Lamatua' Yesus nanori atahori sia lete' ata
5
Lele' Yesus nita atahori hetar rema tungga E, ma Ana hene nisi' lete ana' sa, de 'endo' neu naa. Ana mana tungga na ra fo pili nala' ra, rema deka-d'eka fo rena E. 2 Boe ma Ana mulai nanori se nae,Atahori mana 'onton teb'e-teb'e' a
3 “Atahori mana tud'a-loloe' ma du'a rae sira parluu Lamatualain, ara 'onton,
te 'aka' Lamatualain mesa' ne, sira Mane malole na.
4 Atahori mana ramed'a susa-sona' ra 'onton,
huu Lamatualain mesa' ne mana tao se ramaho'o.a
5 Atahori anak ra 'onton,
huu dei fo ara simbo basa papala-b'ab'anggi' fo Lamatualain helu-fuli' a.b
6 Atahori mana nau tungga Lamatualain dala ndoo-tetun ra 'onton,
huu dei fo Ana tao fee se ramed'a dai.c
7 Atahori mana ratud'u rala kasian ra 'onton,
huu dei fo Lamatualain kasian se boe.
8 Atahori rala meumare' ra 'onton,
huu dei fo sira hambu rita Lamatualain.d
9 Atahori mana tao mole-d'ame' ra 'onton,
huu dei fo Lamatualain nae, ‘Sira, Au ana ngga ra.’
10 Atahori mana nenetao doid'oso' huu tungga Lamatualain ra 'onton,
te 'aka' Lamatualain mesa' ne, sira Mane malole na.e
11 Mete ma atahori laen tao doid'oso nggi huu ama tungga Au, ama 'onton boe. Mete ma ara 'ola' de'ulaka nggi, ma dui-b'engga peko-leleko' tao ma'afoo nara ma ra, na ama o 'onton boe.f 12 'Ona' mae ta'o naa o, ama musi tao ao ma ra ramaho'o ma rala ma ra ma'ahee 'a, huu Lamatualain sad'ia bala-b'ae bab'anggi ma ra naen seli sia sorga. Te misined'a, e! Nda 'aka' hei hambu doid'oso' 'ona' naa sa, te dalahulun atahori ra o tao dala de'ulaka' 'ona' naa neu Lamatualain mana 'ola-'ola na ra boe.”g
Atahori mana tungga Lamatua' Yesus, 'ona' masi' noo manggarelo' a
13 “Mete ma tae tao nanaat a malad'a, na, ata parluu tao masi' neu dei. 'Ona' naa boe atahori mana rasod'a sia raefafo' ia, ara parluu nggi. Te mete ma masi' a, mami ena, na, sosoan saa fai? Nggari hendi sia dala' fo nenetab'u-roroo'.h
14 Hei o musi misod'a 'ona' lambu, fo atahori hetar rita noo malole'. Ama musi mbila manggarelo', 'ona' kota mana sia lete' ata, fo atahori mete rita.i 15 Atahori mana nambila' lambu te'oek, nda tao lambu a neu hura rae a rala sa. Te ara mbed'a' lambu a sia mamana naru', fo naronda neu basa ume rala.j 16 Ama o musi misod'a 'ona' naa boe. Ama musi mironda, fo atahori laen rita masod'a malole ma ra boe. Rita ta'o naa dei fo ara koa-kio Lamatualain rae, ‘Wee! Hei Amam sia sorga, mandete-masa'a', o!’”k
Lamatua' Yesus nema tao natetu Lamatualain hohoro-lalanen
17 “Ama 'afi' du'a mae, Au raefafo' 'uma ia, fo 'ae 'umopo' hendi Lamatualain hohoro-lalanen fo Ana fee neu ba'i Musa a. Boe ma 'afi' mae Au nda taoafi' neu saa fo Lamatualain mana 'ola-'ola na ra 'ola' mema' eni' a lele ulu' a. Huu Au 'uma ia, 'ae tao basa' e dad'i 'ona' basa dala' fo ara 'ola' mema' a. 18 Huu naa de, rena malolole, e! Lalai noo raefafo' nda fe'e bisa rambalulutu sa, mete ma basa e nda fe'e dad'i tungga Lamatualain hohoro-lalane na ra sa. Mae 'aka' titik do koma esa o nda bisa nene'ose hendi' sa.l 19 Mia basa Lamatualain atahori na ra, mete ma ruma ralena-langga Lamatualain hohoro-lalanen, huu ana du'a nae, ‘Hee! Hohoro-lalane' ia, anad'iki' a, nda na'ena sosoan saa sa boe!’ Basa ma ana nanori 'ona' naa fee neu atahori laen, dei fo Lamatualain sia sorga tao e dad'i 'a anad'iki'. Te atahori mana tao tungga basa Lamatualain hohoro-lalanen, ma ana nanori 'ona' naa neu atahori laen, dei fo Lamatualain tao eni dad'i atahori mana na'ena ngguna'. 20 Mimihere Au! Mete ma hei nda misod'a ndoo-tetu' malole lena' meser agama roo atahori partei Farisi ra sa, na, hei nda bisa dad'i Lamatualain atahorin sa.”
Lamatua' Yesus nanori atahori ra fo esa 'afi' namanasa esa
21 “Hei bub'ulu' ba'i Musa hohoro-lalanen fo ana nafad'e mema' neu bei-ba'i ta ra nae, ‘'Afi' misa atahori, te se nisa atahori, dei fo ana hambu huku-d'oki'.’m 22 Te Au 'ae 'ufad'e ta'o ia: esa 'afi' miminasa esa, te seka namanasa toronoon, dei fo nenehuku-d'oki'. Atahori mana namue toronoon nae, ‘Nggoam 'ona' 'ee!’ Dei fo atahori naa musi neu nataa sia lasi-lasi agama ra mata na. Boe ma atahori mana bua toronoon nae, ‘Nggoa', e!’, dei fo nenehuku-d'oki' sia ai naraka.
23 Dad'i mete ma mae mendi tutunu-hohotum neu Lamatualain, te musuned'a toronoom fe'e namanasa nggo, 24 na, 'afi' mbed'a' tutunu-hohotum dei. Muu dame moo toronoom dei, dei fo fe'e na muu mbed'a' tutunu-hohotum fee neu Lamatualain.
25 Mete ma hambu atahori nae tao ded'eat noo nggo, na, malole lena' muu dame lai-lai moo e leo. Mete ma hoko', na, dei fo atahori naa noo nggo muu mutaa sia mana nggero-furi' a. Basa fo mana nggero-furi' a fee nggo misi' polisi, boe ma ara tao nggo bui rala muu. 26 Au 'ola' ia teb'e-teb'e'! Dei fo leo mukundoo sia bui rala losa bae basa hutam dei.”
Lamatua' Yesus nanori atahori fo 'afi' hohongge
27 “Hei bub'ulu' ba'i Musa hohoro-lalanen nae, ‘'Afi' hohongge.’n 28 Te Au 'ae 'ufad'e ta'o ia: atahori boti' matan fo mete ina' sa, ma ralan hii nae sunggu' na'ab'ue noo e, na, tou' naa hohongge noo ina' naa sia ralan ena. 29 Mete ma tao sala' mendi' mata 'onam, na, 'ed'o hendi' e. Huu malole lena' sorga muu mendi 'a matam seri, 'afi' losa ara nggari nggo misi' ai naraka muu mendi matam ru'a se.o 30 Ma mete ma tao sala' mendi' lima 'onam, na, nggero hendi e. Te malole lena' sorga rala muu mendi 'a limam seri, te 'afi' losa ara nggari nggo misi' ai naraka noo limam ru'a se.”p
Lamatua' Yesus nanori nae 'afi' mahela'
31 “Hei bub'ulu' ba'i Musa hohoro-lalanen nae, ‘Atahori mahela' noo saon, na, ana musi fee susura mahela' neu ina' a.’q 32 Te Au 'ufad'e ta'o ia: mete ma hambu atahori mahela' noo saon, tao-tao te saon nda hohongge, sa, ma ina' naa sao selu', na, 'ona' sao ulun tao e hohongge. Ma mete ma hambu tou' sa sao nala ina' mana hela hendi' sa, na, ru'a se o hohongge boe.”r
Lamatua' Yesus nanori so'al hehelu-fufuli'
33 “Hei bub'ulu' ba'i Musa hohoro-lalanen fo ana nafad'e neu bei-ba'i ta ra nae, ‘Mete ma ho helu-fuli pake susumba' mendi' Lamatualain naran, na, ho nenepa'a' moo hehelu-fufuli' naa ena.’s 34 Te Au 'ufad'e ta'o ia: mete ma helu-fuli, na, 'afi' pake susumba'. 'Afi' sumba mendi' sorga naran, huu sorga naa, Lamatualain mamana leleo na.t 35 'Afi' sumba mendi' raefafo' naran, huu raefafo' naa Lamatualain ei tatab'un boe. Boe ma 'afi' sumba mendi' Yerusalem naran, huu Yerusalem naa o, Mane Monae' a kotan boe.u 36 'Afi' sumba mendi' langga ma ra. Te hei nda mi'ena koasa fo parenda langga fulu ma ra esa fo dad'i nggeo' do muti' sa boe. 37 Dad'i mete ma ama mae helu-fuli mae, iya, na, mifad'e mae, ‘iya’. Do mete ma hoko', na, mae ‘hoko'’. Mete ma hei 'ola' lena' naa fai, na, naa na'oka sia nitu ra ena.”
Lamatua' Yesus nanori nae 'afi' bala-b'ae de'ulaka' noo de'ulaka', te musi mete-se'u noo malole' lena'
38 “Hei bub'ulu' ba'i Musa hohoro-lalanen nae, ‘Mete ma hambu atahori tao ralutu matam, na, bala-b'ae tao mulutu matan boe. Ma mete ma hambu atahori tao ra'ou' nisim, na, tao mu'ou' nisin boe.’v 39 Te Au 'ae 'ufad'e ta'o ia: 'afi' bala-b'ae de'ulaka' noo de'ulaka'. Mete ma atahori mbasa nasum seri, na, hela fo ana mbasa selu' nasum seri fai. 40 Mete ma hambu atahori rae rad'ed'ea roo nggo, fo rae ha'i rala bad'um, na, fee bad'u mafeli' lena' neu boe. 41 Mete ma hambu sold'ad'u esa na'asusuu' nggo lao' ma lemba mendi sud'i 'a saan dod'oon kilo esa, na, lemba mendi e dod'oon kilo rua leo. 42 Mete ma hambu atahori ro'e saa mia nggo, na, fee neu leo. Ma mete ma hambu atahori rae pindan sud'i 'a saa ma, na, fee neu' ena.”
Lamatua' Yesus nanori fo sue atahori mana binci hita
43 “Hei rena atahori rae, ‘Sue toronoo ma ra, ma binci atahori mana binci nggo.’w 44 Te Au 'ufad'e ta'o ia: musi sue atahori mana binci nggo. Ma mo'e Lamatualain fee papala-b'ab'anggi' neu atahori mana tao doid'oso nggo. 45 Mete ma tao ta'o naa, na, mutud'u mae, ho ia Amam mana sia sorga ana na. Huu Ana tao relo a naronda fee neu atahori malole' ma fee neu atahori de'ulaka ra boe. Ana o na'onda' 'ud'an fee neu atahori mana tungga parendan ma atahori mana lab'an parendan boe. 46 Dad'i mete ma sue 'aka' atahori mana sue nggo, na, du'a mae Lamatualain musi bala-b'ae nggo papala-b'ab'anggi', do? Hoko'! Te atahori de'ulaka' o sue nonoo mana sue sira boe. 47 Dad'i mete ma ho fee sod'a-mole' neu 'a nonoom, na, lenan saa? Te atahori nda mana ramahere neu Lamatualain sa o tao 'ona' naa boe. 48 Dad'i musuned'a, e! Amam mana sia sorga sue basa atahori. Dad'i ho musi tao tungga ta'o naa boe.”x