Lamatua' Yesus fee nesenened'a' fo besa-b'esa roo meser agama ra ma atahori Farisi ra
23
Basa ma Yesus nanori ana mana tungga na ra, roo atahori hetar mana tungga se. 2 Ana nafad'e nae, “Meser agama ra roo atahori Farisi ra to'u hak fo ranori ba'i Musa hohoro-lalane na ra. 3 Huu naa, hei musi rena se ma tungga nenori na ra. Te 'afi' tungga saa fo ara tao' ra, huu ara nda tao tungga sira nenori na ra sa. 4 Ara ra'asusuu' atahori fo lemba-d'oi agama hohoro-lalane mamabera na ra. Te sira mesa' se nda nau tulu-fali atahori fo tao tungga hohoro-lalane' naa sa. 5 Basa saa fo ara tao 'a, ara tao fo atahori koa-b'o'u se. 'Ona' a: saa esa isin Lamatualain Ded'ea-'o'olan fo atahori rea sia langga na ra, ma feo sia lima na ra. Te ara bau tao ra'amoko sira 'ena na. Ma ara o tao rananaru lena' tali' mana sia bad'u naru na ra suun, fo mana fee nesenened'a' neu se so'al Lamatualain Ded'ea-'o'ola na. Ara tao ta'o naa, fo atahori koa-b'o'u se rae, ‘Wee! Naa ra dei, atahori meumare' ra, o!’a 6 Mete ma ara ume hule-o'e' rala reu, do tungga fefetas, na, ara sangga 'a mamana 'e'endo meulau', fo atahori hetar rita se. 7 Mete ma ara reu sia pasar, na, ara o hii 'a simbo had'a-hormat. Ara hii 'a fo atahori be'utee mbali se 'oi, ‘Ama meser nenefee had'a-hormat.’ 8 Te ama 'afi' tungga naa ra dalan! Atahori nda bole ro'e nggi rae, ‘ama meser’, huu hei Meser ma 'aka' esa' a. Boe ma basa hei ia ra, bob'onggi' esa. 9 'Afi' minanaru atahori sia raefafo' ia mae, ‘ama'’, te hei Amam sia sorga 'aka' esa' a. 10 Atahori ra o nda bole ro'e nggi na rae, ‘lamatua'’, te huu hei Lamatuam mana hak parenda hei, 'aka' esa 'a, naeni Au ia, fo Lamatualain helu-fuli nae haitua nema eni' a mia lele ulu' a ena. 11 Naa de Au 'ufad'e nggi fo 'afi' minanaru ao ma ra 'ona' atahori mana hii 'a sangga had'a-hormat. Hei seka mae dad'i atahori moko-monaen, na, ana musi dad'i 'ona' ate fo mete-se'u atahori laen ra.b 12 Te atahori mana so'u nanaru aon, dei fo Lamatualain na'atutud'a' E. Te atahori mana tao aon 'ona' atahori anad'iki' e, dei fo Lamatualain so'u nanaru e.”c
Lamatua' Yesus 'ena-'ai malangga agama Yahud'i ra malangga na ra, huu ara 'ola' laen, te tao laen
13 Basa ma, Yesus tute 'o'olan nae, “Hee, hei meser agama ma atahori Farisi ra, e! Mema' hei, atahori mana dea-rala'! Dei fo ama hambu sosoe', huu hei nda nau maso' misi' Lamatualain parendan fo mimihere Au sa, naeni Atahori fo Lamatualain helu-fuli nae haitua nema' a. De'ulakan lena' fai, hei mii mi'inggee mala atahori mana nau maso' nisi' Lamatualain parendan fo ara nda ramahere neu Au sa.
14 [Hee, hei meser agama ma atahori Farisi ra! Mema' hei, atahori mana dea-rala'! Dei fo ama hambu sosoe', huu hei 'aka' peko-leleko' ina-falu ra, ma lea mala ume na ra. Te sia atahori hetar matan, hei mi'ifuni' de'ulaka ma ra, ma mimbirii' hule-o'e doo' fo atahori rae hei rala ma ra meumare'. Te dei fo Lamatualain hukun nggi beran seli.]d
15 Hee, meser agama ma atahori Farisi ra, e! Mema' hei, atahori mana dea-rala'! Dei fo ama hambu sosoe' huu hei sae 'ofa' sud'i 'a bee mii, ma 'onda-hene lete' o, mae sangga 'aka' atahori esa 'a, fo ana tungga hei partei agama ma. Te mete ma ana tungga ena, na, hei tao masod'an dad'i de'ulakan lena' fai, losa ana hambu hukun sia naraka beran lena' lao rua mia hei e.
16 Weh, Hei rala ma ra poke' ra ena, te ta'o bee de hei fe'e mae mitud'u dala' fee neu atahori laen fai? Ne'o ama hambu sosoe' huu ama minori leli mae, ‘Mete ma atahori rae so'u hehelu-fufuli' rendi' susumba' ma 'ingga Ume Hule-o'e Huu' a, na, atahori naa nda nenepa'a' noo hehelu-fufuli' naa sa. Te mete ma ana so'u hehelu-fufuli' nendi susumba ma 'ingga lilo mbilas mana sia Ume Hule-o'e' a, na, eni fe'e nenepa'a' noo hehelu-fufuli' naa ena.’ 17 Hei ia ra atahori nggoa mate'e ra! Ne'o hei mae Lamatualain nae lilo mbilas pantiin lena' Eni Ume Hule-o'e Huun, do? Hoko'! Te ume naa, mana tao lilo mbilas naa ra dad'i meumare'!
18 Hei o minori leli mae, ‘Mete ma atahori so'u hehelu-fufuli' noo susumba' 'ingga nendi' mei tutunu-hohotu' mana sia Ume Hule-o'e Huu' a, na, atahori nda nenepa'a' noo hehelu-fufulin naa sa. Te mete ma ana so'u hehelu-fufuli' noo susumba' 'ingga nendi' tutunu-hohotu' mana sia mei ata, na, eni fe'e na nenepa'a' noo hehelu-fufulin naa ena.’ 19 Hei ia ra, poke teb'e-teb'e' ra ena. Mema' mei tutunu-hohotu' naa, pantiin lena' tutunu-hohotu' mana sia mei ata. Huu mei naa, mana tao tutunu-hohotu' naa ra dad'i meumare' soa' neu Lamatualain. 20 Huu naa, mete ma atahori sumba ma 'ingga mei tutunu-hohotu', na, malole lena' 'ingga mei a noo basa saa mana sia mei ata boe. 21 Ma mete ma atahori sumba noo 'ingga Ume Hule-o'e Huu' a, na, malole lena' 'ingga lao esa' Ume Hule-o'e' a noo Lamatualain naran boe. Huu Ana leo sia naa. 22 Ma mete ma atahori sumba ma 'ingga sorga, na, naa o, 'ona' ana 'ingga lao esa' Lamatualain kad'era parendan noo naran ena boe, huu Ana mana 'endo' to'u parenda' sia naa.e
23 Hee, hei meser agama ma atahori Farisi ra, e! Mema' hei, atahori mana dea-rala' ra! Dei fo ama hambu sosoe', huu hei mihine bareken fo fee neu Lamatualain bab'anggi' esa mia bab'anggi kasanahulu' ra. Hei 'aka' bareken basa-b'asa' e, losa bumbu-d'ai mana mia osi o, hei reken mates boe. 'Ona' a hei reken lutu'-lelo': dare, 'ad'as ma'ameni', ma jintan deke'. Tao-tao te ama lilii' hendi Lamatualain hohoro-lalanen pantiin manaseli na ra! Hei misod'a nda noo ndoo-tetu' sa. Hei nda sue atahori mana tud'a-loloe' ra sa. Hei nda misod'a mikindoo tungga Lamatualain hihii-nanaun sa. Malole lena', ama tao tungga basa naa ra dei, dei fo ama mii bareken bumbu-d'ai, fo mae fee neu Lamatualain.f 24 Hei rala ma ra poke' ra ena, te ta'o bee fo mae mii mitud'u dala' neu atahori fai? Hei tao hohoro-lalane' losa lutu'-lelo' fo denu atahori laen ra tungga, te Lamatualain hohoro-lalanen pantiin manaseli na ra, hei nda tungga sa. 'Ona' hei paresa' lutu'-lelo' fo sula hendi mbene mumuu' mia hei oe nininum. Te banda monae' 'ona' 'amba, na, hei 'od'o hendi e teme-teme!
25 Hee, hei meser agama ma atahori Farisi ra, e! Mema' hei, atahori mana dea-rala'! Dei fo ama hambu sosoe', huu hei safe mala pingga'-manggo ra losa rakahahad'o', te naa 'aka' sia 'a dea'. Tao-tao te sia rala' manggenggeo' a mamafafau' noo nggeo' lao mia nana'o ma ra ma bare-na'o ma ra.
26 Weh! Atahori Farisi poke-laka' ra, e! Safe mi'ihulu' pingga'-manggo ma ra rala na ra dei! Noo ta'o naa, dea na ra o dad'i meu' boe!
27 Hee, hei meser agama noo atahori Farisi ra, e! Mema' hei, atahori mana dea-rala'! Dei fo hei hambu sosoe', huu hei ia 'ona' rates mana dama muti'. Atahori mete rita dean meulaun seli. Te ralan naa, sofe' noo atahori mates ra rui na ra, ma basa mana ma'afoo mburu' ra.g 28 Hei o 'ona' naa boe! Hei hii 'a tao ao ma ra 'ona' atahori meumare' ra. Atahori ra mete nggi ta'i dea' na, hei 'ona' atahori rala ndoos. Tao-tao te rala ma ra, sofe' noo dala de'ulaka'. Huu hei 'ola' laen, te tao laen, ma lilii' hendi Lamatualain parenda na ra.
29 Hee, hei meser agama ma atahori Farisi ra, e! Mema' hei, atahori mana dea-rala'! Dei fo ama hambu sosoe'! Ama tao rates monae-monae' fee Lamatualain mana 'ola-'ola na ra, ma paroon malole-malole' atahori malole' ra rate na ra. 30 Te hei mae, ‘'Ona' hai misod'a lele' esa moo bei-ba'i ma ra, ne'o hai nda tungga tao misa Lamatualain mana 'ola-'ola na ra sa.’ 31 Noo ta'o naa, hei mikimbembela tatao-nono'i ma ra mae, hei o de'ulaka' 'ona' bei-ba'i ma ra boe. 32 Dad'i malole lena', hei tao de'ulaka' 'ona' naa losa bab'asan, tungga bei-ba'i ma ra sala-kilu na ra!
33 Hei ia ra de'ulaka' teb'e-teb'e' 'ona' mengge maraso'. Se'u te hei mae Lamatualain nda hukun nggi sa? 'Afi' mimihena! Ne'o Ana nggari nggi misi' ai naraka rala mii! 34 Rena, e! Dei fo Au haitua fee nggi mana 'ola-'ola ngga ra, fo ara ranori ma ratud'u nggi Lamatualain dala masod'a ndoo-tetu na. Te ne'o ama tao misa ruma, ma mbaku misa ruma sia hau nggangge'. Hei o li'u ruma sia ume hule-o'e' boe, ma hei poko-paru ruma losa ara rela mia kota esa risi' kota laen. 35 Fe'e fai dalahulun hei bei-ba'i ma ra tao risa Habel. Tao-tao te eni, atahori rala ndoos. Hei be'i-ba'i ma ra tao risa atahori rala ndoos ra, rakandoo 'a mia tititi-nonosi' esa losa tititi-nonosi' laen ra. Losa nala Sakaria, naeni Barakia ana na. Ara tao risa e mia Ume Hule-o'e Huu' a sod'an deka noo mei tutunu-hohotu' a. Huu hei tungga bei-ba'i ma ra de'ulaka na ra naa, naa de hei musi lemba-d'oi basa atahori rala ndoos ra raa na ra. 36 Mema' teb'e! Te hei mana fe'e sia lele' ia, dei fo nenehukun, huu dala-d'ala de'ulaka' ra fo hei bei-ba'i ma ra tao mia lele ulu' a.”
Lamatua' Yesus kasian atahori Yerusalem ra
37 “Hei atahori Yerusalem ra, e! Hei mana 'aka' tao misa Lamatualain mana 'ola-'ola na ra, ma mbia misa ded'enu na ra fo mana rema tulu-fali hei' ra. Au 'aka' kokoe 'usufafali nggi fo 'ima misi' Au, 'ona' manu ine a nae nasarorombo nala ana na ra sia lid'an rala. Te hei nda nau sa. 38 Huu naa, Lamatualain nda taoafi' neu ume ma ra sa ena. Ma mbila do fini-esa' te rou' ena. 39 Rena malolole, e! Huu hei nda 'afi' mita Au sa ena, losa lele' hei mitaa mae, ‘hai mo'e fo Lamatualain fee papala-b'ab'anggi' fee neu Atahori ia, huu Lamatualain mana denu E.’ Hei mitaa 'ona' naa, dei fo hei fe'e na mete-mita Au fai.”