bole raa sa. Basa de ba'i Daud se raa, te atahori nda rae, ara sala sa. Hei 'ona' nda baca mihine Lamatualain Susura Meumaren sa!^b 5 Te sia naa o nenesura' so'al malangga agama ra tao ues mete-se'u sia ume hule-o'e' nandaa noo fai hahae tao ues. Te ara nda hambu sala' saa sa boe.^c 6 Rena, o! Dalahulun, Ume Hule-o'e Huu' a pantiin, te 'ale' ia hambu dala' sa pantiin lena', naeni, Au, Atahori Matetu' ia. 7 Sia Lamatualain Susura Meumaren, Lamatualain nae, ‘Au hihii-nanau ngga ta'o ia: Au atahori ngga ra musi ratud'u susue-lalai' esa noo esa. Mete ma ara nda tao ta'o naa sa, na, banda tutunu-hohotu' fo ara rendi fee Au' naa, nda na'ena sosoa-ndandaa' saa sa boe.’ Naa, mete ma ama mihine malolole Lamatualain 'o'olan, ne'o ama nda fee sala' neu ana mana tungga ngga ra sa. Te ara nda tao sala saa sa boe!^d 8 Te Au ia, Atahori Matetu' a. Au 'u'ena hak 'u'etu' 'ae, atahori bole tao saa nandaa noo fai hahae tao ues.”

9 Basa naa ma Yesus lao hela mamana' naa, de nisi' sira ume hule-o'e na. 10 Sia naa, hambu tou' esa liman seri ma'amate'. Atahori Farisi naa ra rae sangga dala' fo fee sala' neu Yesus, mete ma Ana tao nahai' atahori naa, nandaa noo fai hahae tao ues. De ara ratane rae, “Tungga hita agaman hohoro-lalanen, atahori bole tao nahai' atahori nandaa noo fai hahae tao ues, do hoko'?”

11 Boe ma Yesus nataa nae, “Mete ma atahori sa bib'in esa tud'a ndola' rala neu, nandaa noo fai hahae tao ues, ne'o tenu bib'i' a neu 'o'o bib'i a dea neu, to?^e 12 Naa! Lamatualain sue atahori lena' tenu bib'i' a sue bib'i na. Huu naa, atahori bole tao dala malole' nandaa noo fai hahae tao ues.”

13 Boe ma Ana 'ola' noo atahori lima ma'amate seseri' naa nae, “'A'a, e! Loo limam nema!” Boe ma ana loo lima ma'amate seserin naa, boe ma liman hai neu' ena, 'ona' liman seri' a.

14 Rita ta'o naa ma, atahori Farisi ra ramue. De ara fela lao hela ume hule-o'e' a, boe ma ara reu rala rala' sa rae, “Ata musi sangga dala' fo tisa E!”

15 Te Yesus bub'ulu' dud'u'a de'ulaka na ra, naa de Ana lao nisi' mamana' laen. Atahori hetar tungga E, ma Ana tao nahai' basa atahori mamahed'i' ra. 16 Te Ana 'ai se nae, “Ama 'afi' mifad'e atahori laen so'al Au.” 17 Ana tao ta'o naa tungga saa fo Lamatualain nafad'e neu mana 'ola-'olan Yesaya nae,

22 Lao esa, atahori ra rendi atahori nitu tao' esa nisi' Yesus. Atahori naa matan poke' ma nda 'ola' nala' sa. Boe ma Yesus 'oi hendi nitu de na'ahahai' e. Boe ma, atahori naa nita ma 'ola' neu' ena. 23 Basa atahori rita ta'o naa, ma ara heran. Ara 'ola-'ola' rae, “Mbei ma Eni ia, Daud tititi-nonosin, fo Lamatualain mana 'ola-'ola na ra sura' mema' mia lele ulu' a. Eni ia, ne'o Atahori fo hita nea-nea' a!”

24 Te lele' atahori Farisi ra rena rala, ma ara nda simbo sa. Boe ma ara 'ola-'ola' rae, “Woe! Atahori ia bisa 'oi hendi nitu, huu nitu ra malanggan Balseb'ul mana fee Ne koasa.”^g

25 Te Yesus nahine atahori Farisi ra 'o'ola na. Boe ma nafad'e se nae, “Hei 'o'olam naa, nda na'ena sosoa-ndandaa' sa! Mete ma sia nusa' esa, rauinggu na ra rafetu-raparu, ta'o bee fo nusa' naa na'atataa'! 'Ona' naa boe mete ma atahori sia kota esa, do sia ume sa rala, esa natofa noo esa, ne'o ara sea-saranggaa losa rambalulutu, o! 26 Dad'i mete ma nitu ra bamusu' ma esa 'oi esa, na, sira malanggan nda to'u parenda' doo-d'oo sa ena! 27 Misined'a, e! Hei atahori ma ra o 'oi rahine nitu ra boe. Ara 'oi rendi' nitu a koasan, do? Hoko'! Dad'i ama 'afi' 'ola' leli mae, Au 'oi nitu ra 'endi' nitu a koasa na. Dei fo hei atahori ma ra ra'etu' ao na ra rae, saa fo ama rundu' a, nda teb'e sa. 28 Te mete ma Au teb'e-teb'e' 'oi nitu 'endi' koasa mia Lamatualain Dula-d'alen, na, naa natud'u nae, Lamatualain mema' Mane' mana sia hei mata ma ra ena.

29 Mete ma atahori rae rema ramana'o sud'i 'a saa sia atahori ma'ad'ere' sa umen, na, ana musi futu-pa'a nahere' atahori naa dei. Dei fo, ana namana'o nala atahori naa sud'i 'a saa na ra.^h

30 Misined'a malolole! Te atahori nda mana partei noo Au sa, bamusu' noo Au. Noo atahori nda mana taoafi' neu Au ue-tatao ngga sa, ana tao 'a nemue-neanggi'.ⁱ 31 Dad'i rena malolole Au 'o'ola ngga ia! Lamatualain sad'ia 'ose hendi atahori sala-kilu na ra ena. Ma mete ma atahori 'ola' nda malole' so'al atahori laen, na, Lamatualain fe'e sad'ia fee ambon neu e. Te mete ma atahori nambarani 'ola' nda malole' so'al Lamatualain Dula-d'ale Meumaren, na, Lamatualain nda 'ose hendi sala-kilun sa. 32 Mete ma atahori 'ola' de'ulaka' so'al Au, Atahori Matetu' ia, Lamatualain sad'ia fee ambon neu e. Te mete ma atahori 'ola' na'amuti-na'amuu lab'an Lamatualain Dula-d'ale Meumaren, na, Lamatualain nda 'ose hendi salan naa sa losa fai matete'en!”^j

33 Basa ma Yesus 'ola' nakandoo neu atahori Farisi ra nae, “Dud'u'a malolole! Hau huu malole' nab'oa boa malole'. Te hau huu nda malole' a sa nab'oa boa nda malole' sa. Huu mia hau a boan, atahori bisa bub'ulu' rae, hau huu' naa, malole' do hoko'.^k 34 Te hei ia ra 'ona' mengge mana peko-leleko'! Ama nda bisa 'ola' dala-d'ala malole' ra sa. Huu saa nenembed'a' sia atahori ralan, na, ana kalua tungga bafa na.^l 35 Atahori malole', tantu 'ola' dala malole', huu hambu dala-d'ala malole' nenembed'a' sia rala na. Te atahori de'ulaka', 'ola 'a de'ulaka', huu hambu dala-d'ala de'ulaka' nenembed'a' sia rala na.

36 Mimihere neu Au! Te dei fo losa fai matete'en, Lamatualain paresa' basa atahori tatao-nono'i na. Lele' naa, atahori esa-esa' musi nataa eni ded'ea-'o'olan mana nda mangguna' a sa. 37 Dad'i ma'ab'eb'esa, e! Te dei fo Lamatualain timba-tai ded'ea-'o'ola ma ra, noo na'etu' nae, ama hambu huku-d'oki' do hoko'.”

38 Lele' meser agama hira roo atahori Farisi ra rena Yesus 'ola' na'o naa, ma ara ro'e mbali E rae, “Ama Meser! Hai mae mita Ama' tao manad'ad'i manaseli', fo dad'i bukti 'oi, Ama' koasan teb'e-teb'e' mia Lamatualain.”^m

39 Te Yesus bua se nae, “Wuih! Hei atahori 'ale' ia, nda nau tao rerena' neu Lamatualain sa! Ama mihine 'a tao de'ulaka'! Mae ama mo'e manad'ad'i manaseli' o, Au nda fee sa. Huu fe'esa'an Lamatualain fee manad'ad'i' nendi' mana 'ola-'olan Yunus. Naa dai ena!ⁿ 40 Yunus leo rerelo' telu, ma tetemba' telu mia 'u'u monae' a 'ambun rala. Au o 'ona' naa boe, Atahori Matetu' ia. dei fo Au leo rerelo' telu, ma tetemba' telu sia lua fatu', atahori mates ra mamana na.^o 41 Dei fo sia fai matete'en, mete ma Lamatualain dad'i mana nggero-furi, na, atahori Niniwe ra rambarii' dad'i sakasii fo rundu nggi rae, ‘Basa hei ia, nggoa'!’ Fe'esa'an, atahori Niniwe ra rena Lamatualain mana 'ola-'olan Yunus, de ara doa' ma lao hela sala-kilu na ra. Te hei hoko'. Tao-tao te, 'ale' ia hambu Atahori sia hei talad'a ma ra manaseli' lena' Yunus, naeni Au ia. Te ama nda nau taoafi' neu Au mbei sa boe.^p 42 Dei fo sia fai matete'en, lele' Lamatualain dad'i mana nggero-furi, na, ina mane Seba mia seri' 'ona o, nambarii' dad'i sakasii. Ana dud'u fo rundu basa mana masod'a' 'ale' ia nae, ‘Basa hei ia ra, nggoa', e!’ Fe'esa'an, ina mane' a nema mia doo-d'oo' fo nita noo mata aon mane Soleman mahine na. Tao-tao te, 'ale' ia hambu Atahori sia talad'a ma ra manaseli' lena' mane Soleman, naeni Au ia. Te ama nda taoafi' mbei neu Au sa boe.”^q

43 “Mete ma nitu nene'oi hendi' mia atahori esa, nitu a neu nisi' mamana rou' fo sangga mamana hahae'. Te ana nda hambu mamana malole' sa. 44 Boe ma ana dud'u'a nae, ‘Hee! Nda hambu mamana' sa, de malole lena' au bali' 'isi' atahori fo fe'esa'an au leo mia' a.’ Basa ma ana bali', ma nita mamana' naa, meu' ma nenetao malole' ena. 45 Boe ma nitu naa neu no'e nonoon hitu, de'ulaka na ra seli lena' e fai. Boe ma basa se reu leo sia atahori naa, ma ara poko-paru randaa e. Dad'i 'ale' ia, atahori naa masod'an de'ulakan seli. 'Ona' naa boe, atahori sia fai-fai ma'ab'ui' ia ra.”^r

46 Lele' naa, Yesus fe'e 'ola' noo atahori hetar. Boe ma maman noo 'od'i na ra rema rae randaa roo E. Ara riirii mia 'a ume dea' de denu atahori reu ro'e E. 47 Boe ma atahori reu rafad'e rae, “Ama', e! Ama' maman noo 'od'i ma ra sia dea'. Ara rae randaa roo Ama'.”^s

48 Boe ma Yesus nataa nae, “Au mama ngga, seka? Ma Au toronoo ngga, seka?” 49 Ma Ana dud'u atahori mana tungga E, de nafad'e nae, “Mete, huu ia ra Au mama ngga ma toronoo ngga ra. 50 Huu atahori mana tao tungga Ama ngga sia sorga hihii-nanaun, sira Au bob'onggi matetu ngga ra.”