Lamatua' Yesus fee nekendandaa' fini sia rae mata'-mata'
4
Lao esa, Yesus neu selu' sia dano Galilea. Boe ma atahori manaheta' rema heo rala E. Ma Ana hene neu 'endo' sia 'ofa' mana nafu' esa ata, de nanori se. Basa atahori mana sia mad'a' ata ra, rena E.a
Markus 4:1-20
3 “Ama rena malolole! Hambu atahori esa neu nggari fini sia osi na. 4 Lele' ana nggari fini ra, ruma tud'a sia dala ata. De mbui' ra rema bito hendi basa fini naa ra. 5 Fini ruma tud'a sia rae fatu-fatu'. De losa' ma, ara mori. Te huu rae a ni'is, 6 de lele' relo a boti' boe, ma numbu' naa ra male, de meto hendi se. Huu 'oka na ra nda maso' losa rala sa.
7 Fini ruma fai tud'a sia uru lasi manggou-mahinat. Boe ma uru lasi a hapi nisa numbu' naa ra, losa ara nda bisa rambule sa. 8 Ma fini ruma fai tud'a sia rae isi' a. De ranumbu, ra'amoko, rab'una, ma rab'oa. Ruma rab'oa bali' ded'esin losa telu nulu, ruma nee nulu, ma ruma fai losa natun esa.
9 De see mandiki', na, rena malolole!”
Ta'o bee de Lamatua' Yesus 'ola' nendi' nekendandaa'
10 Boe ma lele' Yesus hela' a mesa' ne, ma mana tungga kasanahulu rua na ra, roo atahori laen hira mana rena rala Eni nenorin naa, rema randaa roo E. Ara ro'e fo Ana nafad'e nekendandaa' naa sosoa na. 11 Boe ma Yesus nataa nae, “Huu ama mae mihine teb'e-teb'e' Lamatualain parendan, naa de Au 'ufad'e mema' nekendandaa' naa sosoa na. Te mete ma atahori laen, na, Au 'unori 'endi' a nekendandaa'. 12 Atahori laen naa ra 'ona' Lamatualain mana 'ola-'olan sura' mema' nae,
‘Ara rita ena, te nda nau rahine sa.
Ara rena ena, te nda nau taoafi' sa.
Hela fo ara 'afi' ramahere Lamatualain,
fo Lamatualain nda parluu fee ambon neu sala na ra sa.’”b
Lamatua' Yesus nafad'e nekendandaa' fini naa sosoa na
(Matius 13:18-23; Lukas 8:11-15)
13 Basa ma, Yesus nafad'e se nekendandaa' naa sosoan nae, “Mete ma hei nda fe'e mihine nekendandaa' ia sosoan sa, na, ta'o bee fo hei bisa mihine nekendandaa' laen sosoa na? 14 De sosoan, ta'o ia: atahori mana nggari fini naa, 'ona' atahori mana 'ola-'ola' Lamatualain Ded'ea-'o'ola na. 15 Fini mana tud'a sia dala' ata losa mbui' ra bito hendi se, 'ona' atahori mana rena Lamatualain Ded'ea-'o'ola na. Te nda doo' sa ma, nitu ra malanggan nema ha'i nendi Ded'ea-'o'ola' naa mia atahori naa rala na. 16 Fini mana tud'a sia rae fatu-fatu' naa, 'ona' atahori mana rena ma simbo nala Ded'ea-'o'ola' naa noo rala nemeho'ot. 17 Te Ded'ea-'o'ola' naa, nda na'oka sa. Naa de nda nenembed'a doo' sia atahori ralan sa. Lele' atahori laen tao na'asususa' e huu ana simbo Ded'ea-'o'ola' naa, na, ana mbo'i hendi e neu' ena. 18 Ma fini mana tud'a sia uru lasi manggou-mahinat naa, 'ona' atahori mana rena nala Ded'ea-'o'ola' naa. 19 Te ana 'aka' tasib'u noo tataos mata'-mata', fo bisa nasod'a noo su'i-b'etas. De tataos naa ra seti hendi Ded'ea-'o'ola' naa mia ralan, losa nda hambu buna-b'oa' sa. 20 Te fini mana tud'a sia rae isi' a, 'ona' atahori mana rena ma simbo nala Ded'ea-'o'ola' naa, ma tao tungga Lamatualain hihii-nanau na. Boe ma tao' a dala-d'ala malole' ra, 'ona' fini mana mab'una-mab'oa' a. Ruma rab'oa bali' ded'esin losa telu nulu, ruma losa nee nulu, ma ruma losa natun esa.”
'Afi' tatana lambu mendi' boa
21 Yesus 'ola' nakandoo mia 'ofa' naa ata. Ana fee selu' nekendandaa' esa fai nae, “Ona bee! Hei mete mita atahori nambila' lambu, basa ma ana tatana e nendi' boa, do? Do ana mbed'a e sia mamana susunggu' a rae', do? Hoko', to? Mete ma mbed'a' ta'o naa, na, nda manggarelo' sa ena. Atahori musi mbed'a' lambu neu mamana naru' fo hambu manggarelo'.c
Markus 4:21-41
22 Dad'i saa mana nenefuni' lele' ia, dei fo nenenita'. Saa fo atahori nda rahine lele' ia sa, dei fo nenenehine'.d 23 De see mandiki', na, rena malolole.
24 Du'a malolole! Mete ma hei uku-uli atahori laen tatao-nono'in, na, atahori o uku-uli hei tatao-nono'im 'ona' naa boe. Lamatualain o uku-uli tatao-nono'i ma ra 'ona' naa boe. Te Eni uku-ulin, beran lena'.e
25 Mete ma atahori nau sangga teb'e-teb'e' Lamatualain hihii-nanaun, na, ana boe nahine. Te mete ma atahori nda nau taoafi' neu Lamatualain hihii-nanaun sa, na, ana boe namanggoa.”f
Lamatua' Yesus fee nekendandaa' fini mana mori ao'
26 Basa ma Yesus tute 'o'olan nae, “Lamatualain nusa'-namon boe na'amoko 'ona' fini fo atahori nggari sia osi na. 27 Mae atahori naa bali', sunggu'-fela, ma nda nasaned'a fini naa sa ena, te fini naa nanumbu ma na'amoko nakandoo 'a. 28 Fini naa nasod'a aon sia rae a, nad'ana, nab'una, losa naisi. 29 Mete ma are a huni-huni ena, na, tenu osi' a nahine' a nema 'oru. Lamatualain nusa'-namon o 'ona' naa boe. Basa naa ra, Lamatualain mana ue-tao.”g
Lamatua' Yesus fee nekendandaa' deke anad'iki ana'
30 Basa ma, Yesus tute 'o'olan nae, “Au fee selu' nekendandaa' esa fai, 'ona' ia: ama bisa mi'isasama' noo Lamatualain atahori na ra. Fefeun sira hid'a' a, te bau doo', ma bau ramaheta. 31 Naa 'ona' a deke anad'iki ana'. 32 Te lele' ata sela e, ana mori dad'i hau huu ine'. De mbui ra rema sangga mafo' fo randuna sia ata.”
33 Yesus nanori se, nandaa noo mahine na ra. 34 Ana biasa nanori atahori laen ra nendi' nekendandaa'. Te mete ma nanori mana tungga na ra, na, Ana nafad'e nekendandaa' ra sosoa na ra.
Lamatua' Yesus tao namalino sanggu anin
35 Bob'o na boe, Yesus fe'e sia 'ofa' ata. Ma Ana no'e mana tungga na ra nae, “'Ima fo tisi' dano seri'.”
36 Basa ma ara sae 'ofa' roo Yesus. De ara lao hela atahori hetar sia naa. Te ruma tungga sae 'ofa' laen. 37-38 Fai' naa, Yesus ndae langgan neu ainulu, de sunggu' nasambeta sia 'ofa' 'iko na. Nda doo' sa ma, sanggu anin losa boe. Ree ra po'a oe maso' nisi' 'ofa' rala, losa nae 'a sofe. De mana tungga na ra ramatau rala seli. De ara reu fafae E rae, “Papa! Fela dei! Ata tae' a molo ena! Te Papa nda fad'uli hai sa!”
39 Ana rena nala, ma fela de 'ai anin naa nae, “Muloe'!” Ana o parenda dano a nae, “Mumulino leo!” Anin naa naloe', ma dano a namalino neu' ena boe. 40 Basa ma Yesus natane mana tungga na ra nae, “Saa de basa nggi mimitau? Nda mimihere Au sa, do?”
41 Basa se ramatau ma titindindii, de 'ola' rae, “Ia, seka, e? Losa sanggu anin noo ree ra o rena E boe!”