Lamatua' Yesus tao nahai' sold'ad'u Roma ana mana tao ues na
7
Yesus nanori basa ma Ana lao bali' kota Kapernaum neu. 2 Sia naa hambu malangga sold'ad'u Roma esa. Ana na'ena ana mana tao ues esa, dad'i eni ana nemehere na. Ana mana tao ues naa, namahed'i nae 'a mate. 3 Lele' malangga rena so'al Yesus, boe ma ana haitua atahori lasi Yahud'i hira naa reu ro'e Yesus nema fo tao nahai' ana mana tao ues naa. 4 Ara kokoe Yesus, fo mete ma nau, na, Ana tungga noo se fo na'ahahai' atahori naa. Ara kokoe E rae, “Ama'! Atahori Roma ia, atahori malole'! Eni nandaa Ama' tulu-fali e. 5 Te huu ana naririi ume hule-o'e' sa fee hai, huu ana sue hai atahori Yahud'i ra.” 6 Boe ma Yesus tungga noo se.Ara nda fe'e losa ume sa, te malangga denu nonoon nendi hara' neu Yesus nae, “Papa 'afi' bengge-b'engge 'uma fai, huu au nda 'undandaa simbo Papa sia ume ngga sa. 7-8 Boe ma au nda 'undandaa 'uma 'undaa 'oo Papa sa. Mema' Papa na'ena koasa. Dad'i sad'i Papa 'ola' mia 'a naa o, ana mana tao ues ngga hai neu' ena. Au 'uhine dala' ia, huu au malangga ngga na'ena koasa fo parenda au. Ma au o 'u'ena koasa fo parenda sold'ad'u ngga ra. Mete ma au parenda ana mana tungga ngga 'ae, ‘Misi' naa!’ Ana neu. Mete ma au 'ae, ‘Ia 'uma!’ na, ana nema. Noo mete ma au parenda ana mana tao ues ngga 'ae, ‘Tao ues ia!’ ana tao ta'o naa. Dad'i sad'i Papa 'ola 'a, na, ana mana tao ues ngga ia, hai neu' ena.”
9 Rena ta'o naa ma Yesus heran. Ana heo' dean mbali atahori hetar mana tungga E. Boe ma Ana nae, “'Ola' nae! Doon basa ia ena, te Au nda fe'e 'undaa 'oo atahori Yahud'i esa boe, nemeheren 'ona' atahori Roma ia sa!”
10 Dad'i Yesus lao' losa 'a naa. Basa ma, malangga nonoo na ra lao bali'. Ara losa malangga umen, ma rita ana' naa hai ena.
Lamatua' Yesus tao nasod'a bali' ina falu esa anan
11 Mbila' neu, ma Yesus noo ana mana tungga na ra lao risi' kambo' sa, naran Nain. Atahori hetar lao' ra'ab'ue roo se. 12 Lele' ara rae deka roo lelesu maso' kambo' a, atahori nononggo' sa rae dea reu ra'oi mamates. Mana mate' naa, ina falu sa ana mone 'ise na. 13 Lele' Yesus nita ina falu naa, ma ralan tud'a kasian. Boe ma Ana 'ola' noo ina falu a nae, “Mama! Dai ena, sud'i nggae!”
14 Boe ma Yesus neu deka-d'eka, ma kois rad'at mamates naa. Boe ma atahori mana lemba rad'at a, hahae tahan. Boe ma Yesus 'ola' neu atahori mates a nae, “Ana mone', e! Fela leo!” 15 Boe ma, ana' a nasod'a bali', ma fela nggua-nggua neu' ena. Boe ma ana 'ola-'ola' noo basa atahori mana ririi ndule e. Basa ma Yesus nafad'e neu ina' naa nae, “Mama! Anam sie.”
16 Basa atahori mana sia naa ra, ramatau rae mate! Boe ma ara koa-kio Lamatualain rae, “Lamatualain denu mana 'ola-'olan manaseli' sa fee nema hita!” Hambu laen fai rae, “Lamatualain nema sia hita talad'an ena, de natud'u rala malolen ena!” 17 Boe ma dud'uit naa nened'ui-b'engga' sia bee-b'ee sia profinsi Yud'ea, losa nusa' laen boe.
Yohanis mana sarani' a haitua mana nendi hara' nisi' Lamatua' Yesus
18-20 Yohanis mana sarani' a ana mana tungga na ra rena basa saa fo Yesus tao' ra ena. Dad'i ara reu dui neu Yohanis sia bui rala. Boe ma ana denu atahori rua reu risi Yesus fo ratane E rae, “Ama' ia, teb'e-teb'e' Kristus, fo hai mihani' a, do? Do hai musi mihani atahori laen fai?”
De ara randaa roo Yesus, ma ratane ta'o naa.
21 Lele' mana nendi hara' ra fe'e mia naa, Yesus na'ahahai' atahori hetar mia hed'i-nggarau na ra mata'-mata'. Ma Ana 'oi nitu mia atahori nitu dai' ra. Ana o tao nahai' atahori poke' ra fo rita bali'.
22 Basa ma Yesus nafad'e Yohanis ana ded'enu na ra nae, “'Ama bali' mii mifad'e 'a'a Yohanis, basa-b'asa saa fo hei rena ma mita' a, 'ona' Lamatualain mana 'ola-'olan Yesaya sura' nae,
‘Atahori poke', nita bali'.
Atahori mamalu'u', fela lao-lao'.
Atahori hed'i kusta, dad'i mamalelenu'.
Atahori mbake', bisa rena.
Atahori mates, rasod'a bali'.
Atahori manatud'a-loloe', rena Hara-lii Malole'.’a
23 Bali' mii mifad'e 'a'a Yohanis mae, ‘Atahori nda mana mae simbo Au sa, dei fo ara 'onton teb'e.’”
24 Lele' Yohanis ana mana tungga na ra bali' boe, ma Yesus 'ola' noo atahori nae' naa ra so'al Yohanis nae, “Lele' hei mii sangga Yohanis sia mamana ma'afuni' naa, hei du'a mae hei mii mindaa moo atahori 'ona' beek? Hei nda du'a mae mii mindaa moo atahori mana male-ma'a' 'ona' hau 'oo neneuli-fae' tungga anin sa! 25 Hei nda du'a mae mii mindaa moo atahori mana pake bua-b'a'u mafelit sa, huu atahori mata' naa leo sia 'a ume mane'! 26 Dad'i hei mii mindaa moo see sia naa? Hei du'a mae mii mindaa moo Lamatualain mana 'ola-'olan, do? Teb'e! Te eni naa, mana 'ola-'ola manaseli' teb'e. 27 Huu nenesura' mema' sia Lamatualain Susura Meumaren so'al Yohanis dalan 'oi,
‘Rena! Au denu atahori ngga,
fo neu soi dala' fee nggo.’b
28 Sia raefafo' ia, nda hambu atahori esa saa boe, manaseli' lena' Yohanis. Te sia Lamatualain mamana parendan, atahori mana ma'ab'uit a o manaseli' lena' Yohanis.”
29 Atahori mana rena Yesus 'o'olan, rahine rae, Lamatualain dalan naa, dala masod'a ndoo-tetu'. Mana 'ed'a bea ra o rahine boe. Huu fe'esa'an Yohanis sarani se, ma nanori se ena. 30 Te atahori mia partei agama Farisi ma mana mahine hukun Yahud'i ra, nda nau tungga Lamatualain hihii-nanaun sa ena. Naa de, ara nda ro'e Yohanis sarani se sa.c
31 Boe ma Yesus natane nae, “Au 'ae 'u'usasama' atahori lele' ia ra roo saa e? Atahori mata' saa ra ia ra? 32 Ara 'ona' 'ana-'ana' mana 'endo-'endo' sia pasar. Ara soa randu ma unggu-remu rae,
‘Hai fuu suling rame-rame,
te hei nda lendo-foti ma'ahee sa.
Boe ma hai sod'a sosod'a be'e mamates,
te hei nda nggae sa.’
33 Huu Yohanis mana sarani' a nda ninu anggor, ma ana hii 'a puasa, na, hei mo'e e mae, ‘Nitu dai'!’ 34 Te ia naa Au, Atahori Matetu' a, 'inu anggor ma 'ua roti 'ona' biasa. Boe ma, hei mo'e Au mae, ‘Eni ia, mana bare-tasa'! Ma mana mafu' seli! Neu na'ab'ue noo mana 'ed'a bea ra! Eko-d'a'i noo atahori nda papake' ra sa. Ana nda ma had'at sa.’ 35 Te ama mete 'a, Au ded'ea ngga ia! Atahori mana bub'ulu' noo matetu', ara tungga Lamatualain hihii-nanau na.”
Lamatua' Yesus neu naa fefetas sia Simon umen
36 Sia kota naa, hambu atahori Farisi sa, naran Simon. Lao esa, ana no'e Yesus se reu raa sia ume na. Yesus se simbo rala hara' ma reu fo 'endo rae raa. 37 Lele' naa, ina manendit sa rena 'oi, Yesus naa sia naa. Ma ana rala neu, de to'u nendi mina ma'ameni mafelit boto sa. 38 Ana nema tungga dea' deka noo Yesus. De sende' lulu-langgan sia Yesus ei na. Ma ana nggae losa luun titi dai Yesus ei na. Ana seka Yesus ein nendi' langga fulun, ma 'id'u nasafafali Yesus ei na. Basa ma ana mbori mina ma'ameni' naa neu Yesus ei na.d
39 Simon, nahine ina' naa leleo-lalao na. Naa de ana du'a sia ralan nae, “Ia dad'i bukti Yesus ia, nda Lamatualain mana 'ola-'olan sa! Mete ma teb'e-teb'e Lamatualain mana haitua E, naa Yesus bub'ulu', ina' mana kois Eni a, ina manendit. Lamatualain mana 'ola-'ola na ra nda 'ona' E sa, huu atahori meumare' nda deka-d'eka roo atahori manggenggeo' ra sa!”
40 Te Yesus nahine Simon dud'u'a na. Boe ma Ana nae, “'A'a Simon! Ta'o ia, 'a'a. Au 'ae 'ufad'e nggo dala' sa.”
Boe ma Simon nataa nae, “Neu! Ama Meser, 'ola' leo.”
41 De Yesus fee nekendandaa' sa nae, “Atahori sa hii 'a fee atahori pindan doi na. Lao esa ana fee atahori rua pindan doi na. Ana fee esa doi fula' natun lima; ma esa ka 'aka' lima nulu' a. 42 Te losa fain, ru'a se nda fee rala bali' doi' naa ra sa. Boe ma atahori mana fee doi' naa, kasian ru'a se. Naa de ana mbo'i ru'a se mia huta na ra. Dad'i tungga 'a'a Simon dud'u'an, atahori karua' mana pindan doi' naa ra, bee ka sue lena' atahori mana hii 'a fee pindan doi' a?”
43 Simon nataa neu' ena nae, “Ne'o mana nahuta nae 'a!”
Yesus nataa nae, “Teb'e 'a'a!”
44 Boe ma Ana mete mbali ina' a, ma 'ola' neu Simon nae, “Sob'a 'a'a Simon mete ina' ia. Lele' Au 'uma 'isi' 'a'a umen rala, 'a'a nda ha'i hela oe fo safe ei ngga tungga hita 'ad'at na sa. Te ina' ia na'ad'oe ei ngga nendi' luu-oen, basa ma seka namad'a' nendi' langga fulu na. 45 Boe ma faa' ra, lele' soru Au 'isi' 'a'a Simon umem rala, 'a'a Simon nda 'id'u Au, tungga hita 'ad'at na sa. Te eni' a Au isi' ume ia rala, ina' ia nda naloe' 'id'u ei ngga sa. 46 'A'a Simon o lilii' 'ad'at fo mbori mina neu fui' ra langga na. Lele' Au rala 'uma faa' ra, ina' ia mbori mina ma'ameni mafelit neu ei ngga. 47 'A'a Simon rena malolole dei! Ina' ia salan mema' nae'. Te Lamatualain 'ose hendi basa sala na ra ena, huu ana natud'u susuen ma rala makasin nae-nae neu Au. Te atahori mana named'a aon nda mana tao sala' nae' sa, ana o named'a nae eni nda parluu hambu ambon nae' sa. Naa de ana nda nahine susue', ma nda namaho'o nahine no'e makasi mbali Lamatualain sa.”
48 Basa ma Yesus 'ola' neu ina' naa nae, “Au 'ose hendi sala ma ra ena!”
49 Atahori mana 'endo' raa ra'ab'ue, ara 'utu-'utu rae, “Awee! Ana du'a nae, Eni seka ia?! Nambarani fee ambon neu atahori salan, o! Tao-tao te 'aka' Lamatualain mesa' ne mana na'ena hak 'ose hendi atahori sala na ra! Cih!”
50 Te Yesus nafad'e neu ina' naa nae, “Huu mumuhere Au ena, naa de Lamatualain fee nggo masoi-masod'a' ena. Bali' leo moo sod'a-mole'!”