Lamatua' Yesus fee nekendandaa' so'al atahori mana sela fini sia rae mata'-mata'
13
Fai' naa boe Yesus kalua mia ume naa, de neu 'endo' sia dano Galilea suu na. 2 Boe ma atahori hetar reu heo rala E. Ma Ana hene neu 'endo' sia 'ofa' sa ata mananafu' sia naa, de nanori se. Basa atahori mana sia mad'a' ata rena E.a 3 Ana nanori se nae' nendi' nekendandaa' hetar. Ana dui nae, “Hambu atahori mana ue-rae esa neu sia osin, de nggari fini. 4 Lele' ana nggari fini ra, ma hambu ruma tud'a sia dala'. Boe ma mbui' ra rema de bito rendi basa fini ra.5 Te fini ruma tud'a sia rae fatu-fatu'. Fini a nanumbu losa', huu rae isi' mbei 'a. 6 Te reo-rendu ma, numbu' ra male de meto hendi se. Huu 'oka na ra nda maso' losa rae rala sa.
7 Hambu fini ruma fai tud'a sia uru manggou'. Boe ma uru manggou' a hapi nisa numbu' naa ra.
8 Te hambu fini ruma tud'a sia rae isi'. Fini naa ra ranumbu, ma ra'amoko losa rab'oa. Ruma fee bali' buna-b'oa na ra ded'esin lao telu nulu, ruma losa nee nulu, ma ruma losa natun esa.
9 Seka mandiki', na, rena malolole, o!”
Lamatua' Yesus nafad'e nae saa de Eni hii 'a nanori nendi' nekendandaa'
10 Basa ma Yesus ana mana tungga na ra rema de ratane E rae, “Ta'o bee de Pak nanori atahori hetar naa ra mendi' nekandandaa'?”
11 Boe ma Yesus nataa nae, “Huu Lamatualain nau fee nggi mihine parendan, naa de Au 'ufad'e mema' nekendandaa' ia sosoa na. Te mete ma atahori laen, na, Au 'unori 'endi 'a nekendandaa'. 12 Huu atahori mana nau nahine Lamatualain hihii-nanaun teb'e-tebe', dei fo Lamatualain fee ne bau nahine. Te atahori nda mana nau taoafi' neu Lamatualain hihii-nanaun sa, dei fo Lamatualain fee ne lilii' hendi saa fo ana nahine' a.b 13 Au 'unori se 'endi 'a nekendandaa', huu:
‘Ara rita ena,
te nda nau rahine sa.
Ara rena ena,
te nda nau taoafi' sa.’
14 Ara 'ona' atahori fo Lamatualain mana 'ola-'olan Yesaya sura' nae,
‘Dei fo ama rena,
te ama nda nau mihine sai-sai sa.
Dei fo ama mita,
te ama nda nau bub'ulu' saa fo manad'ad'i' naa sa.
15 Huu atahori ia ra rala na ra manggatee',
ara ra'ambambake' ndiki na ra,
ma ara ra'apopoke' mata na ra.
Dad'i hela neu fo ndiki na ra mbake ta'o 'a naa leo,
ma hela neu fo, mata na ra poke ta'o 'a naa leo.
Hela neu fo Au sud'i boe tao malole se,
huu ara nda nau taoafi' neu Au sa.’c
16 Te hei ia ra, 'onton, o! Huu ama mita noo mata ma ra ena, ma ama rena noo ndiki ma ra ena. 17 Mimihere Au! Fe'esa'an Lamatualain mana 'ola-'olan noo atahori rala ndoos ra nau rae rita saa fo hei mita' ia, te ara nda rita sa. Ara o nau rena saa fo ama rena' a, te ara nda rena sa.”d
Lamatua' Yesus nafad'e nekendandaa' so'al fini a sosoan
18 Lele' Yesus 'ola' basa ma, Ana nafad'e se nae, “Dad'i ia naa ama rena nekendandaa' ia sosoa na ena. 19 Fini mana tud'a sia dala' a, naeni atahori mana rena Ded'ea-'o'ola' so'al Lamatualain to'u parenda', te ana nda nahine noo matetu' sa. Basa ma nitu ra malanggan nema rambas nendi Ded'ea-'o'ola' naa mia atahori naa rala na.
20 Fini mana tud'a sia rae fatu-fatu' a, naeni atahori mana rena Lamatualain Ded'ea-'o'olan, ma ana simbo noo rala nemeho'ot. 21 Te Ded'ea-'o'ola' naa ra nda ra'oka sa. Naa de nda nenembed'a' doo' sia atahori naa ralan sa. De lele' atahori laen tao ra'asususa' e huu simbo Ded'ea-'o'ola' naa ra, ma ana nggari hendi se neu' ena.
22 Ma fini mana tud'a sia uru manggou' a talad'an, 'ona' atahori mana rena Ded'ea-'o'ola' naa. Te ana seb'o-mue noo 'a ue-tataos mata'-mata' fo nasod'a noo 'a lole-lad'a' ra. De basa ue-tataos naa ra, seti hendi Ded'ea-'o'ola' naa mia ralan, de nda na'ena ngguna saa sa ena boe.
23 Te fini mana tud'a sia rae isi' a, 'ona' atahori mana pasa ndikin fo simbo Ded'ea-'o'ola' naa, ma tungga Lamatualain hihii-nanau na. Boe ma ana tao 'a dala-d'ala malole', 'ona' fini mana mab'oa' a. Hambu ruma rab'oa ded'esin lao telu nulu, ma ruma lao nee nulu, ma ruma lao natun esa.”
Lamatua' Yesus fee nekendandaa' uru sia osi talad'an
24 Yesus nafad'e selu' nekendandaa' esa fai nae, “Lamatualain to'u parenda' naa, 'ona' atahori esa nggari fini malole' sia osi na. 25 Temba' neu ma, basa atahori mana sunggu' masambeta' ra. Boe ma atahori de'ulaka nema, de nggari uru fui deke' ra risi' osi a. 26 Lele' osi a nab'una-nab'oa, ma atahori mana tao ues na ra rita uru fui a mori bela' noo are-gandum sia naa. 27 Boe ma reu rafad'e tenu osi' a rae, ‘Papa! Fai' naa hita sela fini malole' sia papa osin, to? Ta'o bee de uru a nae' boe?’
28 Malangga a nataa nae, ‘Naa, atahori de'ulaka' ue-tatao na.’
Boe ma mana tao ues na ra 'ola' rae, ‘Papa, hai mii miue hendi uru a, do?’
29 Te nataa nae, ‘'Afi'! Lele' hei miue uru a, ne'o hita sela-nggari malole na ra nenelea hendi' boe. 30 Hela se mori bela' losa fula-fai 'e'etu-'o'oru' a losa. Lele' naa, dei fo au 'ufad'e atahori mana tao ues ra 'ae, “Ama mi'id'uru mi'ihulu' uru fui ra dei. Ma futu se mbumbutu-mbumbutu', fo ded'ee hendi se. Basa naa mid'ud'uru buna-b'oa malole' ra, fo mbed'a' nisi' soka-pole' rala.’””
Lamatua' Yesus fee nekendandaa' so'al deke anad'iki'
31 Basa ma, Yesus 'ola' fai nae, “Au fee selu' nekendandaa' esa fai, fo ama bisa mihine ta'o bee fo Lamatualain dad'i Mane' soa' neu atahori hetar. Fefeun atahori na ra 'ona' deke anad'iki' sa fo atahori sela sia osin rala. 32 Mae deke' naa, anad'iki' seli, te mete ma mori nema, na, dad'i hau huu ine monae' sia osi. Sambe mbui' ra rema randuna sia dana na ra.”
Lamatua' Yesus fee nekendandaa' so'al bib'it roti
33 Yesus fee selu' nekendandaa' esa fai nae, “Lamatualain atahorin, 'ona' bib'it roti fo ina' sa ha'i fo sambor noo tarigu sak esa.e Boe ma roti a reis losa na'amoko, huu bib'it roti mbei anak naa.”
Lamatua' Yesus pake nekendandaa' fo nanori dala-d'ala feu'
34 Yesus nanori atahori hetar nendi' dud'uit mata' hetar. Ana 'ola' nendi 'a nekendandaa'. 35 Ana nanori ta'o naa tungga saa fo Lamatualain mana 'ola-'olan sura' mema' ena nae,
“Dei fo Au 'unori 'endi' nekendandaa'.
Dei fo Au 'ufad'e dala-d'ala' fo atahori nda fe'e rena rita sa,
eni' a mia Lamatualain tao raefafo' ia losa ia nema.”f
Lamatua' Yesus nafad'e nekendandaa' so'al uru mana mori ao' sia osi a talad'an sosoa-ndandaan
36 Basa ma, Yesus lao hela atahori hetar naa ra, de bali' ume neu. Boe ma ana mana tungga na ra rema, de ro'e tulun mia E rae, “Ama'! Tulun mufad'e hai nekendandaa' so'al uru mana mori ao' a sosoan dei!”
37 Boe ma Yesus nataa nae, “Atahori mana nggari fini malole' naa, naeni Au, Atahori Matetu' ia. 38 Ma osi naa, naeni raefafo' ia. Fini malole' naa, naeni atahori mana dad'i Lamatualain bob'onggin ena. Noo uru mana mori ao' naa, naeni nitu ra malanggan atahori na ra. 39 Boe ma, atahori de'ulaka' mana nema nggari fini uru naa, naeni nitu ra malanggan. Ma fai 'etu-'oru' naa, naeni fai matete'e na. Atahori mana 'etu-'oru buna-b'oa' naa, naeni Lamatualain ate na ra mia sorga. 40 Lele' fai matete'en, ara rad'uru rala uru ra fo hotu hendi se. 41 Huu Au, Atahori Matetu' ia, dei fo haitua ate mana sia sorga rema. Dei fo ara reu rad'uru basa atahori nda mana tungga Lamatualain parendan sa. Ma ara reu rad'uru rala basa atahori mana neu kokoe-nanasi atahori laen ra, fo ara nda tungga Lamatualain parendan sa. 42 Dei fo ara mbia hendi basa atahori de'ulaka' ra risi' ai naraka rala reu, 'ona' uru nenehotu hendi' naa. Sia naa, dei fo ara fe'e na ramed'a doid'oso' rita' mamate na ra, ma nggae ei-ei nda raloe' sa. 43 Te atahori mana nasod'a noo ndoos tungga Lamatualain hihii-nanaun, dei fo ara leo rakandoo roo Ama Mane' sia sorga. Sia naa, ara raronda 'ona' relo a. Naa! Atahori mana nau nahine Au, pasa ndikim malolole, o!”
Lamatua' Yesus fee nekendandaa' so'al sud'i 'a saa mafelit
44 Yesus fee selu' nekendandaa' esa fai nae, “Atahori mana nau nahine so'al Lamatualain to'u parendan, 'ona' atahori mana nau hambu sud'i 'a saa mafelit, fo atahori funi sia rae rala. Atahori naa nema 'ali, ma ana hambu sud'i 'a saa naa ra sia naa, naa de namaho'o nala seli. Basa ma, ana nasambombori bali' sud'i 'a saa naa. Boe ma ana bali' lai-lai, de neu seo hendi basa hata-heto na. De ana neu hasa nala rae naa, fo eni bisa hambu sud'i 'a saa mafelit naa.”
Lamatua' Yesus fee nekendandaa' esa so'al mutiara mafelit
45 Yesus fee selu' nekendandaa' fai nae, “Atahori mana nae nahine Lamatualain to'u parendan naa, 'ona' atahori mana danggan esa nau hambu mutiara mafeli' talalu. De ana sangga-sangga' mutiara fo nae hasa. 46 Lele' ana hambu mutiara sa meulaun seli, ma ana bali' neu' ena, de neu seo hendi basa hata-heto na. Basa ma ana neu hasa mutiara naa, fo eni bisa hambu e.”
Lamatua' Yesus fee nekendandaa' esa so'al neisi pu'at
47 Yesus fee selu' nekendandaa' nae, “Lamatualain to'u parendan, 'ona' mana pu'a ra reu mbo'i pu'at esa sia dano. Boe ma pu'at naa hambu 'u'u mata'-mata'. 48 Lele' pu'at naa sofe' noo 'u'u, ma mana pu'a ra reu ha'i rala se, fo rendi dano suun neu. Boe ma ara 'endo' de raisi 'u'u mia pu'at. 'U'u malole' ra, ara tao nisi' rela rala neu. Te 'u'u nda malole' sa na, ara nggari hendi se.
49 'Ona' naa boe, neu fai matete'e na. Dei fo Lamatualain ate na ra rema mia sorga, fo bingga-b'anggi atahori de'ulaka' mia atahori rala ndoos ra. 50 Dei fo ara nggari basa atahori de'ulaka ra ai naraka rala reu. Sia naa, ara ramed'a doid'oso' manaseli', ma nggae ei-ei nda raloe' sa.”
Lamatua' Yesus nanori so'al nenori mbaraa' noo nenori feu'
51 Yesus 'ola' basa na'o naa, ma Ana natane se nae, “Hei mihine basa saa fo Au 'ola' faa' ia ra, do?”
Ara rataa rae, “Mihine, Papa!”
52 Boe ma Yesus nataa bali' se nae, “Malole! Huu meser agama esa-esa' mana nanori teb'e-teb'e' Lamatualain Ded'ea-'o'olan fo mana sura' eni' mia dalahulun, ma to'u nahere' Au nenori ngga 'oras ia, na, ana 'ona' tenu ume' sa soa 'a soi nggud'an, fo natud'u hata-heto mbaraan, na'ab'ue noo hata-heto feu na.”
Atahori Nasaret ra nda simbo Lamatua' Yesus sa
53 Lele' Yesus nanori basa atahori nendi' nekendandaa' ma, Ana lao hela mamana' naa, 54 de lao nisi' kambo na. Sia naa, Ana ume hule-o'e' rala neu de nanori atahori ra. Basa atahori mana rena E, heran-heran. Ara 'ola-'ola' rae, “Awii! Atahori ia mahinen dei! Ana neu nanori mia bee ia? Ta'o bee de Ana tao nala' manad'ad'i manaseli' naa ra? 55 Tao-tao te Eni tukan hau a Ana na. Hita tahine malole inan Maria; ma 'od'i na ra, naeni Yakob'is, Yusuf, Yud'as noo Simon. 56 Hita o tahine feto na ra boe, huu basa nggita leo sia kambo' esa na! Dad'i Ana hambu mahine' naa, mia bee nema fai? Boe ma Ana hambu koasa manaseli' naa, mia seka fai?” 57 Naa de ara ramanasa losa nda nau rae rena E sa ena.
Te Yesus nafad'e nae, “Mema' teb'e! Sia mamana' laen, atahori ra hii 'a fee had'a-hormat neu Lamatualain mana 'ola-'ola na ra. Te sia kambon ma ume isi na ra, na, atahori ra nda nau fee had'a-hormat neu e sa.”g 58 Huu rala na ra manggatee' de ara nda nau ramahere Yesus sa, naa de Ana nda tao manad'ad'i manaseli' hetar sia naa sa.