2-6 Sia naa, hambu tou' esa, nitu ra tao e losa namulu. Ana leo sia rates. Hatu'-rerelon ana koo-koo ndule mbuku' mana sia naa ra noo ma'aholan, ma nggasi nakandoo 'a. Ana tutu nab'isu' aon nendi' fatu. Te ma'ad'eren seli. Nda hambu atahori bisa pa'a rala e sa, mae rendi' rante besi. Atahori ra pa'a rasafafali ei-lima na ra rendi' rante besi, te na'etu' rante naa, ma natiku' besi mana sia ein boe. Ma'ad'eren seli, de nda hambu atahori esa sa boe bisa baa rala e sa.

Lele' Yesus se 'onda mia 'ofa' a boe, atahori mulu' naa nita se mia doo-d'oo' ena. Ana kalua mia rates, nela nisi' Yesus, de sende' lulu-langgan neu Yesus mata na. 7-8 Yesus nita atahori naa matan 'ona' naa boe, ma Ana 'ola' nae “Woi! Nitu de'ulaka'! Lao hela atahori ia leo!”

Basa ma, atahori naa nggasi nahere' nae, “Heh! Ho mae tao saa mbali au! Au bub'ulu' Ho ia, Yesus, Lamatualain fo mana koasa Ana na. Au 'o'e fo 'afi' tao doid'oso au!”

9 Boe ma Yesus natane e nae, “Ho naram, seka?”

Atahori naa nataa nae, “Au nara ngga Legion, huu hai nitu hetar seli, 'ona' batalion hetar!”

10 Basa ma, nitu ra pake atahori naa fo no'e Yesus 'afi' denu sira lao hela nusa' naa.

11 Deka naa, hambu atahori hira ranea fafi lalaet esa. Mbei ma fafi rifon rua. Ara soso'a sia mbuku' a suu na. 12 Boe ma nitu ra ro'e Yesus rae, “Fee hai maso' misi' fafi naa ra rala.”

13 Ma Yesus nau boe. De nitu naa ra, rela hela atahori naa, de risi' fafi ra. Boe ma fafi rifon karua' naa ra, rela leli mia mbuku suun, de tee dano rala reu. De basa se tena, ma mate sia naa.

14 Atahori mana ranea fafi ra rita ta'o naa ma, ramatau rala seli. Boe ma rela' reu rafad'e basa atahori ndule kambo' mana sia naa ra. Atahori hetar rema rae rita saa mana dad'i' naa. 15 Ara rema randaa roo Yesus, ma rita atahori nitu tao' a 'endo' sia naa. Dud'u'an meu bali' ma ana pake bua-b'a'us ena. Atahori naa ra rita ta'o naa ma, basa se ramatau, huu rahine rae see mana bisa 'oi hendi nitu ra mia atahori naa, na, mema' manaseli' teb'e. 16 Basa ma, basa se 'ola-'ola' rae, sira rita noo mata na ra atahori mulu' naa hai ena ma fafi naa ra tena de mate hendi' se. 17 Boe ma atahori kambo' naa ra rema ro'e fo Yesus lao hela sira mamana na.

18 Lele' Yesus nae hene nisi' 'ofa' ata neu, ma atahori fo nitu tao' naa nema no'e mbali E nae, “Papa, e! Fee au tungga boe.”

19 Te Yesus nda nau sa. Ana 'ola' nae, “Malole lena' ho bali' fo mufad'e basa bob'onggi ma ra saa fo Lamatualain tao fee nggo ena. Ma mufad'e mae Lamatualain o sue nggo boe.”

20 Basa ma, atahori naa bali' de neu lao ndule nusa' esa noo kambo' sanahulu fo ara biasa ro'e, rae ‘Dekapolis’. Ana dui saa fo Yesus tao fee eni ena. Basa atahori mana rena dud'uin, ara titindindii de rae, “Mema' teb'e!”

21 Basa ma, Yesus se sae 'ofa' de bali' risi' dano a seri'. Lele' ara 'onda mia 'ofa', ma atahori hetar rema heo rala E.

22 Sia naa o hambu atahori esa, naran Yairus. Eni malangga ume hule-o'e sia kambo' naa. Ana nita Yesus, ma sende' lulu-langgan neu matan, 23 de kokoe nae, “Papa! Ana feto ngga fe'e too sanahulu rua, mera nae 'a mate. Papa tulun 'uma mu'uhahai' e dei.”^a

24 Boe ma Yesus tungga Yairus, de nisi' ume na.

Te lele' ara lao ma, atahori hetar tungga E, losa ara seti E dii-'ona'.

25 Sia atahori ra talad'a na ra, hambu ina' esa namahed'i mbo'a raa' nda naloe' matetu' sa losa too sanahulu rua ena. 26 Ana nabasa' doin noo hata-heton fo bae neu dokter ra. Te nda hambu esa o na'ahahai' nala e sa boe. Hed'in foe nakandoo 'a. 27-29 Ina' naa rena dud'uit nae' so'al Yesus ena. De ana sususi sia atahori ra talad'a na ra, fo nae deka-d'eka Yesus dea na. Ana du'a nae, “Sad'i au kois bad'un, na, au hai!”

Lele' ana kois Yesus bad'un, 'aib'oi' ma, hed'in naloe' neu' ena. Ana med'a, eni hai teb'e ena.

30 Nandaa noo lele' naa, Yesus med'a koasa kalua mia ao na. Ana heo' mbali dea' de mete atahori naa ra. Basa ma Ana natane nae, “Seka kois Au bad'u ngga?”

31 Mana tungga na ra rataa rae, “Papa mete neu' ena. Atahori hetar rakaseseti basa ia naa. Papa fe'e mutane mae, seka kois bad'u ma?”

32 Te Yesus 'aka' mete rereo', fo nae sangga tiro, seka kois Eni. 33 Ina' naa rena Yesus natane ta'o naa ma, ana namatau nala seli. Boe ma ana sende' lulu-langgan neu Yesus matan, de nataa nae, “Papa! Au mana kois Papa bad'u na.”

34 Boe ma Yesus nae, “Huu mama mumuhere teb'e-teb'e' Au, naa de mama hai ena. Ia naa, mama bali' ume mu moo nemeho'ot ena, huu sususam basa ena.”

35 Yesus fe'e 'ola-'ola' ta'o naa, ma atahori esa nema mia Yairus umen, de nafad'e nae, “Awee! Ana feto' a mate ena. De sud'i boe ne'eb'eb'engge' Papa Meser fai. Sud'i boe neu fai.”

36 Te Yesus nda taoafi' neu atahori naa 'o'olan sa. De nafad'e Yairus nae, “'Afi' mumutau! Mumuhere neu 'a Lamatualain.” 37 Boe ma Yesus lao hela mana tungga laen na ra. Te Ana noo Petrus, Yakob'is noo 'od'in Yohanis, de ara lao rakandoo. 38 Losa Yairus umen, ma ara rita atahori hetar lao' reu-rema ma rena se nggae ei-ei. 39 Yesus maso' rala neu, de natane mbali se nae, “Saa de ama nggae ta'o ia? Ana' ia nda mate sa. Ana sunggu' a.”

40 Ara rena Yesus 'ola' na'o naa, ma basa se mali ra'a'e'ei' E.

Te Ana denu basa se dea reu. Ana no'e nala ana' naa papa noo maman, ma mana tungga na ra atahori telu, de ara risi' ana' a kaman rala. 41 Boe ma Yesus to'u nala ana' a liman, de 'ola' nendi' sira ded'ea Aram na nae, “Talita kum!” (Sosoan nae, “Ana feto'! Fela leo!”)

42-43 'Aib'oi' ma, ana feto' naa fela de mulai lao'. Boe ma Yesus denu maman nae, “Fee ana' ia naa leo!”

Basa atahori mana rita saa mana d'ad'i' naa, ara titindindii. Te Yesus 'ira se nae, “'Afi' mifad'e esa boe mae Au tao 'usod'a bali' e!”